ՊԲ օպերատիվ տվյալների համաձայն, օգոստոսի 30-ից սեպտեմբերի 5-ն ընկած ժամանակահատվածում ղարաբաղա-ադրբեջանական հակամարտ զորքերի շփման գծում հակառակորդի կողմից հրադադարի պահպանման ռեժիմը խախտվել է շուրջ 1000 անգամ, որի ընթացքում տարբեր տրամաչափի հրաձգային զինատեսակներից, ինչպես նաև 60, 82 և 120 մմ-ոց ականանետերից ու ՌՊԳ-7 և ՀԱՆ-17 տիպի նռնականետերից, հայ դիրքապահների ուղղությամբ արձակվել է ավելի քան 14000 կրակոց:

Նշված ժամանակահատվածում հայկական դիրքերի ուղղությամբ, հակառակորդը կիրառել է նաև թուրքական արտադրության TP-107 տիպի ռեակտիվ հրթիռահրետանային կայանք:
ՊԲ առաջապահ զորամասերը համարժեք պատասխան են տվել հակառակորդի նախահարձակ գործողություններին և անհրաժեշտ քայլեր ձեռնարկել շփման գծի ողջ երկարությամբ մարտական դիրքերի պահպանությունը հուսալիորեն կազմակերպելու համար:

ԼՂՀ ՊՆ մամուլի ծառայություն

Ձեռքի մատների երկարության եւ շագանակագեղձի քաղցկեղի զարգացման վտանգի միջև առկա կապի մասին հավանաբար բոլորն են լսել . կա տեսակետ, որ եթե տղամարդու անանուն մատը ցուցամատից ավելի երկար է, ուրեմն նա գտնվում է բարձր ռիսկի խմբում:

Սա առասպել է, թե՞ ճշմարտություն: Այս հարցի շուրջ իրենց դատողություններն են հայտնել Քլիվլենդի կլինիկայի մասնագետները:

2011 թ հրապարակված հետազոտության շրջանակում, գիտնականները 15 տարի ուսումնասիրել են շագանակագեղձի քաղցկեղ ունեցող 1500 տղամարդու ու 3000 առողջ տղամարդու: Պարզվում է, որ այն տղամարդիկ, ում ցուցամատը անանուն մատից ավելի երկար է, շագանակագեղձի քաղցկեղով հիվանդանալու 33 տոկոսով ավելի քիչ հավանականություն ունեն, քան տղամարդիկ, ում անանուն մատն է ավելի երկար:

Մեկ ուրիշ հետազոտություն նաև ցույց էր տվել, որ երկար անանուն մատով տղամարդկանց մոտ ավելի հաճախ է ախտորոշվում շագանակագեղձի քաղցկեղ:

Այս կապի պատճառը, ըստ գիտնականների, կարող է թաքնված լինել մարդու հոմեոտիկ գեներում, որոնք դեռ մոր արգանդում կանոնակարգում են պտղի օրգանների աճը ՝ թե ներքին օրգանների ՝ շագանակագեղձի ու երիկամների, թե մատների: Համենայն դեպս 2015 թ. հետազոտությունը ցույց է տվել, որ շագանակագեղձի քաղցկեղ ունեցող հիվանդների մոտ այդ գեների համամասնությունը խախտված է: Ճիշտ է դեռ անհայտ է, թե ինչպես են այդ գեները փոխգործում հորմոնների ՝ էստրոգենի ու էնդրոգենի հետ, որոնք նույնպես դեր են կատարում քաղցկեղային հիվանդությունների զարգացման հարցում: Սակայն որոշակի կապ հաստատ կա, չէ՞ որ հենց էստրոգենների քանակով է պայմանավորված ցուցամատի երկարությունը:

Քլիվլենդի բուժարանի մասնագետների կարծիքով ՝ շատ կարևոր է հասկանալ հորմոնների ու հոմեոտիկ գեների փոխազդեցության մեխանիզմը, քանի որ դրա շնորհիվ հնարավոր կլինի գտնել քաղցկեղի դեմ պայքարելու նոր միջոցներ: Ինչ վերաբերում է մատների երկարությանը ՝ նոր հետազոտություններ են պահանջվում, որպեսզի վերջնականապես ապացուցվի մատների ու շագանակագեղձի քաղցկեղի միջև առկա կապը:

NEWS.am Medicine

Երգչուհի Լարա Ֆաբիանի ու տաղանդավոր ֆրանսիացի Գրեգորի Լեմարշալի հարաբերությունների մասին քիչ բան է հայտնի, դրանք մինչև հիմա գաղտնիք են անգամ ամեն տեղ խցկվող լրագրողների համար: Արդյո՞ք երկու հիանալի ձայներ ունեցող երգիչները պարզապես ընկերներ էին, թե՞ ավելին, գաղտնիք է:

Սակայն ակնհայտ է, որ Լարան ծանր էր տանում երիտասարդի անժամանակ մահը: Զարմանալի չէ, որ երբ նրա մահից հետո երգչուհին համերգին պետք է կատարեր Je t’aime երգը, այն երգը, որը ֆրանսիական տաղանդների շոուում ընտրել էր Գրեգորին ելույթ ունենալու համար, նրա ձայնը խզվեց:

Սակայն այստեղ երգչուհուն օգնության եկան նրա հավատարիմ երկրպագուները՝ երգելով հայտնի երգը: Ընդ որում՝ նրանք փոխեցին Je t’aime («Ես սիրում եմ քեզ») բառերը On t’aime-ի՝ «Մենք քեզ սիրում ենք»:

Թուրքերի համար Վանա լճի շրջակայքն արևելյան ծայրամաս է: Քրդերի համար, որոնք այստեղ գերակշռող մաս են կազմում, պետության սիրտ, որի շուրջ նրանք ծրագրեր են կազմում: Հայերի համար, որոնց այստեղից տեղահանել են, այն Հայաստանի պատմական կենտրոնն է: Իսկ ճանապարհորդների համար՝ դրախտ: Հիասքանչ լանդշաֆտներ, պատմության հետքեր, քիչ թվով զբոսաշրջիկներ: Այս մասին գրում է լեհական Gazeta Wyborcza-ն: Հոդվածում նշվում է.

«Ամռան սկզբին Թուրքիայի կառավարությունն ու Քրդական աշխատավորական կուսակցությունը հայտարարեցին խաղաղության գործընթացի ավարտի մասին:

Վանում հյուրանոցատերերը դժգոհում են. պատվերների երկու երրորդն արդեն չեղարկել են: Ուղեկցորդների շրջանում անգործությունն աճում է:

Լճի վրա կախված ժայռին աչքի է զարնում Աթաթուրքից հսկայական գրությունը. «Երջանիկ է նա, ով կարող է ասել, որ թուրք է»: Քրդերը, որոնք այստեղ մեծամասնություն են կազմում, ստիպված են օրական մի քանի անգամ կարդալ այս գրությունը:

Թուրքիան մինչև այսօր չի ցանկանում խոստովանել, որ հայոց ցեղասպանություն է իրականացրել, և երկու երկրների միջև սահմանը շարունակում է փակ մնալ՝ չնայած հարաբերությունները դանդաղորեն հարթվում են: Այդ ճանապարհի խորհրդանիշը Աղթամարն է: Հունիսին այստեղ հնչեց համաշխարհային ջազի աստղ Տիգրան Համասյանի հոգևոր երաժշտությունը: Նրա հետ միասին հանդես եկավ Երևանի պետական կամերային երգչախումբը: Այս ամենը դժվար է ընդունել թուրք ազգայնականներին:

Աղթամար կղզու Սուրբ Խաչ եկեղեցին վերջերս ընդգրկվեց ՅՈՒՆԵՍԿՕ-ի ոչ նյութական մշակութային ժառանգության ցանկում: Թուրքիայի մշակույթի նախարարն այդ առիթով պարծանքով իր Twitter-ում գրեց հենց ապրիլի 24-ին՝ Հայոց ցեղասպանության 100-րդ տարելիցին:

Այն տարածքները, որտեղ ժամանակին հայերն էին ապրում, վերականգնման, անվտանգության ու դեռեւս հարյուրավոր տաճարների պարզ ցուցանակների տեղադրման կարիք ունեն»:

Նախագահ Սերժ Սարգսյանն այսօր ընդունել է ԵԱՀԿ գործող նախագահի անձնական ներկայացուցիչ Անջեյ Կասպրչիկին. տեղեկացնում է ՀՀ Նախագահի աշխատակազմի հասարակայնության հետ կապերի բաժինը:
Հանդիպման ընթացքում քննարկվել են վերջին օրերին հայ-ադրբեջանական պետական սահմանին և ղարաբաղա-ադրբեջանական շփման գծում տիրող իրավիճակի հետ կապված հարցեր:
Երկուստեք մտահոգություն է հայտնվել շփման գծում հրադադարի ռեժիմի խախտման հաճախակի դարձած դեպքերի կապակցությամբ:
Նախագահ Սերժ Սարգսյանը կարևորել է ԵԱՀԿ Մինսկի խմբի համանախագահների կողմից առաջարկված միջադեպերի քննության մեխանիզմի շուրջ համաձայնության հասնելը՝ ընդգծելով, որ դա հնարավորություն կընձեռի խուսափել իրավիճակի նման սրացումներից և մարդկային կորուստներից։ Նա նաև դրական է գնահատել նման իրավիճակներում ԵԱՀԿ գործող նախագահի անձնական ներկայացուցչի գրասենյակի կողմից իրականացվող դիտարկումների հաճախակիացումը:
Անդրադարձ է եղել նաև ս.թ. սեպտեմբերի 3-ից 6-ը անցկացվող «Շանթ-2015» ռազմավարական հրամանատարաշտաբային զորավարժություններին և դրանց նպատակին:

Այսօր վաղ առավոտյան, Արցախի ազատամարտիկների միության (ԱԱՄ) նախաձեռնությամբ Ստեփանակերտից Հայաստանի Հանրապետության հյուսիս-արևելյան՝ Տավուշի սահմանագոտի է մեկնել հարյուր ազատամարտիկ՝ ԼՂՀ վարչապետ Արայիկ Հարությունյանի և միության նախագահ Սամվել Կարապետյանի գլխավորությամբ:

«Արցախպրես»-ի թղթակիցն այդ կապակցությամբ մեկնելուց առաջ զրուցել է ազատամարտիկների հետ՝ նրանց տրամադրվածության և նպատակների մասին, որը ներկայացնում ենք ստորև.

Սամվել Աղաջանյան, Արցախի ազատամարտիկների միության Ասկերանի տարածքային միավորման նախագահ

— Մենք պատրաստ ենք «Մեկ ազգ, մեկ հայրենիք» կարգախոսի ներքո ծառայելու մեր հայրենիքի բոլոր հատվածներում:Մեկնում ենք մեծ ոգևորությամբ ու բարձր տրամադրությամբ: Մեր նպատակն է մեկ անգամ ևս թշնամուն ջախջախիչ հարված հասցնել և հասկացնել, որ այլևս հրաժարվի նման ոտնձգություններից: Ավելին՝ Արցախի ազատամարտիկները միշտ պատրաստ են մեկնել նաև Արևմտյան Հայաստան՝ ազատագրելու մեր հայրենիքի մյուս հատվածները ևս: Ասկերանի տարածքային միավորման անդամներից շատերն են ցանկություն հայտնել սահմանագիծ մեկնելու, սակայն տեղերի սահմանափակ լինելու պատճառով այս անգամ ավելի քիչ ազատամարտիկներ են ընդգրկվել Ասկերանից:

Էդիկ Խաչատրյան, Արցախի ազատամարտիկների միության աշխատակազմի ղեկավար

— Մեկնում ենք մեծ ոգևորությամբ: Յուրաքանչյուրիս պարտքն է պաշտպանել հայրենիքի սահմաններն ու ապահովել մեր ժողովրդի անվտանգությունը: Մենք ունենք մեկ ընդհանուր հայրենիք ու սահման և պատրաստ ենք ցանկացած պահի դիմագրավելու թշնամու բոլոր ոտնձգություններն ու դաս տալու նրան: Սահմանագիծ մեկնելու և մեր զինվորների կողքին կանգնելու մեր հերթական առաքելության նպատակը մեկ անգամ ևս ցույց տալն է, որ հայ ազգը պատրաստ է ցանկացած պահի միասնական գործելու, ինչը մեր հաղթանակի գրավականն է:

Հարութ Մնացականյան, ԱԱՄ «Հայրենյաց պաշտպան» երիտասարդական հասարակական կազմակերպության նախագահ

— Մենք տրամադրված ենք մարտական, և երիտասարդական խմբում կամավոր ընդգրկված 7 տղաները կազմ ու պատրաստ են փորձառու ազատամարտիկների կողքին իրականացնելու ցանկացած մարտական առաջադրանք: Նաև ոգևորված ենք, քանի որ կրկին մեր հայրենիքի սահմանին ենք կանգնելու: Այս այցելությունը սահմանագիծ խորհրդանշական բնույթ է կրում, քանզի սահմանին կանգնած մեր զինվորներն անթերի ու վստահ են իրականացնում իրենց առաքելությունը: Մեր նպատակն է ևս մեկ անգամ ցույց տալու մեր միասնությունն և այն կամքը, որ պատրաստ ենք կանգնելու բոլորիս հայրենիքի սահմանի ցանկացած հատվածի պաշտպանության դիրքերում:

Հրաչիկ Նասիբյան, ԱԱՄ Ստեփանակերտի տարածքային 5-րդ միավորման նախագահ

-Հաճախ ենք մասնակցություն ունենում ռազմահայրենասիրական տարաբնույթ միջոցառումների կազմակերպմանը՝ լինի դա Արիության դաս, այցելություն սահմանագիծ: Կարծում եմ, որ սահմանը բոլորիս տունն է: Մարտական տրամադրվածությամբ էլ մեկնում ենք հայրենիքի սահման՝ մեր ներդրումն ունենալու նրա պաշտպանության գործում: Մենք չենք հարձակվում և չենք ուզում պատերազմել, բայց որտեղից մեզ վրա կրակեցին, այնտեղ նրանց կոչնչացնենք:

Artsakhpress.am

Ադրբեջանի պաշտպանության նախարարությունն այսօր հայտարարություն է տարածել, որում նշված է, թե Հայաստանի զինված ուժերը սկսել են կրակել իրենց խաղաղ բնակչության վրա. տեղեկացնում է Interfax.az-ը: Ադրբեջանի պաշտպանական գերատեսչությունը նշել է նաև, թե վախենալով իրենց հզոր հարվածներից, Հայաստանի սահմանամերձ բնակավայրերից սկսել են մարդկանց տարհանել: Ադրբեջանի ՊՆ-ն Հայաստանին սպառնացել է իրենց «գյուղերի և խաղաղ բնակիչների վրա արձակվող կրակոցներն անմիջապես չդադարեցնելու դեպքում, օգտագործելով ցանկացած կրակային համակարգ, որ կա մեր զինանոցում, ոչնչացնել թշնամուն»: Այս առնչությամբ Aravot.am-ը մեկնաբանություն խնդրեց ՀՀ պաշտպանության նախարարի մամուլի քարտուղար Արծրուն Հովհաննիսյանից: Նա Ադրբեջանի ՊՆ-ի հաղորդագրությունը ծիծաղելի անվանեց: Պարոն Հովհաննիսյանը հերքեց Ադրբեջանի ՊՆ-ի այն պնդումները, թե Հայաստանի սահմանամերձ բնակավայրերից մարդկանց տարհանում են: Իսկ Ադրբեջանի խաղաղ բնակչության վրա կրակելու առնչությամբ ասաց. «Հայկական կողմը երբեք նման բան չի արել, չի անում ու չի անելու: Դրա կարիքը չկա»: Արծրուն Հովհաննիսյանը նաեւ Ադրբեջանին խորհուրդ տվեց մտածել «իրենց կողմից փախչող ժողովրդի մասին, սպիտակ դրոշների մասին, գյուղերից փախած գյուղապետերի մասին, մեկ էլ մորգերում ու հոսպատալներում վիրավորվածների և զոհվածների թաքցված դիակների մասին»:

Հակառակորդի կողմից ձեռնարկված գործողության հետեւանքով սեպտեմբերի 4-ին՝ ժամը 17:00-ի սահմաններում մարտական խնդիր կատարելու ժամանակ զոհվել են պաշտպանության բանակի պայմանագրային զինծառայողներ Մարատ Ռուդոլֆի Խաչանյանը և Արման Վաչագանի Ստեփանյանը:

Այս մասին հայտնում են ԼՂՀ ՊՆ մամուլի ծառայությունից և տեղեկացնում, որ դեպքի մանրամասները պարզելու համար կատարվում է քննություն:

«ԼՂՀ պաշտպանության նախարարությունը կիսում է կորստյան ծանր վիշտը և իր զորակցությունը հայտնում զոհված զինծառայողների ընտանիքների անդամներին, հարազատներին և ծառայակիցներին»,–ասվում է հաղորդագրությունում:

shamshyan.com-ը գրում է.

39-ամյա Ալիկ Հակոբյանին մեղադրանք է առաջադրվել այն բանի համար, որ նա Տավուշի մարզի Վ.Ծաղկավան գյուղից դեպի Բերդ քաղաք շուրջ 1 կմ հեռավորությամբ հանդիպել է ճամփեզրով քայլող իրեն անծանոթ՝ 49-ամայ Վիկտոր Վոլոդյայի Օրդյանին և վերջինիս իրենից խուսափելու և անհասկանալի լեզվով խոսելու, ինչպես նաև աջ ձեռքը ծոցագրպանից դուրս բերելու հանգամանքներից կարծելով, որ նա Ադրբեջանի քաղաքացի է և ծոցագրպանից ցանկանում է զենք հանել, իր մոտ գտնվող որսորդական հրացանով դիտավորությամբ կյանքից զրկելու նպատակով կրակել է վերջինիս, որի հետևանքով Վիկտոր Օրդյանն ստացել է հրազենային վնասվածք: Ալիկ Հակոբյանի դեմ քրեական գործ է հարուցվել` ՀՀ քրեական օրենսգրքի 34-104 հոդվածի 1-ին մասով։ Այս մասին SHAMSHYAN.com-ը տեղեկացավ Բերդի ընդհանուր իրավասության դատարանից։ Խափանման միջոց ընտրվել է ստորագրությամբ չհեռանալը։ Առաջիկայում կնշանակվի դատական քննության օրը։

Միշտ վստահությամբ ենք լցված և գիտենք, որ այնքան ժամանակ, քանի դեռ այս մարմնի մեջ ենք բնակվում, դուրս ենք մնում մեր իսկական տնից, հեռու՝ Տիրոջից, որովհետև հավատով ենք ապրում՝ առանց տեսնելու նրան։ Բայց վստահություն ունենք և առավել ևս կուզենայինք դուրս գալ այս մարմնից և լինել Տիրոջ մոտ։ Ուստի մնանք այս մարմնի մեջ, թե հեռանանք, մեր միակ ձգտումն է հաճելի լինել Աստծուն, որովհետև մենք բոլորս էլ պիտի կանգնենք Քրիստոսի ատյանի առաջ, որպեսզի յուրաքանչյուրն իր մարմնով ընդունի երկրի վրա իր կատարած բարի կամ չար գործերի հատուցումը։