Երևանի Վ. Բրյուսովի անվան պետական լեզվաբանական համալսարանի ռեկտորի նորանշանակ պաշտոնակատար Գաբրիել Բալայանը թեև շնորհակալ է, որ Կրթության և գիտության նախարարությունը, իմանալով հանդերձ, որ ինքը նախկին ռեկտոր Սուրեն Զոլյանի թիմակիցն է, այդուհանդերձ, հենց իրեն է նշանակել ռեկտորի պաշտոնակատարի պաշտոնում, սակայն դեռ բուհի ռեկտոր է համարում Սուրեն Զոլյանին։

“Նախարարը հրաման է արձակել, որ ես լինեմ պաշտոնակատար: Այսօր աշխատանքի է եկել նաև Սուրեն Զոլյանը: Ես Սուրեն Զոլյան ռեկտորից ստացել եմ հանձնարարական՝ կատարել նախարարի հրամանը, և ես կատարում եմ: Պարոն ռեկտորն ինձ է փոխանցել նաև ֆինանսական բոլոր փաստաթղթերը, որոնք ես պետք է ստորագրեմ, սակայն ինձ համար ռեկտորը դեռ Սուրեն Զոլյանն է”,- tert.am-ի հետ զրույցում ասել է ԵՊԼՀ իրավական, վարչական և տնտեսական աշխատանքների գծով պրոռեկտոր Գաբրիել Բալայանը:

Հիշեցնենք, որ ԵՊԼՀ ռեկտորին ՀՀ կրթության և գիտության նախարարը երկու անգամ նկատողություն էր հայտարարել, որից հետո էլ ԵՊԼՀ ռեկտոր Սուրեն Զոլյանը ազատվել էր զբաղեցրած պաշտոնից։ Սակայն վեջինս նախարարի որոշումը բողոքարկում է վարչական դատարանում։  tert.am-ը գրում է, որ Գաբրիել Բալայանը, ով փաստացի ղեկավարում է բուհը, իր աշխատասենյակը չէր փոխել, և ասաց, որ ոչ էլ մտադիր է։

“Ինչպես տեսնում եք, ես իմ աշխատասենյակը չեմ փոխել և մտադիր էլ չեմ փոխելու: Այսօր ես չեմ գործում ռեկտորի և Աշոտյանի արանքում, այլ ես գործում եմ բուհի շահերից ելնելով”,- ասել է Գ. Բալայանը:

Հարցին, թե վերջինս ինչ կարծիքի է Սուրեն Զոլյանի մասին, Գաբրիել Բալյանն ասաց, որ ինքը միայն դրական կարծիք ունի ռեկտորի մասին:

“Ես միանշանակ լավ կարծիք ունեմ պարոն ռեկտորի մաիսն, ես նրա թիմակիցն եմ, նրա հրավերով եմ եկել, իմ անձնական կարծիքն այն է, որ ես ցանկանում եմ՝ նա կրկին պաշտոնավարի մեր բուհում, և նրա պաշտոնավարման ընթացքում մեր բուհը հասել է միայն հաջողությունների”,- ասել է Գաբրիել Բալայանը:

Այսօր ԵՊԼՀ նախկին ռեկտորը մի ուղերձ է հղել ուսանողներին, որով կոչ է անում չբացակայել դասերից, քանի որ դա իր վրա վատ ազդեցություն կունենա:

ԵՊԼՀ նախկին ռեկտոր Սուրեն Զոլյանը չի կարողացել ընդունել tert.am-ին։ Ըստ ռեկտորի պաշտոնակատար Գ. Բալայանի՝ նրա մոտ արտասհամանից հրավիրված պատվիրակության անդամներ են եղել:

Ինչպես տեղեկացնում է թուրքական Zaman-ը Թուրքիայի Քարաբյուքի մարզի Սաֆրանբոլու շրջանում երեկ բռնկված անտառային հրդեհը մարել չի հաջողվում: Տարածքում գտնվող 3 գյուղերի բնակիչները, անվտանգության նկատառումներով, տարհանվել են:  Քարաբուքի անտառի շահագործման ղեկավար Էմին Ուզունսոյը տեղեկացրել է, որ հաջողվել է կրակի տարածումը կանխել, սակայն մարել դեռևս չի հաջողվել:  Դեպքի վայրում աշխատում են 65-ից ավելի հրշեջ մեքենա և մոտ 600 հրշեջ:

Երկու օր է Թուրքիայում շարունակվող փոթորկի և քամու պատճառով կրակը տարածվել է նաև տարածքի որոշ տներում:

Կառավարությունը որոշում է կայացրել, համաձայն որի, երկուշաբթի՝ ապրիլի 30-ը, հանրապետությունում ոչ աշխատանքային օր կլինի: Քաղաքացիներ կհանգստանան երկու օր՝ ապրիլի 30-ին և մայիսի 1-ին՝ Աշխատավորի միջազգային օրը: Փոխարենը աշխատանքային օր է հայտարարվել շաբաթը՝ ապրիլի 28-ը:

Հայկական ժամանակ.  Հայ ազգային կոնգրեսի անդամ, Երևանի թիվ 7 ընտրատարածքում Աժ պատգամավորի թեկնածու Նիկոլ Փաշինյանը շարունակում է իր նախընտրական այցերը թիվ 7 ընտրատարածքում, որի ժամանակ հասցեական նամակներ է բաժանում ընտրողներին:

Երեկ նույնպես` Շերամի փողոցի բակերից մեկում «Լֆիկի մարդիկ» փորձել են արգելակել քարոզարշավը, ինչը չի ստացվել, և Փաշինյանը մոտ մեկու-կես ժամ երթ է արել Շերամի 87,89,93,95,97,99 շենքերի բակերում: Դրանից հետո Փաշինյանն այցելել է Սիլիկյան թաղամաս, և նրա թիմի տեսախցիկներն արձանագրել են, թե ինչպես շուրջ 60 ավտոմեքենաներով տարեց կանայք և երիտասարդ տղամարդիկ են տեղափոխվում քարոզչությունը խոչընդոտելու: Կանանցից ոմանց ձեռքին եղել են թափանցիկ տոպրակներ, որոնց մեջ` երկուական խաչապուրի:

Հայաստանի կրթության եւ գիտության նախարարությունը պարզաբանել է Երեւանի Վ. Բրյուսովի անվան պետական լեզվաբանական համալսարանի ռեկտոր Սուրեն Զոլյանին աշխատանքից ազատելու նախարարի հրամանը:

Պարզաբանման մեջ ասվում է.

«Երեւանի Վ. Բրյուսովի անվան պետական լեզվաբանական համալսարան» պետական ոչ առեւտրային կազմակերպության գործադիր մարմնի ղեկավար՝ ռեկտոր Սուրեն Զոլյանի լիազորությունները դադարեցվել են եւ 2008 թվականի մարտի 17-ին նրա հետ կնքված, թիվ 134 աշխատանքային պայմանագիրը լուծվել է ՀՀ կրթության եւ գիտության նախարարի 2012 թվականի ապրիլի 17-ի 58-Ա1 հրամանով՝ «Պետական ոչ առեւտրային կազմակերպությունների մասին» ՀՀ օրենքի 15-րդ հոդվածի 2-րդ մասի, 16-րդ հոդվածի 3-րդ մասի ժգ) կետի համաձայն: «Պետական ոչ առեւտրային կազմակերպությունների մասին» ՀՀ օրենքի 16-րդ հոդվածի 3-րդ մասի ժգ) կետը՝ «Գործադիր մարմնի պաշտոնում նշանակված կամ ընտրության արդյունքում գործադիր մարմնի պաշտոնում նշանակված անձի լիազորությունները դադարեցվում են իրավասու մարմնի որոշմամբ, եթե` մեկ տարվա ընթացքում օրենքի խախտման համար ենթարկվել է կրկնակի կարգապահական պատասխանատվության», հստակ սահմանում է, որ իրավասու մարմինը պարտադիր պետք է /այլ ոչ թե կարող է/ իր որոշմամբ դադարեցնի գործադիր մարմնի պաշտոնում նշանակված անձի լիազորությունները եթե` մեկ տարվա ընթացքում օրենքի խախտման համար ենթարկվել է կրկնակի կարգապահական պատասխանատվության, իսկ նույն օրենքի 15-րդ հոդվածի 1-ին եւ 2-րդ մասերի համաձայն՝ կազմակերպության գործադիր մարմնի ղեկավարին նշանակում եւ ազատում է (նրա լիազորությունները դադարում են) լիազորված պետական մարմինը, եթե հիմնադրի որոշմամբ կամ պետական կազմակերպության կանոնադրությամբ այլ բան նախատեսված չէ,  պետական կազմակերպության գործադիր մարմնի գործառույթներն իրականացնող անձի հետ կնքվում է պայմանագիր, որը հիմնադրի անունից ստորագրում է լիազորված պետական մարմնի ղեկավարը: Համաձայն ՀՀ կառավարութան 2002 թվականի հոկտեմբերի 31-ի թիվ 1929-Ն որոշման 3-րդ կետի՝ «Երեւանի Վ. Բրյուսովի անվան պետական լեզվաբանական համալսարան» պետական ոչ առեւտրային կազմակերպության կառավարման լիազորությունները վերապահվել են ՀՀ կրթության եւ գիտության նախարարությանը, իսկ համաձայն ՀՀ կառավարության 2008 թվականի մարտի 13-ի «Երեւանի Վ. Բրյուսովի անվան պետական լեզվաբանական համալսարան» պետական ոչ առեւտրային կազմակերպության ռեկտորի ընտրության արդյունքները հաստատելու մասին` թիվ 220-Ա որշման 2-րդ կետի ՀՀ կրթության եւ գիտության նախարարին է վերապահվել Ս. Զոլյանի հետ ՀՀ օրենսդրությամբ սահմանված կարգով կնքել աշխատանքային պայմանագիր` 5 տարի ժամկետով: 2008 թվականի մարտի 17-ին` Գործատուի, ի դեմս Հայաստանի Հանրապետության կրթության եւ գիտության նախարար Լեւոն Մկրտչյանի, մի կողմից, եւ ռեկտոր Սուրեն Տիգրանի Զոլյան, մյուս կողմից, կնքվել է թիվ 134 աշխատանքային պայմանագիրը, որի ամբողջ բովանդակությամբ սահմանված է, որ գործատուն լիազորված պետական մարմինն է:

Ելնելով վերոգրյալից` անհերքելի փաստ է, որ ՀՀ կրթության եւ գիտության նախարարը հանդիսանում է Սուրեն Տիգրանի Զոլյանի գործատուն, հետեւաբար օրենքով սահմանված հիմքերի առկայության դեպքում պետք է դադարեցնի գործադիր մարմնի պաշտոնում նշանակված անձի լիազորությունները:

Ինչ վերաբերվում է օրենքով սահմանված հիմքի՝ «մեկ տարվա ընթացքում օրենքի խախտման համար ենթարկվել է կրկնակի կարգապահական պատասխանատվության» առկայությանը, ապա ՀՀ կրթության եւ գիտության նախարարի 2012 թվականի ապրիլի 6-ի 160-Ա եւ 2012 թվականի ապրիլի 17-ի  173-Ա հրամաններով, օրենքների խախտումների համար, Սուրեն Զոլյանի նկատմամբ կիրառվել է «խիստ նկատողություն» կարգապահական տույժը՝

ա. նախարարի 160-Ա հրամանի համաձայն Սուրեն Զոլյանը խախտել է «Պետական ոչ առեւտրային կազմակերպությունների մասին» ՀՀ օրենքի 15-րդ հոդվածի 1-ին մասի 2-րդ պարբերության եւ 6-րդ մասի պահանջները,

բ. նախարարի 173-Ա հրամանի համաձայն Սուրեն Զոլյանը խախտել է ՀՀ օրենքներով ուղղակի նախատեսված ՀՀ կառավարության որոշումները եւ նորմատիվ գերատեսչական իրավական ակտերը, հետեւաբար՝ օրենքները, ինչը հայտնաբերվել եւ արձանագրվել է ԵՊԼՀ-ում վերահսկողություն իրականացնող հանձնաժողովի կողմից:

Վերոգրյալը փաստում է, որ Սուրեն Զոլյանի լիազորությունները դադարեցնելու՝ օրենքով սահմանված հիմքի առկայությունը անհերքելի է:

«ՉԻ» տեղեկություններով, երեկ Սյունիքի մարզում ՀՀԿ-ական Սուրեն Խաչատրյանի նախաձեռնությամբ չնախատեսված հավաք է կազմակերպվել: Հավաքի հիմնական նպատակը հետևյալն է եղել, մարզպետ Սուրեն Խաչատրյանը իր թիմակիցներին ու ակտիվին, այդ թվում նաև որոշ գյուղական համայնքների ղեկավարներին, որոնք Գորիս քաղաքում խնամիներ և բարեկամներ ունեն, խստագույնս հանձնարարել է ՀՀԿ-ի կենտրոնական ուժերը տեղակայել իր հայրենի Գորիսում, քանի որ կոնկրետ այդտեղ փոքր «պրավալի» դեպքում անգամ ինքը ոչ միայն խայտառակ կլինի, այլև կզրկվի աթոռից: Մարզպետ Սուրեն Խաչատրյանը` Լիսկան, իր շրջապատի ջլապինդ տղաներին հորդորել է հարկ եղած դեպքում դիմել ցանկացած մեթոդի` չվախենալով ոչնչից: Հավաքի վերջում մարզպետն իր «ենթակաների» մոտ փոքր-ինչ սրտնեղած կատակել է. «Էս վերջում` էդ կանանց հետ գլուխ դնելուց հետո, իմիջս մի քիչ վատացել ա, տեսեք` որ մեկդ եք կարողանում պատիվս բարձրացնել: Ով որ լավ աշխատեց, մի հատ լավ ճամփորդություն եմ կազմակերպելու դեպի Փարիզ: Դիմություն ա, ընդդիմություն ա, ես չգիտեմ, ով փորձեց ստեղ գլուխ բարձրացնել` իմացեք, որ ոտով-գլխով պատասխան եք տալու»:

Ապրիլի 18-ին , ժամը 22։00–ի սահմաններում Ոստիկանության կենտրոնականի բաժին ահազանգ է ստացվել անհայտ քաղաքացուց, որ Երևանի «Հաղթանակ» կամրջից մարդ է ցած նետվել։

Այս մասին  tert.am–ին տեղեկացրել է  ֆոտոլրագրող Գագիկ Շամշյանը, ով նաև ասել  է, որ   ինքնասպանություն գործած քաղաքացին Երևանի Բաբաջանկյան 21 շենքի բնակիչ 33–ամյա Արման Մ.–ն է։

Գ. Շամշյանը հայտնել է նաև, որ իրեն հայտնի է դարձել, որ ինքնասպանություն գործելուց առաջ Արմանը, ով ըստ դեպքի վայրում ներկաների պատմածների աշխատում էր Ֆինանսների նախարարությունում որպես վերահսկիչ, sms է ուղարկել իր եղբորը՝ Արտակին, որտեղ գրել է, որ գնում է իր կյանքին վերջ տա։ Արմանի եղբայրը այդ մասին տեղեկացրել է ոստիկանության Էրեբունու բաժին, և մինչ ոստիկանները և հարազատները կփնտրեին Արմանին, արդեն տեղի էր ունեցել այս ցավալի դեպքը։

Փաստի առթիվ Ոստիկանության Կենտրոնականի քննչական բաժնում նյութեր են նախապատրաստվում։

«Կոշ» քրեակատարողական հիմնարկի դատապարտյալ Արամ Սիմոնյանը շուրջ 10 օր առաջ տեղափոխվել է «Դատապարտյալների հիվանդանոց» քրեակատարողական հիմնարկ: Ըստ արդարադատության նախարարության, մարտի 28-ին «Կոշ» քրեակատարողական հիմնարկում պատիժը կրող Արամ Սիմոնյանը հիմնարկի բժշկին բողոքել էր որովայնի շրջանում սուր ցավերից և նույն օրն էլ տեղափոխվել էր «Դատապարտյալների հիվանդանոց»: Կատարված գործիքային և լաբորատոր քննությունների արդյունքում պարզվել է, որ Ա. Սիմոնյանի մոտ առկա է «կալկուլյոզ խոլեցիստիտ» [լեղապարկի քարեր` 22 և 14 միլիմետր տրամագծով]: Իսկ հիմնարկի ատամնաբուժական բաժանմունքում հետազոտման ժամանակ Ա. Սիմոնյանի մոտ հայտնաբերվել են ատամնաշարի հետ կապված մի շարք հիվանդություններ` թարախային գոյացություններ:

Հրապարակ թերթն այսօրվա համարում անդրադարձել է Արցախի փողոցում թողնված նորածնի ճակատագրին` գրելով. «2010 թվականի այս նույն օրը «Հրապարակը» պատմեց մի երեխայի մասին, որին գտել էին Արցախի փողոցում, մի պարսպի տակ և հանձնել էին ոստիկանություն: Այնտեղից էլ «Սուրբ Աստվածամայր» բժշկական կենտրոնի Շտապ օգնության մեքենան կանացի շրջազգեստով փաթաթված «գտածոն» բերել էր նորածինների բաժանմունք: Նորեկի անունը Հայկ դրեցին, ազգանունը` Աստվածատրյան: Բժշկական կենտրոնի տնօրեն Դալլաքյանին շատ էին զանգում ընկեցիկին որդեգրելու խնդրանքով: Բայց այդ օրերին քրեական գործ էր հարուցված, ոստիկանները փնտրում էին հանցագործ մորը, իսկ երեխան «իրեղեն ապացույցի» կարգավիճակ ուներ և ենթակա չէր որդեգրման: Պետք է ավարտվեր քննությունը, ծնողը կորած ճանաչվեր, երեխան համարվեր ծնողազուրկ, նոր որդեգրեին: Բոլոր այս գործողությունների համար սովորաբար 3 ամսից մինչև 1.5 տարի է պահանջվում: Այս պատմությունը հուզել էր մեր ընթերցողներին: Մինչ օրս նրանք նամակներ են գրում և ուզում են իմանալ, թե ինչպես դասավորվեց Հայկ Աստվածատրյանի ճակատագիրը, որտեղ է նա հիմա: Խմբագրության փոստում ընթերցողի նամակն է, որտեղ նա խնդրում է պատմել, թե ինչ ճակատագիր է ունեցել երկու տարի առաջ տպագրված մեր հոդվածի հերոս փոքրիկը: Ընթերցողների խնդրանքով էլ այցելեցինք մինչև 5 տարեկան երեխաների համար նախատեսված «Մանկան տուն» հաստատություն, որտեղ տարել էին Հայկին հիվանդանոցից: Տնօրեն Լիանա Կարապետյանից իմացանք, որ տղան մանկատանն անցկացրել է 7 ամիս, որից հետո նրան որդեգրել է երիտասարդ մի զույգ: Ծնողների տվյալները բացահայտելն արգելված է օրենքով: Մեզ ընդամենը հաջողվեց պարզել, որ Հայկը Երևանում է ապրում, և նրա նոր մաման մեր գործընկերն է` լրագրող, տնօրենի բնորոշմամբ` «պատկառելի անձնավորություն»: Հետաքրքիր է, որ ոչ միայն մեր ընթերցողներն են հետաքրքրվել երեխայի ճակատագրով: Օրերս մանկատուն է զանգահարել էրեբունու ոստիկանությունից մի բարձրաստիճան աշխատակից և ասել է, որ ուզում է մատաղ անել Հայկի համար: «2005 թվականից ընկեցիկ երեխաների թվաքանակը մեր մանկատանը նվազել է,- ասաց տնօրենը,- փոխարենը ավելացել են տարբեր շեղումներ ունեցող երեխաները, հատկապես Դաունի համախտանիշով տառապող»: Ըստ Լիանա Կարապետյանի, այդպիսի ծնունդներ հատկապես շատ են Արմավիրի մարզում: Մասնագետները սա կապում են թմրամիջոցների օգտագործման, նաեւ բնապահպանական խնդիրների հետ»:

ՀՀ Մարդու իրավունքների պաշտպան Կարեն Անդրեասյանը,  այսօր հանդիպել է «Հայ ազգային կոնգրես» ընդդիմադիր դաշինքի համակարգող Լևոն Զուրաբյանի հետ:

Ըստ ՄԻՊ գրասենյակի հաղորդագրության՝ հանդիպմանը պաշտպանն առաջարկել է դաշինքին իր նոր, համալրված ռեսուրսներով աջակցությունը նախընտրական և ընտրական շրջանում:

Քննարկման ընթացքում ՀԱԿ նախընտրական շտաբի ղեկավարը, ի թիվս այլ խնդիրների, բարձրացրել է նախընտրական ցուցակների և գրանցումների հետ կապված խնդիրը, ինչպես նաև Կոնգրեսի հանրահավաքների ժամանակ հանրային տրանսպորտի երթևեկության խոչընդոտները: