Թալինի թիվ 15 ընտրատարածքից մեծամասնականով Ազգային ժողովի գործող պատգամավոր, «Մաքս գրուպ» ընկերության սեփականատեր, ՀՀԿ-ական  գալիք խոհրդարանական ընտրություններին չի առաջադրի իր թեկնածությունը:

ՀՀԿ-ն որոշում է կայացրել այս ընտրատարածքում սատարել Թալինի ներկայիս քաղաքապետ Մնացական Մնացականյանին:

Խաչիկ Մանուկյանն ասում է, որ այդ որոշման համար ՀՀԿ-ից վիրավորված չէ և կշարունակի մնալ կուսակցության անդամ:

Ավելին`երեկ Թալինի տարածաշրջանի թիվ 15 ընտրատարածքի բազմաթիվ բնակիչներ եկել էին Երևան և «Մաքս գրուպ» ընկերության մոտ սիրելի պատգամավորից պահանջում էին կրկին առաջադրել թեկնածությունը:

Թե ով էր կազմակերպել այդ ցույցը և ինչ նպատակ ուներ այն, այլ խոսակցության թեմա է: Մանուկյանն էլ պատշաճորեն հանդիպեց իր ընտրատարածքի բնակչությանը և շնորհակալություն հայտնեց իրեն զորակցելու համար:

Գրեթե նույն իրավիճակում է գտնվում Մանուկյանի մտերիմ ու անբաժան ընկերը`Հարություն Փամբուկյանը, որի անունը մինչ այժմ չկա համամասնական ցուցակում, իսկ մեծամասնականով արդեն հայտնի է, որ նա չի առաջադրվելու: Ասենք, որ հարցումներին նա պատասխանել է շատ կարճ`«էլ չի ձգում»: Սակայն ոչ ոքի համար գաղտնիք չէ, որ ՀՀԿ-ում որոշում կայացնողը կուսակցությունն է:

Ավելին` երկու ընկերները միասին են դուրս մղվում քաղաքական դաշտից, իսկ նրանց շուրջը կատարվող իրադարձությունները հետաքրքիր զարգացումներ են ստանում.

Շատերը գիտեն, որ Հարություն Փամբուկյանը ԱԺ այն պատգամավորներից է, որ չնայած իր «կայուն» բացակայություններին  ԱԺ նիստերից, չէր կորցնում պատգամավորի իր տեղը:

Փամբուկյանը, որ հիմնականում  աշխատում էր հեռու մնալ հանրային ուշադրությունից,  ժամանակին քաղաքապետի թեկնածու Գագիկ Բեգլարյանի շտաբի ղեկավարը դարձավ: Փամբուկյանին է պատկանում «Օրանժ» ֆիտնես ակումբը և մի շարք բիզնեսներ արտերկրում: Սակայն նա ակտիվորեն մեջտեղ եկավ 2002թ., երբ միջնորդ հանդիսացավ ու գլուխ բերեց «Հայաստանի էլեկտրական ցանցեր» ընկերության վաճառքի գործարքը: Հենց նրա թեթև ձեռքով ՀԷՑ-ը ծիծաղելի գնով վաճառվեց Midland Resources Holding Ltd. ընկերությանը: ՀԷՑ-ը գնահատվել էր 40 մլն դոլար, բայց հայտարարվեց, թե մասնավորեցնողը փոխհատուցելու է ԷՑ-երի նախկինում կուտակած 25 մլն դոլարի չափով պարտավորությունները, և Midland Resources-ը վճարեց 12 մլն դոլար՝ 110-ական ՄՎտ հզորությամբ 115 հատ ենթակայանների դիմաց:

Հետագայում պարզվեց, որ Midland Resources-ն օֆշորային ընկերություն է և ընդամենը 1 տարի էր, ինչ գրանցված էր բրիտանական Ջերսի կղզում: Ընդ որում, դրա հիմնադիրն էր ՌԱՕ ԵԷՍ ընկերության վարչության նախագահի տեղակալ Անդրեյ Ռապոպորտը: Իսկ շուրջ 3 տարի անց ԷՑ-ը վերավաճառվեց ՌԱՕ ԵԷՍ-ի դուստր ձեռնարկությանը՝ ԻՆՏԵՐ ՌԱՕ ԵԷՍ-ին՝ 80 մլն դոլարով: Թե ինչպես գլուխ բերվեց այս մութ գործարքը, որի արդյունքում միլիոներ փոշիացվեց, այլ հարց է:

Այսինքն այն ինչ կարելի էր 80 մլն-ով իրացնել, վաճառվեց 12 մլն-ով: Փաստորեն, գործարքի մասնակիցները ստացան 68 մլն դոլար: Իսկ  Midland Resources-ը ՀԷՑ-ում որևէ ներդրում չէր կատարել: Սակայն Հարություն Փամբուկյանը կարծես մարսեց այս պատմությունը: Այս գործարքին չէր կարող տեղյակ չլինել, ՀՀ նախկին նախագահ Ռոբերտ Քոչարյանը:

Ի դեպ անցած տարվանից ՀԷՑ-ում ՊԵԿ -ը համատարած ստուգումներ սկսվեց: Ինչն, ըստ որոշ տեղեկությունների, մեկնարկեց ռուսական կողմի դժգոհությունների արդյունքում: Խոսքը մոտ 100 մլն դոլարի մասին է:
ՊԵԿ-ի 2011-ին իրականացրած ստուգումների արդյունքում տարվա վերջին քրեական գործ հարուցվեց ՀԷՑ ընկերության դեմ: Սակայն սա էլ այլ խոսակցության թեմա է:

Այսօր կարծես նոր ու հետաքրքիր զարգացումներ են նկատվում. Փամբուկյանը բոլորովին վերջերս գնեց «Ջոս» համալիրը: Չնայած հայտարարված գործարքին  նա միակ բաժնետերը չէ, այնտեղ իր բաժնեմասն ունի Նավասարդ սրբազանի սանիկը` Մհեր Ավետիսյանը, որի անվան շուրջ եղած աղմկոտ բացահայտումները այդպես էլ մնացին անորոշ: Հիշեցնենք, որ գնման գործարքից առաջ լուրեր էին շրջանառվում, թե «Ջոսի» իրական սեփականատերը կամ մեծ բաժնետերը ՀՀ վարչապետն է, որն իր մտերիմ ընկերոջ, Նավասարդ Կճոյանի սանիկի միջոցով աշխատացնում է ժամանցի կենտրոնը:

Չի բացառվում, որ Փամբուկյանին ուղղակի առաջարկել են գնել բաժնեմասը: Դրանից ոչ շատ առաջ խոսակցություններ էին պտտվում, որ Փամբուկյանը արտերկիր է տեղափոխում իր բիզնեսը:

Այս ֆոնի վրա այժմ երկու ընկերներ զրկվում են ԱԺ մտնելու հնարավորությունից ու  հայտնվում խաղից դուրս վիճակում: Արդյո՞ք դա փոխկապակցված է, և արդյոք այստեղ դեր ունի Ռոբերտ Քոչարյանի գործոնը:

Ի դեպ Հանրապետական կուսակցության այս երկու առանցքային դեմքերը իրենց այսօրվա դիրքին են հասել, այսպես կոչված նախկինների շնորհիվ, ինչքան էլ այսօր արմատական ընդիմությունը պնդի, թե ավազակապետությունում ենք ապրում, այս պետությունը իրենք են կերտել: Իրենք սեփականաշնորհեցին երկիրն ու կոպեկներով վաճառեցին միմյանց, իրենք թալանեցին գործարաններն ու այսօր էլ նրանց որոշ մասը դարձյալ այդ թալանվածի հաշվին է ապրում: Այստեղ խնդիրն այն է, որ այսօր ջրի երեսին են մնացել միայն ամենաճաարպիկները որոնք արագ հանրապետականանցան ու բարգավաճեցին: Իսկ մյուսները մնացին ինչպես իրենք են պնդում` անկոպեկ կամ թուլափայի հույսին:
Ժամանակին Հարություն Փամբուկյանն ու նրա անբաժան ընկերը «Մաքս գրուպի» Խաչիկ Մանուկյանը Ղևոնդ անունով ոստիկանության համակարգի նախկին մի աշխատողի և Տավուշի մարզպետի եղբոր` Աշոտ Ղուլարյանի հետ նախկին վարչապետ Հրանտ Բագրատյանի եղբոր` Կարենի օգնությամբ սեփականաշնորհեցին մի գործարան, որը կարճ ժամանակ անց վերածեցին ավերակի:

Գործարանը մաս  -մաս, կամաց- կամաց թալանվեց ու վաճառվեց: Ընկերները սկսեցին այդ գումարներով նոր գործեր սկսել: Նրանցից միայն Ղևոնդն էր, որ հավատարիմ մնաց գործարանին փորձելով այն պահպանել, կամ գուցե միայն նա էր, որ չկարողացավ այլ` ավելի խոշոր ինչ որ բան ձեռք գցել. Խաչիկ  Մանուկյանը կոպեկներով մեծ քանակի հողեր ձեռք բերեց, նրան  բաժին հասավ նաև սայլարկայի և թռչնաֆաբրիկաների բիզնեսը, իսկ Փամբուկյանը իր ձեռքը վերցրեց բենզինի բիզնեսը:

Ինչպես  տեղեկացնում է NEWS.am  կայքը,  Հայաստանի պաշտպանույթան նախարարի արդեն նախկին մամուլի քարտուղար Դավիթ Կարապետյանը նշանակվել է ԱԱԽ քարտուղար Արթուր Բաղդասարյանի խորհրդական: Այդ մասին տեղեկատվությունը հաստատել է  ինքը` Դավիթ Կարապետյանը:

Կայքի  տեղեկություններով, Դավիթ  Կարապետյանը ընդգրկվելու է նաև  ՕԵԿ-ի համամասնական ցուցակի վերին հորիզոնականներում:

Իսկ այն հարցին, թե արդյոք իրականությանը համապատասխանո՞ւմ է տեղեկատվությունն այն մասին, որ իր անունը լինելու է «Օրինաց երկիր» կուսակցության համամասնական ցուցակում, Դավիթ Կարապետյանը ոչ  հաստատել,  և ոչ էլ  հերքել է  այդ լուրը:

Ավելի  վաղ տեղեկացրել էինք, որ  Հայաստանի պաշտպանության նախարար Սեյրան Օհանյանի հրամանով Դավիթ Կարապետյանն ազատվել է մամուլի քարտուղարի պաշտոնից` այլ աշխատանքի անցնելու կապակցությամբ:

Ասյօր Երևանի Կարեն Դեմիրճյանի անվան մարզահամերգային համալիրում մեկնարկած ԲՀԿ 6-րդ համագումարին ելույթով հանդես եկավ կուսակցության նախագահ Գագիկ Ծառուկյանը: Նա  անդրադարձավ ոչ միայն Հայաստանում առկա հաջողություններին, այլ նաև բացթողումներին։

«Եթե նայենք ինքներս մեզ, պետք է մի հարց տանք։ Ինչպե՞ս է ստացվում, որ մեր հայրենակիցները արտասահմանում հասնում են մեծ հաջողությունների, իսկ իրենց հայրենիքում չեն կարողանում»,–  ուշադրություն հատկացնելով  աղքատության և արտագաղթի խնդիրներին ասաց Ծառուկյանը` հավաելելով որ միակ պատճառը«միջավայրի բացակայությունն»է :

«Եթե այս հարցին անմիջապես լուծում չտրվի, մենք ստիպված ենք գրանցելու աղքատության ավելի մեծ աճ, արտագաղթի ավելի մեծ ծավալներ: Պետք է պայմաններ ստեղծել, որ մարդը հեռանալու մասին չմտածի, մեր երիտասարդները պետք է ապագան ստեղծեն Հայրենիքում, իսկ դրա կանխման միակ լուծումն, աշխատատեղերի ստեղծումն է»:

Խոսելով 2008 համաշխարհային տնտեսական ճգնաժամի հետևանքներից՝ Գագիկ Ծառուկյանը դրա ազդեցությունը հատկապես մեծ համարեց փոքր և միջին ձեռնարկությունների վրա, որոնց համար այն, ի տարբերություն խոշոր բիզնեսի, «լինել– չլինելու խնդիր» դարձավ. «Պետությունը պետք է այդ խավին աջակցի և արտոնութուններ տա: Սա է կայացման ճանապարհը»,- որպես լուծում առաջարկեց նա՝ ավելացնելով, որ այս խնդիրը դրված է նաև ԲՀԿ առաջիկա 5 տարիների ծրագրում:

Ծառուկյանը նաև ԲՀԿ անունից հանդես եկավ առաջարկով՝ «սկզբնական կապիտալիզմից անցում կատարել մարդկային կապիտալիզմի, այսինքն` ժողովրդական կապիտալիզմի»։ Գործարար միջավայրը բարելավելու համար անհրաժեշտ է ներդրումներ, դրսի կապիտալ»,-նշեց նա: «Մեր երկրի գլխավոր հերոսը պիտի լինի ոչ թե չինովնիկն ու պաշտոնյան, այլ մարդը»,– ասաց նա։

Ծառուկյանը պատասխանեց նաև մեծանուն ֆրանսահայ երգիչ Շարլ Ազնավուրի հարցադրմանը, թե ինչպես է պետությունը կանխելու արտագաղթը՝ նշելով, որ այն ունի հստակ պատասխան. «պետք է ամեն ինչ անել, որ մեր երկրի սոցիալ–տնտեսական վիճակը փոխվի, երկրի գործարար միջավայրը բարելավվի, ստեղծվեն նոր աշխատատեղեր»
ԲՀԿ առաջնորդը նաև նկատեց, որ իր կուսակցության համար մեծ նշանակություն ունի նաև համերաշխություն խնդրը: Նա կարևորեց խաղաղության հաստատումը թե սահմաններում, թե երկրի ներսում. «Ոչ ես, ոչ ԲՀԿ որևէ անդամ հանդես չի գալիս թշնամանքով որևէ այլ կուսակցության նկատմամբ: Պետք է ստեղծել համերաշխության մթնոլորտ, լսել միմյանց տեսակետները, որպեսզի մայիս 6-ի ընտրություններին դուրս գանք համախմբված»,-նշեց նա՝ որպես երկիրը այս վիճակից դուրս բերելու ևս մեկ կարևոր գործոն:

Գագիկ Ծառուկյանը հայտարարեց, որ առաջիկա ընտրությունները պետք է միանշանակ անցնեն ազատ և արդար, քանի որ դա լուրջ մարտահրավեր է Հայաստանի համար:

« Արդար ընտրությունների շուրջ պետք համախմբվի ողջ քաղաքական դաշտը»,-ասաց նա և նշեց, որ այդ կերպ կարելի է պահպանել ընտրողի իրավունքը: Նա հավատացրեց, որ ԲՀԿ-ն ամեն ինչ անելու է մեր ժողովրդի հավատն ու հույսը վերադարձնելու համար:

«Մենք ժողովրդին երբեք հուսախաբ չենք արել, և այս անգամ նույնպես արդարացնելու ենք ձեր հույսերը: Մենք ունենալու ենք բոլորի երազած Բարգավաճ Հայաստանը»,-ելույթը եզրափակեց Ծառուկյանը:

 ՀԱԿ համամասնական ցուցակի առաջին 16 անձանց անուններն արդեն հայտնի է: Լևոն Տեր-Պետրոսյանը ՀԱԿ համամասնական ցուցակի հերթականությունը սահմանել է  հետևյալ կերպ.

1.Լևոն Տեր-Պետրոսյան

2. Ստեփան Դեմիրճյան

3. Արամ Զ. Սարգսյան

4. Արամ Մանուկյան

5. Լևոն Զուրաբյան

6. Լյուդմիլա Սարգսյան

7. Նիկոլ Փաշինյան

8. Հրանտ Բագրատյան

9. Գագիկ Ջահանգիրյան

10. Խաչատուր Սուքիասյան

11. Մանուշակ Պետրոսյան

12. Դավիթ Շահնազարյան

13. Պետրոս Մակեյան

14. Հովհաննես Հովհաննիսյան

15. Դավիթ Մաթևոսյան

16. Զոյա Թադևոսյան

ՀԱԿ ցուցակի հաջորդ տեղերի հետ կապված դեռ հստակեցումներ չկան: Այդ առումով բանակցությունները դեռ շարունակվում են:

Քիչ առաջ հանրապետական դարձան երգչուհի Շուշան Պետրոսյանը, КВН-ի անդամ Կարեն Ղազարյանը, «Առավոտ» օրաթերթի լրագրող Մարգարիտ Եսայանը, Հայաստանի հանրային հեռուստատեսության «Առաջին լրատվականի» ղեկավար Սամվել Ֆարմանյանը, ԱԺ պատգամավոր Վիկտոր Դալլաքյանը, նախարարներ Վաչե Գաբրիելյանն ու Հրայր Թովմասյանը:

Աստղաբույլը լրացրեցին  պատգամավորներ, որոնք նախկինում անկուսակցական էին, սակայն անդամակցում էին ՀՀԿ խմբակցությանը: Նրանց թվում էր  Գագիկ Աբրահամյանը (Արա Աբրահամյանի եղբայրը), պրոֆեսոր Արա Բաբլոյանը:

Հայաստանի Հանրապետական կուսակցության գրասենյակում Հայաստանի նախագահ Սերժ Սարգսյանը կուսակցական տոմսեր և ՀՀԿ կրծքանշաններ բաժանեց նորաթուխ Նժդեհականներին:

 Այսօր Հայաստանում գիտությունը և գիտնականը դուրս են մղվել պետական և հասարակական ուշադրությունից: Խորհրդային միության փլուզումից հետո ստեղծված ծանր ֆինասկան պայմանները պատճառ հանդիսացան որպեսզի այս ոլորտը հայտնվի ծանր վիճակի մեջ: Ֆինանսական միջոցների անբավարարությունը, գիտական կապերի խզումը հանգեցրին հանրապետությունում գիտական գործունեության լճացմանը։

Հասարակության մեջ փոխվեցին ընկալումները գիտության ու գիտնականի նկատմամբ: Գուցե «թերսնման» արդյունքում է, որ այսօր կանգնած ենք շատ վտանգավոր մի փաստի առաջ. «Հայաստանում գիտությունը կարող է ֆիզիկապես դադարել գոյություն ունենալ: Ուստի Կառավարությունը պարտավոր է անհրաժեշտ գումարներ գտնել ու տրամադրել պետական անվտանգության տեսակետից կարևորագույն խնդիրը` երկրից ուղեղների արտահոսքը կանխելու համար»:

Այս թեմայով մենք զրուցեցինք ֆիզ.-մաթ. գիտությունների դոկտոր Արթուր Իշխանյանի հետ:

Վերջինիս խոսքով հետաքրքիրն այն է, որ ֆինասական լուրջ խնդիրներ ունեցող այս ոլորտը, շարունակում է լուրջ հաջողություններ գրանցել. «Դրա մասին գալիս է փաստելու ՅՈՒՆԵՍԿՕ-ի 2010 թվականի զեկույցը` 10 տարվա կտրվածքով աշխարհում գիտության զարգացման վերաբերյալ: Այն շատ հետաքրքիր փաստեր է առաջ բերում հատկապես Հայաստանում գիտության վիճակի վերաբերյալ:

Առաջին հերթին, ըստ ցուցանիշների Հայաստանը առաջին տեղերից մեկում է գտնվում աշխարհում` մեկ գիտնականին բաժին ընկնող գիտական արդյունքի տեսանկյունից: Այսինքն, մեր գիտությունը արդյուանվետ է, բայց սա ցավոք վերաբերում է միայն ֆունդամենտալ, հիմնարար գիտություններին: Արդյունքի 54 տոկոսը բաժին է ընկնում ֆիզիկոսներին, 40 տոկոսը մաթեմաթիկոսներին, քիմիկոսներին, կենսաբաններին և մյուս բնագետներին, և միայն մնացած չնչին տոկոսներն են բաժին ընկնում հումանիտար ոլորտին: Դա այն պարագայում, երբ գիտական ատենախոսությունների պաշտպանությունների թվով ճշգրիտ հակառակ պատկերն է: Հումանիտարները պաշտպանում են բազմապատիկ ավել, այսինքն գիտությունների թեկնածուների ֆորմալ դիպլոմ ստացողների թիվը բազմապատիկ ավել է, բայց բուն գիտական արդյունքը համարյա զրոյական: ՅՈՒՆԵՍԿՕ-ի այս զեկույցը ցույց է տալիս, որ ճշգրիտ գիտությունների ոլորտում Հայաստանը առաջիններից է, հունմանիտար ոլորտում` վերջիններից:

Զեկույցը նաև ցույց է տալիս, որ Հայաստանում 10 տարի շարունակ գիտնակաների միջին տարիքը 10 տարով աճել է, տասը տարի առաջ 48 էր, այսօր` 58: Սա նշանակում է, որ որևէ ներհոսք դեպի գիտություն չկա: Այսինքն` մենք գործ ունենք բացառապես խորհրդային շրջանից ժառանգած կադրերի հետ, իսկ գիտական արդյունք տալիս են այն մարդիկ, ովքեր խորհրդային շրջանում են կայացել: Նոր կադրեր համարյա չկան, հետևաբար 5-6 տարի հետո մեզ սպասվում է աղետ, վթար, որովհետև հին կադրերը 65-ի մոտ, կգնան թոշակի և նրանց հետևից էլ փակվելու են նրանց լաբորատորիաները: Հետևաբար գիտության երիտասարդացումը հանդիսանում է ֆունդամենտալ նշանակության խնդիր»,-ասաց պարոն Իշխանյանը` հավելելով, որ Յունեսկոյի վերը նշված զեկույցը, որը տպագրվեց 2011- փետրվարին, առիթ հանդիսացավ վերաքննարկելու ընդհանրապես գիտության վիճակը մեր երկրում: Եղան բազմաթիվ քննարկումներ տեղի ունեցան բազմաթիվ հանդիպումներ:

Հատկանշական է այն փաստը, որ հենց 21 –րդ դարի գիտական ամենամեծ նվաճումը` համացանցը միջոց դարձավ, որպեսզի Հայաստանում գիտնականները ի վերջո բարձրաձայնեն իրենց խնդիրների մասին:

Ֆեյսբուք սոցիալական ցանցում 2011 գարնանից սկիզբ առավ «Պահանջում Ենք գիտության ֆինասավորում» նախաձեռնությունը: Էջում մասնավորապես ասվում է,

“Այն ստեղծված է գիտության տագնապային վիճակի մասին ահազանգելու համար: Էջի մասնակիցները գիտակցում են, որ Հայաստանի կայուն և մրցունակ զարգացումը հնարավոր է միայն և միայն գիտության նկատմամբ կառավարության խորը հարգանքի և գնահատականի պայմաններում”: Խմբի մասնակիցները, որպես առաջին քայլ պահանջում են

1. ՀՀ կառավարությունից անհապաղ, կտրուկ և առանց նախապայմանների գիտության ֆինանսավորման աճ՝ մոտ ապագայում մինչև ՀՆԱ-ի 2-3%:

2. Գիտնականների և ասպիրանտների միջին աշխատավարձի անհապաղ քառապատկում: Մոտ ապագայում միջազգային ցուցանիշների հասցմամբ:

3 Այդ քայլերն իրականացնելուց հետո անընդհատ աջակցում գիտությանը, մասնավորապես մաքսային և այլ կառավարության մարմինների շփման դյուրացում, կոնսուլտացիաների և արտոնությունների, հասարակության հետ շփումների և բիզնես միջավայրի հարթակների տրամադրում և այլ օպերատիվ համագործակցություն։

Ակտիվ գործունեության շնորհիվ այս խնդրին ի վերջո պետական մակարդակով ուշադրություն դարձվեց: Հանգրվանային կետերից մեկը Ծաղկաձորյան հավաքն էր` նախագահ Սերժ Սարգսյանի մասնակցությամբ:

Ծաղկաձորյան համաժողոնը նվիրված էր գիտության ֆինասավորման ուղիների դիվերֆիկացիային և երիտասարդ գիտնակաների խնդրներին ընդհանրապես: Նախագահը տեղում հայտարարեց, որ կտրամադրվի որոշակի գումար երիտասարդ գիտնակաների խնդիրները լուծելու համար և գումարների կառավարումը ևս կտրվի երիտասարդներին:

Արդեն դեկտեմբերի վերջերին նախագահը իր խոսքը գործ դարձնելով գիտության խնդիրները լուծելու համար տրամադրեց 100 միլիոն դրամ: Այն տնօրինելու է հայաստանի երիտասարդական հիմնադրամը: Իսկ մեխանիզմը հետևյալն է. եռամսյակը մեկ բաց կթողնվի 25 միլիոն: Կառավարման համար ստեղծվել է 9 երիտասարդ գիտնականից բաղկացած ղեկավար մարմին, որը բաղկացած է երեք թևերից.

1. Ֆեյսբության նախաձեռնություն

2. Գիտությունների ազգային ակադեմիայի ինստիտուտի երիտասարդներ

3. Բուհական երիտասարդ գիտնականների միավորում:

Ինչպես նշեց Արթուր Իշխանյանը, կազմվել է նաև 5 հոգուց բաղկացած խորհրդատվական մարմին, որի կազմում են ԿԳՆ նախարար Արմեն Աշոտյանը, գիտության պետական կոմիտեի նախագահ Սամվել Հարությունյանը, նախագահի աշխատակազմից Ավետիք Բերբերյանը, ԵՊՀ ռեկտոր Արամ Սիմոնյանը, Գիտությունների ազգային ակադեմիայի ակադեմիկոս-քարտուղար Հրանտ Մաթևոսյանը, և մեր զրուցակից, ֆիզմաթ գիտությունների դոկտոր Արթուր Իշխանյանը: Այս խորհրդատվական մարմինը ունի վետոյի իրավունք, այսինքն` իրավունք հաստատելու կամ չհաստատելու այն որոշումները, որոնք կկայացվեն երիտասարդների խորհրդի կողմից:

Ինչպես տեղեկացանք, այս պահին որոշված է, որ 40 միլիոն ենթադրվում է ուղղել երիտասարդական գիտական դրամաշնորհների հայտարարաման համար, մոտ 20 միլիոն՝ գիտաժողովների կազմակերպման համար, մոտ 20 միլիոն ճանապարհային ծախսեր` միջազգային գիտաժողովներին մասնակցելու համար, և 10 միլիոն տարատեսակ մրցանակների սահմանաման համար:

Ահա այս նպատակների իրագործմանը կուղղվի այդ 100 միլիոնը: Սակայն պետք է նշել, որ դա շատ քիչ է, որպեսզի հիմանարար փոփոխություններ կատարվեն ոլորտում:

Մնում է միայն հուսալ որ այդ 100 միլիոնը գոնե ինչ որ կերպ շունչ կտա արդեն հոգևարքին մոտեցող գիտությանը:

Շուշան Գալստյան

Մարդու մոտ, թե` ճարպային հանգույցների խտացումը, թե` օրգանիզմի աշխատանքի դանդաղումը, թե`  ուղեղի ծերացումը սկսվում է արդեն 45 տարեկանից: Բացառություններ լինում են,սակայն նախկինում ընդունված էր համարել, որ մարդու ֆունկցիոնալ խանգարումները սկսվում են 60 տարեկանից, ինչը վերանայել են Լոնդոնի Համալսարանի գիտնականները, հանգելով վերընշված եզրակացությանը:

Նրանց հետազոտությունների վերլուծությունը ցույց է տվել, որ մտավոր ունակությունները անկում են ապրում 45 — 49 տարեկանում` 3,6 %-ով: Այդ պրոցեսը զարգանում է տարիքի հետ: 65-70 տարեկանում մտավոր կարողությունները գրանցում են 9,6%-ի անկում տղամարդկանց, և 7,4%-ի անկում կանանց մոտ:

Նրանք խորհուրդ են տալիս խուճապի չմատնվել, այլ ընդհակառակը` համակարգել առօրյան, անցնելով խնայող ռեժիմի:

Այսօր առավոտյան Խորենացի փողոցի բազմաբնակարան շենքում երկու քաղաքացի ներկայանալով «Բարգավաճ Հայաստան» կուսակցության անդամներ, ընդ որում ցույց տալով նաև վկայականներ, ցուցակները ձեռքներին մեկ առ մեկ ճշտում էին, թե քանի հոգի են ապրում տվյալ բնակարանում, քանիսն են գրանցված, պատճառաբանելով, որ փորձում են ի հայտ բերել մեռած հոգիների: Ձեռքի հետ էլ ճշտելու «Բարգավաճի» համկիր են տվյալ տան բնակիչները, թե ոչ: Այն դիտարկմանը, թե դա կարելի է անել ընտրական տեղամասում, նրանցից մեկը ոգևորված ասաց. «Դա էլ ենք անելու, բա ոնց»:

Մեր հարցին, թե իրավունք ունի որևէ կուսակցությունը նման գործունեությամբ զբաղվելու, որքան էլ զարմանալի է, լսեցինք իրարամերժ կարծիքներ:

Իսկ ամենահետաքրքիրը ԿՀԸ –ի մեկնաբանութունն էր. նրանց մի ամբողջ աշխատանքային օր պետք եղավ, որ մեկ նախադասություն փոխանցեին. «Չի խախտվում ընտրական օրենսգրքի որևէ դրույթ»:

Հանրապետական պատգամավորներից մեկը, որին ի դեպ չտեղեկացրեցինք, թե խոսքը ո՞ր կուսակցության մասին է ասաց, որ նման քայլն անթույլատրելի է, իսկ ավելի շուտ իրենց օգտին քվեարկող ընտրողների քանակը ճշտելու քայլ է:

ԲՀԿ մամլո խոսնակ Բաղդասար Մհերյանը սկզբում ասաց, որ շատ հնարավոր է ինքնակոչներ լինեն, հետո երբ ասացինք, որ բնակիչների ցուցակը  ճշգրիտ ցուցակ էր և մարդիկ անդամատոմսով էին, ասաց, որ ոչ մի կրիմինալ չի տեսնում էդտեղ և շատ նորմալ է համարում նրանց այցը:

Մեկնաբանելով հարցը դաշնակացական պատգամավոր Լիլիթ Գալստյանն ասաց. «Դա միջոց է, որպեսզի կուսակցությունը վերահսկելի դարձնի  իրավիճակը և մոտավոր հաշվարկներ ունենա: Եթե չեմ սխալվում նման դեպքում ընտրական օրեսգրքի որևէ դրույթ չի խախտվում, սակայն  մենք բախվում ենք այն երևույթի հետ, որ շատ կուսակցություններ հոգևորսությամբ են զբաղված:

«Ժառանգության» պատգամավոր Արմեն Մարտիրոսյան էլ պարզաբանեց. «Ըստ էության  դա  կարելի է  և թույլատրելի միայն այն դեպքում, եթե  ճշտում են ցուցակներում  եղած մարդիկ  այժմ  երկրում են թե ոչ: Մնացյալ բոլոր դեպքերում անձնագրային տվյալներ վերցնել, կաշառք նվերների տեսքով և այլն օրենքի խախտում է:

Իսկ ՕԵԿ մամուլի քարտուղար Սուսաննա Աբրահամյանը խուճապի մատնվեց . «Եթե դա մեզ չի վերաբերվում…  մեր կուսակցությունը նման բաներով չի զբաղվում:  Կամ դուք չեք ասում մարդկանց  կամ կուսակցությունների անուներ, ապա ես  չեմ պատասխանի ձեր հարցին: Անորոշ հարց  եք տալիս  ու ինչ որ շանտաժի մեջ  եք փորձում ներքաշել:

Օրերս կառավարությանն առընթեր Պետական գույքի կառավարման վարչության նախագահ Արման Սահակյանը մի հետաքրքիր թեմա է շոշափել. նա ասել է, որ Հայաստանի պետական բյուջեից միայն Սփյուռքի նախարարության համար 81 միլիոն դրամ գումար է հատկացվում «Էրեբունի Պլազայում» տարածքի վարձակալության համար:

Գաղտնիք չէ, որ Էրեբունի Պլազան պատկանում է նախկին նախագահ Ռոբերտ Քոչարյանին: Ստացվում է, որ պետությունը նախարարություն պահելու համար չի կարողանում շենք հատկացնել և 81 միլիոն դրամ իր գրպանից  վճարում է, որ Սփյուռքի նախարարությունը վարձով տեղակայվի նախկին նախագահի սեփական տարածքում: Ի դեպ Քոչարյանին ևս նույն շենքից դարձյալ պետության հաշվին, մի ամբողջ հարկ է հատկացվել, որպես օֆիսային տարածք:

Եվ սա այն դեպքում, երբ այս էլ քանի տարի է Վազգեն Սարգսյան — 3 հասցեում գտնվող Արդարադատության նախարարության նախկին, 2008 թ. այրված շենքի տեղում 3176 քառ. մետր մակերեսով տարածքը և դրան հարող նախկին ԿԳ նախարարության շենքը, որոնք հատկացվել են ռուսաստանաբնակ գործարար Սամվել Կարապետյանին, ավարտուն տեսքի չեն գալիս:

Ավելին` դրա դիմաց Տաշիր գրուպի սեփականատերը խոստացել է վերնիսաժի տարածում շենք կառուցել, որտեղ կտեղակայվեն մի շարք գերատեսչություններ (այս թեմային մենք արդեն անդրադարձել ենք), սակայն այս էլ քանի տարի է, սայլը տեղից չի շարժվում:

Չնայած, ըստ Սահակյանի կա կառավարության որոշում քանդել տեղափոխել Արտաքին գործերի, Էներգետիկայի ու բնական պաշարների և Տարածքային կառավարման նախարարությունները, քանի որ նշված նախարարությունների տարածքները աշխատողներն չեն բավականացնում:

Արդյո՞ք սա նշանակում է, որ գործարարը չի ցանկանում ներդումներ կատարել Հայաստանում նույնիսկ իր ստանձնած պարտավորությունների շրջանակներում:Ու չնայած կառավարության որոշմանն ու բազմաթիվ գերատեսչությունների սպասմանը , Տաշիր Սամոյին չեն շտապեցնում:Արդյո՞ք հաջողակ գործարարին չնեղացնելու միտումը դա կապված է նախընտրական շրջանի հետ:

Ի դեպ Սամվել Կարապետյանը, կամ Տաշիր  ընկերությունների խումբը մտադիր է գնել աշխարհահռչակ իտալական Ռոբերտո Կավալլի բրենդը: Այս մասին հայտնել են ռուսական լրատվամիջոցները՝ հղում անելով իտալական հեղինակավոր Il Sole 24 Ore գործարար պարբերականին։

Նշվում է, որ գործարքն իրականացնելու համար նա մտադիր է ծախսել 500 մլն եվրո (ներկայիս փոխարժեքով՝ մոտ 660 մլն դոլար):