Նախագծի համաձայն՝ Հայաստանում մինչեւ 2024 թվականի հունվարի 1-ը կենսաչափական անձնագրերի տրամադրումը ժամանակավորապես կդադարեցվի։ Այս մասին այսօր՝ դեկտեմբերի 2-ին, ԱԺ պաշտպանության եւ անվտանգության մշտական հանձնաժողովի նիստում «Հայաստանի Հանրապետության քաղաքացու անձնագրի մասին» օրենքում փոփոխություններ եւ լրացումներ կատարելու եւ հարակից օրենքներում փոփոխություններ կատարելու մասին օրինագծերի փաթեթի քննարկման ժամանակ ասաց ՀՀ ոստիկանության պետի տեղակալ Արա Ֆիդանյանը։

Այն, ինչպես նշեց փոխոստիկանապետը, կկասեցվի մինչեւ նոր կենսաչափական անձնագրերի ստեղծումը՝ ժամանակակից տեխնոլոգիաներով, ավելի անվտանգ: Ֆիդանյանի խոսքով՝ աստիճանաբար նոր կենսաչափական անձնագրերը կփոխարինեն հին նմուշներին։

«Ընդ որում, անձը հաստատող փաստաթղթերը կտրամադրվեն առանց էլեկտրոնային պահոցի։ Առնվազն այնքան ժամանակ, քանի դեռ դրանց բնութագրերը չեն որոշվել Հայաստանի կառավարության որոշմամբ։ Էլեկտրոնային պահոցով անձը հաստատող փաստաթղթերի տրամադրումը նախատեսված է մինչեւ 2023 թվականի փետրվարի 15-ը, իսկ առանց էլեկտրոնային պահոցով անձը հաստատող փաստաթղթերի տրամադրումը՝ փետրվարի 15-ից»,-ասաց փոխոստիկանապետը։

Այսպիսով, նախագծով նախատեսվում է, որ անձնագրերի տրամադրումը (փոխանակումը) կդադարեցվի (2023 թվականի հունվարի 1-ից մինչեւ 2024 թվականի հունվարի 1-ը)։ Ընդ որում, մինչեւ 2023 թվականի հունվարի 1-ը ՀՀ քաղաքացիներին տրված անձնագրերը կհամարվեն վավեր։

«Նոր օրենքը, եթե ընդունվի, ուժի մեջ կմտնի 2022 թվականի դեկտեմբերի 30-ից»,-ասաց Ֆիդանյանը։

Համեմատաբար կարճ քննարկումից հետո հանձնաժողովը դրական եզրակացություն տվեց տվյալ օրենսդրական նախաձեռնությանը:

Արցախի ԱԳՆ-ն հանդես է եկել հայտարարությամբ, որը ներկայացնում ենք ստորև.

«Վերջին շրջանում կրկին ակտիվացել են Լեռնային Ղարաբաղի Հանրապետության կարգավիճակի վերաբերյալ տարատեսակ քննարկումները, մեկնաբանությունները, կարծիքները, ինչն օբյեկտիվ գործընթաց է՝ հաշվի առնելով ադրբեջանա-ղարաբաղյան հակամարտության կարգավորման գործընթացում այս հարցի առանցքային բնույթը։

Պաշտոնական Ստեփանակերտը ողջունում է ադրբեջանա-ղարաբաղյան հակամարտության խաղաղ և համապարփակ լուծմանը, ինչպես նաև Հայաստանի և Ադրբեջանի միջև հարաբերությունների կարգավորմանն ուղղված ցանկացած քայլ։ Միևնույն ժամանակ, Արցախի Հանրապետության արտաքին գործերի նախարարությունը լիազորված է հայտարարել, որ Արցախի ժողովրդի և իշխանությունների պաշտոնական դիրքորոշումը մնում է անփոփոխ։

Արցախը չի լինելու Ադրբեջանի կազմում։ Հայաստանի և Ադրբեջանի միջև հարաբերությունների կարգավորումը, այդ թվում՝ երկու երկրների միջև սահմանների հարցի լուծումը, չի կարող և չպետք է կապված լինի Արցախի Հանրապետության կարգավիճակի հետ։

Ադրբեջանի Հանրապետության տարածքային ամբողջականությունը ոչ մի առնչություն չունի Լեռնային Ղարաբաղի Հանրապետության և նրա կարգավիճակի հետ, որը սահմանվել է մեր երկրի ժողովրդի կողմից՝ միջազգային իրավունքի նորմերին, սկզբունքներին և այն ժամանակ գործող խորհրդային օրենսդրությանը ամբողջական և խիստ համապատասխանությամբ»:

«Հայաստան» խմբակցության կողմից առաջարկվող հայտարարության մեջ օգտագործված ձևակերպումները կխանգարեն ՀՀ շուրջ դիվանագիտական կոնսոլիդացիայի ձևավորմանը և կնվասեն խաղաղության օրակարգի առաջխաղացմանը, ուստի չենք կարող ընդունել այդ նման ռիսկեր պարունակող հայտարարություն։ Այդ մասին ընդդիմության առաջարկով հրավիրված ԱԺ արտահերթ նիստին հայտարարեց արտաքին հարաբերությունների մշտական հանձնաժողովի նախագահ Էդուարդ Աղաջանյանը։

«Մեր գերնպատակը ՀՀ շուրջ քաղաքական-դիվանագիտական կոնսոլիդացիա ապահովելն է։ Դրա համար անհրաժեշտ է խոսել այնպիսի բառապաշարով, որը ընկալելի կլինի միջազգային հանրության համար և դա հիմնական տարաձայնությունն է, որ ունեցանք «Հայաստան» խմբակցության հետ»,-նշեց Աղաջանյանը և հավելեց, որ, այդուհանդերձ, Ադրբեջանի կողմից նոր ռազմական սադրանքները չեն բացառվում՝ հաշվի առնելով նրա կողմից վարվող ապակառուցողական քաղաքականությունը։

Սեպտեմբերի 12-13-ից հետո սահմանին միշտ էլ կրակոցներ եղել են: Այս մասին, այսօր՝ դեկտեմբերի 1-ին, ԱԺ-ում լրագրողների հետ զրույցում նշեց պաշտպանության նախրար Սուրեն Պապիկյանը՝ անդրադառնալով սահմանային իրավիճակի մասին լրագրողների հարցերին:

«Այս պահին այլ մեկնաբանություն չունեմ: ՊՆ-ն ամեն օր հանդես է գալիս պաշտոնական հաղորդագրություններով»,-ասաց նա:

Հարցին՝ պատերազմի վտանգ կա՞, Սուրեն Պապիկյանը պատասխանեց. «Ժողովուրդ, պատերազմի վտանգ միշտ էլ կա»։

Ինչ վերաբերում է Հնդկաստանից զենք գնելուն, Սուրեն Պապիկյանն ասաց, որ կոնֆիդենցիալ ինֆորմացիաներից չի խոսելու։

Այս երկու նախադսություններն ասելուց հետո Սուրեն Պապիկյանը շտապեց վերելակ մտնել, նրա հետևից էլ վերելակ մտան անվտանգության աշխատակիցները, սակայն վերելակը տեղից չշարժվեց։ Լրագրողներն անվտանգության աշխատակիցներին զգուշացրեցին, որ իրենք շատ են, նույնիսկ մեծ ցանկության դեպքում էլ, վերելակի դռները չեն փակվի, պետք է մի քանիսը դուրս գան։ Երկու հոգի վերելակից դուրս եկան՝ դռները կրկին չփակվեցին, ստիպված բոլորը  դուրս եկան։

Միջադեպը նույնիսկ Սուրեն Պապիկյանի ծիծաղն առաջացրեց, ստացվում է՝ անվտանգության աշխատողները նրան ուզում էին «փրկել» լրագրողներից, բայց վերելակի պատճառով կրկին դուրս բերեցին լրագրողների մոտ։

News.am-ը գրում է․

Ֆրանսիայի կառավարությունը կարծում է, որ Հայաստանին աջակցող բանաձեւը «չի արտացոլում պաշտոնական դիրքորոշումը»։

Հիշեցնենք, որ բանաձեւն ավելի վաղ ընդունել է Ֆրանսիայի Սենատը, իսկ նախօրեին՝ Ֆրանսիայի Ազգային ասամբլեան։

Ֆրանսիայի ԱԳՆ պաշոնական կայքում բանաձեւի հետ կապված իշխանության պաշտոնական դիրքրոշումն արտահայտող հաղորդագրություն է տեղադրվել, որում ասվում է․ «Այս տեքստը խորհրդարանական նախաձեռնություն է եւ չի արտացոլում Ֆրանսիայի կառավարության դիրքորոշումը։ Այն ընդունվել է անկախ՝ համապատասխան իշխանության բաշխման սկզբունքին։ Կառավարության դիրքորոշումը հայտնի է, այն արտացոլված է նախարարի՝  նոյեմբերի 29-ի հայտարարության մեջ, որում, մասնավորապես, ասվում է, որ «Ֆրանսիան շարունակում է խրախուսել երկրներին՝ առաջ գնալու բանակցություններում եւ հասնելու խաղաղության»։ Այս համատեքստում Հանրապետության նանխագահն աջակցել է Պրահայում Ադրբեջանի եւ Հայաստանի նախագահների հանդիպմանը, որը հանգեցրել է ՀՀ տարածքում ԵՄ դիտորդական առաքելության տեղակայման»։

Նշենք, որ Ֆրանսիայի ԱԳՆ պաշտոնական հաղորդագրության մեջ սխալ կա։ Ֆրանսիայի ԱԳՆ-ն, հավանաբար, տեղյակ չէ, որ Պրահայում հանդիպմանը մասնակցել է ՀՀ վարչապետը, այլ ոչ թե նախագահը (les Présidents arménien et azerbaïdjanais)։ Նման «մանրուքների» նկատմամբ անուշադրությունը առիթ է ստեղծում հեռուն գնացող եզրակացություններ անելու համար

Ադրբեջանում հետաքննում են «հանցագործությունը»՝ Իրանից հայկական արտադրանքի տեղափոխման փորձը։

Ադրբեջանական լրատվամիջոցների հաղորդմամբ՝ Բաքվի գլխավոր մաքսային վարչության մաքսային կետում հայտնաբերվել են շինարարական աշխատանքներում օգտագործվող 24820 կոնտեյներներ եւ 1050 դատարկ ստվարաթղթե արկղեր՝ հայկական արտադրության սիլիկոնային արտադրանքի կոնտեյներների փաթեթավորման համար: Պարզվել է, որ այդ ապրանքներն ուղարկվել են Իրանի Իսլամական Հանրապետությունում գործող ընկերության կողմից Ադրբեջանում գտնվող ֆիզիկական անձի հասցեին։ Փաստի առթիվ կատարվում է մաքսային պետական կոմիտեի եւ պետական անվտանգության ծառայության համատեղ հետաքննություն։

Մայրաքաղաքը ամանորյա տեսքի բերելու համար Հանրապետության հրապարակի շենքերի վրա անցքեր և ճեղքեր են արվել, ինչը համացանցում մեծ քննադատությունների ալիք է բարձրացրել թե՛ մասնագիտական շրջանակների, թե՛ հանրության շրջանում։ Թեմայի հետ կապված Tert.am-ը զրուցել է ճարտարապետ Տիգրան Գալստյանի հետ՝ հասկանալու ճարտարապետական տեսանկյունից այդ միջամտությունները ի՞նչ հետևանքներ կարող են ունենալ հատուկ պահպանվող հուշարձանների ցանկում ընդգրկված Հանրապետության հրապարակի շենքերի վրա։

Տիգրան Գալստյանն առաջին հերթին կարևորեց այն հանգամանքը, որ Հրապարակի շենքերի զարդանախշերի վրա արված միջամտությունները հետագայում նույությամբ վերականգնելը անհնար է լինելու, ինչը պայմանավորված է տուֆից կառուցված լինելու հանգամանքով։

«Վերականգնելու միակ տարբերակն այն է, որ  քարն ապամոնտաժվի և տուֆից նոր քանդակ արվի, բայց քարի հետ աշխատող բոլոր մասնագետները գիտեն, որ նույնիսկ նույն հանքի տարբեր տեղերից հանված տուֆը տարբեր երանգներ ունի, ուստի նույնությամբ վերականգնել չի հաջողվի։ Վերականգնելու տարբերակներից մեկը տուֆի փոշիով մածուկ պատրաստելն ու այդպես անցքերը փակելը կարող է լինել, բայց դա ևս լուծում չէ։ Այդ տարբերակը ժամանակավոր բնույթ ունի և մի քանի տարի հետ անցքերը նորից կբացվեն։ Տուֆը մի շարք յուրահատկություններ ունի, այն ծակոտկեն քար է և հնարավոր է  անձրևաջրերը մտնեն նրա մեջ, ձմռանը սառչի և ճաքեր տա, տուֆի հետ պետք է մաքսիմալ զգույշ լինել, այն շատ փխրուն քար է»,- ասաց ճարտարապետը։

Հարցին՝ կա՞ն արդյոք մասնագետներ, որոնք կկարողանան նույնությամբ վերականգնել զարդանախշերը, հաշվի առնելով, որ ԿԳՄՍ նախարարության տարածած հայտարարության մեջ ասվում էր, թե քաղաքապետարանը վերականգնելու է բոլոր բացած անցքերը և արված ճաքերը, ճարտարապետը ասաց․ «Հայաստանում չկան այդպիսի լիցենզավորված մասնագետներ, նման մասնագիտական ուղղություններ որպես այդպիսին  չունենք,  ես կարծում եմ, որ շենքերը և զարդանախշերը նախկին տեսքին բերելը անհնար է, մշակութային հուշարձանը արդեն իսկ վնասվել է»։

Ճարտարապետի խոսքով՝ քաղաքը ամանորյա տեսքի բերելու համար հնարավոր էր այլ միջոցներ օգտագործել, որոնք կիրառվում են ամբողջ  աշխարհում ՝առանց շենքերը վնասելու։

«Եվրոպական շատ երկրների մայրաքաղաքներ տոնական տեսքի են բերում՝  առանց մայրաքաղաքի շենքերի վրա անցքեր բացելու։ Այդ տարբերակներից մեկը  տանիքից անտեսանելի ցանց կախելն է, այդ դեպքում բոլոր միացումներն արվում են այդ ցանցի վրա և որևէ շենք չի վնասվում։ Առհասարակ այստեղ միակ խնդիրը լուսավորությունը չէ, նույն օդորակիչները, դրանց համար արված անցքերը, գովազդային վահանակները և այլ ձևավորումներ վնասում են շենքերի ճարտարապետական հորիվածքը։ Այդ ամեն ինչը վստահաբար կարելի է այնպես անել, որ ապամոնտաժելուց հետո հետքեր չթողնեն»,- ընդգծեց ճարտարապետը։

Նշենք, որ Երևանի քաղաքապետարանը հայտարարություն է տարածել, որում ասվում էր, թե տարածվող լուսանկարներից մեկը, որտեղ հեղույսը մխրճված է զարդաքանդակի մեջ, ամանորյա լուսավորության նախագծի հետ կապ չունի։

Մինչեւ տարեվերջ խաղաղության պայմանագիր կնքելը Հայաստանի իշխանությունների կողմից հայտարարված նպատակ է. արդյոք կհաջողվի մինչեւ տարեվերջ դա իրականացնել, ցավոք, միայն մեզնից չի կախված: Այս մասին այսօր՝ նոյեմբերի 30-ին, ԱԺ-ում լրագրողների հետ զրույցում նշեց ԱԺ Արտաքին հարաբերությունների հանձնաժողովի նախագահ Էդուարդ Աղաջանյանը

«Հայաստանն իրենից կախված ամեն ինչ անում է, որ դա տեղի ունենա»,-ասաց նա:

Դիտարկմանը, որ Ադրբեջանն արդեն հայտարարում է, որ իրենց 8 գյուղեր գտնվում են հայկական օկուպացիայի տակ, արդյոք սահմանազատման ուղղությամբ գործընթաց ընթանում է, Աղաջանյանը պատասխանեց. «Դրանք նոր հայտարարություններ չեն, գործընթաց տեղի է ունենում, բայց գործընթացներին պետք է մոտենանք ընդհանուր ժամանակի համատեքստում: Դա չպետք է ընկալել ամենօրյա հանդիպումների տեսքով: Այո, հանդիպումներ լինում են, բայց դրանց արանքում ոչ հրապարակային գործընթացներ եւ խոսակցություններ եւս տեղի են ունենում»:

Ինչ վերաբերում է սահմանին տիրող իրավիճակին եւ հարցին, թե արդյոք Ադրբեջանը պատրաստ է գնալու խաղաղության, նա արձագանքեց. «Սահմանին իրավիճակը լարված է եղել այս ամբողջ ժամանակահատվածում: Դրան զուգահեռ, բնականաբար, քաղաքական պրոցեսներ են տեղի ունենում:

Մենք պետք է առաջնորդվենք մեր կողմից առաջ քաշված օրակարգով եւ  ամեն ինչ անենք, որ Ադրբեջանը դառնա այդ օրակարգի կրող եւ մաս: Արդյոք մեզ մինչ այս պահը 100 տոկոսով հաջողվել է իրականացնել, ցավոք ոչ, ինչը չի նշանակում, որ որ մենք պետք է հրաժարվենք մեր ընդունած օրակարգից»:

Հակակոռուպցիոն կոմիտեում քննվող քրեական վարույթի ընթացքում փաստական տվյալներ են ձեռք բերվել այն մասին, որ Ոստիկանության նախկին պետ Վ.Գ.-ի (Վլադիմիր Գասպարյան-խմբ) դուստրը՝ Յ.Գ.-ն, միջոցներ տրամադրելով և խոչընդոտներ վերացնելով, օժանդակել է 2012-2018 թվականներին Կառավարությանն առընթեր Ոստիկանության պետի տեղակալ-ոստիկանության զորքերի հրամանատարի պաշտոնը զբաղեցրած Լ.Ե.-ին, որը, պաշտոնեական դիրքն օգտագործելով, 2015-2018 թվականների ընթացքում իրեն վստահված առանձնապես խոշոր չափերով վատնման եղանակով գույք է հափշտակել: Այս մասին  տեղեկանում ենք Հակակոռուպցիոն կոմիտեից:

Մասնավորապես, 2011-2018 թվականներին Ոստիկանության պետի պաշտոնը զբաղեցրած Վ.Գ.-ն, 2015 թվականի մարտի 7-ի թիվ 490-Ա հրամանով, իր դստերը՝ Յ.Գ.-ին, նշանակել է Ոստիկանության զորքերի շտաբի օպերատիվ բաժնի ավագ սպայի պաշտոնին: Այնուհետև, Ոստիկանության զորքերի հրամանատար Լ.Ե.-ի՝ 2018 թվականի մարտի 16-ի 225-Ա հրամանով Յ.Գ.-ն նշանակվել է Ոստիկանության զորքերի անձնակազմի հետ տարվող աշխատանքների բաժանմունքի պետի պաշտոնին և Վ.Գ.-ի՝ 2018 թվականի մարտի 16-ի 23-Ա հրամանով Յ.Գ.-ին շնորհվել է ոստիկանության փոխգնդապետի կոչում, որից երեք օր անց՝ Ոստիկանության զորքերի հրամանատար Լ.Ե.-ի՝ 2018 թվականի մարտի 19-ի 248-Ա հրամանով Յ.Գ.-ն կրկին նշանակվել է Ոստիկանության զորքերի շտաբի օպերատիվ բաժնի ավագ սպայի պաշտոնին, իսկ Ոստիկանության պետի՝ 2018 թվականի մայիսի 10-ի 1388-Ա հրամանով, Յ.Գ.-ի կողմից ներկայացված զեկուցագրի հիման վրա՝ վերջինս ազատվել է Ոստիկանությունում ծառայությունից:

Նշված պաշտոնին նշանակվելուց հետո՝ մինչև պաշտոնավարման դադարեցումը, Յ.Գ.-ն առհասարակ ծառայության չի ներկայացել, ծառայողական պարտականությունները չի կատարել:

Լ.Ե.-ն, քաջատեղյակ լինելով Յ.Գ.-ի կողմից ավելի քան երեք տարի՝ 2015 թվականի մարտի 7-ից մինչև 2018 թվականի մայիսի 10-ն ընկած ժամանակահատվածում ծառայողական պարտականություններն անհարգելի պատճառով չկատարելու, սահմանված կարգով ծառայության չներկայանալու մասին, ոչ միայն չի ձեռնարկել կանխարգելիչ միջոցառումներ, այլև իրեն վստահված առանձնապես խոշոր չափերով ուրիշի գույքը վատնման եղանակով հափշտակելու միասնական դիտավորությամբ, պաշտոնական դիրքի օգտագործմամբ, նշված ժամանակահատվածում յուրաքանչյուր ամիս իր ստորագրությամբ հաստատել է Ոստիկանության զորքերի ամսական ֆինանսավորման հայտերը և Ֆինանսների նախարարություն ուղարկված վճարման հանձնարարագրերը, որոնցում ներառված են եղել նաև անհարգելի պատճառներով ծառայության չներկայացած և ծառայողական պարտականությունները չկատարած Յ.Գ.-ի տվյալները: Արդյունքում վերը նշված ժամանակահատվածում Յ.Գ.-ին, որպես աշխատավարձ, պարգևատրումներ, արձակուրդային գումարներ, փաստացի վճարվել է առանձնապես խոշոր չափերի՝ ընդհանուր 8 մլն 838 հազար դրամ, վերջինս էլ, աշխատանքի չհաճախելու և ծառայողական պարտականությունները փաստացի չկատարելու պայմաններում, ստացել և կանխիկացրել է իրեն որպես աշխատավարձ, պարգևատրումներ, արձակուրդային վճարներ տրամադրված գումարները:

Այսպիսով, Յ.Գ.-ն պաշտոնավարման ընթացքում, միջոցներ տրամադրելով և խոչընդոտները վերացնելով, օժանդակել է Լ.Ե.-ին՝ պաշտոնեական դիրքն օգտագործելով, վատնման եղանակով պետական միջոցներից առանձնապես խոշոր չափերի՝ ընդհանուր 8 մլն 838 հազար դրամ հափշտակություն կատարելուն:

Վերը նշված հանցանքը կատարելու համար 2022 թվականի նոյեմբերի 30-ին հսկող դատախազի կողմից որոշում է կայացվել Յ.Գ.-ի նկատմամբ արարքի կատարման պահին գործող Քրեական օրենսգրքի 38-179-րդ հոդվածի 3-րդ մասի 1-ին կետով հանրային քրեական հետապնդում հարուցելու մասին. մեղադրանք ներկայացնելու և խափանման միջոց ընտրելու համար այն ուղարկվել է Հակակոռուպցիոն կոմիտե:

ԱԺ «Հայաստան» խմբակցության մաս կազմող «Վերածնվող Հայաստան» կուսակցության անդամ պատգամավորների հրաժարականները համարվում են ընդունված։ Նման հայտարարություն է ընդունել ԱԺ նախագահի պաշտոնը զբաղեցնող Ալեն Սիմոնյանը։

Հայտարարությունները հրապարակված են ԱԺ պաշտոնական էջում.

««Ազգային ժողովի կանոնակարգ» սահմանադրական օրենքի 155-րդ հոդվածի 1-ին մասի համաձայն` Հայաստանի Հանրապետության Ազգային ժողովի պատգամավոր Վահե Հակոբյանը 2022 թվականի նոյեմբերի 29-ին հրաժարականի դիմում է ներկայացրել:

«Ազգային ժողովի կանոնակարգ» սահմանադրական օրենքի 155-րդ հոդվածի 2-րդ մասի համաձայն` եթե հրաժարականի հրապարակումից հետո՝ մեկ շաբաթվա ընթացքում, պատգամավորը գրավոր դիմումով հետ է վերցնում հրաժարականի մասին իր դիմումը, ապա Ազգային ժողովի նախագահն այդ մասին հանդես է գալիս հայտարարությամբ, եթե հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որն ստորագրում եւ հրապարակում է Ազգային ժողովի նախագահը: Արձանագրության հրապարակման պահից հրաժարականը համարվում է ընդունված»։

«Ազգային ժողովի կանոնակարգ» սահմանադրական օրենքի 155-րդ հոդվածի 1-ին մասի համաձայն` Հայաստանի Հանրապետության Ազգային ժողովի պատգամավոր Հռիփսիմե Ստամբուլյանը 2022 թվականի նոյեմբերի 29-ին հրաժարականի դիմում է ներկայացրել:

«Ազգային ժողովի կանոնակարգ» սահմանադրական օրենքի 155-րդ հոդվածի 2-րդ մասի համաձայն` եթե հրաժարականի հրապարակումից հետո՝ մեկ շաբաթվա ընթացքում, պատգամավորը գրավոր դիմումով հետ է վերցնում հրաժարականի մասին իր դիմումը, ապա Ազգային ժողովի նախագահն այդ մասին հանդես է գալիս հայտարարությամբ, եթե հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որն ստորագրում եւ հրապարակում է Ազգային ժողովի նախագահը: Արձանագրության հրապարակման պահից հրաժարականը համարվում է ընդունված»։

««Ազգային ժողովի կանոնակարգ» սահմանադրական օրենքի 155-րդ հոդվածի 1-ին մասի համաձայն` Հայաստանի Հանրապետության Ազգային ժողովի պատգամավոր Ելենա Կիրակոսյանը 2022 թվականի նոյեմբերի 29-ին հրաժարականի դիմում է ներկայացրել:

«Ազգային ժողովի կանոնակարգ» սահմանադրական օրենքի 155-րդ հոդվածի 2-րդ մասի համաձայն` եթե հրաժարականի հրապարակումից հետո՝ մեկ շաբաթվա ընթացքում, պատգամավորը գրավոր դիմումով հետ է վերցնում հրաժարականի մասին իր դիմումը, ապա Ազգային ժողովի նախագահն այդ մասին հանդես է գալիս հայտարարությամբ, եթե հետ չի վերցնում հրաժարականի մասին իր դիմումը, ապա նրա լիազորությունների դադարման մասին կազմվում է արձանագրություն, որն ստորագրում եւ հրապարակում է Ազգային ժողովի նախագահը: Արձանագրության հրապարակման պահից հրաժարականը համարվում է ընդունված»։