«Ոտքի Հայաստան»-ն այսօր «Արցախի դեմ ապրիլյան ագրեսիայի տեսագրությունը» վերնագրով տեսանյութ է տարածել, որը մեծ քննարկումների առիթ է դարձել սոցիալական ցանցերում. ոմանք դա որակում են որպես դավաճանություն, ռազմական գաղտնիքի բացահայտում, իսկ ոմանք էլ տեսակետ են հայտնում, որ այս կերպ լույս է սփռվում մի շարք հարցերի վրա: Տեսանյութում երեւում է ադրբեջանցիների տեղաշարժը, ինչի մասին զեկուցվում է հրամանատարությանը, սակայն այնտեղից գործողության դիմելու որեւէ հրահանգ չի տրվում:

Աղմուկ հանած տեսանյութի վերաբերյալ Yerkir.am-ին թեեւ չհաջողվեց պաշտպանության նախարարությունից պաշտոնական արձագանք-պատասխան ստանալ, սակայն բարձրաստիճան մի պաշտոնյա, ով չցանկացավ ներկայանալ, մեր թղթակցի հետ մասնավոր զրույցում հայտարարեց, որ տեսանյութը կիսատ է, եւ տարածողը միտումնավոր ամբողջական տարբերակը չի տարածել:

Ըստ ՊՆ բարձրաստիճան պաշտոնյայի, իրականում ամեն ինչ կազմակերպվել է բարձր մակարդակով, երեք դիրքով կազմակերպված թողել են, որ ադրբեջանցիները կուտակվեն ու հետո նոր մերոնք անցել են գործողության, իսկ դիրքերը չեն զիջել:

Արտակ Գալստյանի պաշտպան Սուսաննա Սարգսյանը հայտնում է, որ իր պաշտպանյալը հացադուլ է հայտարարել եւ բաց նամակ հղել Սերժ Սարգսյանին:

Պաշտպանի խոսքով՝ Գալստյանին Հատուկ քննչական ծառայությունում սպառնում են անձնական հաշվեհարդար տեսնել:

«ՀՀ հատուկ քննչական ծառայությունը իր պաշտոնական  կայքով տարածված հաղորդագրությամբ նշում է , որ « Կալանավորվել է «Վանոյի Արտակ» մականունով հայտնի Արտակ Գալստյանը»,  նույն գործով Տիգրան Ուրիխանյանը մամուլում հայտարարություններ է անում, որ «Վանոյի Արտակ»-ը  ոստիկանության պատվերն է կատարում:  Այսինքն  իսկզբանե Արտակ Գալստյանին թիրախավորելով, որպես ոստիկանության հետ սերտորեն կապված անձ, այսօր ակտիվ գործողություններ է ծավալում, ընդհուպ միջամտելով ՔԿՀ ներքին կանոնակարգին, փորձելով իր անձնական հաշիվներն լուծել ՔԿՀ-ում»,- մասնավորապես՝ ասվում է պաշտպանի հայտարարությունում: Վերջինս նշվում է նաեւ, որ իր պաշտպանյալին սկզբում առաջադրել են անհեթեթ մեղադրանք, որը բացարձակապես  հիմնված է նրա հանդեպ թշնամանք ունեցող անձի՝ Շիրակի մարզի նախկին  ոստիկանապետ Կարեն Բաբակեխյանի ցուցմունքների վրա:

«Երկրորդ դրվագով մեղադրանք են առաջադրել կաշառքի դրդչության համար, միայ երրոդ անձի ցուցմունքով, որն իբր թե լսել է նման խոսակցություն :  Գործով մյուս մեղադրյալ Անի Հովհաննիսյանի կողմից  ՀՀ Գլխավոր դատախազին, ԱԱԾ տնօրենին, ՀՀ նախագահին հասցեագրված միջնորդությամբ անմիջապես նշվում է, որ ՀՔԾ-ում իրեն խոստացել են խափանման միջոցը փոխել եթե նա համաձայնվի Արտակ Գալստյանի դեմ ցուցմունք տա: Մեղադրանքի հիմնավորված չլինելը, Արտակ Գալստյանին չպատկանող տարածքներում իբրև Արտակ Գալստյանին պատկանող տարածքներ,  անօրինական խուզարկությունները, իքնին հաստատում են այն հանգամանքը, որ հատուկ քննչակած ծառայությունը հանձինս իր ղեկավարների փորձում է հաշվեհարդար տեսնել Արտակ Գալստյանի հետ, և այդ նպատակին հասնելու համար ջանք չեն խնայում: Իսկ Անձնական հաշվեհարդար տեսնելու միտումը ակնհյատ է հենց Անի Հովհաննիսյանի միջնորդոությամբ նշված հանգամանքներով, այն է հատուկ քննչական ծառայությունում համոզված են, որ ՀՔԾ պետ Վահրամ Շահինյանի մասին ինչ որ հոդվածներ տպագրելը կամ այդ հոդվածների պատվիրատու են դիտում Արտակ Գալստյանին:

Այս պայմաններում  Արտակ Գալստյանի տեղփոխումը հատուկ մասնաշենքից ընդհանուր մասնաշենք, նշանակում է Արտակ Գալստյանի նկատմամբ  մահապատժի դատավճիռ կայացնել»,- հայտնում է պաշտպանը:

Ստորեւ ներկայացնում ենք Գալստյանի բաց նամակը Սերժ Սարգսյանին.

«Ահազանգում եմ Ձեզ այն մասին, որ ՀՀ ՀՔԾ կառույցի կողմից  տեղի է ունենում անձնական հաշվեհարդար իմ անձի նկատմամվ, ընդհուպ մինչև գործը հասել է  ֆիզիկական ոչնչացման։

Բացի այն, որ ինձ անձնական թշնամի  հայտարարած Կարեն Բաբակեխյանի կեղծ ցուցմունքով ՀՔԾ քննչական խումբը  ինձ կալանավորել է, սակայն դրանով չի բավարարվում

ՀՔԾ ծառայությունը իր պաշտոնական կայքում ինձ Արտակ Գալստյանիս ներկայացնում է որպես Վանոյի Արտակ , որպես Ոստիկանության հետ սերտ կապ ունեցող անձնավորություն, միևնույն ժամանակ այսօր հունիսի 13-ին գրություն է ուղարկում Նուբարաշեն ՔԿՀ-ի ղեկավարությանը, որպեսզի ինձ նախկին աշխատակիցների խցից  տեղափոխեն քրեական հանցագործությունների ընդհանուր խուց։ Իմ կողմից ՔԿՀ ղեկավարությանը  ներկայացվել է պաշտոնատար անձանց ցանկը, որոնք, որ կարող են հաստատել  իմ անձը և գործունեությունը։ Սակայն ՔԿՀ ղեկավարությունը նշում է , որ պետք է  առաջնորդվի ՀՔԾ գրությամբ։

Սույն հանգամանքներում, ինձ նախկին աշխատակիցների խցից այլ խուց տեղափոխելը հավասարազոր է ՀՔԾ-ի կողմից ինձ ուղղակի մահապատժի ենթարկելուն։

Ելնելով վերը նշված հանգամանքներից և ավելին չտարածվելով բաց նամակիս մեջ  իմ աշխատանքային գործունեության մասին, հայտնում եմ Ձեզ, որ արդեն իսկ Նուբարաշեն ՔԿՀ-ի պետին հայտարարել եմ  հացադուլ հայտարարելու մասին, որպես պահանջ ներկայացնելով իմ անձնական անվտանգության ապահովումը։

Խնդրում եմ Ձեզնից ձեռք  առնել համապատասխան միջոցառումներ ՀՔԾ-ի կողմից իմ անձնական անվտանգության և կյանքիս հանդեպ ՀՔԾ-ի կողմից  ձեռնարկված միջոցները կանխելու նպատակով։

Հարգելի Նախագահ և պրն դատախազ, ՀՔԾ-ի կողմից կատարվող  այս գործողությունները  լրիվ դուրս են  իրավական հարթությունից և նպատակ են հետապնդում կոնկրետ իմ անձի ֆիզիկական բնաջնջումը ։

Այդ պատճառով եմ խնդրում եմ անմիջապես արձագանքել»։

Աղբյուրը՝ armtimes.com

«Հայաստանյան պաշտոնյաներից քչերն են իրենց անունով հանդես գալիս սոցցանցերում. նրանցից շատերը «ֆեյքերի» տակ են գործում: Երկրի առաջին դեմքը` Սերժ Սարգսյանը, բավականին ակտիվ, սակայն անտեսանելի օգտատեր է, ասում են` «այփադը ձեռից ցած չի դնում»:

Ինչպիսի՞ օգտատեր է Գալուստ Գրիգորիչը։ «Նա որեւէ սոցցանցում գրանցված չէ, որեւէ էջ նրա անունով գրանցված չէ, եւ որեւէ մեկը նրա էջը չի վարում»: Ինչո՞ւ: «Որովհետեւ ԱԺ-ն աշխատում է շատ հրապարակային, ու դրա անհրաժեշտությունը չկա»,- ասաց ԱԺ նախագահի մամլո խոսնակը: Օբամայից է՞լ եք բաց աշխատում. նա ՖԲ-ում էջ ունի: «Անհատական մոտեցման խնդիր է»: Պահպանողական-հետադիմակա՞ն եք։ «Չեմ համաձայնի Ձեր ասածի հետ. եթե սոցցանցում կա բարձրացված այնպիսի հարց, որն առնչվում է ԱԺ-ին եւ ԱԺ նախագահին, նա անպայման տեղեկացվում է»»:

«Հրապարակ»

Ավելի մանրամասն՝ թերթի այսօրվա համարում:

««Գյուղատնտեսության նախարարը կկրճատի 1982 թվականի Կատաֆալկա» վերնագրով armtimes.com-ը կիրակի օրը հոդված էր հրապարակել, որտեղ ներկայացրել էր գյուղատնտեսության նախարար Սերգո Կարապետյանի ծառայողական ավտոմեքենաների կրճատման վերաբերյալ կայքին ուղարկած հարցման պատասխանը։ Նախարարը նշել էր, որ ՀՀ կառավարություն ներկայացվել է առաջարկություն կրճատել նաև նախարարության կառավարման ոլորտում գործող պետական մարմիններին, ՊՈԱԿ-ներին, բաժնետիրական ընկերություններին և պետական հիմնարկներին պատկանող թվով 769 ծառայողական ավտոմեքենաներից 134-ը։ Նախարարության տրամադրած ցանկում ամենազարհուրելի կրճատումը նախատեսված էր «Հայջրմուղկոյուղի» ՓԲԸ-ում։ Այստեղ պատրաստվում էին կրճատել 1982 թվականի արտադրության Կատաֆալկա (հուղարկավորության մեքենա)։ «Հայջրմուղկոյուղի» ՓԲԸ-ից armtimes.com-ին երեկ տեղեկացրին, որ իրականում սխալմամբ է մեքենաների ցանկում գրվել «Կատաֆալկա», դրա փոխարեն պետք է ավտոբուսի կմախք լիներ։ Իսկ թե ինչ մակնիշի ավտոբուս է եղել դա, «Հայջրմուղկոյուղի» ՓԲԸ-ում չեն կարողացել պարզել, միայն նշեցին, որ ավտոբուսի կմախքը գտնվում է «Հայջրմուղկոյուղու» Ստեփանավանի տեղամասի տարածքում։ Մեր հարցին՝ որքա՞ն գումար է հատկացվել այս կմախքի պահպանման, ապահովագրման և տեխզննման համար, ընկերությունից պատասխանեցին, որ ավտոբուսի կմախքն իրենք ընդունել են որպես մետաղի ջարդոն և հետևաբար պահպանման կամ ապահովագրական ծախսեր չեն արել»:

«Հայկական ժամանակ»

Ավելի մանրամասն՝ թերթի այսօրվա համարում։

Երեկ միասնական ՀՕՊ համակարգի մասին համաձայնագիրը չի ընդգրկվել ԱԺ արտահերթի օրակարգում։ Խոսքը դեռևս 2015 թվականի դեկտեմբերի 23-ին «Հայաստանի Հանրապետության և Ռուսաստանի Դաշնության միջև Հա­վաքական անվտանգության կովկասյան տարածաշրջանում հակաօդային պաշտ­պանության միավորված տարածաշրջանային համակարգ ստեղծելու մասին» համաձայնագրի մասին է։ Համաձայնագրով նախատեսված է Հայաստանի և Ռուսաստանի միջև հակաօդային պաշտպանության միավորված տարածաշրջանային համակարգ ստեղծել, որով հայկական կողմը իր հակաօդային պաշտպանության համակարգի մի մասը տրամադրում է միավորված տարա­ծաշրջանային համակարգին։

Երեկ ՀՀԿ-ն կոնկրետ չի մանրամասնել, թե երբ փաստաթուղթը կդրվի քննարկման։ ՀՀԿ խմբակցության ղեկավար Վահրամ Բաղդասարյանը լրագրողների հետ զրույցում ասել է, թե համաձայնագիրն արտահերթ նիստում չհայտնվեց, քանի որ Հայաստանը հրատապության խնդիր չի դրել։ «Ձեր հետաքրքրությունն ա եղել պարզապես, որ շտապ է, մեկ օրվա, երկու օրվա խնդիր։ Չի եղել նման խնդիր դրված։ Ժամկետները որոշում ենք մենք։ Եթե կլինի անհրաժեշտություն, դրա մասին տեղյակ կպահենք»,- հայտարարել է նա։

Ի դեպ, տեղեկատվություն կա, որ երկկողմ համաձայնագիրն արդեն առաջիկա շաբաթներին քվեարկության կդրվի Ռուսաստանի Պետդումայում։ Չնայած սրան՝ Բաղդասարյանը վստահեցրել է, թե այստեղ արտառոց ոչինչ չի պատահել, փոխարենը՝ ՀՕՊ ուժեր ստեղծելու համաձայնագիրը Հայաստանը կվավերացնի այն ժամանակ, երբ տեսնի դրա անհրաժեշտությունը։ «Թող քննարկեն։ Մի պետություն Ռուսաստանն է, մի պետություն՝ Հայաստանի Հանրա-
պետությունը»,- նշել է նա։

«ՉԻ»

Ամբողջական տեքստը՝ թերթի այսօրվա համարում:

«Հայաստանի կառավարությունը պայքար է հայտարարել կոռուպցիայի ու մենաշնորհների դեմ: Բոլորը խոսում են տնտեսական մենաշնորհների քայքայիչ հետևանքների մասին: Ազգային ժողովը քննարկում է նոր Հարկային օրենսգիրքը, որը, ըստ դրա հեղինակների, հարկային դաշտը դարձնելու է ավելի հավասար, թեթևացնելու է հարկային բեռը, կրճատելու է ստվերն ու ավելացնելու է բյուջեի մուտքերը:

Ընդունենք, որ իշխանությունն անկեղծ է՝ ինչպես՝ մենաշնորհների դեմ պայքարում, այնպես էլ՝ Հարկային օրենսգրքի հարցում: Բայց արդյոք այդ քայլերով լուծվելո՞ւ են Հայաստանի բոլոր հիմնական խնդիրները, որոնք պետությունը հասցրել են այս աղետալի վիճակին: Առաջին հայացքից՝ թվում է, թե Հայաստանի խնդիրների մեծ մասը սոցիալ-տնտեսական են, և տնտեսության մեջ մի քանի բեկումնային քայլերով հնարավոր կլինի էականորեն փոխել իրավիճակը: Գուցե: Բայց Հայաստանի շատ ավելի լուրջ, խորքային խնդիրները ո՛չ տնտեսական են, ո՛չ էլ սոցիալական:

Պարզապես այդ խնդիրներրի զգալի մասը սոցիալական կամ տնտեսական դրսևորումներ են ստանում: Իրականում Հայաստանի կարևորագույն խնդիրները գտնվում են արտաքին քաղաքական հարթությունում: Ընդ որում, պատահաբար, իսկ գուցե օրինաչափորեն, դրանք արտահայտվում են նույն արատավոր դրսևորումներով, ինչ տնտեսական կյանքում: Մեշնաշնորհ: Այո, սա Հայաստանի տնտեսությունը քայքայող ամենագլխավոր խնդիրն է, որից ածանցվում է նաև կոռուպցիան, չնայած կոռուպցիան ունի ավելի լայն` ոչ միայն՝ մենաշնորհային ընդգրկում:

Իսկ մի՞թե մենաշնորհային չէ Հայաստանի արտաքին քաղաքականությունը` մեկ երկրից ունեցած կախվածության ու այդ երկրի տոտալ ազդեցության առումով: Եթե խնդիրը դիտարկենք այս համեմատության տեսանկյունից, ապա կարող ենք արձանագրել, որ Հայաստանի արտաքին քաղաքականության ոլորտում Ռուսաստանն ունի ճիշտ այնպիսի ազդեցություն, ինչպես Սամվել Ալեքսանյանը` շաքարավազի շուկայում:

Եվ ինչպես շաքարավազի շուկայում են ձևի համար շաքարավազ ներկրող մի քանի սուբյեկտներ գրանցված, այնպես էլ Հայաստանն է ձևի համար, Ռուսաստանից բացի, հարաբերվում աշխարհի այլ երկրների հետ: Այդ հարաբերությունները Հայաստանի արտաքին քաղաքականության մեջ ունեն նույնպիսի կշիռ, որքան մի քանի մանր, որպես կանոն՝ միայն իրենց արտադրության համար շաքարավազ ներկրող տնտեսվարողները շաքարավազի շուկայում: Այսինքն` կշիռ չունեն և ապահովում են ձևը` հանուն մենաշնորհային բովանդակության:

Եվ, ինչպես Սամվել Ալեքսանյանն է գերշահույթներ ստանում շաքարավազի իր մենաշնորհից, այնպես էլ Ռուսաստանն է Հայաստանի վրա ունեցած մենաշնորհային ազդեցությունից «գերշահույթներ» ստանում, որոնք արտահայտվում են էներգետիկ համակարգի գրեթե բոլոր ենթակառուցվածքների, Հայաստանով անցնող գազամուղի, կապի ու հաղոդակցության ոլորտի, երկաթուղու, այլ բնագավառներում ունեցած ենթամենաշնորհային ազդեցության տեսքով: Հիմա էլ Ռուսաստանը ցանկանում է ստանալ Հակաօդային պաշտպանության համակարգը: Հայաստանի նկատմամբ Ռուսաստանի մենաշնորհային ազդեցության մասին վկայող օրինակները կարելի է անվերջ շարունակել, բայց դրանից իրավիճակի ողբերգականությունը չի նվազի:

Ճիշտ հակառակը: Բայց տարօրինակն այն է, որ գրեթե բոլորը գիտակցելով ու հասկանալով տնտեսության մեջ մենաշնորհի աղետալի հետևանքների մասին՝ պայքարում են կամ ձևացնում են, թե պայքարում են դրա դեմ, սակայն գրեթե անտարբեր են Հայաստանի արտաքին քաղաքականության մոնոպոլիզացվածության նկատմամբ, որն իր հետևանքներով ու կործանարարությամբ՝ շատ ավելի վտանգավոր է, քան ներքին բոլոր մենաշնորհները` միասին վերցրած: Ընդ որում, ինչպես ներքին կյանքում տնտեսական մենաշնորհներն են փոխկապակցված կոռուպցիոն խոշոր սխեմաների հետ, այնպես էլ արտաքին քաղաքականության ոլորտում` Ռուսաստանի մենաշնորհից ածանցվում են կոռուպցիոն գործարքներ, որոնք պակաս տեսանելի են, քան պետական գնումներում դրսևորվող «ատկատները» կամ «վազվռատները»»:

«168 Ժամ»

Մանրամասները` թերթի այսօրվա համարում:

Հիսուս ասում է.

-Իմ պատվերն այս է, որ սիրեք միմյանց, ինչպես ես սիրեցի ձեզ։ Մեծագույն սերն այն սերն է, որով մարդ ինքն իրեն զոհում է իր բարեկամների համար։ Դուք իմ բարեկամներն եք, եթե գործադրեք այն, ինչ պատվիրում եմ ձեզ։ Այլևս ձեզ ծառա չեմ կոչում, որովհետև ծառան չգիտի, թե ի՛նչ է անում տերը, այլ ձեզ բարեկամ կոչեցի, որովհետև ինչ որ լսեցի իմ Հորից, հայտնեցի ձեզ։ Դուք չէ, որ ընտրեցիք ինձ, այլ ես ձեզ ընտրեցի և ձեզ նշանակեցի, որ գնաք ու պտղաբեր լինեք, և ձեր պտուղը լինի մնայուն, որպեսզի ինչ էլ որ խնդրեք իմ անունով, Հայրս տա ձեզ։ Դարձյալ պատվիրում եմ ձեզ, սիրեցե՛ք միմյանց։
(Հովհաննեսի ավետարան 15:12-17)

«Կոռուպցիայի դեմ պայքարը երեկ չէ, որ սկսվել է, եւ այսօր կամ վաղը չէ, որ պետք է ավարտվի»: Այս մասին, այսօր ԱԺ-ում լրագրողների հետ զրույցում նշեց ԱԺ փոխնախագահ Էդուարդ Շարմազանովը՝ պատասխանելով այն հարցին, թե մեկ ամիս է անցել վարչապետ Հովիկ Աբրահամյանի՝ կոռուպցիայի դեմ պայքարի մեկնարկից, եւ ինչ արդյունքներ են արձանագրվել: ԱԺ փոխխոսնակի խոսքով՝ կոռուպցիան ախտ է, մարտահրավեր, որի մասին իրենք մեկ անգամ չէ, որ հայտարարել են: Նա ասաց, որ իշխանություններն ունեն քաղաքական կամք՝ պայքարելու կոռուպցիայի դեմ:

Լրագրողների հետ զրույցում Էդուարդ Շարմազամովն անդրադարձավ նաեւ ՌԴ ԱԳՆ մամուլի խոսնակի՝  Գարեգին Նժդեհի արձանի տեղադրման արձագանքին։

Մանրամասները՝ տեսանյութում:

https://www.youtube.com/watch?v=yfm3f6KR180

Տեսանյութը  araratnews.am

ՀՀ տրանսպորտի և կապի նախարարության բակային հատվածում տեղի ունեցած ծեծկռտուքի գործով մեղադրյալներ Վազգեն Մկրտչյանին ու Հովհաննես Շմոյանին կալանավորելու՝ առաջին ատյանի դատարանի որոշումների դեմ վերաքննիչ բողոքները մերժվել են: Այս մասին «Փաստինֆո»-ի լրագրողին հայտնեց մեղադրյալների պաշտպան, փաստաբան Միհրան Պողոսյանը:

Հիշեցնենք, որ նրանց մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 6-րդ կետով՝ մի խումբ անձանց կամ կազմակերպված խմբի կողմից դիտավորությամբ առողջությանը ծանր վնաս պատճառելը։

Ավելի վաղ փաստաբանը մեզ հայտնել էր, որ երկու մեղադրյալներն էլ չեն ընդունում իրենց առաջադրված մեղադրանքները, քանի որ «մեղադրանքում առկա ձևակերպումներն ընդհանրապես իրականության հետ որևէ աղերս չունեն, այսինքն՝ հանգամանքները, որ նկարագրվում են, ընդհանրապես իմ պաշտպանյալների վերաբերյալ չեն»: