Զորակոչային հանձնաժողովի կազմում ընդգրկված՝ «Մարտունու» բժշկական կենտրոնի բժիշկ Վիկտոր Սահակյանը երկրոդ անգամ դատապարտվեց ՀՀ քրեական օրենսգրքի 315-րդ հոդվածի 1-ի մասով՝(պաշտոնեական անփութություն):

Գեղարքունի մարզի ընդհանուր իրավասության դատարանի դատավճռով Սահակյանը ինչպես նախորդ անգամ այս անգամ ևս դատապարտվեց տուգանքի՝ 300 000 ՀՀ դրամի չափով:
«Փաստինֆո»-ն ավելի վաղ տեղեկացրել էր, որ ըստ մեղադրանքի՝ Վիկտոր Սահակյանը, ընդգրկված լինելով Մարտունու զինկոմիսարիատի զորակոչային հանձնաժողովի կազմում՝ որպես բժիշկ-սրտաբան, 26.03.2015թ. կատարել է պաշտոնեական անփութություն, այն է՝ զորակոչի ընթացքում Գեղարքունիքի մարզի բնակիչ Պարգև Սողոմոնյանի սրտի հետազոտություն կատարելիս, ծառայության նկատմամբ անփույթ վերաբերմունք դրսևորելու հետևանքով, պատշաճ կերպով չի կատարել իր պարտականությունները՝ երկու օրվա մեջ՝ 2015թ. մարտի 25-ին և 26-ին «Մարտունու բժշկական կենտրոն» ՓԲ ընկերությունից էլեկտրասրտագրության երկու տարբեր արդյունքներ ստանալով, Պ.Սողոմոնյանին չի ուղարկել նեղ մասնագիտական հետազոտման /Հոլտեր-մոնիթորինգ/, որի արդյունքում չի հայտնաբերել Պ.Սողոմոնյանի մոտ առկա սրտի հիվանդությունը:

Վիկտոր Սահակյանը՝ Սողոմոնյանին տվել է սահմանափակումով զինծառայությանը Պ.Սողոմոնյանի պիտանի լինելու վերաբերյալ եզրակացություն, ինչի հիման վրա Պ.Սողոմոնյանը ճանաչվել է զինծառայությանը պիտանի սահմանափակումով և 02.07.2015թ. զորակոչվել է ՀՀ ԶՈՒ:

Սակայն ՀՀ ՊՆ կենտրոնական ռազմաբժշկական հանձնաժողովի ուղեգրով կատարված Հոլտեր-մոնիթորինգի արդյունքների համաձայն՝ Պ.Սողոմոնյանի մոտ հայտնաբերվել է «Սրտի ռիթմի խանգարում, հաճախակի փորոքային էքստրասիստոլիա /մինչև 11000 օրեկան/ ալլոռիթմիայի /բիգեմինիայի, տրիգեմինիայի/ էպիզոդներով: Եզակի սուպրավենտրիկուլյար էքստրասիստոլիա» հիվանդությունը և ԿՌԲՀ-ի որոշմամբ նա ճանաչվել է զինվորական ծառայության համար ոչ պիտանի և վաղաժամկետ զորացրվել է ՀՀ ԶՈՒ պահեստազոր:

Ամբաստանյալ բժիշկն առաջադրված մեղադրանքում իրեն մեղավոր չի ճանաչել և ցուցմունք է տվել, որ Պարգև Սողոմոնյանը 2013թվականի փետրվարի 12-ին Մարտունու զինկոմիսարիատի կողմից «Էքստրասիստոլիկ առիթմիա» նախնական ախտորոշմամբ ուղեգրվել է «Էրեբունի» բժշկական կենտրոն ստացիոնար հետազոտման, որտեղից ստացված առողջական վիճակի ակտի հիման վրա, վերջինիս մոտ ախտորոշվել է «Հաճախակի փորոքային էքստրասիստոլիա» հիվանդությունը և իր կողմից տրված եզրակացությամբ Պ.Սողոմոնյանը ճանաչվել է պիտանի զինվորական ծառայության համար՝ սահմանափակումով:

Այնուհետև, 2015թ. ամառային զորակոչին ընդառաջ, ժամկետային պարտադիր զինվորական ծառայության զորակոչվելու կապակցությամբ, համապատասխան բժշկական հետազոտությունների ենթարկվելու նպատակով Մարտունու զինվորական կոմիսարիատից 2015 թվականի մարտի 25-ին ուղեգրվել է «Մարտունու բժշկական կենտրոն» ՓԲԸ: Նշված բժշկական կենտրոնից ստացված եզրակացության հիման վրա Պ. Սողոմոնյանի մոտ ախտորոշվել է «Սինուսային առիթմիա՝ 100-70 զ. 1 րոպեում, միջին հաշվով, հաճախակի փորոքային էքստրասիստոլիա» հիվանդությունը: Էքստրասիստոլիաների կայուն լինելու կամ չլինելու հանգամանքը պարզելու նպատակով, իր կողմից 2015 թվականի մարտի 26-ին նույն բժշկական կենտրոնում նշանակվել է կրկնակի էլեկտրասրտագրություն, որի արդյունքում Պ. Սողոմոնյանի մոտ ախտորոշվել է «Սինուսային առիթմիա 75-52զ. 1/սմ, սրտի Էլ. առանցքի թեքում» հիվանդությունը:

Հիմք ընդունելով 2015թվականի մարտի 26-ի «Մարտունու բժշկական կենտրոն» ՓԲԸ կողմից տրված եզրակացությունը, հաշվի առնելով նաև այն հանգամանքը, որ Պ. Սողոմոնյանի սիրտը լսելիս, նրա սրտի աշխատանքի ռիթմը եղել է կանոնավոր՝ պաթոլոգիա չի հայտնաբերել և Սողոմոնյանին չի ուղարկել նեղ մասնագիտական հետազոտման /Հոլտեր-մոնիթորինգ/, այլ ճանաչել է պիտանի զինվորական ծառայության համար՝ սահմանափակումով և վերջինս զորակոչվել է ՀՀ ԶՈՒ:

Ամբաստանյալ բժշկի կատարած հանցանքը հիմնավորվել է տուժող Պարգև Սողոմոնյանը ցուցմունքներով այն մասին, որ ինքը ճանաչվել է պիտանի զինվորական ծառայության համար՝ սահմանափակումով:, սակայն 2015 թվականի հուլիսի 02-ին զորակոչման նպատակով, զինկոմիսարիատից տեղափոխվել է կենտրոնական հավաքակայան, որտեղից 2015 թվականի հուլիսի 03-ին իրեն ուղարկել են կենտրոնական կլինիկական զինվորական հոսպիտալ՝ բուժման և հետազոտման: 2015 թվականի օգոստոսի 05 ԿՌԲՀ-ի որոշմամբ ճանաչվել է ոչ պիտանի զինվորական ծառայության համար խաղաղ ժամանակ, պիտանի սահմանափակումով՝ պատերազմի ժամանակ և վաղաժամկետ զորացրվել է պահեստազոր:

Սողոմոնյանը նաև նշել է, որ 2015թ. ամառային զորակոչի ընթացքում, բուժհետազոտության ժամանակ, զորակոչային հանձնաժողովի բժիշկ-սրտաբանին սրտի հետ կապված գանգատներ է ներկայացրել, սակայն վերջինս պատասխանել է, որ իր մոտ դեպի առողջացման դինամիկա է նկատվում:

Դատաքննության ընթացքում հարցաքննվել է նաև վկա Հանրապետական զինվորական կոմիսարիատի ավագ բժիշկ, փոխգնդապետ Հովհաննես Մինասյանը, ով հայտնել է, որ Սողոմոնյանի առողջական վիճակի հետազոտման ակտի հետ կապված երկու տարբեր ախտորոշումների առկայության դեպքում Մարտունու զորակոչային հանձնաժողովի բժիշկ-սրտաբան՝ Վիկտոր Սահակյանը պետք է Պարգև Սողոմոնյանին ուղեգրեր նեղ մասնագիտական՝ հոլտեր-մոնիտորինգ հետազոտման և միայն դրանից հետո եզրակացություն տար Պարգև Սողոմոնյանի պիտանիության վերաբերյալ:

Ըստ փոխգնդապետ Հովհաննես Մինասյանի՝ բժիշկ Վիկտոր Սահակյանը ճիշտ չի գնահատել հիվանդության արտահայտման աստիճանը և հիմք է ընդունել միայն 2015 թվականի փետրվարի 26-ին ԷՍԳ հետազոտության արդյունքները, ինչը սխալ:

Ամբաստանյալի կատարած հանցանքը հիմնավորվել է նաև Մարտունու զինկոմիսարիատի զորակոչային բաժանմունքի պետ, փոխգնդապետ Ջիվան Ավետիսյանի և նույն բաժանմունքի զորակոչի խմբի պետ, կապիտան Սեյրան Խուդաբաշյանի ցուցմունքներով, ովքեր հայտնել են, որ Կենտրոնական հավաքակայանում ուսումնասիրելով Պ. Սողոմոնյանի անձնական գործը, ինչպես նաև առանձնազրույց ունենալով նրա հետ, հանգել են նրան, որ Սողոմոնյանը սրտի հետ կապված խնդիրներ ունի, ինչի պատճառով նրան տեղափոխել են Կենտրոնական կլինիկական զինվորական հոսպիտալ, որտեղ ենթարկվել է համապատասխան բժշկական հետազոտությունների, որի արդյունքում Սողոմոնյանը ճանաչվել է ոչ պիտանի զինվորական ծառայության խաղաղ ժամանակ և պիտանի՝ սահմանափակումով` պատերազմի ժամանակ:

Նշենք նաև, որ հանձնաժողովային դատաբժշկական փորձաքննության եզրակացության համաձայն ՝ սրտաբանի կողմից ճիշտ չի գնահատվել զինակոչիկի հիվանդության արտահայտման աստիճանը, որի ճիշտ գնահատման դեպքում Սողոմոնյանը պետք է ներկայացվեր ԿԲՀ-ի հետագա հետազոտման ծավալների /Հոլտեր մոնիտորինգի իրականացման հարցը լուծելու/ և դրա հետ կապված զինակոչիկի զինծառայությանը պիտանելիության հարցը պարզելու համար:

Ըստ փորձաքննության՝ Պ.Սողոմոնյանի մոտ առկա «Սրտի Ռիթմի խանգարումներ՝ հաճախակի փորոքային էքստրասիստոլիա», հիվանդությունը ըստ էության ձեռք բերովի է:
Էլեկտրասրտագրության սարքավորումով իրականացված հետազոտությամբ հնարավոր էր հայտնաբերել Սողոմոնյանի մոտ առկա հիվանդությունը՝ սրտի ռիթմի խանգարումը, որը և հայտնաբերվել է սրտաբանի կողմից զորակոչի ընթացքում:

Դատարանը հետազոտելով և գնահատելով գործում եղած ապացույցներն իրենց համակցությամբ, ներքին համոզմամբ, հանգել է հետևության, որ ամբաստանյալ Վիկտոր Սահակյանը կատարել է հանցավոր արարք և ենթակա է քրեական պատասխանատվության և պատժի:

Դատարանը պատիժ նշանակելիս հաշվի է առնել այն հանգամանքը, որ նշված ԲԿ-ում որտեղ աշխատում է ամբաստանյալը՝ վերջինս գնահատվում է դրականորեն, 66 տարեկան է, տուժողը բողոք չի ներկայացրել և խնդրել է ամբաստանյալին չպատժել:

Միևնույն ժամանակ նրա պատիժը և պատասխանատվությունը մեղմացնող հանգամանք չի արձանագրվել:

Հիշեցնենք նաև, որ այս նույն բժշկի թեթև ձեռքով Կարեն անունով մեկ այլ երիտասարդ ճանաչվել էր պիտանի ծառայության համար և զորակոչվել էր ՀՀ ԶՈւ՝ ժամկետային զինծառայության, վերջինիս սակայն ծառայության ընթացքում արձակուրդ է տրամադրվել և հենց այդ ժամանակ էլ կատարված մի շարք հետազոտությունների ժամանակ հայտնաբերվել է հիվանդություն և ճանաչվել է ոչ պիտանի զինծառայության համար և զորացրվել է ՀՀ ԶՈՒ պահեստազոր:

Այս գործով ևս բժիշկն իրեն առաջադրված մեղադրանքը չի ընդունել և դատապարտվել է կրկին 300 000 ՀՀ դրամի չափով տուգանքի:

Աղբյուր` Փաստինֆո

Այսօր, տեղի ժամանակով ժամը 21:00-ին, Բաքվում կհանդիպեն ադրբեջանական «Գաբալա» և Վրաստանի «Սամտրեդիա» թիմերը` Եվրոլիգայի որակավորման առաջին փուլում: Պետք է ասել, որ  վրացի և ազերի ֆուտբոլային ֆանատների թշնամանքը հասել է գագաթնակետին։Ծեծկռտուքն ու դրոշների այրումը, միմյանց արժանապատվությունը վիրավորող պաստառների ցուցադրումն ու անկարգությունները մշտապես ուղեկցում են այս երկու ազգերի ֆուտբոլային խաղերի ժամանակ:

Բաքուն հայտարարել էր, թե  երեք հազար ոստիկաններ  կհսկեն կարգուկանոնը մարզադաշտի տարածքում, մեծ թվով ոստիկաններ պարեկություն կանեն մայրաքաղաքում:

Երեկ պարզվեց, որ  «Սամտրեդիան» ժամանել է Բաքու, սակայն Վրաստանից ոչ մի մարզասեր չի ժամանել Ադրբեջան: ««Սամտրեդիային» ոչ ոք մարզադաշտում չի աջակցի» վերնագրով նյութեր են հրապարակել ադրբեջանական ԶԼՄ-ները: Արդյոք վրացիները բախումներից խուսափելու համա՞ր են մենակ թողել իրենց թիմին, թե փոխհամաձայնեցված. ադրբեջանցիներն էլ հունիսի 7-ի պատասխան խաղին չեն ժամանի Թբիլիսի:

Հնարավոր է, որ այսօր վրացական թիմի երկրպագուները ժամանեն Բաքու: Այս դեպքում « բախումներն ու անկարգություններն անխուսափելի կլինեն:

Թուրքիա-Ռուսաստան նորօրյա հաշտեցումը միանգամայն սպասելի և կանխատեսելի էր, քանի որ երկու պետություններն էլ արտամղված են Եվրոպայից, և ինչ է ստացվում, որ նրանք երկար ժամանակ հոխորտում էին, սակայն իրար կարիք ունեին:

ԳԱԼԱ-ի հետ զրույցում ռուս–թուրքական հարաբերությունների վերջին զարգացումներին անդրադառնալով՝ նման գնահատական տվեց քաղաքագետ Լևոն Շիրինյանը:

«Ռուսաստանն արտամղվեց Եվրոպայից և սանկցիաների տակ ընկավ, դարձավ իզգոյ՝ վտարակ պետություն, և պարզ է, որ նա դաշնակիցներ էր փնտրում: Սիրիայի հանգամանքով, երբ թուրքերն ինքնաթիռը խոցեցին, ռուսները քաղաքականությունն արմատապես փոխեցին թուրքերի հանդեպ, և վատացավ հարաբերությունները, որովհետև իրար հետ հաշիվներ էին մաքրում, բայց, ըստ էության, նրանք իրար նաև ձգում էին:

Դա շատ ակնհայտ էր: Ճիշտ է, Պուտինը հոխորտում էր, Ժիրինովսկին չգիտեմ ինչ էր անում, բայց բոլոր դեպքերում իրար կարիք շատ ունեին: Երբ որ դրան գումարվեց նաև Բունդեսթագի կողմից Հայոց ցեղասպանության ակտի ճանաչումը մեղքի հանձնառումով, սա արդեն նոր քայլի արտամղեց թուրքերին: Նրանք, ըստ էության, Ռուսաստանի հետ հարաբերությունների վատացումը կապեցին Դավիթօղլուի հետ, իբրև թե նա Եվրոպա էր գնում, իսկ իրենք շուռ եկան Ռուսաստանի հետ դաշինքի որոնմանը: Սա պատմության մեջ միշտ է եղել Ռուսաստան-Թուրքիա հարաբերությունների մեջ: Զարմանալի ոչինչ չկա»:

Քաղաքագետը ռուս-թուրքական այս նոր հաշտեցումը որակում է ցինիզմ և համեմատում 1920-ականների հետ: Ըստ նրա՝ նույն մոդելի կրկնությունն է, երբ ձևավորվել էր Քեմալ-Աթաթուրք դաշինքը, որի զոհը դարձավ Հայաստանի առաջին հանրապետությունը և հայ ժողովուրդը:

«Հիմա պիտի մտածել՝ այս նույնը կարող է կրկնվել, թե ոչ: Անշուշտ դժվարություններ 100 տոկոսով կունենանք, բայց մեր քաղաքական, ռազմական ղեկավարությունը կունենա արդյոք այնքան կամք ու համարձակություն, որ կարողանա ճիշտ խաղ տանել:

Այստեղ հաջողություն կունենա քաղաքական այն ղեկավարությունը, որի համար անկախությունը կյանքի ու մահվան հարց է: Եթե այսպես եղավ, պրոբլեմ չեմ տեսնում, իսկ եթե ոչ, պրոբլեմ կունենանք»:

Ինչպե՞ս կարող է ռուս-թուրքական հարաբերությունների վերջին զարգացումները պրոեկտվել ԼՂ խնդրի վրա:

Ըստ Շիրինյանի՝ եթե հարաբերությունների լավացումն առաջխաղացում արձանագրի, ապա Թուրքիան կարող է նաև պահանջել զիջումներ ռուսների կողմից Արցախի հարցում:

«Բայց մենք պիտի հասկանանք, որ Արցախը Ռուսաստան չէ, մենք էլ կենդանի մարդիկ ենք: Առաջինը հայկական կողմը պետք է ռուսներին ցույց տա՝ պանթյուրքիզմի վտանգ կա, ու հենց իրենց համար: Հայաստանի քաղաքական ղեկավարությունը և ինտելեկտուալ շերտը, ովքեր համապատասխան կրթություն ունեն, քաղաքագետ են և համազգային շահն են հասկանում, ռուսներին պետք է ներկայացնեն հայկական օրակարգ, որ մեր այս պահանջներն Արցախի հարցում պետք է բավարարվեն: Եթե չէ, պետք է Հայաստանը մտածի իր դաշնակիցների մասին: Եվ Հայաստանը պետք է որ պատրաստ լինի շրջադարձի: Այստեղ մի վտանգ կա, որ անպայման հինգերորդ շարասյունը կխանգարի»:

Այս նոր զարգացումների ֆոնին քաղաքագետը խիստ վտանգավոր որակեց նաև ՀՕՊ միասնական համակարգի մասին համաձայնագրի վավերացումը՝ հայտարարելով, որ պետք է ունենալ ազգային հակաօդային պաշտպանություն:

Լրագրող Թաթուլ Հակոբյանը վստահեցնում է՝ Կազանյան փաստաթուղթը նման է 1997-ին Լևոն Տեր-Պետրոսյանի առաջարկած փուլային լուծման առաջարկին: Հիշեցնենք, որ լրագրող Թաթուլ Հակոբյանը օրեր առաջ հրապարակել էր ղարաբաղյան կարգավորման Կազանյան կոչված փաստաթուղթը, որը մինչև 2011թ. աշխատանքային փաստաթուղթ էր ԼՂ հիմնահարցի շուրջ բանակցային գործընթացի մասնակիցների համար: «Կազանյան փաստաթուղթը, այո, համարում եմ, որ շատ մոտ է Լեւոն Տեր Պետրոսյանի 1997-ին առաջարկած կարգավիճակին, որը ագրեսիվ կերպով մերժեցին այն ժամանակվա վարչապետ Ռոբերտ Քոչարյանը, այն ժամանակվա ներքին գործերի նախարար Սերժ Սարգսյանը, ամենազոր համարվող Վազգեն Սարգսյանը… այսօր բանակցային սեղանին դրված է նոր կազանյան փաստաթուղթ, որն ավելի վատն է, քան կազանյանը, որը մերժել է Ադրբեջանը,: Լավրով-Պուտին պլանի եւ Տեր Պետրոսյանի առաջարկածի նմանությունն այն է, որ երկու դեպքում էլ Ղարաբաղի կարգավիճակը թողնվում է անորոշ ապագային: Ճիշտ է ռուսական առաջարկներում որոշակի առավելություն կա այն իմաստով, որ գոնե խոսք է գնում հանրաքվեի մասին, բայց ակնհայտ է, որ Ադրբեջանը դա չի ընդունում ու դա իրականանալի չէ:

Ինչպես 1997-ին, այնպես էլ այս Պուտին, Լավրով պլանում նույնպես կարգավիճակի հարցը թողնվում է ապագային: Տարածքների հարցը լուծվում է այնպես, ինչպես 1997-ին առաջարկում էր լուծել Տեր Պետրոսյանը: Երկու մեծ բաց կա, արդյոք ՀՀ եւ ԼՂ իշխանություններն ընդունելու են Լավրով-Պուտին պլանը, որովհետեւ ի տարբերություն 1997-ին, գոնե գրավոր տեքստում խոսք չէր գնում Քարվաճառը հետ տալու մասին, այս առաջարկներում, որը չի հրապարակվել, բայց որի բովանդակությանը ես ծանոթացել եմ, Քարվաճառի հարցը եւս թողնվում ապագային, ինչպես Լաչինը, վերադարձվում է հինգ շրջան»,- մեզ հետ զրույցում ասաց Թաթուլ Հակոբյանը:

Լրագրողը նկատեց, որ գոնե Տեր-Պետրոսյանը ազնվորեն հասարակությանը հայտնեց՝ փուլային լուծումն ինչ է նախատեսում. ««Պատերա՞զմ, թե՞ խաղաղություն․ լրջանալու պահը» հոդվածով, հստակ ներկայացրեց իր դիրքորոշումը և իր այդ անկեղծության պատճառով էլ զրկվեց իշխանությունից: Սերժ Սարգսյանը ոչինչ չէր ասում, ոչ ոք չգիտեր, որ նա հինգ տարի առաջ Կազանում համաձայնություն է տվել փուլային տարբերակին և միայն պատերազմից ու կորուստներից հետո ստիպված էր խոստովանել, թե ինչ փաստաթուղթ է դա: Բացի դա, Տեր-Պետրոսյանն իր իշխանության վրա էր վերցնում փուլային տարբերակի պատասխանատվությունը, հստակ ներկայացնում էր, որ դա իր և ՀՀՇ-ի ընտրությունն է: Ի տարբերություն, 1997-ի՝ այսօրվա նախագահը կարողացել է գտնել պատասխանատվությունից խուսափելու ձևը»:

aravot.am

Ապա այդտեղից ելնելով՝ Հիսուսը գնաց Տյուրոսի և Սիդոնի կողմերը։ Եվ ահա քանանացի մի կին, որ այդ կողմերից էր, եկավ Հիսուսի մոտ և բարձրաձայն ասաց.
— Տե՛ր, Դավթի՛ Որդի, ողորմի՛ր ինձ, աղջիկս տանջվում է չար ոգուց։
Բայց Հիսուսը պատասխան չտվեց նրան։ Այն ժամանակ աշակերտները մոտեցան և աղաչելով ասացին.
— Արձակի՛ր նրան, որովհետև աղաղակում է մեր հետևից։
Հիսուսը պատասխանեց.
— Ես միայն Իսրայելի ժողովրդի կորած ոչխարների համար եմ ուղարկվել։
Սակայն կինը մոտեցավ և նրա առաջ ծնկի եկած՝ ասաց.
— Տե՛ր, օգնի՛ր ինձ։
Հիսուսը պատասխանեց.
— Ճիշտ բան չէ մանուկների ձեռքից հացն առնել և շներին գցել։
Կինն ասաց.
— Այո՛, Տե՛ր, բայց նույնիսկ շներն իրենց տիրոջ սեղանից ընկած փշրանքներով են կերակրվում։
Այն ժամանակ Հիսուսը նրան պատասխանեց.
— Ո՛վ կին, մեծ է քո հավատը, թող քո ուզածի պես լինի։
Եվ նույն պահին նրա աղջիկը բժշկվեց։
(Մատթեոսի ավետարան 15:21-28)

Ռուբեն աբեղա Զարգարյան

Հանրապետության տարածքում`

Հունիսի 29-30-ը հյուսիսային շրջաններում, հուլիսի 1-3-ը շրջանների մեծ մասում՝ գիշերը և օրվա երկրորդ կեսին, սպասվում է կարճատև անձրև և ամպրոպ, առանձին հատվածներում հնարավոր է կարկուտ:

Քամին՝ հարավ-արևմտյան՝ 2-7 մ/վ արագությամբ, ամպրոպի ժամանակ հնարավոր է քամու ուժգնացում‵ 20-25 մ/վ:

Օդի ջերմաստիճանը 29-30-ը կբարձրանա 2-3 աստիճանով, հուլիսի 1-2-ը կնվազի 3-4 աստիճանով:

Երևանում՝

Հունիսի 29-30-ը սպասվում է առանց տեղումների եղանակ: Հուլիսի 1-3-ը՝ երեկոյան ժամերին, առանձին հատվածներում հնարավոր է կարճատև անձրև և ամպրոպ: Ամպրոպի ժամանակ սպասվում է քամու ուժգնացում‵ 15-20 մ/վ արագությամբ:

Երևանի հունիսի 29-ի բազմամյա կլիմայական տվյալներ.

• Օդի առավելագույն ջերմաստիճան՝    38.0⁰C (1996 թ.)
• Օդի նվազագույն ջերմաստիճան՝       11.0⁰C (1994 թ.)
• Օդի միջին օրական ջերմաստիճան՝   24.2⁰C

ՀՀ ԳԵՏԵՐԻ. ԼՃԵՐԻ ԵՎ ՋՐԱՄԲԱՐՆԵՐԻ ՎԻՃԱԿԸ: ՏՎՅԱԼՆԵՐ ՍԵՎԱՆԱ ԼՃԻ ՎԵՐԱԲԵՐՅԱԼ

Հանրապետության գետերում դիտվել է փոփոխական ռեժիմ:

Քիչ առաջ ԱԺ ամբիոնից ՀԱԿ խմբակցության պատգամավոր Նիկոլ Փաշինյանը մեղադրեց բոլոր ընդդիմադիր քաղաքական ուժերին ՝ ՕԵԿ-ին, «Բարգավաճ Հայաստանին» և ՀԱԿ-ին, իշխանության խամաճիկը լինելու մեջ: Փաշինյանը անձնական վիրավորանքներ հնչեցրեց նշյալ քաղաքական ուժերի հասցեին, ինչին ի պատասխան, Հեղինե Բիշարյանը տեղից բղավեց. «Համբա՛լ, ոչխար, ա՛յ իշխանության կամակատար, ա՛յ իշխանության հաճախորդ, ձենդ կտրի , անասուն, թե չէ էս շիշը կտամ գլխիդ»:

Բիշարյանը տեղից սկսեց գոռգոռալ՝ «Այ լոպա՛զ, սուս մնա՛»:

Փաշինյանը պատասխանեց. «Վալերյանկա չկա՞ մի հատ, հանգստացի՛ մի հատ, ի՛: Էդ որ ասում եք՝ ժողովուրդը ամեն ինչ հիշում ա, էդ ի՞նչ նկատի ունեք: Էդ մոռացե՞լ եք, որ մինչեւ 2014-ը կոալիցիայի անդամ բերաններդ ջուր առած երկու տարի կնոպկա եք սեղմել Տիգրան Սարգսյանի կառավարության համար, է՞ս գիտի ժողովուրդը, թե՞ գիտի, որ Մարտի 1-ի զոհերի արյունները գնել եք քեշ պաշտոններով, քեշ փողով»:

Բիշարյանը տեղից ձեռքը տնկեց ու բղավեց՝ Մարտի 1-ի արյունը ձեր վզին ա: Փաշինյանը խորհուրդ տվեց՝ «Թուլցե՛ք»:

Քանի որ Նիկոլ Փաշինյանն անդրադարձել էր նաև ԲՀԿ խմբակցության ղեկավար Նաիրա Զոհրաբյանին, օգտվելով արձագանքի իր իրավունքից, Նաիրա Զոհրաբյանն ասաց. «Այն, ինչը որ այստեղ հնչեցրեց նշյալ գործիչը ՝ լկտի, անամոթ սուտ է ՝ տղամարդուն ոչ վայել սուտ, որն իրականությանը չի համապատասխանում: Այո, իմ նշյալ ելույթի հետ կապված, ինչին անդրադարձավ վերոնշյալ գործիչը, ես խնդրել եմ իմ լրագրող գործընկերներին հանել որոշ պարբերություն և նրանք հարգել են իմ խնդրանքը, բայց, խնդրանքս բնավ կապ չի ունեցել այն պատճառի հետ, ինչն այստեղից լկտիաբար ստելով և իրականությունն աղավաղելով բարձրաձայնեց նշյալ գործիչը: Ես իմ արժանապատվությունից ցածր եմ համարում այսուհետ նման անբարո, տղամարդուն ոչ վայել պահվածքին անդրադառնալը»,-ասաց Նաիրա Զոհրաբյանը:

Մոսկվայի քաղաքային դատարանը հունիսի 28-ին հաստատել է հայտնի գործարար և բարերար, «Սոբեսեդնիկ» հրատարակչատան տնօրեն Լևոն Հայրապետյանի դատավճիռը: Հայրապետյանը դատապարտվել է 4 տարվա ազատազրկման` ցմահ ազատազրկման դատապարտված նախկին սենատոր Իգոր Իզմեստևի մորից 700.000 դոլար շորթելու մեղադրանքով, հայտնում է ՌԻԱ Նովոստին:

«Դատավճիռը թողնել անփոփոխ, բողոքարկումը` չբավարարել»,-հրապարակել է դատարանի որոշումը դատավորը: Այժմ դատավճիռը համարվում է ուժի մեջ մտած:

Հայրապետյանը դատապարտվել է 4 տարվա ազատազրկման ընդհանուր ռեժիմի գաղութում և պարտավոր է տուժածի օգտին վճարել 20,8 մլն ռուբլի:

Ավելի վաղ նիստը հետաձգվել էր, քանի որ դատավորները պետք է լրացուցիչ ուսումնասիրեին բողոքող կողմի պահանջները: Նախորդ նիստին դատապաշտպանը ներկայացրել էր մի շարք դիմումներ մշակույթի և արվեստի, Մոսկվայի հայկական համայնքի ներկայացուցիչների կողմից` խնդրելով Հայրապետյանին նշանակել պատժամիջոց, որը չի նախատեսի ազատազրկում: Նշվել է, որ դատապարտյալը հայտնի բարերար է և մի շարք շնորհակալագրեր ունի, այդ թվում Ռուսաստանում օլիմպիական շարժման զարգացման, Ղրիմում հայկական մշակույթի զարգացման համար: Դատապաշտպանները նաև ուշադրությունը հրավիրել էին Հայրապետյանի վատթարացող առողջական վիճակի վրա, որը տառապում է մի շարք խրոնիկ հիվանդություններով:

Կյանքից հեռացել է արձակագիր, հրապարակախոս Հրաչյա Մաթևոսյանը (Հրաչօ): Նա, ի դեպ, Հրանտ Մաթևոսյանի եղբայրն էր։ Հրաչյա Մաթևոսյանը  79 տարեկան էր:

«Մաճկալներ», «Բարի մարդկանց հովիտը», «Աստղերի հետ թռչում էր իմ ձին», «Ալևորներ» վիպակների ու պատմվածքների ժողովածուները պատկանում են նրա գրչին:

Ծանրամարտի միջազգային ֆեդերացիայի (IWF) կողմից ամերիկյան Հյուսթոն քաղաքում 2015 թվականի աշխարհի առաջնության նորացված արդյունքների հրապարակումից հետո պարզ է դարձել, որ Ադրբեջանը զրկվել է ծանրամարտի օլիմպիական բոլոր լիցենզիաներից:
Ինչպես հաղորդում է “Արմենպրես”-ը` վկայակոչելով ադրբեջանական ԶԼՄ-ները, Ադրբեջանից հետ են վերցրել աշխարհի անցյալ տարվա առաջնության արդյունքներով խթանիչներ օգտագործած վեց ծանրորդների միավորները: Արդյունքում տղամարդկանց օլիմպիական աղյուսակում Ադրբեջանը 16-րդ տեղից իջել է 31-րդ տեղը, ինչի համար այդ երկրին Ռիոյում 2016 թվականի Օլիմպիադայի մասնակցության թույլտվություն չի հասնում, քանի որ քվոտաները ստանում են միայն 24 լավագույն երկրները: Ռիոյի Օլիմպադա չեն մեկնի նաև Ադրբեջանի կին ծանրորդները, որովհետև կանանց ցուցակում Ադրբեջանը զբաղեցնում է 26-րդ տեղը:
Meydan TV հեռուստաալիքի կայքն ավելի վաղ հայտնել էր, որ Ադրբեջանի ծանրամարտի հավաքականի 6 անդամ անցյալ տարի նոյեմբերին ԱՄՆ-ում անցկացված աշխարհի առաջնության արդյունքներով 8 տարի ժամկետով որակազրկվել են խթանիչներ օգտագործելու համար:
Որակազրկվածների թվում են նաև արտասահմանից հրավիրված մարզիկներ Վալենտին Խրիստովը և Բոյանկա Կոստովան, ինչը նշանակում է, որ նրանք չեն կարող մասնակցել Ռիո-2016 Օլիմպիական խաղերին, որոնց մեդալներ նվաճելու հետ մեծ հուսեր էր կապում Ադրբեջանը:
Ադրբեջանական ԶԼՄ-ները հայտնում են, որ բարձրակարգ սեփական մարզիկներ չունենալու պատճառով Ադրբեջանը Ռիոյի Օլիմպիադային կմասնակցի մի թիմով, որում 70 տոկոսից ավելին արտասահմանյան երկրներից հրավիրված մարզիկներ են:
Ադրբեջանի երիտասարդության և սպորտի նախարարությունն արդեն հայտնել է 45 մարզիկների անունները, որոնք պետք է Ադրբեջանը ներկայացնեն Ռիոյում Օլիմպիական խաղերում:
“Ներկա պահին Ադրբեջանի հավաքականի մարզիկների 70 տոկոսից ավելին արտասահմանցիներ են, որոնք ներգրավվել են Ռուսաստանից, Կուբայից, Ուկրաինայից, Եթովպիայից, Բուլղարիայից, Սլովենիայից, Իրանից, Մոլդովայից, Վրաստանից և Բելոռուսից:
Հասկանալի է, որ արտասահմանցի մարզիկների ներգրավումն արվել է հանուն օլիմպիական մեդալների նվաճման, հանուն այն բանի, որպեսզի Օլիմպիադայում հնչի Ադրբեջանի հիմնը և երևա նրա դրոշը: Սակայն, 70 տոկոս արտասահմանցի մարզիկներով Օլիմպիադային ներկայանալն արդեն գերավելորդություն է”, — այդ առնչությամբ դժգոհություն է հայտնել haqqin.az կայքը: