Պեմզաշենում 31-ամյա կնոջը և նրա երկու երեխային դաժանաբար սպանած տղամարդը սեռական ոտնձգություն է կատարել՝ 12 տարեկան աղջիկ երեխայի նկատմամբ։ Տեղեկությունը «Փաստինֆո»-ի հետ զրույցում հաստատել են ՔԿ-ից։

Հիշեցնենք, որ նոյեմբերի 9-ին Շիրակի մարզի Պեմզաշեն գյուղում ողբերգական դեպք է տեղի ունեցել։ Ժամը 12։25-ի սահմաններում ԱԻՆ ՓԾ 911 ճգնաժամային կառավարման կենտրոն ահազանգ է ստացվել, որ բժիշկների հերթապահ խումբը կանչով մեկնել է Պեմզաշեն գյուղի տներից մեկը, որտեղ բնակիչները չեն արձագանքում դռան և հեռախոսազանգերին։ Քաղաքացիները, ԱԻՆ ծառայողները և ոստիկանները բացել են տան դուռը և հայտնաբերել 3 դի։ Մահացածներն են՝ մայրը՝ 31-ամյա Զարինեն, ու նրա երկու երեխաները՝ 12 տարեկան դուստրը և 8 տարեկան որդին։ Դեպքի առթիվ նախաձեռնվել է քրեական վարույթ՝ ՀՀ քրեական օրենսգրքի 155-րդ 1-ին մասով՝ սպանության և նույն հոդվածի 2-րդ մասի 5-րդ կետով՝ անչափահասի սպանության հատկանիշներով։

Իրավապահ մարմինները հայտնել էին, որ տան ննջասենյակի մեկտեղանի մահճակալին հայտնաբերվել է արական սեռի երեխայի դի՝ կրծքավանդակի հատվածում կտրած-ծակած վերքերով՝ ձեռքերը և ոտքերը կապած վիճակում, նույն ննջասենյակի հատակին հայտնաբերվել է իգական սեռի երեխայի դի՝ կրծքավանդակի հետին մակերեսին և որովայնի հատվածներում կտրած-ծակած վերքերով, իգական սեռի դի՝ որովայնի և կրծքավանդակի հատվածներում ու կրծքավանդակի հետին մակերեսին կտրած-ծակած վերքերով՝ ձեռքերը հետնամասում թելով կապված վիճակում:

Դաժան սպանության կասկածանքով նոյեմբերի 12-ին ձերբակալվել էր Շիրակի մարզի 32-ամյա բնակիչը, որը ոստիկանությունում տվել է ինքնախոստովանական ցուցմունք, հաջորդ օրը ձերբակալվել է նաև հանցանքը ենթադրաբար կատարած երկրորդ անձը՝ 36-ամյա տղամարդ։ Տղամարդիկ, ըստ գյուղի բնակիչների, ազգականներ են, երկուսն էլ ամուսնացած են, ունեն երեխաներ։ Սպանված կնոջ ամուսինը ՌԴ-ում էր՝ արտագնա աշխատանքի, վերադարձել է ողբերգական դեպքից հետո։

ՔԿ-ից «Փաստինֆո»-ի հետ զրույցում հայտնեցին, որ ձերբակալվածներին մեղադրանք է առաջադրվել, նրանց նկատմամբ կալանավորումը որպես խափանման միջոց ընտրելու մասին միջնորդություններ ներկայացվել դատարան, որոնք դեռևս քննվում են։ Այլ մանրամասներ հայտնելուց ՔԿ-ից առ այժմ զերծ մնացին, սակայն հաստատեցին շրջանառվող տեղեկությունն առ այն, որ տղամարդը սեռական ոտնձգություն է կատարել սպանված 12 տարեկան աղջիկ երեխայի նկատմամբ։

Ռուսաստանի պաշտպանության նախարարությունն Ադրբեջանին մեղադրել է գյուղատնտեսական աշխատանքներ իրականացնող խաղաղ բնակչի ուղղությամբ կրակելու մեջ:

Ինչպես հաղորդում է «Արմենպրես»-ը, ՌԴ պաշտպանության նախարարության կայքում հրապարակվել է Լեռնային Ղարաբաղում ՌԴ խաղաղապահ զորակազմի տեղեկագիրը, որում նշվում է, որ Ասկերանի շրջանում ֆիքսվել է հրադադարի ռեժիմի խախտում. «Նոյեմբերի 12-ին, ժամը 15:30-ին ադրբեջանական դիրքից հրաձգային զենքից կրակ է արձակվել տեղի բնակչի ուղղությամբ, որը գյուղատնտեսական տեխնիկայով հողային աշխատանքներ է իրականացրել Խրամորթ բնակավայրից 1.8 կիլոմետր արևելք ընկած հատվածում»,- ասված է հաղորդագրության մեջ:

Նշվում է, որ կրակի հետևանքով բնակիչը թեթև վիրավորվել է, իսկ նրա տեխնիկան՝ կրել աննշան վնաս:

«Խաղաղապահ զորակազմի հրամանատարությունն ադրբեջանական կողմի հետ հետաքննություն է անցկացնում փաստի առթիվ»,- ասված է հաղորդագրության մեջ:

Նոյեմբերի 12-ին ժամը 18:00-ի սահմաներում, ոստիկանության Ասկերանի շրջանային բաժնում հաղորդում է ստացվել, որ Խրամորթ գյուղի վարչական տարածքում ադրբեջանական մարտական դիրքից հրաձգային զինատեսակներից կրակոցներ են արձակվել դաշտում տրակտորով աշխատող քաղաքացիական անձանց ուղղությամբ:

Դեպքի վայր մեկնած շրջանային բաժնի ծառայողները պարզել են, որ նույն օրը ժամը 16:30-ի սահմաններում, Խրամորթ գյուղի բնակիչներ` 27-ամյա Ս.Վանյանը և 45-ամյա Ա. Հայրապետյանը նշված գյուղի վարչական տարածքի «100 հեկտար» կոչվող տեղանքում, «Տ-150» մակնիշի տրակտորով գյուղատնտեսական աշխատանքներ իրականացնելիս, մերձակա տարածքում տեղակայված ադրբեջանական մարտական դիրքից նրանց ուղղությամբ կրակ է արձակվել։

Կրակոցներից ջարդվել է տրակտորի դիմային և հետևի հողմապակիները։ Ջարդված դիմապակու կտորները դիպչել են Ա. Հայրապետյանի դեմքին`պատճառելով մարմնական վնասվածքներ: Վերջինս տեղափոխվել է հանրապետական բժշկական կենտրոն։

Շիրակի մարզի Պեմզաշեն գյուղում 31-ամյա Զարինե Մելիքսեթյանին ու նրա 8 և 12 տարեկան երեխաների սպանության մեջ կասկածվող երկու անձանց ընտանիքներին գյուղից տարհանել են հնարավոր հաշվեհարդարից խուսափելու համար։ Տեղեկությունը հայտնում է Sputnik Արմենիայի թղթակիցը։ Ավելի վաղ լուրեր էին տարածվել, որ գյուղում լարված իրավիճակ է, անգամ փորձել են կասկածյալների տներն այրել։ «Այս պահին գյուղում հանգիստ է, լարվածություն չկա, ոչ մեկը չի ցանկանա հաշվեհարդար տեսնել, գնալ նրանց հետ նստել»,–ասաց գյուղացիներից մեկը` Սոկրատ Պետրոսյանը։ Բնակիչները չէին սպասում, որ կասկածյալները կարող են գյուղից լինել։ Պետրոսյանի խոսքով` դեպքի վայրի մոտակայքում տեսախցիկներ են եղել, որոնք էլ հնարավոր է՝ օգնել են ոստիկաններին բացահայտել հանցագործությունը։ Գյուղի մեկ այլ բնակիչ Վոլոդյա Հակոբյանն էլ վստահ է, որ այսուհետ ոչ սպանվածների հարազատները կարող են այդ տանը բնակվել, ոչ էլ գյուղում՝ հանցագործների հարազատները։ «Գլուխները կառնեն կփախնեն»,–ասաց նա։ Առաջին կասկածյալի հետ կապված գյուղացիները մի բնորոշում են տալիս` «խուլիգան է», բայց չեն հասկանում, թե երկրորդ կասկածյալը ինչպես կարող էր նման բան անել։ «2–րդ կասկածյալը 10 օր առաջ է արտագնա աշխատանքից վերադարձել։ Գյուղի միջի տղա է, շփվող, երևացող , եթե ինքը եղած լինի, կափսոսեմ իր համար։ Գնում էր Ռուսաստան, աշխատում էր, գալիս էր։ Ընտանիքն իրենից 2 օր առաջ էր գյուղ եկել»,–ասաց գյուղացին։

Երբ թշնամիդ սպառնում է, չես կարող անտեսել դրանք, միշտ պետք է պատրաստ լինես պատերազմի։ Խաղաղության հասնելու լավագույն միջոցը պատերազմին պատրաստվելն է։ Այս մասին NEWS.am -ի թղթակցի հետ զրույցում ասաց The California Courier թերթի հրատարակիչ, խմբագիր Հարութ Սասունյանը։

Նա նշել է, որ Ալիեւը շարունակում է սպառնալ Հայաստանին ուժի կիրառմամբ՝ շեշտելով այն փաստը, որ Հայաստանը իբր չի կատարում նոյեմբերի 9-ի հայտարարությամբ ստանձնած պարտավորությունները։

«Ալիեւը հերթական անգամ բարձրացրել է միջանցքի հարցը եւ հայտարարել հայկական ուժերին Արցախից դուրս բերելու պահանջի մասին (ինչն արդեն արվել է)։ Ալիեւը երկու հարցն էլ խեղաթյուրում է:

Բայց ակնհայտ է, որ նա բոլորովին այլ բանի մասին է մտածում, մտադիր չէ դադարեցնել ագրեսիան։ Նույնիսկ Վաշինգտոնյան հանդիպման օրը Ադրբեջանը գնդակոծել է հայկական դիրքերը։ Սա նշանակում է, որ Բաքուն լիովին անտեսում է խաղաղ բանակցությունները եւ շարունակում է անել այն, ինչ ուզում է»,- հավելեց Սասունյանը։

Նա բացատրեց, որ եւ՛ ԱՄՆ-ն, եւ՛ Ֆրանսիան շահագրգռված են Հարավային Կովկասի տարածաշրջանում կայունության հաստատմամբ, որպեսզի կարողանան ստանալ երկու բան։ Առաջինը՝ Ադրբեջանի էներգետիկ ռեսուրսներն են, որոնց կարիքն այսօր Եվրոպան ունի։ Երկրորդը՝ մնչեւ վերջերս Ռուսաստանի ազդեցության գոտին համարվող տարածաշրջանում իր ազդեցությունը տարածելն է:

«Սակայն դա չի նշանակում, որ Թուրքիան եւ Ադրբեջանը՝ Արեւմուտքին թույլ կտան անել այն, ինչ ուզում է։ Անկարան եւ Բաքուն կշարունակեն իրենց կամքը պարտադրել Հայաստանին եւ տարածաշրջանին։ Արեւմուտքը մտադիր չէ ուժ կիրառել Ադրբեջանի եւ Թուրքիայի նկատմամբ, առավել եւս, որ Անկարան ՆԱՏՕ-ի դաշնակիցն է, իսկ Ադրբեջանը՝ Թուրքիայինը։

Միակ բանը, որ արվում է 44-օրյա պատերազմից հետո, տարբեր հայտարարություններ են անում, որոնք Թուրքիան ու Ադրբեջանը անտեսում են»,- ընդգծեց Սասունյանը։

Համեմատելով Արեւմուտքի համար Հայաստանի եւ Ուկրաինայի կարեւորությունը՝ նա նշեց, որ Ուկրաինան գտնվում է Եվրոպայի կենտրոնում, եւ ցանկացած եվրոպական երկիր շատ ավելի կարեւոր է Արեւմուտքի համար, քան Հարավային Կովկասի որեւէ պետություն, այդ թվում՝ Վրաստանը:

Ուղիղ երկու տարի լրացավ այն ժամանակվանից, երբ սեփական ժողովրդի արդար ցասումից սարսափած իշխանությունները չտեսնված ու չլսված անվտանգության միջոցառումներ ձեռնարկեցին սեփական անվտանգությունն ապահովելու համար։ 2020 թվականի նոյեմբերի 9-ից հետո ՔՊ-ականները Նիկոլ Փաշինյանի գլխավորությամբ «հոդս էին ցնդել»։ Մի քանի շաբաթ անց միայն նրանք կարողացան վերադառնալ իրենց տներ ու աշխատավայրեր։

Այդ օրերին մամուլը գրում էր, որ Փաշինյանի ու իր ընտանիքի անվտանգությունն ապահվելու համար անգամ ՀՕՊ համակարգեր են գործի դրել, կառավարական ամառանոցների տարածքում։ Այսօր էլ Նիկոլ Փաշինյանն ու իր թիմի առանցքային պաշտոնյաները շրջում են տասնյակ զինված թիկանպահների ուղեկցությամբ։

Օրերս  հայտնի դարձավ, որ Ազգային Ժողովի պարսիպներն են բարձրացվում և փշալարապատվում, ավելին փշալարերով, ըստ «Հրապարակ» օրաթերթի նաև էլեկտրական հոսանք են անցկացնելու։ Խոսակցություններ կան, որ ինչպես 2020 թվականի նոյեմբերին, այնպես էլ հիմա կառավարական ամառանոցի և Ազգային Ժողովի տարածքը պաշտպանվում է ՀՕՊ համակարգերով։ Իշխանությունները ըստ էության վախենում են ոչ միայն սեփական ժողովրդից, այլև ինչ որ ուժերից, որոնք կարող են նաև օդային ճանապարհով հասնել իրենց։

ՊՆ մամուլի խոսնակ Արամ Թորոսյանը սկզբում Politik.am-ի լրագրողի հարցին ի պատասխան, թե արդյո՞ք բանակի ՀՕՊ-ը պաշտպանում է ԱԺ-ն և կառավարական ամառանոցը ասաց, որ հարցումը գրավոր ուղարկենք, սակայն տաս րոպե անց ինքը հետ զանգահարեց և հայտարարեց, որ հերքում է եղած տեղեկատվությունը։

Հ․Գ․ Իշխանություններն իհարկե կարող են ամեն բան էլ հերքել, բայց այս ընթացքում մենք հասցրել ենք տեսնել հարյուրավոր տեղեկությունների վերաբերյալ հերքումներ, որոնք վերջում հաստատվել են, իսկ իշխանությունը չի էլ ամաչել ստի ու կեղծիքի համար։ Վկան 44-օրյա պատերազմի «Հաղթելու ենք»-ներն են։

Աղբյուրը՝ Politik.am

2022 թվականի նոյեմբերի 8-ին Ադրբեջանի նախագահն այցելել էր օկուպացված հայկական Շուշի, որտեղից հերթական անգամ ռազմատենչ հայտարարություններ էր արել, մի կողմից՝ ուղղված միջազգային հանրությանը, թե որևէ մեկն իրեն չկարողացավ ու չի կարող կանգնեցնել, պատերազմական գործողություններ սկսելու համար, մյուս կողմից՝ արցախահայությանը, հայ ժողովրդին՝ ասելով, թե արցախահայությունը հույսը դրել է  ռուս խաղաղապահների վրա, որոնք շուտով այնտեղից դուրս կգան։

168.am—ի հետ զրույցում Արցախի Հանրապետության արտաքին գործերի նախարար Դավիթ Բաբայանն ասաց, որ Ալիևի այդ բոլոր հայտարարությունները հայատյացության արդյունք են, նաև՝ հակառուսականության արդյունք։

«Այս հայտարարությունները համընկնում են Ուկրաինայում պատերազմական գործողությունների ընթացքի հետ։ Երբ Ուկրաինայում ռուսական կողմի համար որոշակի դժվարություններ են առաջանում, Ալիևը սկսում է  ակտիվանալ, ուշի ուշով հետևում ու սպասում են Ռուսաստանի պարտությանը՝ ցանկանալով օգտվել այդ ամենից։

Արցախում տեղակայված ռուս խաղաղապահների մանդատին դեռևս 3 տարի կա, վաղ է խոսել նրանց Արցախում մնալու ժամկետի երկարաձգման կամ հակառակի մասին։ Ալիևը, իհարկե, մանիպուլյացիաներ է անում, փորձում է դիվիդենտներ շահել, արցախահայությանը վախեցնել, ռուսներին է հարվածում, սակայն դեռևս ժամանակ կա խաղաղապահների հարցը քննարկելու համար»,- նշեց Դավիթ Բաբայանը։

Արցախի ԱԳ նախարարի խոսքով՝ Ալիևի հայտարարությունը, թե իրեն որևէ մեկը չի կարող կանգնեցնել, ոչ միայն շանտաժ ու արհամարհանք է միջազգային հանրության նկատմամբ,  այլև՝ մեղադրանք է։

«Փաստորեն նման հայտարարություններով  Ադրբեջանն իր ագրեսիային ու ցեղասպան քաղաքականությանը մասնակից է դարձնում միջազգային հանրությանը։ Այսպիսով՝ Ալիևն ասում է՝ եթե միջազգային հանրությունն այդքան լավն է, ժողովրդավարության, մարդու իրավունքների պաշտպանության բաստիոն է, բա ինչո՞ւ իրեն չեն կանգնեցրել, գուցե եթե ուզենային կանգնեցնել՝ կկանգնեցնեին»,- եզրափակեց Դավիթ Բաբայանը։

Միջազգայնագետ Սուրեն Սարգսյանը ներկայացրել է, թե ԱՄՆ-ում միջանկյալ ընտրություններից հետո ինչ արդյունքներ են գրանցվել, ովքե՞ր են հաղթել և դա ինչ կտա մեզ։

Նա, մասնավորապես, գրում է.

«Ընդհանուր պատկերը

1. ԱՄՆ-ում Կոնգրեսի միջանկյալ ընտրություններ են անցկացվում նախագահի ղեկավարման 4 տարիների միջակայքում: Սովորաբար միջանկյալ ընտրություններում գործող նախագահի կուսակցությունը պարտվում է և սա դարձել է պրակտիկա վերջին տասնամյակներում։

Այս պահին Ներկայացուցիչների պալատը վերցնում են հանրապետականները։ Սենատում ամենայն հավանականությամբ իրենց դիրքերը կպահպանեն դեմոկտրատները՝ մեկ կամ երկու ձայների տարբերությամբ (այդ թվում փոխնախագահի ձայնի)։ Չնայած դեռ որոշ նահանգներում հաշվարկներ են գնում, սակայն պատկերն ամբողջանում է։

2. Բայդենի գործերն իհարկե բարդանում են, բայց ԱՄՆ արտաքին քաղաքականության վրա սա էական ազդեցություն չի ունենա, այն առավելապես կկրի ներքաղաքական բնույթ։

3. Թրամփը «կիսագոհ է» ընտրությունների արդյունքներից, բայց ամենայն հավանականությամբ առաջիկայում կհայտարարի նորից ընտրություններին մասնակցելու իր մտադրության մասին։

Մեզ հետաքրքրող հարցերից կառանձնացնեմ մի քանիսը

1. Ուկրաինային աջակցելու որոշումը այս ընտրությունների արդյունքում չի փոխվի։ Հակառուսական գիծը Վաշինգտոնի քաղաքական իստեբլիշմենտի համար կոնսենսուսային է, երկու կուսակցություններում էլ, որոշ բացառություններով, կիսում են Ուկրաինային Ռուսաստանի դեմ աջակցելու քաղաքականությունը։ Չարժե սպասել լուրջ փոփոխությունների Ուկրաինայի նկատմամբ ամերիկյան քաղաքականության մեջ։

2. Փենսիլվանիայում պարտվեց հանրապետական Մեհմեդ Օզը, ով Էրդողանի լավագույն բարեկամներից էր և լուրջ կշիռ կունենար Սենատում հայտնվելու պարագայում։ Այս գործում անգնահատելի էր մեր համայնքի և լոբբիստների համակարգված աշխատանքը։

3. Պարտվեց նաև թուրքական և ադրբեջանական հանձնախմբերի նախագահ կոնգրեսական Չեբոթը։ Չնայած այս տանդեմը նոր բարեկամ կգտնի Պալատում, բայց դա ժամանակատար գործընթաց է։

Նենսի Փելոսին այլևս խոսնակ չի լինի

4. Այս ընտրությունների արդյունքում Փելոսին կկորցնի իր դիրքը, որպես Պալատի խոսնակ։ Չեմ էլ կարծում որ նա կցանկանա մնալ որպես շարքային կոնգրեսական, ամենայն հավանականությամբ, ինչպես պնդում են ամերիկյան զլմ-ները նա կնշանակվի դեսպան և դուրս կգա քաղաքականությունից։

Նորից եմ պնդում, որ Փելոսիի հայաստանյան այցի կարևորագույն շարժիչ ուժերից էր անձնական վերաբերմունքը հայերի նկատմամբ, ինչպես նաև «Farewell Trip» ունենալու ցանկությունը, Ցեղասպանության թանգարանը տեսնելը, ինչի մասին բազմիցս ասել է իր հայ բարեկամներին և ընտրողներին։ Ցեղասպանության ճանաչման հարցում նա մեծ ներդրում ուներ և Հայաստան այցելելու համար սա կարևոր նախադրյալ էր։ Այսինքն՝ անձնական մոտիվացիան էր հիմնական շարժիչ ուժը, դրա համար էլ նա որոշեց իր «weekend»-ն անցկացնել Հայաստանում, թեկուզև պաշտոնական այցի տրամաբանության ներքո։

5. Նորաթուխ կոնգրեսական ունենաք Նյու Ջերսիից։ Նյու Ջերսիի սենատոր Բոբ Մենենդեզի որդին է՝ Բոբ Մենենդեզ կրտսերը»։

Մենք վատ ենք վերաբերվում ցանկացած ապակառուցողական քարոզչությանը, լինի դա ԶԼՄ-ներում, թե քաղաքական բնույթի։ Կարեւոր չէ, թե ինչին է դա վերաբերում։ Այսպես է ՌԴ ԱԳՆ պաշտոնական ներկայացուցիչ Մարիա Զախարովան մեկնաբանել Արցախում ռուս խաղաղապահների հասցեին Ադրբեջանի կողմից քննադատությունն ու հարձակումները։

«Ինչ վերաբերում է ռուս խաղաղապահների դերին (Ղարաբաղում) եւ նրանց գործունեության գնահատականին, երեք երկրների ղեկավարները Սոչիում կայացած գագաթաժողովում նշել են ռուսական զորախմբի առանցքային ներդրումը տեղակայման գոտում անվտանգության ապահովման գործում եւ ընդգծել տարածաշրջանում իրավիճակը կայունացնելու ջանքերի անհրաժեշտությունը, որն արձանագրվել է համատեղ հայտարարության մեջ։ Ինչ վերաբերում է կեղտին, որը դրա շուրջը հայտնվում է, ապա ցանկացած դրական, կառուցողական ու ստեղծագործ նախաձեռնություն միշտ բացասական ալիք է առաջացնում։ Դա, ցավոք, մեր աշխարհի օրենքն է»,- ասել է նա:

Ես համարում եմ, որ երեք տարուց ռուս խաղաղապահները գնալու են, այն ժամանակ էլ եմ բարձրաձայնել, որ հինգ տարուց հետո նրանք դուրս են գալու, չնայած բոլոր այն հայտարարությւոններին, որ դուրս չեն գալու, ամեն գնով պահելու են Արցախը և այլն։ Այս մասին «Ազատության» տաղավարում ասաց Արցախի Հանրապետության անվտանգության խորհրդի նախկին քարտուղար Սամվել Բաբայանը։

Վերջինս նշեց, որ Արցախից դուրս չգալու՝ ռուսական կողմի հայտարարությունները իրականությունից շատ հեռու են։

«Այն շահերը, որ այսօր ունի ՌԴ-ն՝ Թուրքիայի, Ադրբեջանի հետ, տանելու են այդ զիջումներին՝ էլի մեր հաշվին, դրա համար  ես ասում եմ, որ մերոնք խելքի գան  և փորձեն այլ լուծումներ գտնեն։ Սոչիում վերջին հանդիպման ժամանակ Ռուսաստանը ասաց, որ կա  Ղարաբաղի խնդիր, պետք է լուծվի, սակայն Ադրբեջանը ասաց, որ այդ հարցը լուծվել է երկու տարի առաջ, կարողացա՞վ բան ասի, նույնն էլ այն ժամանակ է լինելու։ Լինելու են ավելի մեծ՝ տնտեսական շահեր, որոնք գերադասվելու են, քան այդ խնդիրը»,- ասաց Բաբայանը։

Հարցին՝ արդյո՞ք խաղաղապահների դուրս բերումը չի նշանակի դուրս գալ Կովկասից, Բաբայանը ասաց․

«Այդ մենք ենք համարում դուրս գալ Կովկասից, իրենք Հայաստանը համարում են, որ իրենցն է և Ղարաբաղից դուրս գալով՝ Կովկասը չեն կոցնում»։

Սամվել Բաբայանը նշեց, որ Արցախի հայկական մնալու ճանապարհը կարող է լինել ուժեղ բանակ և տնտեսություն ստեղծելը։

Հրապարակը գրում է․

Շիրակի մարզի Արթիկ խոշորացված համայնքի Պեմազշեն բնակավայրում այսօր սարսափելի հանցագործության ականատես դարձան Շիրակի մարզի իրավապահներն ու գյուղի բնակիչները: 31-ամյա կնոջը և իր երկու՝  8  և 12-ամյա երեխաներին սպանել էին իրենց բնակարանում:

Գյումրեցի ընդդիմադիր իրավապաշտպան Կարապետ Պողոսյանը «Հրապարակի» հետ զրույցում ասաց, որ ինֆորմացիան փակ է, միայն տեղեկացված է, որ սպանությունն առանձնակի դաժանությամբ է կատարված:

«Իմ ունեցած տեղեկություններով մորն ու զավակներին խոշտանգել են, ոտքերը կապել են տուկի թելերով: Ենթադրվում է, որ սկզբում երեխաների երակներն են կտրել, դանակով հարվածներ են ստացել բոլորը, իսկ հետո մորթել են զոհերին: Բոլորին դանակներով են սպանել, ենթադրվում է, որ միայն դանակով է կատարվել սպանությունը՝ հրազեն չի կիրառվել»,-ասաց Պողոսյանը:Իրավապաշտպանը, որ դեպքի մասին լսելուց հետո անմիջապես Պեմզաշեն էր գնացել, նշում է, որ գիշերը գյուղացիներից ոչ ոք ոչ մի ձայն չի լսել, ոչ մի ակսկածելի շարժ էլ չեն նկատել, այլապես հանցագործության մասին ավելի վաղ կիմանային:

Համագյուղացիներին սկզբում անհանգստացրել է այն հանգամանքը, որ երեխաները դպրոց չեն գնացել, իսկ նրանց մայրիկը՝ աշխատանքի, սկսել են զանգահարել իրենց հարևանուհուն, սակայն երբ բազմաթիվ զնագերից հետո այդպես էլ ոչ ոք չի պատասխանել հեռախոսին՝ փրկարար ծառայություն են կանչել… փրկրարաների դուռը բացելուց հետո միայն հայտանաբերել են մոր ու իր զավակների դիակները:Մեր հարցին, արդյոք գյուղում տեղադրված տեսախցիկների տեսագրություններում ոստիկանությունն ինչ-որ բան հայտնաբերել է, Կարապետ Պողոսյանը նշեց, որ այդ մասով ոչինչ հայտնի չէ՝ միգուցե հիմա էլ շարունակում են զննությունը:

Զարմանալին այն է, որ մինչ այս պահը հանցագործության որևէ հետք չի հայտնաբերվել:

«Ոստիկանությունը հետքեր չի գտնում, այսինքն ամենայն հավանականությամբ հանցագործության գործիքները հանցագործը կամ հանցագործները իրենց հետ են տարել: Տարբեր վարկածներ կան առաջ քաշված, բայց այս պահին չկա որևէ վարկած, որը մոտ կլինի իրականությանը՝ ըստ ոստիկանության:Ու լավ կլիներ, որ ոստիկանությունը որոշակիորեն կիսվեր հասարակության հետ իր ունեցած վարկածներով, կարևոր էր, որ որոշակի ինֆորմացիա լիներ:

Նմանատիպ, բայց ոչ այսքան դաժան դեպք եղավ տարիներ առաջ Գյումրիում Ավետիսյաններիի ընտանիքի սպանությունը, որտեղ  հրազենով էին սպանել, ոչ թե մորթել էին մարդկանց: Այն ժամանակվա իշխանությունը շատ ավելի բարոյական էր ու շատ ավելի անկեղծ էր հասարակության հետ, քան ներկա իշխանությունները»,-ասաց Պողոսյանը:

Անդրադառնալով մյուս վարկածներին, իրավապաշտպանը նշեց, որ Գյումրիում շրջանառվում է, որ եղել է որոշակի թշնամական դիվերսիոն խմբի ներթափանցում:

«Երեկ՝ երեկոյան ժամը չորսից վեցը ընկած հատվածում Գյումրիում աննախադեպ ոստիկանական ստուգումներ էին անցկացնում, ամբողջ Գյումրին խցանման մեջ էր, մեքենաները կանգնեցնում էին, ստուգում էին, իհարկե չեմ պնդի, որ դրա հետ էր կապված, բայց զուգադիպությունները չափազանց շատ են»,-շեշտեղ վերջինս:

Կարապետ Պողոսյանը նշեց նաև, որ հանցագործության վայրն էլ այնքան պատահական չէ, մասնավորապես թուրքական կապիտալը շատ հետաքրքրված է Արթիկի Պեմզաշենի ու Տուֆաշենի տուֆերի հանքերով և արդեն իսկ բազմաթիվ հանքերում թուրքերը ներդրումներ են կատարել:

«Ես ենթադրում եմ, որ հանցագործության վայրը կարող է ընտրված լինել  բնակչությանը վախեցնելու ու հայաթափելու համար՝ հետագայում ազատ հանքագործունեություն իրականացնելու համար: Այսօր այդ տարածքը իրենց համար բիզնեսի տեսանկյունից հետաքրքրություն են ներկայացնում: Այնտեղ գրեթե բոլոր հանքերում թուրքերն ունեն իրենց մասնաբաժինները ու դա բոլորին է հայտնի»,- նշեց Կարապետ Պողոսյանը:

Ընդդիմադիր իրավապաշտպանի մյուս վարկածն էլ այն է, որ այս հանցագործությամբ թուրք-ադրբեջանական տանդեմը որոշել է նշել իրենց այսպես կորված «հաղթանակը»: «Անցած տարի նոյեմբերի իննին ընդառաջ Շուշիում Ալիևի թիկնազորի անդամը ատրճանակով սպանեց հայ երիտասարդին ու ես չեմ բացառում ու չեմ զարմանա, որ միաժամանակ երեկվա գործողությունները հենց թուրքական կամ ադրբեջանական ծիսակատարության արդյունք էր իրենց «հաղթանակին» նվիրված: Երեկ մենք բազմաթիվ անգամներ ականաատես եղանք իրենց լկտի պահվածքին, հրավառություններին, իրանական սահմանի ուղղությամբ կրակոցներին և Շուշիում Ալիևի լպիրշ հոխորտանքներին՝ ուղղված Հայաստանի և Հայաստանի այս պահի ղեկավարի ուղղությամբ: Այս հանցագործություները ես  համարում եմ նաև Ալիևի հոխորտանքների շարունակություն»,- նկատեց վերջինս:

Նա հավելեց, որ փորձել է նաև ընդհանուր խրոնիկան ճշտել վերջին տասնամյակների սպանությունների: Դաժան դեպքեր շատ են եղել՝ Վանաձորում, Գյումրիում, տարբեր վայրերում, երբ մի ամբողջ ընտանիքի միանգամից սպանել են, բայց ոչ մի դեպքում նման դաժանությամբ սպանությունը չի կատարվել: Պողոսյանը նկատում է , որ այս սպանության դաժանությունը նույնիսկ ամենադաժան հայ հանցագործին հատուկ չէ՝ հրազեն է գործածվել ընտանեկան սպանությունների ժամանակ:

«Ավելին ասեմ, այս դաժանությունների մասին իմանալով, թե ինչ դաժանությամբ են սպանել այս ընտանիքի անդամներին՝ աչքիս առաջ եկավ պատանեկության տարիներին Եղեռնի մասին կարդացածս»,-եզրափակեց Կարապետ Պողոսյանը: