«ՉԻ» տեղեկություններով, ՀՀ նախկին վարչապետ Հրանտ Բագրատյանի էլեկտրոնային հասցեն ջարդելն ու նրա անունից կեղծ` 4-րդ նամակն ուղարկելը Սերժ Սարգսյանին, ուղղորդված է եղել ՀՀ ներկա վարչապետ Տիգրան Սարգսյանի շրջապատից: Շրջանառվող խոսակցությունների համաձայն` հանցագործներն ամեն ինչ հաշվարկել են` նախ, որ Բագրատյանը հանրապետությունում չէ, և հենց այդ պատճառով դժվար թե ցանկություն ունենա պատասխանելու լրագրողների զանգերին: Երկրորդ` նամակի ոճը հնարավորինս նմանեցված է եղել Բագրատյանի ոճին: Չարագործների հաշվարկով` ահագին կլինի արձագանքը, եթե հրապարակումը թեկուզ մեկ ժամ աշխատի: Նրանց նպատակն է եղել նամակի հրապարակումից կարճ ժամանակ անց այն տարածել ֆեյսբուք սոցիալական ցանցում, և մինչև Բագրատյանը գլխի կընկնի, որ պետր է հերքել, շատերն արդեն կարդացած կլինեն կեղծ նամակը:
Ի դեպ` ծրագիրը տապալվել է, որովհետև լրատվություն թողարկող կայքերից մեկը նախ տեսել է, որ նամակը լատինատառ վերնագիր ունի, մինչդեռ Բագրատյանը երբեք չի վերնագրում իր նամակները: Երկրորդ տեքստում հայտնվել են ինչ-որ անհասկանալի կոդեր, որոնց առկայությունն արդեն հիմնավորել է կասկածները: Ֆեյսբուքում շատ ավելի արագ է տարածվել ինֆորմացիան, որ դա Բագրատյանի նամակը չէ, քան հանցագործները կհասցնեին դա տարածել: Մի խոսքով, վարչապետի շրջապատում այդպիսի «ծրագրեր» իրականացնողները հիմա խոր դեպրեսիայի մեջ են, որովհետև նկատողության են ստացել Բագրատյանին սևացնելու գործը տապալելու համար:

Ոստիկանության Արաբկիրի քննչական բաժնում՝ իտալացիներից առգրավված մոտ 10 հազար դոլարի անհետացման վերաբերյալ հրապարակումից հետո ոստիկանապետ Վ. Գասպարյանի հանձնարարությամբ ներքին անվտանգության վարչությունում սկսվել է ծառայողական քննություն:

Փողի անհետացման մասին իմացել են իրավապահ մարմինների բազմաթիվ ներկայացուցիչներ` hանրապետության ոստիկանության պետի տեղակալ, քննչական գլխավոր վարչության պետ Գագիկ Համբարձումյանը, Արաբկիրի ոստիկանության պետ Արթուր Մեհրաբյանը, Արաբկիրի ոստիկանության քննչական բաժնի պետ Արծրուն Առաքելյանը, գործը քննող երեք քննիչները, վերահսկող դատախազը եւ Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի դատավոր Արմեն Խաչատրյանը:

Ոստիկանության «Հետքի» աղբյուրի փոխանցմամբ, բացի ոստիկանության ներքին անվտանգության վարչությունից` հրապարակումից հետո այս հարցով զբաղվել է նաեւ քննչական գլխավոր վարչության պետ Գագիկ Համբարձումյանը: Հենց նա է խնդրել ոստիկանապետին, որպեսզի ինքը զբաղվի իր ենթակայության տակ գտնվող կառույցով:

Գործը քննող քննիչները քննչական բաժնի պետ Արծրուն Առաքելյանի ներկայությամբ բացատրագրեր են գրել, որտեղ, բնականաբար, ժխտել են փողի անհետացման փաստը: Թե ինչ կարգավիճակով են նրանք գրել այդ բացատրագրերը, հայտնի չէ: Գագիկ Համբարձումյանը ոստիկանապետին զեկուցել է, որ Արաբկիրի քննչականում նման դեպք չի եղել: Նշենք, որ Արծրուն Առաքելյանը Գագիկ Համբարձումյանի սանիկն է: Իսկ վերջինիս որդին Արծրուն Առաքելյանի տեղակալն է:

Ոստիկանապետ Վլադիմիր Գասպարյանին, սակայն, արդեն հայտնի է դարձել, որ քննչականից իսկապես անհետացել է իտալացուց առգրավված գումարը: Նա հրահանգել է շարունակել ծառայողական քննությունը: Իսկ «Հետքը» սպասում է եւ առայժմ ձեռնպահ մնում իր մոտ եղած նյութերը հրապարակել:

Դժվար է ասել՝ ՀՔԾ-ն քրեական գործ կհարուցի՞, թե՞ ոչ, որովհետեւ հանցագործությունը պարտակողը, ըստ երեւույթին, վերը նշած պաշտոնյաներն են: Եվ եթե քրեական գործ հարուցվի, ապա պետք է ի սկզբանե պարզ լինի, թե ում են պատժելու: Հավանաբար, քավության նոխազը դեռ չի գտնվել, եւ հենց սա է հիմնական պատճառը, որ առայսօր քրեական գործ չի հարուցվել:

Էդիկ Բաղդասարյան

Գեղարքունիքի մարզի Վերին Շորժա և Ներքին Շորժա գյուղերի բնակչությունը դուրս է մնացել նախընտրական գործընթացից: Մեր ունեցած հավաստի տեղեկություններով, այստեղ, ոչ նախընտրական շտաբեր են բացվել, ոչ  ընտրացուցակներ կան, ոչ էլ գյուղացիներն իրենց մասնակից ու ընտրող են զգում: Մարզում  կատարվող նախընտրական անցուդարձը կարծես չի էլ վերաբերվում երկու Շորժաների բնակիչներին:

Շատ հետաքրքիր է, թե՝ արդյո՞ք նման իրավիճակը ստեղծվել է միտումնավոր,  կամ ի՞նչ է մտածում ԲՀԿ- ական մարզպետ Նվեր Պողոսյանը, երբ իր ղեկավարմանը հանձնված մարզում երկու գյուղ հայտնվում է նման իրավիճակում՝  մարզպետի գործունեության, թե՞ անգործության արդյունքում՝ «եզրագծից այն կողմ»:

Այս տարի միայն հունվար — փետրվար ամիսներին արձանագրվել է, ՄԻԱՎ-ի 23 դեպք, նախորդ տարվա նույն  ժամանակահատվածի համեմատ՝ 8 դեպք: Ասել է թե` 3 անգամ ավելի: Գրանցվել է `ՁԻԱՀ-ի նախորդ տարի 4 դեպք, այս տարի նույն ժամանակահատվածում՝ 9: Եւ սա դեռ Ազգային վիճակագրական ծառայության հրապարակած տվյալների համաձայն:

2011 թվականի առաջին 2 ամիսների ընթացքում հոնորեայի ոչ մի դեպք չի գրանցվել, իսկ այս տարվա հունվար — փետրվարին արձանագրվել է 3 դեպք:  23 դեպքով ավելացել են սուր աղիքային ինֆեկցիաները: Նախորդ տարվա առաջին երկու ամսում քոսի 26 դեպքի դիմաց, այս տարի գրանցվել է 30-ը:

Եվ  այդքան մինուսի մեջ 1 պլյուս` մոտ կրկնակի նվազել է վիրուսային հեպատիտների թիվը 43-ից դարձել է 25: Հեպատիտ Ա-ի 16 դեպք է արձանագրվել՝ նախորդ տարվա 31-ի համեմատ:

ԱՄՆ դեսպան Ջոն Հեֆերնն այսօր Հայաստան-ԱՄՆ դիվանագիտական հարաբերությունների քսանամյակի առիթով հնչեցրած ելույթում անդրադարձավ նաև առաջիակա ԱԺ ընտրություններին: «Այո, քաղաքական կամքը կարևոր է, սակայն չես կարող քաղաքական կառույցներ ձևավորել այն ենթադրությամբ, որ իշխանության գլուխ կանգնածները կանեն այն, ինչ ճիշտ է»,-նշեց դեսպանը և ավելացրեց, որ հասկանում է, որ ընտրությունների նկատմամբ լուրջ թերահավատություն է տիրում:

«Վերջերս Ազգային դեմոկրատական ինստիտուտի կողմից Հայաստանի 1500 քաղաքացիների շրջանում անցկացված հարցման ժամանակ հարցվողների միայն 12%-ն է նշել, որ ակնկալում են ազատ և արդարացի ընտրություններ: Հիմա պետք չէ նշել, որ մենք այսօր փորձենք պարզել, թե այդպիսի կասկածներն ինչով են հիմնավորված, սակայն ես ուզում եմ հարցնել, թե այդպիսի կասկածներ ունեցող մարդիկ ինչպես են արձագանքելու: Արդյո՞ք նրանք ամեն ինչ թողնելու են իշխանությունների տնօրինմանը, թե՞ ավելի վատ՝ նրանք ուղղակի բաց են թողնելու փոփոխության հնարավորությունը»,-ասաց նա:

Նա նույնիսկ նշեց ոմանց կողմից կանխավ արված հայտարարությունը, թե մայիսի կայանալիք ընտրությունները կեղծվելու են, և այժմվանից արդեն կոչ են անում դուրս գալ բողոքի ցույցերի քվերակության հաջորդ օրը:

Դրա փոխարեն, Ջոն Հեֆերնի համոզմամբ՝ մարդիկ պետք է կատարեն աշխատանքի իրենց մասը, ստեղծեն ինստիտուցիոնալ ցանցեր և դաշինքներ՝ իրենց ձայնը լսելի դարձնելու համար, մշակեն և գործարկեն կեղծիքները կանխելուն մեխանիզմներ:
«Այսպիսի կառույցների ձևավորումը եռանդագին աշխատանք է պահանջում: Մենք ջերմորեն ողջունում ենք Հայաստանի խիզախ և նվիրյալ քաղաքացիներին՝ իշխանությունների կազմում և իշխանությունների կազմից դուրս, ովքեր եռանդագին աշխատում են կառուցելու»,– ասաց ԱՄՆ դեսպանը։

tert.am

Ապրիլի 3-ից մինչ ընտրությունների ավարտը ՀՀ տնտեսական մրցակցության պաշտպանության պետական հանձնաժողովի նախագահ Արտակ Շաբոյանը արձակուրդում կլինի: Քանի որ Շաբոյանը հանրապետական կուսակցության անդամ է և ՀՀԿ համամասնական ցուցակում գտնվում է 79-րդ տեղում, ի կատարումն Վարչապետի հրահանգի նա  կուսակցական — նախընտրական աշխատանքներով զբաղվելու համար արձակուրդ կգնա:

Իսկ այդ ընթացքում նրա ղեկավարած Հանձնաժողովը կշարունակի զբաղվել իր բնականոն, պետականաշինիչ  գործունեությամբ:

ԲՀԿ Շիրակի մարզային կառույցի գրասենյակը, ըստ Aravot.am-ի  ահազանգել է իրենց, առ այն, որ ոստիկանները եկել են խուզարկելու ԱԺ պատգամավոր Մարտուն Գրիգորյանին պատկանող Լալայան 2 գ հասցեում գտնվող սեփական տունը: «Մինչ մենք կհասնեինք այնտեղ` ճշտելու, թե որն է խուզարկման պատճառը, ոստիկանները արդեն հեռացել էին: Պատգամավորի խորհրդական Աղասի Աբրահամյանը մեր զրույցում ասաց, որ նրանք ցանկացել են խուզարկություն անցկացնել  իրենց բացարձակապես անհայտ դեպքերի ու ծեծռկուտքի հետ կապված», — գրում է կայքը:

Որի տեղեկություններով, ոստիկանները ներկայացել են դատարանի որոշմամբ, որտեղ որպես ծեծկռտուքի մասնակից նշված է եղել նաև պատգամավորի հոր` Կամո Գրիգորյանի անունը, սակայն պարզելով, որ տունը պատգամավորի անունով է, նրանք թողել և հեռացել են: «Պարոն Աբրահամյանից հետաքրքրվեց, թե ի ՞ նչ ծեծռտուքի մասին է խոսքը, և պատգամավորի հայրը որքանո ՞վ մասնակցություն ունի Գյումրիում նախորդ օրը երկու մականունավոր երիտասարդների`«Շեկոյի» և «Տանկի» միջև տեղի ունեցած ռազբորկային:  Հարցին ի պատասխան Աղասի Աբրահամյանն ասել է. « Ինչպե ՞ս կարող է  պատգամավորի հայրը  մասնակցություն ունենալ նման դեպքի, նա ֆիզիկապես անգամ չէր կարող կապ ունենալ, դուք ձեր աչքով տեսաք, որ երեկ պարոն Ծառուկյանը Գյումրի էր եկել Մարտուն Գրիգորյանի հորեղբոր հիշատակին նվիրված ըմբշամարտի հուշամրցույթին մասնակցելու, երբ մարդու եղբոր հիշատակն են հարգում, նա որտե՞ղ կարող էր լինել, դուք ո՞նց եք պատկերացնում»:

Մեր այն հարցին ի պատասխան էլ , թե Գյումրիում տարածված խոսակցությունների համաձայն «Շեկոն» ԲՀԿ-ական է, որը ռազբորկա է սարքել ՀՀԿ-ի համար թիվ 34 ընտրատարածքում ձայներ հավաքող  «Տանկի» հետ  պարոն Աբրահամյանը պարզաբանեց. «Մենք մեր կուսակիցներին լավ ենք ճանաչում, ի՞նչ կապ ունի Շեկոն ԲՀԿ-ի հետ, ես միայն մի բան կարող են վստահորեն ասել` այս խուզարկության փորձը միանշանակ  կապված է ընտրությունների հետ» գրում է կայքը, հիշեցնելով, որ թիվ 34 ընտրատարածքում, որն ընդգրկում է Գյումրին,  մեծամասնական ընտրակարգով պայքարի են դուրս եկել ԲՀԿ-ական Մարտուն Գրիգորյանն  ու «Շիրակ» ֆուտբոլային ակումբի սեփականատեր, գործարար Արման Սահակյանը:

Aravot.am-ը խուզարկման հետ կապված պարզաբանումներ է խնդրել նաև Գյումրու ոստիկանապետ Վարուժան Շաշիկյանից, որը վստահեցրել է. «Նման բան չկա, ոչ մի խուզարկություն չի կատարվել,  նման փորձ չի արվել, եթե կատարած լինեինք, կասեի կատարել ենք»:

Ընդդիմադիր ճակատում խմորումներն ու փոխադարձ մեղադրանքները շարունակվում են. «Ազատ դեմոկրտաներ» կուսակցության անդամ Կարապետ Ռուբինյանը այսօր կայացած ասուլիսում հայտարարեց, թե զարմացած էր, որ իրենց առաջարկությունները մերժվեցին և ի վերջո պարզվեց, որ ՀԱԿ-ը համագործակցում է իշխանական ուժերի հետ. «Զարմանալի է, որ մեր առաջարկությունը մերժվեց, բանակցողները ոչ ճիշտ տեղեկատվություն ներկայացրեցին: Վերջում պարզվեց, որ ՀԱԿ-ը բանակցությունները տանում է իշխող կոլաիցիայի հետ:

Ինչ վերաբերվում է միասնական թեկնածուի գաղափարին, ըստ Ռուբինյանի, շատ ողջունելի քայլ կլինի, եթե ասենք, ՀՀՇ վարչության նախագահ Արամ Մանուկյանը հանի իր թեկնածությունը, այն ընտրատարաքից, որտեղ նաև առաջադրված է «Ժառանգության» խմբակցության պատգամավոր Զարուհի Փոստանջյանը՝ ի պատասխան թիվ 7 ընտրատարածքում «Ժառանգության» ցուցաբերած բարի կամքի։

Խոսքը «Ժառանգության» նախագահ Րաֆֆի Հովհաննիսյանի ինքնաբացարկի մասին է, որը նա արեց, քանի որ այդ ընտրատարծքում առաջադրված էր նաև ՀԱԿ ներկայացուցիչ, «Հայկական ժամանակ» օրաթերթի գլխավոր խմբագիր Նիկոլ Փաշինյանը։

Ըստ «Ժառանգության ներկայացուցիչ Ռուբեն Հակոբյանի. «Սրանք քաղաքական պրոցեսներ են, սա չի նշանակում, որ պետք է խռովենք իրարից, դռները բաց են, մենք կարող ենք մեկ միասնական թեկնածու ունենալ»:

Ըստ նրա վերջերս ՀԱԿ-ի հետ ընտրատարածքներում ընդդիմութան մեկ միասնական թեկնածու ունենալու վերաբերյալ տեղի ունեցած կոնֆլիկտից հետո, «Ժառանգությունը» չի «խռովում» ՀԱԿ-ից:

Ավելին`«12-րդ և 13-րդ ընտրատարածքներում միասին պայամանավորվել են պաշտպանել միմյանց»,:

Սակայն նա կասկածելի է համարում ՀԱԿ-ի վարքագիծը և չի հավատում իշխանափոխության հասնեու նրանց խոսքերին. «Եթե օրվա կեսին մի բան են ասում, մյուս կեսին իշխափոխության մասին են խոսում, ապա կասկածելի է այդ», -ասաց նա:

«Մենք միասին ճանապարհ ենք անցել և միասին դեռ ճանապարհ ենք անցնելու»,- այսօր` լրագրողների հետ հանդիպմանը, մեկնաբանելով այն խոսակցությունները, թե Արարատ Զուրաբյանը լքելու է կուսակցությունն,- ասաց «Ազատ դեմոկրատներ» կուսակցության անդամ, ԱԳ նախկին նախարար Ալեքսանդր Արզումանյանը:

Ճիշտ է, Արարատ Զուրաբյանն ընդգրկված չէ «Ժառանգություն» -«Ազատ դեմոկրատներ» դաշինքի համամասնական ցուցակում, ինչն առիթ է տվել նման լուրերի, սակայն ըստ Արզումանյանի, Զուրաբյանն ակտիվորեն մասնակցելու է նախընտրական գործընթացներին  և իր ուժերի ներածի չափով նպաստելու է ընդհանուր դաշինքի հաղթանակին:

Ինչ վերաբերվում է «Ազատ դեմոկրատների» ներքին խնդիրներին. «Մենք ազատական կուսակցություն ենք, որում խոսքի ազատությունը  բացարձակ արժեք է և չկա մի այնպիսի  իրավիճակ, որ նույն կուսակցության բոլոր անդամներն ունենան նույն մոտեցումը: Այդ դեպքում մենք պետք է փակենք կուսակցությունը»:

Արզումանյանը կարծում է,որ Զուրաբյանը կուսակցության հիմնադիր անդամներից է ու նա կուսակցության հետ շատ երկար ճանապարհ ունի անցնելու: Սակայն Զուրաբյանն ինքը, կորոշի իր մասնակցության ձևաչափերը:

Ինչ վերաբերվում է կուսակցությանը, նա շեշտեց, որ իրենք ընդդիմադիր դաշտի որեւէ այլ ուժի մրցակից չեն համարում, իրենց մրցակիցն իշխող կոալիցիան է լինելու:

Նոր տվյալներով Կենտրոնական ընտրական հանձնաժողովը չի գրանցել համամասնական ցուցակներում ընդգրկված երեք թեկնածուների: ԿԸՀ ի արտահերթ նիստին, հանձնաժողովի անդամներն առարկություններ ունեին ՕԵԿ-ի երկու թեկնածուների՝ Արամ Հարությունյանի ու Գևորգ Թոսունյանի, իսկ ՀԱԿ ի համամասնական ցուցակում` Խաչատուր Սուքիասյանի վերաբերյալ:

Արդյունքում` նրանք չեն գրանցվել պահանջված փաստթղթերի անհամապատասխանության պատճառով:

Եղել են նաև ինքնաբացարկի դիմումներ Հայաստանի հանրապետական կուսակցության, Բարգավաճ Հայաստանի, Օրինաց երկրի և Միավորված հայեր կուսակցությունների կողմից:

Ինքնաբացարկի դիմում է ներկայացրել ՀՀԿ-ից երեք թեկնածու՝ Դավիթ Սարգսյան, Արտեմ Սարգսյան, Արմեն Բաղդասարյան, ԲՀԿ-ից ինքնաբացարկ են հայտնել Մհեր Պողոսյանը, Սերգեյ Բագրատյանը, Իսկ ՕԵԿ-ից՝ նախկին գյուղնախարար Գերասիմ Ալավերդյանը, Միավորված հայեր կուսակցությունից՝ Տելեմակ Աֆրիկյանը:

Ընդհանուր պատկերը հետևյալն է. մայիսի 6-ին կայանալիք խորհրդարանական ընտրություններում մեծամասնական ընտրակարգով 41 տեղի համար առաջադրված էին 180 թեկնածուներ, սակայն ինքնաբացարկների և փաստաթղթերի անհամապատասխանության պատճառով, այսօր գրանցված են 156 թեկնածուներ:

Այսպիսով` ՀՀ ԿԸհ ը սահմանված կարգով մինչև ապրիլի 1 ընկած ժամանակահատվածում գրանցել է 156 թեկնածու մեծամասնականով և ԱԺ ընտրություններին մասնակցող բոլոր ինը կուսակցություններին՝  ՀՀԿ, Կոմկուս, ԲՀԿ, ՀԱԿ, Դեմկուս, ՕԵԿ,ՀՅԴ, Ժառանգություն, Միավորված հայեր: