ՀՀ ազգային անվտանգության ծառայությունում հավաստի օպերատիվ տվյալներ են ստացվել, որ Երևան քաղաքում անցկացվող հավաքի կազմակերպիչները մտադրված են այսօր անցկացվող ՀՀ ԱԺ հերթական նստաշրջանի ընթացքում սադրանքների միջոցով հրահրել հակաօրինական գործողություններ և դրդել հավաքի մասնակիցներին զավթել ԱԺ շենքը և հարկադրել կատարելու որևէ գործողություն՝ այդ կերպ ապակայունացնել երկրի ներքին անվտանգությունը, խաթարել հասարակական կարգն ու անվտանգությունը: Այս մասին հայտարարություն է տարածել ԱԱԾ-ն:

Հայտարարությունում նաեւ ասվում է. «Ազգային անվտանգության ծառայությունը խստորեն նախազգուշացնում է հավաքի կազմակերպիչներին և դրանց մասնակիցներին՝ ձեռնպահ մնալ հակաօրինական գործողություններ կատարելուց՝ հակառակ պարագայում կատարվածի ողջ պատասխանատվությունը կրելու են դրանց կազմակերպիչները:

Ծառայությունը կոչ է անում բոլոր օրինապաշտ քաղաքացիներին տուրք չտալ սադրանքներին, զերծ մնալ հակաօրինական քայլեր կատարելուց, չտրվել սադրանքներին՝ հակառակ պայմաններում հավասարապես կիսելու են քրեական պատասխանատվության ողջ բեռը»:

2022 թվականի մարտի 3-ի դրությամբ worldpopulationreview.com կայքում հրապարակված տվյալների համաձայն՝ հանցավորության մակարդակի 2022 թվականի ցուցիչով (ցուցիչը հաշվարկվում է 0-ից 100 ինդեքսով՝ հանցավորության ցածր մակարդակից դեպի բարձր մակարդակ կարգով – խմբ․) Հայաստանը զբաղեցնում է 10-րդ տեղը (22.79 ինդեքսով)՝ առաջ անցնելով ինչպես ԱՊՀ բոլոր երկրներից, այնպես էլ եվրոպական երկրների մեծ մասից: «Արմենպրես»-ի հաղորդմամբ՝ Ազգային ժողովում այս մասին ասաց ՀՀ գլխավոր դատախազ Արթուր Դավթյանը, ներկայացնելով Հայաստանի Հանրապետության դատախազության 2021 թվականի գործունեության մասին հաղորդումը։

Գլխավոր դատախազը նշեց, որ Հայաստանում 100 հազար բնակչին բաժին է հասնում 1020 հանցագործության դեպք։

 
«Պետք է նշել, որ այս ցուցանիշով մեր երկիրը շարունակում է էական դրական պատկեր ապահովել։ «Համաշխարհային բնակչության գնահատում» անկախ միջազգային կազմակերպության հրապարակված տվյալների համաձայն՝ հանցավորության մակարդակի 2022 թվականի ցուցիչով Հայաստանը զբաղեցնում է 10-րդ տեղը 22,79 ինդեքսով, առաջ անցնելով ԱՊՀ բոլոր երկրներից, ինչպես նաև եվրոպական երկրների մեծ մասից։ Համեմատության համար նշենք, որ Դանիան զբաղեցնում է 20-րդ տեղը, Ֆինլանդիան՝  23-րդ տեղը, Գերմանիան՝ 42-րդ տեղը, Ռուսաստանը՝ 51-րդ տեղը»,- ասաց Դավթյանը։

Գլխավոր դատախազի խոսքով՝ 2021 թվականին արձանագրվել է հանցագործությունների բացահայտման ցուցանիշի աճ։

«2021 թվականին բացահայտման ցուցանիշը կազմել է 57,7 տոկոս, նախորդ տարվա 55,7 տոկոսի դիմաց։ Ընդ որում, պետք է փաստել, որ 3830-ով ավելի հանցագործություն, քան նախորդ տարի»,- ասաց Դավթյանը։

Հայաստանում առկա է քաղաքական լուրջ ճգնաժամ, որն աստիճանաբար խորանում է, շատ լուրջ վտանգ կա, որ սա կարող է լուրջ ցնցումների հասնել: «Փաստինֆո»-ի հետ զրույցում հայտարարել է քաղաքական մեկնաբան Արմեն Բաղդասարյանը:

Փորձագետը չի բացառել, որ քաղաքական այս լարվածությունը կարող է հանգեցնել քաղաքացիական բախումների, քանի որ կարծում է, որ իշխանությունը ինքնակամ չի հանձնի իշխանությունը, ոչ էլ կնստի բանակցությունների ընդդիմության հետ, իսկ ընդդիմությունն էլ, ոգևորվելով շարժման թափից, նույնպես պատրաստ է ցանկացած գնով վերցնել իշխանությունը:

Նշենք, որ իշխող խմբակցության ներկայացուցիչները շարունակում են պնդել, թե երկրում ներքաղաքական ճգնաժամ չկա, ավելին՝ տարբեր հայտարարություններով փորձում են հեգնել ընդդիմության շարժումը:

Ըստ փորձագետի՝ ՔՊ-ականների արձագանքն ուղիղ համեմատական է զանգվածային ակցիայի մասնակիցների թվին, որքան ակցիայի մասնակիցների թիվը մեծանա, այնքան այդ հայտարարությունները կլինեն մեղմ.

«Չեմ բացառում, որ եթե շարժումը մեծ թափ հավաքի, շատերը ճարպկորեն փորձեն անցնել ընդդիմության կողմը և սկսեն իշխանություններին քննադատել: Հնարավոր է, որ հիմա էլ փորձում են ընդդիմության լիդերների հետ կոնտակտներ փնտրել, ամեն դեպքում՝ իշխող ֆրակցիայում պատեհապաշտները շատ են, որոնք պատահաբար են այնտեղ հայտնվել, և քանի որ արդեն հարմարվել են իշխանության վայելքներին, չէին ցանկանա միանգամից զրկվել դրանից և կփորձեն իրենց համար պահեստային տարբերակ ունենալ»,-ասաց Արմեն Բաղդասարյան:

Փորձագետը միևնույն ժամանակ նկատում է, որ նման հայտարարություններ են անում ՔՊ-ական վարկաբեկված պատգամավորները, իսկ հիմնական մասը գերադասում է ասպարեզում չերևալ, ընդհատակ է անցել և որևէ հայտարարություն չի անում.

«Սպասում են, տեսնեն՝ ինչ կլինի»,-ասաց Արմեն Բաղդասարյանը:

Ինչ վերաբերվում է Նիկոլ Փաշինյանին՝ փորձագետը կարծում է, որ նա ևս ինչ-որ պահի ստիպված կլինի արձագանքել.

«Նա հետևում է իրադարձություններին, եթե շարժումը թուլանա, ինքը կանդրադառնա և կասի՝ տեսաք, շարժումն աջակցություն չունի, իսկ եթե հզորացավ, նա ստիպված է լինելու անդրադառնալ դրան, չեմ բացառում անգամ, որ իր կողմնակիցներին կոչ անի դուրս գալ փողոց, այսպես թե այնպես, նա անդրադառնալու է սրան, հիմա սպասողական վիճակ է»,-ասաց մեր զրուցակիցը:

Փորձագետն ընդգծեց, որ Նիկոլ Փաշինյանը ցանկացած գնով կփորձի պահպանել իր իշխանությունը՝ անգամ քաղաքացիական բախումների գնով:

Հարցին՝ թե արդյո՞ք ընդդիմադիրների շարժումը նոր թափ հավաքելու միտում ունի , կա՞ն արդյունքի հասնելու նախադրյալներ, փորձագետն արձանագրեց, որ իշխանափոխության նախադրյալներ կան, բայց ընդդիմությունը պետք է կարգախոսների դաշտից դուրս գա և ներկայացնի հնարավոր իշխանափոխությունից հետո քայլերի գոնե մոտավոր ծրագիր.

«Սրանից հետո, կարծում եմ, նրանց աջակիցների թիվը կավելանա»,-ասաց քաղաքական մեկնաբանը:
Իսկ թե չհաջողելու դեպքում՝ արդյո՞ք ընդդիմադիր լիդերները հետքայլի շանս կունենան, փորձագետն ասաց.

«Չհաջողելու դեպքում՝ նրանք մեղքը կբարդեն ժողովրդի վրա, կասեն՝ մենք ի՞նչ անեինք, որ ժողովուրդը չեկավ մեր հետևից, կգնան ու կշարունակեն իրենց գործունեությունը խորհրդարանում»,-ասաց Արմեն Բաղդասարյանը:

Հակակոռուպցիոն կոմիտեն այսօր անուղղակիորեն հաստատեց, որ Նիկոլ Փաշինյանը կարող է մեղադրվել պետական դավաճանության և այլ հանցանքներ կատարելու մեջ, ֆեյսբուքյան էջում գրել է ԱԺ «Հայաստան» խմբակցության պատգամավոր Արթուր Ղազինյանը՝ ավելացնելով, որ Փաշինյանին պետական դավաճանության մեղադրանք առաջադրելու միջնորդությունը չմերժվեց, այլ հետաձգվեց լրացուցիչ ապացույցներ ձեռք բերելու համար:

«Հիշեցնեմ, այս քրեական գործով Նիկոլ Փաշինյանը մինչ օրս չի հարցաքննվել: Ոչինչ, շուտով կհարցաքննվի, քիչ մնաց», — նշել է պատգամավորը։

Հիշեցնենք՝ ապրիլի 26-ին ՀՀ գլխավոր դատախազությունում ստացվել է առանձին պահանջ՝ 2020թ. արցախյան պատերազմի աղետալի հետևանքներին հանգեցրած պատճառների հանգամանքների վերաբերյալ ՀՀ հակակոռուպցիոն կոմիտեում միացված վարույթով քննվող քրեական գործով ՀՀ վարչապետ Նիկոլ Փաշինյանին ՀՀ քրեական օրենսգրքի 299-րդ հոդվածի 1-ին մասով, 308-րդ հոդվածի 2-րդ մասով և 309-րդ հոդվածի 3-րդ մասով որպես մեղադրյալ ներգրավելու վերաբերյալ:

Հսկող դատախազի կողմից այս միջնորդությունն ուղարկվել էր վարույթն իրականացնող քննիչին՝ ՀՀ քրեական դատավարության օրենսգրքի 102-րդ և 199-րդ հոդվածներով սահմանված կարգով քննարկելու նպատակով:

ՀՀ ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանն, անդրադառնալով վերջին օրերին Հայաստանում ծավալվող ներքաղաքական զարգացումներին, հույս է հայտնել, որ շուտով կվերադառնանք կյանքի բնականոն ընթացքին:

«Վերջին օրերին մայրաքաղաքի փողոցներում ականատես ենք լինում ընդդիմության կողմից կազմակերպված խառնակչություններին, որոնք ոչ այլ ինչ են, քան գործողություններ՝ միտված ապակայունացնելու մեր երկրի ներքին հանդարտությունը և որոնք անպայմանորեն ազդելու են մեր պետական սահմանների անվտանգության վրա։ Այս օրերին առանձնահատուկ գովեստի է արժանի ՀՀ ոստիկանության ծառայողների անկողմնակալ և օպերատիվ գործունեությունը, որի հիմքում, ըստ էության, ընկած է պետության ներսում կայունության ապահովման խորը գիտակցումը։

Շնորհակալություն եմ հայտնում ՀՀ ոստիկանությանը օրինակելի և պետականամետ աշխատանքի համար, վստահ եմ, որ շուտով կվերադառնանք կյանքի բնականոն ընթացքին՝ մերժելով մեր երկրի արտաքին և ներքին խաղաղությանը վնասող բոլոր տեսակի սադրանքները»,- «Արմենպրես»-ի հաղորդմամբ՝ ասված է Անդրանիկ Քոչարյանի հայտարարությունում։

Պայքարը այս անգամ ապակենտրոն բնույթ ունի, որը կազմակերպական առումով ճիշտ է, բոլորովին պատադիր չէ, որ բոլորը կենտրոնացած լինեն նույն տեղում և պայքարը տանեն մեկ հրապարակում։ Այս մասին Ֆրանսիայի հրապարակում ասաց ԱԺ «Հայաստան» խմբակցության պատգամավոր Արմեն Ռուստամյանը։

«Ինչպես 1988թ-ին, այնպես էլ հիմա գաղափարն է բոլորին միավորել, նորից ազգի պահպանման խնդիրն է առաջացել։ Եթե Նիկոլ Փաշինայնը չի հայտարարում, որ Արցախը Ադրբեջանի կազմում չի կարող լինել, անկլավային վիճակում չի կարող լինել և ՀՀ-ն պետք է վերագտնի երաշխավոր լինելու կարգավիճակ, ապա իր ասածները ընդամենը բառակույտ են, որով փորձ է անում նորից մոլորեցնել բոլորին»,- ասաց Ռուստամյանը։

Նա նշեց, որ ազգային և ապազգային կերպաների պայքար է ընթանում։

«Նիկոլ Փաշինյանը կամավոր հրաժարական չի տա, նրան պետք է ստիպել հրաժարական տալ։ Իր հենարանը մնացել են այն նեղ շրջանակը, որոնք կապված են միմյանց հետ ապազգային ծրագրերով և ուժայինները, որոնք ի վերջո հասկանալու են, ում մասին է այս խոսքը, ում են պաշտպանում և ում վրա են հարձակվում։ Հարձակվում են այն մարդկանց վրա, որոնց հաշվին այսօր գոյություն ունե՞ն։ Իր հենարանը կամաց-կամաց կարձանագրի այն, ինչ իրականում կա ու այդ պարագայում Փաշինյանի հեռանալը կլինի ժամերի հարց»,- հրապարակում ասաց ԱԺ «Հայաստան» խմբակցության պատգամավոր Արմեն Ռուստամյանը։

Իշխանությունը զորք է հանել մեր դեմ, բայց չեն կարող՝ ինչքան բռնում են, էնքան շատանում ենք, Երևանն արդեն փողոցում է՝ ասաց ՀՅԴ Հայաստանի ԳՄ ներկայացուցիչ, ԱԺ փոխնախագահ Իշխան Սաղաթելյանը, որի գլխավորությամբ երթը շրջում էր Երևանի փողոցներով ու տարբեր հատվածներում փակում դրանք։

«Սա երթերից մեկն է, Երևանում հիմա 20 այսպիսի երթ կա։ Արդեն ամեն ինչ ավարտված է։ Պարզապես ոստիկանները պետք է հասկանան, որ իրենք չեն ակրող Նիկոլ պահել և այս ապօրինություններին պետք է վերջ դնեն, բայց տեսնում եք քաղաքացիներն տանում են՝ ոստիկանական բաժիններում են երգում»,-ասաց Իշխան Սաղաթելյանը։

Նա վստահեցրեց, որ ցույցերը շարունակվելու են մինչև Նիկոլ Փաշինյանին ծնկի բերեն։ Իսկ եթե հրաժարական չտա՞՝ հարցին, Սաղաթելյանը պատասխանեց՝ չի կարող չտալ։

«Մայիս ամիսը բավականին հարուստ է լինելու իրադարձություններով, ծանր էմոցիաներով ու պոռթկումներով։ Մենք ունենալու ենք արևի խավարում, որից հետո գտնվելու ենք խավարման միջանցքում, որին կհաջորդի լուսնի խավարումը»,-այս մասին «Փաստինֆո»-ի եթերում՝ «Աստղերը հուշում են» խորագրի ներքո ասել  է աստղաբան Աննա Հակոբյանը՝ նշելով, որ լինելու են փոփոխություններ՝ փոխվելու են պարտնյորներ ու պայմանավորվածություններ։

«Մայիսին տեղի ունեցող խավարումներից անմիջապես հետո՝ մի քանի ամիսների ընթացքում, սպասվում են մահեր։ Դրանք կարող են լինել հեղինակավոր անձինք, Կառավարության անդամներ և այլն։ Արևի խավարումը նոր սկիզբ կբերի»,- ասել է աստղաբանը, որի դիտարկումներով կարող են սրացումներ լինել սահմաններին։

Անդրադառնալով օրեր առաջ Լեո – Պարոնյան խաչմերուկում տեղի ունեցած ողբերգական ավտովթարի թեմային, աստղագետը նկատել է՝ հղի կնոջ էներգիան չափազանց ուժեղ է, հետևաբար, բոլոր նրանք, ովքեր մասնակից են դարձել հղի կնոջ սպանությանը, ունենալու են դժբախտ պատահարներ, նրանք իրենց մահով չեն մահանալու։

Բաքուն անտեսել է, այսպես կոչված, «Խաղաղության պայմանագրի» վերաբերյալ հայկական կողմի առաջարկները, սակայն դա չի խանգարել պաշտոնական Երեւանին բանակցություններ սկսել Ադրբեջանի հետ՝ նրանց իսկ կողմից ներկայացված միակողմանի սկզբունքների հիման վրա։

Ավելին, Հայաստանը փաստացի Ադրբեջանի հետ սկսում է երկկողմ՝ հարաբերություններ արհամարհելով ԵԱՀԿ-ի Մինսկի խմբին, անտեսելով Լեռնային Ղարաբաղի հակամարտության կարգավորման վերաբերյալ համանախագահների մոտեցումները՝ փաստացի այս հարցում եւս ընդունելով Ադրբեջանի թելադրած խաղի կանոնները։

Նման հետեւության հիմքը ՀՀ ԱԳՆ-ից «Փաստինֆո»-ի գրավոր հարցմանն ի պատասխան ուղարկված գրությունն է։

Արտաքին գործոց նախարար՝ կա այսպիսի գերատեսչություն և այն ղեկավարող պետական պաշտոնյա։ Եւ «Փաստինֆո»-ն 6 հարց է ուղղել այս կառույցին՝ համազգային հետաքրքրություն ներկայացնող հարցերի վերաբերյալ մեկնաբանություն ստանալու համար։ Նախ` այստեղ 30 օր ժամանակ էին խնդրել մեկնաբանություն տալու նպատակով՝ հարցերն ուսումնասիրելու համար։ Մինչդեռ՝ մեր հարցերը շատ պարզ էին ու միամտաբար ենթադրում էինք, որ ԱԳՆ-ն ունի իր դիրքորոշումները՝ թե հայ-ադրբեջանական հարաբերությունների, թե Արցախի ճակատագրի վերաբերյալ։ Սակայն պարզվեց չունի ու չի կարողացել պատասխաններ՝ գտնել անգամ «ուսումնասիրություններից» հետո։ Փոխարենը՝ իր ոչինչ չասող գրությամբ փաստել է, որ օրվա իշխանության օրակարգը որոշում է Բաքուն։

Եվ այսպես, ապրիլի 14-ին ՀՀ ԱԳՆ ուղարկված մեր գրավոր հարցման վեց հարցերից մեկը խնդիր ուներ հստակեցնելու՝ «արդյո՞ք այսպես կոչված՝ «խաղաղության պայմանագրի» համար Ադրբեջանի առաջ քաշած սկզբունքները փորձագիտական շրջանակների հրապարակած հայտնի 5 սկզբունքներն են, որոնք, ըստ էության, ենթադրում են Ադրբեջանի տարածքային ամբողջականության ճանաչում և որոնք, Հայաստանը պաշտոնապես «ընդհանուր առմամբ» ընդունելի էր համարել։ Բնականաբար, «ընդհանուր առմամբ» ձևակերպումը տեղ է թողնում հետաքրքրվելու՝ արդյո՞ք ադրբեջանական բոլոր 5 նախապայմաններն ընդունելի են հայկական կողմի համար:

Այս հարցին հստակ պատասխանը տալուց ԱԳՆ-ն ուղղակիորեն հրաժարվել էր՝ հղում կատարելով ԱԳ նախարար Արարատ Միրզոյանի ՝ մարտի 15-ին «Արմենպրես» լրատվական գործակալությանը տված հարցազրույցին, ըստ էության, խուսափելով հայ-ադրբեջանական բանակցային գործընթացի մանրամասները ներկայացնելուց։

Բաքվի սկզբունքներն, ընդհանուր առմամբ, Հայաստանի օրվա իշխանությունների համար ընդունելի լինելու մասին Փաշինյանի ու Միրզոյանի հայտարարություններին զուգահեռ ԱԺ ամբիոնից նշվել էր, թե հայկական կողմը եւս առաջարկներ է ներկայացրել Ադրբեջանին՝ ԵԱՀԿ Մինսկի խմբի միջոցով։ Նկատի ունենալով, որ թե Բաքուն, թե Մոսկվան հայտարարել են, որ հայ-ադրբեջանական բանակցությունների հիմքում Ադրբեջանի ներկայացված սկզբունքներն են՝ խնդրել էինք հայտնել, առ այս պահը Ադրբեջանն արձագանքել է արդյոք հայկական կողմի առաջարկներին, դրանք ընդունելի համարվե՞լ են, թե ոչ։

ԱԳՆ-ում հարցն ուսումնասիրելուց հետո որոշել են չպատասխանել դրան՝ այդպիսով փաստելով, որ Բաքուն դրանք անտեսել է, կամ ուղղակի մերժել, ինչի պայմաններում մեղմ ասած տարօրինակ է միայն Բաքվի առաջարկած խաղի կանոններով բանակցային պրոցես սկսելու ՀՀ գործող իշխանությունների վճռականությունը։

Երրորդ հարցով խնդրել էինք ՀՀ ԱԳՆ-ին պատասխանել, թե պաշտոնական Երեւանը պատրաստ է արդյոք Ադրբեջանի հետ սկսել սահմանների դեմարկացիայի ու դելիմիտիացիայի աշխատանքները՝ առանց ադրբեջանական զորքերի դուրս բերումը ՀՀ ինքնիշխան տարածքից՝ Սոթք-Խոզնավար հատվածից։ Սա նախապայման դիտարկվում է, թե ոչ։ Պարզվում է՝ ադրբեջանցիների ներխուժումից Հայաստանն ազատելու հարցը եւս գործող իշխանությունների օրակարգում չկա։ Համենայն դեպս նշված հարցին ի պատասխան չեն հայտնել, որ այդ հարցը օրակարգում է։ ԱԳՆ-ից միայն հիշեցրել են, որ «Բրյուսելյան վերջին հանդիպման արդյունքներով ձեռք է բերվել պայմանավորվածություն՝ մինչեւ ապրիլի վերջ ստեղծել Հայաստանի և Ադրբեջանի միջև սահմանազատման և սահմանագծման անվտանգության հարցերով հանձնաժողով, որը օժտված կլինի նաեւ սահմանի երկայնքով անվտանգություն ու կայունություն ապահովելու հարցերով զբաղվելու լիազորությամբ եւ որի մասին համաձայնություն ձեռք էր բերվել 2021 թ. նոյեմբերի 26-ին Սոչիում կայացած հանդիպմանը։ Սույն գործընթացն այժմ ընթացքի մեջ է եւ հավելյալ զարգացումների վերաբերյալ հանրությանը կտեղեկացվի լրացուցիչ»։

Մեր հաջորդ հարցը վերաբերում էր կրկին պաշտոնական Երեւանի հայտարարությանը։ Մասնավորապես հիշեցրել էինք, որ ըստ պաշտոնական հայտարարությունների Հայաստանը դիմել էր ԵԱՀԿ Մինսկի խմբին՝ Բաքվի հետ խաղաղության պայմանագրի շուրջ բանակցությունների համար ու ցանկացել էինք ճշտել, թե որքանով են գործող իշխանությունները հետեւողական իրենց իսկ հայտարարությանը. բանակցությունները Մինսկի խմբի միջոցո՞վ են իրականացվելու, թե՞ այլեւս նահանջել են այդ մտքից ու Բաքվի հետ բանակցություններ են սկսում առանց միջնորդների։ Սակայն ԱԳՆ-ն այս հարցն ուսումնասիրելուց հետո չի իմացել ինչ պատասխանի եւ կրկին անպատասխան է թողել։

Մյուս հարցը վերաբերում էր Մինսկի խմբի ամերիկացի համանախագահ Ջեյմս Ուորլիքի հայտարարությանը առ այն, որ եթե տեւական խաղաղություն եք ուզում, ապա Լեռնային Ղարաբաղի կարգավիճակի հարցը պարզապես մի կողմ դնելը հնարավոր չէ, այդ հարցը կողմերը պետք է կարգավորեն։ Եւ խնդրել էինք ՀՀ արտաքին գործերի ներկայիս նախարար Արարատ Միրզոյանին՝ ներկայացնել իր դիրքորոշումը, այն է՝ համակարծիք են արդյո՞ք ամերիկացի համանախագահի հետ։ Արդյունքում եւս մեկ անգամ փաստվեց, որ անգամ ամերիկացի համանախագահին Արցախի ապագան ավելի շատ է մտահոգում, քանի Հայաստանի օրվա իշխանություններին։ Արարատ Միրզոյանը այս հարցին եւս չի պատասխանել՝ ընդամենը նշելով, որ «ԵԱՀԿ Մինսկի խմբի համանախագահության ձեւաչափը Լեռնային Ղարաբաղի հակամարտության կարգավորման մանդատ ունեցող միակ կառույցն է»։

Վերջին հարցը կրկին վերաբերում էր խաղաղության պայմանագրի շուրջ ընթացող բանակցություններին՝ խնդրելով ասել, թե արդյոք Հայաստանը լիազորված է այդ բանակցություններին խոսել Արցախի Հանրապետության անունից, ինչին ի պատասխան ԱԳՆ-ն նշել է, թե. «Պետությունների՝ այլ երկրի անունից որեւէ հարցով հանդես գալը կարգավորվում է երկկողմ համաձայնագրերով եւ միջազգային իրավունքի նորմերով»։

Հիշեցնենք, որ ՀՀ գործող վարչապետ Նիկոլ Փաշինյանը 2019 թվականին հայտարարել էր, որ իրենց կառավարությունը չունի մանդատ և լիազորություն ներկայացնելու Արցախին և Արցախի ժողովրդին։

«Արցախի քաղաքացիները իմ օգտին, ձեր օգտին չեն քվեարկել և չեն օժտել մեզ իրենց ներկայացնելու մանդատով»,- ասել էր Փաշինյանը:
ԱԳՆ-ի գրությունն ընդամենը փաստում է, որ Հայաստանի արտաքին գերատեսչությունը չունի տեսլական, ոչինչ չի որոշում, անում է այն, ինչ պահանջում է թշնամի երկիրը։

Նիկոլ Փաշինյանի հետ հանդիպմանը Արցախի նախագահ Արայիկ Հարությունյանն իր խոսքում ասաց, որ Արցախում կա քաղաքական կոնսենսուս եւ նկատի ուներ Ազգային ժողովում բոլորի կողմից ընդունված միասնական հայտարարությունը՝ ի պատասխան ապրիլի 13-ին Նիկոլ Փաշինյանի հայտարարության, որտեղ նա խոսել էր Արցախի կարգավիճակի հարցում նշաձողն իջեցնելու մասին:  Այս մասին NEWS.am-ի հետ զրույցում նշեց Արցախի ԱԺ ՀՅԴ խմբակցության պատգամավոր Արթուր Մոսիյանը:

«Արայիկ Հարությունյանը խոսեց նաեւ ինքնորոշման իրավունքի մասին եւ ասաց, որ մենք անկախության ուղուց չենք շեղվելու: Սրա շուրջ կա քաղաքական կոնսենսուս»,-ասաց նա:

Անդրադառնալով Նիկոլ Փաշինյանի հայտարարությանը, որ իրենց օրակարգն այն է, որ արցախցին ապրի Արցախում, իրեն համարի արցախցի, ղարաբաղցի և հայ, Մոսիյանն ասաց. «Դա նշանակում է, որ Նիկոլ Փաշինյանը քաղաքական օրակարգը տանում է երկրորդ պլան եւ մանիպուլյատիվ հայտարարություններ է անում: Արցախցին հիմա էլ է ապրում Արցախում եւ ապրում է որպես հայ: Հետո՞: Մենք խոսում ենք Արցախի հարցի լուծման, Արցախի կարգավիճակի մասին: Վերջիվերջո, արցախցին հանրաքվեով անկախացել է, 44-օրյա պատերազմի արդյունքում օկուպացվել են Արցախի տարածքները, մենք ընդունել ենք բռնազավթված տարածքների մասին օրենք, բազմիցս հայտարարել ենք, որ բացառվում է, որ Արցախը լինի Ադրբեջանի կազմում: Նիկոլ Փաշինյանը փոխանակ այս հարցերի պատասխանը տա, ասի՝ համաձայն է արցախցու հետ, թե ոչ, ինքը հայտարարոեւմ է, թե արցախցին պետք է ապրի Արցախում: Կարծում եմ՝ ինքը սրանով օրակարգից շեղվում է: Նա խոսւափում է խոսել Արցախի ինքնորոշման իրավունքից: Մենք մեր անկախության ուղուց չենք շեղվելու եւ կարգավիճակի հարցը պետք է լուծվի ինքնորոշման իրավունքի վրա»:

Ինչ վերաբերում է խաղաղության օրակարգին, ՀՅԴ-ական գործիչն ասաց. «Որեւէ մեկը ավելի քան արցախցին, խաղաղության գինը չգիտե, որեւէ մեկը դեմ չէ արժանապատիվ խաղաղությանը: Դա չի տեղավորվում Նիկոլ Փաշինյանի խաղաղության օրակարգի մեջ: Երբ ինքը սկսեց խոսել խաղաղության դարաշրջանից, մենք ունեցանք կորուստներ, ունեցանք զոհեր, տարածքների կորուստներ: Սա Նիկոլ Փաշինյանի խաղաղության օրակարգն է, սա արցախցիների պատկերացրած խաղաղության օրակարգը չէ: Արցախցին կողմ է արժանապատիվ խաղաղության օրակարգին՝ առանց Նիկոլ Փաշինյանի»:

Արթուր Մոսիյանը կրկնեց, որ Արցախում քաղաքական կոնսենսուսը նրա շուրջ է, որ Արցախը պետք է ինքնորոշվի  եւ անկախության ուղին շարունակի. «Կոնսենսուսը դրա շուրջ է, իսկ մնացածը մանիպուլյացիաներ են, որ արցախիներն ընդունել են խաղաղության օրակարգը: Նիկոլ Փաշինյանի խաղաղության օրակարգը Արցախում որեւէ մեկը չի ընդունում: Արցախցին դեմ չէ արժանապատիվ խաղաղությանը, մեր պատկերացրած արժանապատիվ խաղաղության օրակարգը եւ Նիկոլ Փաշինյանի խաղաղության օրակարգը իրար հետ որեւէ կապ չունեն: Նիկոլ Փաշինյանինը խաղաղություն մուրալու օրակարգ է»:

Աղբյուրը՝  NEWS.am