Էջմիածնի N զորամասից մարտական գործողություններին մասնակցելու նպատակով Կովսական (Զանգելան) մեկնած, այնուհետեւ շրջափակման մեջ ընկած եւ մինչ օրս անհետ կորած համարվող զինծառայողների հարազատները ահազանգում են՝ ԴՆԹ թեստերի պատասխանները կեղծում են։

Ծնողներից մեկը 168.am-ի հետ զրույցում պատմել է, թե ինչից հետո են եկել այդ եզրահանգմանը, որ ԴՆԹ-ի պատասխանները կեղծել են։ Նախ հիշեցրեց, որ մոտ 1 ամիս առաջ նույն զորամասի զինծառայողները գնացել էին Կովսական (Զանգելան), 14 տոպրակ մարմին էին դուրս բերել եւ հանձնել դիահերձարան։ Եվ ահա բոլորովին վերջերս ծնողները Հերացու դիահերձարանից զանգ են ստանում, որ տղաներից մեկի ԴՆԹ-ն համընկել է, իրենց հայտնել են նաեւ զոհվածի մոր անուն-ազգանունը, ինչպես նաեւ՝ հեռախոսահամարը։

«Հերացու բժիշկներից մեկը զանգում է մեր տղերքից մեկին, հարցնում է՝ այսինչյան այսինչը ձեր ծնողներից ո՞վ է, հասկանում ենք, որ մեր ցուցակում այդպիսի մարդ չկա, ասում ենք՝ մեզ հեռախոսահամար փոխանցեք։ Կապ ենք հաստատում այդ համարով, մի կին լացակումած պատասխանում է՝ ի՞նչ եք ուզում ինձնից, ես հոկտեմբերի 23-ին իմ երեխուն հուղարկավորել եմ, դագաղը եղել է բաց, ոչ մի մասունք պակաս չի եղել։ Ուշագրավ է նաեւ այն, որ այդ կնոջ որդին բոլորովին այլ տարածքում է զոհվել, ոչ թե՝ Կովսականում (Զանգելան)»,- պատմել է անհետ կորած զինծառայողներից մեկի մայրը։

Նա հիշեցրել է, որ դեռ հունվարի կեսերին էին ԴՆԹ հանձնել, սակայն ոչ մի արձագանք չկար, իսկ արդեն փետրվարի 11-ին, երբ կառավարության դիմաց բողոքի ակցիա իրականացրեցին, անմիջապես զանգ են ստանում, տեղեկացնում են, որ ԴՆԹ-ի համընկնում կա։

«Դեռ Էջմիածին չէինք հասել, զանգ եկավ, որ ԴՆԹ-ի պատասխան կա, այսինքն՝ փորձեցին մասամբ մեր բերանը փակել։ Զանգեցի քննիչին, ասացի՝ այդ ոսկորը պինդ կպահես, հանկարծ չկորի, ես դա պետք է տանեմ Մոսկվա, ամեն տեղ պետք է տանեմ՝ համոզվելու համար։ Այդ օրվանից հետո էլ ոչ մի զանգ չկա, բայց մոտ 4 օր առաջ էլի զանգում է դատաբժիշկը, ասում է՝ նույնականացում ունեք, զանգում ենք հարազատին, չեն պատասխանում, հեռախոսահամարը վերցնում ենք, մենք էլ ենք զանգում 3 օր, բայց չեն վերցնում, վերցնում են միայն այն օրը, երբ հուղարկավորություն են անում։

Այդ մարդիկ եկել են Էջմիածին, հանդիպել ենք, ասել ենք, որ դա ձեր հարազատի մարմինը չէ։ Հարցնում ենք՝ ձեր երեխեն որտե՞ղ է բոյ տվել, պատասխանում է՝ Շուշիում, նոյեմբերի 7-ին իրենց երեխու հետ խոսել են․․․ Զանգելանը՝ որտեղ, Շուշին՝ որտեղ։ Այս մարդուն 4-5 օր առաջ զանգել ասել են՝ համընկնում կա, բերում, թաղում է անում։ 2 օր առաջ ինքնահողն էր, գնացել էինք իրենց տուն, ասել ենք՝ պատշաճ ձեւով արեք ինքնահողը, իմացեք՝ մի հերոսի բերել, տեղավորել եք։ Շուշիում զոհվածի մարմինն ի՞նչ իրավունք ուներ գալ հայտնվել Կովսականի (Զանգելանի) փոսի մեջ․․․ Ահավոր բան է կատարվում, կվառե՛նք Հերացին, կվառե՛նք, ճիշտ չե՛ն անում։ Մեկին զանգում են՝ մի ոտք են տալիս, մյուսին զանգում՝ մի ձեռք են տալիս, չեմ հասկանում՝ մեր երեխեքը մի ոտքով ու մի ձեռքով են․․․»,- ասել է անհետ կորած զինծառայողներից մեկի ծնողը։

Նա նաեւ հորդորել է, որպեսզի առողջապահության նորանշանակ նախարարը շատ լուրջ մոտեցում ցուցաբերի այս խնդրին, այլապես իրենց քայլերը կլինեն ավելի կոշտ։

Առողջապահության նախարարությունից խնդրի վերաբերյալ հստակ տեսակետ չեն հայտնել՝ նշելով, որ նյութում հստակ տվյալներ նշված չեն:

«Այսքան սուղ տեղեկատվության հիման վրա տեսակետ դժվար է հայտնել: Եթե կոնկրետություն լիներ, դեպքը կուսումնասիրվեր, ու մենք էլ կհասկանայինք՝ ինչի մասին է խոսքը»,- ասել է առողջապահության նախարարի մամուլի խոսնակ Հռիփսիմե Խաչատրյանը։

Հայկական «Fly Armenia Airways» ավիաընկերության «Boeing 737-300» ինքնաթիռի՝ առեղծվածային անհետանալու դեպքի առնչությամբ ՀՀ քաղավիացիայի կոմիտեում շարունակվում է քննություն ընթանալ։ Այս մասին NEWS.am-ին հայտնեցին ՀՀ քաղավիացիայի կոմիտեից, նշելով, որ մանրամասներ չեն կարող հայտնել մինչեւ քննությունը չավարտվի։

NEWS.am-ը զրուցեց վարչապետի նախկին խորհրդական, ավիատոր Հակոբ Ճաղարյանի հետ, որը փետրվարի 23-ին ֆեյսբուքյան իր էջում հայտարարել էր, որ Էստոնիայի մայրաքաղաք Տալլինից թռած ինքնաթիռը պետք է վայրէջք կատարեր Երեւանում, բայց «տեխնիկական անսարքության հետեւանքով» հայտնվել Թեհրանում։

«ՀՀ քաղաքացիական ավիացիայի կոմիտեն եւ «Fly Armenia Airways»-ն միայն գիտեն, թե ինչ թույլտվություն են տվել այդ օդանավին` Էստոնիայից տեղաշարժվելու համար»,- նշեց Ճաղարյանը։

Նա ասաց, որ օդանավն ունեցել է լիտվական գրանցում, հետո փոխանցվել է հայկական ավիաընկերությանը. «Այն դարձել է հայկական օդանավ ու Տալլինից թռիչք կատարել։ Շահագործող ընկերությունն ասում է՝ օդանավը պետք է վայրէջք կատարեր Հոստոմելի օդանավակայանում։ Այդ օդանավայականում կա Boeing օդանավին սպասարկող ընկերություն»։

Հակոբ Ճաղարյանի դիտարկմամբ, այնուամենայնիվ, օդանավն Էստոնիայից դուրս գալու համար պետք է ինչ-որ թույլտվություն ունենար։

Այն տեղեկությունը, որ հայկական օդանավը մինչեւ Թեհրան հասնելը թռիչք է կատարել նաեւ Բուլղարիա՝ Ճաղարյանը հաստատեց. «Այո, 19-ին գիշերել է այնտեղ ու թռիչք կատարել Իրան»։

Մեր դիտարկմանը, որ Բուլղարիան ԵՄ տարածքում է գտնվում եւ հարցին՝ ինչպե՞ս է հայկական օդանավը կարողացել ԵՄ օդային տարածք մտնել, հաշվի առնելով այն, որ մեր օդանավերի մուտքն արգելվում է, Ճաղարյանն ասաց, որ օդանավը կատարել է տեխնիկական թռիչք. «Բացի տեխնիկական թռիչքներից հնարավոր է նաեւ չարտերային թռիչքները։ ԵՄ-ն Հայաստանին «սեւ ցուցակում» ներգրավելով Հայաստանին՝ ամբողջությամբ չի զրկել թռիչք կատարելու իրավունքից»։

Նշենք, որ հայկական օդանավի՝ անհետանալու դեպքի առնչությամբ ՀՀ ՔԱԿ-ը պարզաբանում է ներկայացրել, նշելով, որ կատարվում է քննություն։

Ճաղարյանը շեշտեց, որ այդ քննությունը հնարավոր էր ավարտել ընդամենը մեկ ժամում.

«Պաշտոնական հեռագիր է տրվում Էստոնիայի ավիացիոն իշխանություններին, թե ի՞նչ է ներկայացվել իրենց այդ օդանավը բաց թողելուց։ Դրանից հետո արդեն պարզ է դառնում՝ ինչ է ներկայացված եղել. օրինակա՞ն է եղել, թե՞ ոչ, համապատասխա՞ն է եղել թռիչքային պլանին, թե՞ ոչ։ Առանց այդ գործողության անհնար է լուծում գտնել այդ խնդրին»։

Հարցին՝ արդյոք հնարավո՞ր է, որ Իրանի օպերատորներից մեկին հանձնեն օդանավը, Ճաղարյանն ասաց. «Ես գտնում եմ, որ ամեն բան հնարավոր է, քանի որ այն, ինչն այստեղ կատարվում է, բացարձակ խաբեության գործընթաց է։ Տրվել է վարձակալման, թե վաճառվել է, ես այդ հարցերի պատասխանը չեմ կարող տալ»։

Նշենք, որ «Boeing 737-300» (գրանցումը՝ EK-FAA) ինքնաթիռն ամերիկյան արտադրության է։ Մինչեւ հայկական գրանցում ստանալը օդանավը շահագործվել է Լիտվիայի կողմից

ՀՀ ՔԱԿ-ի կայքից տեղեկանում ենք, որ ինքնաթիռը գրանցվել է Հայաստանում կոնկրետ ժամանակով՝ մինչեւ 2025 թվականի օգոստոսի 20-ը։

Այսինքն՝ «Fly Armenia Airways»-ն օդանավը վարձակալել է մինչեւ 2025 թվականը: 

Նշենք, որ ԱՄՆ օրենսդրությամբ արգելվում է ամերիկյան արտադրության ինքնաթիռների ու ավիացիոն պահեստամասերի փոխանցումը կամ այլ կերպ դրանց տրամադրումը Իրանին։ Նմանօրինակ գործողություններում ներգրավված կառույցները կարող են հայտնվել ԱՄՆ պատժամիջոցների տիրույթում։

Եթե իրենց առաջարկը հրաժարականն է, ապա մերը ընտրություններն են։ Այս մասին այսօր՝ փետրվարի 26-ին, «Սիվիլնեթի» հետ զրույցում նշել է Ազգային ժողովի փոխնախագահ Լենա Նազարյանը։

«Գլխավոր շտաբի քաղաքական հայտարարությունից հետո տեղի ունեցան երեկվա իրադարձությունները։ Եվ ես կարծում եմ, որ այս իրավիճակում անելիք ու պատասխանատվություն ունեն և կառավարող ուժը, և ընդդիմությունը։ Բայց կառավարող ուժը արել էր և երեկ էլ արեց քայլ ընդառաջ՝ այս ամենի հանգուցալուծմանն ուղղված քննարկումներ սկսել, որոնցից մեկը կարող է լինել արտահերթ խորհրդարանական ընտրությունների անցկացումը։ Ընդդիմությունը՝ և խորհրդարանական, և արտախորհդարանական, մերժել են այս առաջարկը։ Եթե ընդդիմությունը չի ընդունում, որ սա հանգուցալուծման ճանապարհ է, ապա կա վտանգ, որ ընտրություններից հետո էլ ընդդիմությունը կարող է անել հավաքներ, ակցիաներ, այսինքն՝ այն, ինչը հիմա է անում, ոչ մի տարբերություն։ Իրենք պետք է համաձայնվեն, որ դա պետք է լինի խաղաղ, արդար, ազատ, թափանցիկ ընթացքով, հակառակ դեպքում՝ մի հրապարակը գոռում է «Նիկոլ, վարչապետ», մյուս կողմը՝ «Նիկոլ, դավաճան» և արդյունքում հարցը չի հանգուցալուծվում»,- ասաց Լենա Նազարյանը։

Լենա Նազարյանի կարծիքով՝ ընդդիմությունը չի ուզում գնալ խորհրդարանական ընտրությունների, քանի որ նրանց ոչ թե հետաքրքրում է, թե ինչ է ուզում ժողովուրդը, այլ այն, որ գործող իշխանությունն ուղղակի գոյություն չունենա։

«Որպեսզի հանգուցալուծում տեղի ունենա, այն ուժերը, որոնք մարդկանց հրապարակներ են տանում, պետք է հանգուցալուծման ցանկություն ունենան։ Իմ պատկերացմամբ՝ նրանք հանգուցալուծում չեն ուզում։ Չեն ուզում ժողովրդին հարցնել, թե ինչ է ուզում ժողովուրդը։ Նրանք պարզապես ուզում են, որ մենք գոյություն չունենանք, բայց մեր գոյությունն ինքնանպատակ չէ։ Ուրիշ խումբ մարդիկ մտածում են, որ մենք պետք է լինենք, քանի որ մեզ հետ են կապում Հայաստանում որոշ գործընթացների շարունակակությունը։ Նրանք մեզանից ակնկալիքներ ու պահանջներ ունեն։ Հիմա ի՞նչ անել, այդ մարդկանց հետ ինչպե՞ս վարվել։ Մեր առաջարկն է գնալ ամենակառուցողական ճանապարհով։ Արտահերթ ընտրությունները հանգուցալուծման ճանապարհներից մեկն է, բայց վարչապետը երեկ հրավիրեց քննարկումների, կարող են լինել այլ ճանապարհներ։ Եթե իրենց առաջարկը հրաժարականն է, ապա մերը ընտրություններն են»,- նշեց Լենա Նազարյանը։

Լենա Նազարյանի խոսքով՝ նախքան Գլխավոր շտաբի պետ Օնիկ Գասպարյանի հրամանը ստորագրելը կամ չստորագրելը, նախագահ Արմեն Սարգսյանը պետք է բացի Սահմանադրությունը։

«Նախագահը կարող է վերցնել Գլխավոր շտաբի հայտարարությունը և բացել Սահմանադրության 14-րդ հոդվածը, որտեղ նշված է, որ Զինված ուժերը պետք է ապաքաղաքական լինեն, և՝ տեսնի այդ հայտարարության մեջ քաղաքական հայտարարություններ արված են, թե՝ ոչ։ Միանշանակ, քաղաքական հայտարարություններ արված են։ Պետք է շատ հստակ արձանագրվի, որ բանակը և զինվորականությունը չպետք է քաղաքական հայտարարություններ անի, պետք է քաղաքական չեզոքություն դրսևորի»,- նշեց Նազարյանը։

Ըստ Լենա Նազարյանի՝ Նիկոլ Փաշինյանի՝ «Իսկանդերի» մասին հայտարարությունից հետո հայ-ռուսական հարաբերությունները չեն տուժել։

«Չեմ կարծում, որ այդ հայտարարությամբ հայ-ռուսական հարաբերությունները մեծ վնաս են կրել, որովհետև չի կարող երկար տարիների հիմնավոր համագործակցությունը վնաս կրել այդ հայտարարություններից»,- նշեց Նազարյանը։

Լրագրողի դիտարկմանը, թե օրինակ ՀԱՊԿ-ի գլխավոր քարտուղար, գեներալ-գնդապետ Յուրի Խաչատուրովի նկատմամբ քրեական գործ հարուցելը չի՞ վնասել հայ-ռուսական հարաբերությունները, ԱԺ փոխխոսնակը հակադարձեց․ «Եթե որոշ անձերի նկատմամբ կան իրավական հարցեր, ինչպե՞ս վարվել այդ դեպքում, չտա՞լ այդ հարցերը»։

Մեղրի համայնքի ղեկավար Մխիթար Զաքարյանը սթափության և ողջախոհության կոչով դիմել է համայնքի բնակիչներին։

«Հայրենակիցնե՛ր, Մեղրի համայնքի հարգելի բնակիչներ, իմ նկատմամաբ քաղաքական համակրություն ու հակակրություն ունեցող քաղաքացիներ։

Այսօր մենք կանգնած ենք մեր պետականության ու ինքնիշխանության կորսման եզրագծին։ Իրավիճակն իրապես ծայրահեղ է, որովհետև մի կողմից պետական ապարատն է պարալիզացված, մյուս կողմից ամենօրյա  մարտահրավերներն են մեր դուռը թակում, իսկ մեկ այլ կողմից վարչապետի աթոռին հայտնված և երկիրն այս օրին հասցրած անձն իր ամեն մի խոսքով, ելույթով գրգռում է առանց այդ էլ շիկացած վիճակը։

Կցանականայի իմ, համայնքի ավագանու և  թիմակիցներիս անվերապահ աջակցությունը հայտնել ՀՀ ԳՇ֊ին և Օնիկ Գասպարյանին։ Մարդու, որի կենսագրությունը, անցած ճանապարհն ամբողջապես պետական այրի վարքի դրսևորման լավագույն օրինակ է։

Սպայությունը` որպես մեր ազգային մտավորականության առանձնահատուկ շերտ, չեմ խուսափում ասել՝ էլիտա,  ունենեցել և ունի  բարձր հասարակական վարկ ու կշիռ, ներդրում,   և ես՝ որպես երեք կողմից սահման ունեցող համայնքի ղեկավար, չեմ ուզում առնչվել արկածախնդիր (առօրյա խոսակցականում ասում ենք՝ քյալլագյոզ), որոշումներում՝ իմպուլսիվ, ազգակործան, անանցյալ ու անապագա  իշխանության հետ, տեսնել նրա քաղաքական կուրսը, որը տանում է անդունդ։

Պատերազմող երկրի սպան բաց նյարդի պես է զգում այս երկիրն ու սպասվող ոտնձգությունները, իսկ ես օրվա մեծ մասն եմ անցկացնում նրանց հետ և բանակի պրիզմայով եմ նայում պետությանը, նրա խնդիրներին ու հոգսերին։

Ուզում եմ սթափության և ողջախոհության կոչ անել՝ հանուն երկրի ներքին կայունության, հանուն երերող այս երկրի առողջացման։ Հույս ունեմ, որ ժողովրդի հավաքական գիտակցությունը և ինքնապահպանման բնազդն  ի վերջո կհաղթի երկրպագության և միջնադարյան ծես հիշեցնող այս մոլագար դրսևորումներին։

Հայոց բանակի ու սպայի կողքին եմ, նրա զինվորն եմ և ամեն պահի պատրաստ եմ սատարել նրան»,- իր ուղերձում նշել է Մխիթար Զաքարյանը։

ՀՀ մարդու իրավունքների պաշտպան Արման Թաթոյանը գրել է.

«Երեկ՝ 2021թ. փետրվարի 26-ին Ադրբեջանի նախագահը հայտարարել է. «Մենք հակաահաբեկչական միջոցառում իրականացրեցինք և արդյունքում 60-ից ավելի ահաբեկիչ ձերբակալվեց: Նրանց հիմա անվանում են ռազմագերի:

Մենք կարծում ենք, որ դա հարցի աղավաղում է, որովհետև պատերազմի ավարտից 20 օր հետո ռազմագերի չի կարող լինել: Մենք բոլոր ռազմագերիներին վերադարձրել ենք: Մենք նրանց վերադարձրել ենք նախքան իրենք մեզ մեր գերիներին կվերադարձնեին: Իսկ այս մարդիկ ռազմագերի չեն, ահաբեկիչ են, դիվերսանտ են»:

1․Հայաստանի մարդու իրավունքների պաշտպանը ևս մեկ անգամ վճռականորեն արձանագրում է, որ Ադրբեջանում պահվող հայկական կողմի բոլոր զինծառայողները և քաղաքացիական անձինք կարգավիճակով գերիներ են:

Բոլոր զինծառայողներն Արցախում են գտնվել՝ իրենց սահմանադրական պարտականությունը կատարելու համար, նրանք Արցախում տարել են զինվորական իրավական ծառայություն:

2․Մարդու իրավունքների պաշտպանի աշխատակազմի հավաքագրած հավաստի ապացույցները հաստատում են, որ գերեվարված անձանց թիվն ավելի շատ է, քան ադրբեջանական իշխանությունները հաստատել են: Դա վերաբերում է նաև մինչև մեկ խմբով թվով 44 գերիների վերադարձին:

Մարդու իրավունքների պաշտպանն արձանագրել է բազմաթիվ դեպքեր, երբ չնայած տեսանյութերով ու այլ ապացույցներով հաստատվող դեպքերին՝ ադրբեջանական իշխանության մարմինները մերժում են անձանց գտնվելու փաստն իրենց մոտ կամ ձգձգում են հաստատման գործընթացը:

3․Ադրբեջանում պահվող հայկական կողմի գերիների նկատմամբ քրեական հետապնդման ընթացակարգեր նախաձեռնելը, նրանց կալանավորելն ու առավել ևս նրանց «ահաբեկիչներ» կամ «դիվերսանտներ» կոչելը միջազգային մարդասիրական իրավունքի ու առհասարակ մարդու իրավունքների միջազգային իրավունքի կոպիտ խախտումներ են:

Իրենց զինվորական իրավական ծառայությունն իրականացնելու համար նրանք չեն կարող որևէ տեսակի քրեական հետապնդման ենթարկվել կամ կալանավորվել՝ որպես պատիժ:
Այս պնդումը հատկապես բխում է 1949 թվականի Ժնևի երրորդ կոնվենցիայի պահանջներից:

Ադրբեջանական իշխանությունները նախ արհեստականորեն ձգձգում էին հայկական կողմի գերիների վերադարձը, իսկ այնուհետև սկսեցին նենգափոխել և չարաշահել իրավական գործընթացները և ուղիղ տեքստով հայտարարել, որ Ադրբեջանում պահվում են միայն «ահաբեկիչներն ու դիվերսանտները»։

Միջազգային մարդասիրական իրավունքն արգելում է նման վերաբերմունքը: Դա ակնհայտորեն պարունակում է պատերազմական հանցագործության հատկանիշներ:

Հայաստանի մարդու իրավունքների պաշտպանը նաև հարկ է համարում հատուկ ընդգծել, որ հետպատերազմական գործընթացում մարդու իրավունքների կամ մարդասիրական հարցերը, այդ թվում՝ գերիների ազատ արձակումն ու վերադարձը պետք է ապահովվի ռազմական գործողությունների դադարից անմիջապես հետո և դրանք պետք է զերծ պահվեն քաղաքական գործընթացներից:

Այս արգելքը գործում է ցանկացած պարագայում՝ միջազգային իրավունքում, անկախ կոնկրետ հակամարտությունների վերաբերող փաստաթղթերում ամրագրված լինելուց:

4․Բացարձակ անընդունելի է Ադրբեջանի նախագահի այն հայտարարությունը, թե պատերազմի ավարտից 20 օր հետո ռազմագերի չի կարող լինել՝ այդպիսով գերիներին անվանելով «դիվերսանտ» կամ ահաբեկիչ կարող է լինել միայն:

Անթույլատրելի է նոյեմբերի 9-ի եռակողմ հայտարարությունը մեկնաբանել այնպես, իբր դրա գործողությունը տարածվում է միայն այդ հայտարարության ստորագրումից առաջ առկա իրավիճակի վրա:

Նախ, թե՛ նոյեմբերի 9-ի հայտարարությունից առաջ, թե՛ դրանից հետո ու հիմա էլ գործ ունենք ընթացող (չավարտված) զինված հակամարտության հետ. այս կանոնն ուղղակիորեն բխում է միջազգային մարդասիրական իրավունքի պահանջներից:

Դրանից բացի, Ադրբեջանի նախագահի հայտարարությունն ուղղակիորեն հակասում է նաև նոյեմբերի 9-ի եռակողմ հայտարարությունը ստորագրած կողմերի մտադրություններին ու այդ հայտարարության կիրառության պրակտիկային:

Մասնավորապես, այդ հայտարարության 8-րդ կետի պահանջի հիման վրա Հայաստանի Հանրապետությունն արդեն իսկ Ադրբեջանին է փոխանցել Արցախում հանցանքներ, այդ թվում՝ խաղաղ բնակիչների սպանություն կատարած և դատապարտված երկու անձի: Ադրբեջանը նույն սկզբունքով Հայաստանին է փոխանցել այդ երկրում ֆորմալ դատապարտված հայերի:

Հայաստանն ու Ադրբեջանը փոխանցել են նաև նոյեմբերի 9-ի եռակողմ հայտարարությունից հետո գերեվարված անձանց ևս:

Այնպես որ նշված հայտարարությունը պետք է կիրառվի ինչպես նոյեմբերի 9-ից առաջ, այնպես էլ դրանից հետո բոլոր իրավիճակների նկատմամբ. այնքան ժամանակ, քանի դեռ պատերազմական գործողությունների հետևանքներով պայմանավորված՝ առկա է մարդու իրավունքների պաշտպանության ու մարդասիրական գործընթացի օբյեկտիվ անհրաժեշտություն:

Ուստի, սկզբունքորեն անթույլատրելի է գերիների առկայությունը եռակողմ հայտարարության սոսկ ամսաթվով պայմանավորելը: Եվս մեկ անգամ հստակ շեշտում եմ, որ, անկախ գերեվարվելու ամսաթվից, Ադրբեջանում պահվող հայկական կողմի բոլոր զինծառայողները և քաղաքացիական անձինք գերիներ են իրենց կարգավիճակով:

5․Գերիների ազատ արձակման հարցի բացարձակ հրատապությունը պետք է դիտարկել նաև Ադրբեջանում հայատյացության քաղաքականության համատեքստում, ինչը բազմիցս հաստատվել է Հայաստանի մարդու իրավունքների պաշտպանի՝ օբյեկտիվ ապացույցների հիման վրա հրապարակած զեկույցներով:

6․Ուստի, բացարձակ դատապարտելի է, որ Ադրբեջանում գտնվող հայկական կողմի գերիների ազատ արձակման ու վերադարձի հարցն ակնհայտ քաղաքականացվում է, իսկ իրավական գործընթացները նենգափոխվում են ու ենթարկվում չարաշահման:

Այս ամենը կոպտորեն խախտում է մարդասիրական գործընթացն ու մարդու իրավունքները երաշխավորող միջազգային պահանջները: Ուստի, նրանք առանց որևէ նախապայմանի պետք է ազատ արձակվեն և անվտանգ վերադարձվեն Հայաստան:

7․Ուստի, հրավիրում եմ միջազգային հանրության ու հատկապես մարդու իրավունքների պաշտպանության մանդատ ունեցող միջազգային կառույցների ուշադրությունն Ադրբեջանի նախագահի նշված հայտարարության վրա՝ բացառելու համար մարդասիրական գործընթացի որևէ խախտում, ապահովելու համար այդ գործընթացի խիստ համապատասխանությունը մարդու իրավունքների միջազգային պահանջներին»։

Բաղրամյան պողոտայում Նիկոլ Փաշինյանի հրաժարականի պահանջով ակցիայի մասնակիցները երթով շարժվում են ՀՀ նախագահի նստավայր։

Բաղրամյան պողոտայում «Հայրենիքի փրկության շարժման» համակարգող Իշխան Սաղաթելյանը հայտարարեց՝ իրենք պահանջելու են, որ Արմեն Սարգսյանը չստորագրի ԳՇ պետ Օնիկ Գասպարյանին պաշտոնից ազատելու մասին Նիկոլ Փաշինյանի միջնորդությունը։

Հանրապետության նախագահի աշխատակազմը ՀՀ զինված ուժերի գլխավոր շտաբի պետ Օնիկ Գասպարյանին պաշտոնից ազատելու առաջարկությունը ստացել է ՀՀ զինված ուժերի բարձրագույն հրամանատարական կազմի հայտարարությունից հետո: Այս մասին քիչ առաջ հայտարարել է ՀՀ նախագահի աշխատակազմը։

«Համաձայն ՀՀ Սահմանադրության, Հանրապետության նախագահն ունի եռօրյա ժամկետ իր դիրքորոշումն արտահայտելու համար: Նախագահը, ելնելով պետական մարմինների բնականոն գործունեությունն ապահովելու անհրաժեշտությունից, մինչ օրս սկզբունքային առարկություններ չի ունեցել պաշտոնատար անձանց նշանակման և ազատման հարցում:

Սակայն, ռազմական դրության իրավիճակում, առկա ճգնաժամի պայմաններում, վերը նշված հայտարարությունից հետո, զինված ուժերի գլխավոր շտաբի պետին պաշտոնից ազատումը հերթական կադրային փոփոխություն չէ՝ հաշվի առնելով, որ ՀՀ Սահմանադրության համաձայն, Հայաստանի Հանրապետության զինված ուժերն ապահովում են Հայաստանի Հանրապետության պաշտպանությունը, անվտանգությունը, տարածքային ամբողջականությունը և սահմանների անձեռնմխելիությունը:

Ստեղծված իրավիճակում որևէ մեկը որևէ ձևով չպետք է փորձի նախագահին ներքաշել քաղաքական գործընթացների մեջ: Անթույլատրելի է նախագահի նկատմամբ ճնշման որևէ փորձ:

Հանրապետության նախագահը որևէ մեկի կամ որևէ քաղաքական ուժի կողմից չէ, երբևէ չի եղել և չի պատրաստվում լինել: Նախագահն իր գործառույթներն իրականացնելիս առաջնորդվում է բացառապես պետության ու ժողովրդի շահերով:

Նախագահ Սարգսյանը կարևորում է կայունությունն ու հանդուրժողականության մթնոլորտը երկրում և շարունակելու է ամեն ինչ անել այդ ուղղությամբ՝ համոզված լինելով, որ խնդիրները պետք է լուծվեն երկխոսության, և ոչ թե առճակատման միջոցով:

Նախագահն այս պահի առաջնահերթ խնդիրն է համարում երկրում առկա լարվածության թուլացումն ու իրավիճակի անցնցում հանգուցալուծումը, և նրա բոլոր գործողություններն ուղղված են դրան»,- նշվում է հայտարարության մեջ:

Հիշեցնենք, որ Նիկոլ Փաշինյանն այսօր հայտարարել էր, թե երեկ ազատել է Օնիկ Գասպարյանին, թեեւ սահմանադրորեն չունի նման լիազորություն։ Իսւ նախագահի աշխատակազմի այսօրվա հայտարարությունը վկայում է, որ Նիկոլ Փաշինյանը ստել է։

Ղ  հակամարտության ընթացքում Հայաստանը չի օգտագործել իր «Իսկանդերները», բոլոր հրթիռային զինամթերքները եղել են երկրի զինված ուժերի պահեստներում, հինգշաբթի լրագրողներին ասել է ՌԴ    ՊՆ-ն՝ մեկնաբանելով ՀՀ վարչապետ Նիկոլ Փաշինյանի հայտարարությունը՝ «Իսկանդեր»-ի մասին։

Ինչպես փոխանցում է «Ռիա Նովոստին»,ՌԴ ՊՆ-ից  նաև հայտնել են, որ «տարակուսանքով և զարմանքով» են տեղեկացել Փաշինյանի այն հայտարարությանը, որ Հայաստանի ԶՈւ կողմից Լեռնային Ղարաբաղում օգտագործված «Իսկանդեր» հրթիռները «չեն պայթել կամ պայթել են միայն 10% -ով»:

«Ըստ մեր օբյեկտիվ և հավաստի տեղեկատվության, այս տեսակի հրթիռային համակարգերից ոչ մեկը չի օգտագործվել  ԼՂ հակամարտության ընթացքում: Բոլոր հրթիռային զինամթերքները գտնվում են ՀՀ ԶՈւ պահեստներում»,- հայտնել են ՌԴ ՊՆ-ից։

«Ամենայն հավանականությամբ, Նիկոլ Փաշինյանին մոլորության մեջ են գցել, ինչի արդյունքում նա օգտագործել է ոչ ճշգրիտ տեղեկատվություն»,- ասված է հաղորդագրության մեջ:

Թուրքիայի նախագահի խոսնակ Իբրահիմ Քալընը գրառում է արել՝ անդրադառնալով Հայաստանում ստեղծված իրավիճակին:

«Դատապարտում ենք հեղաշրջման փորձը Հայաստանում: Հեղաշրջումները միշտ խախտել են ժողովրդավարական գործընթացները և քաոս ստեղծել: Կոչ ենք անում արագ կարգավորել Հայաստանում տիրող իրավիճակը»,- գրել է Քալընը Twitter-ում:

Հիշեցնենք, որ այսօր ավելի վաղ նման կոչով և հայտարարությամբ հանդես էր եկել Թուրքիայի ԱԳ նախարար Մևլյութ Չավուշօղլուն՝ նշելով, որ Հայաստանում տեղի ունեցող իրադարձությունները գնահատում է որպես հեղաշրջման փորձ և վռականորեն դատապարտում:

Հիշեցնենք, որ այսօր ՀՀ ԶՈՒ ԳՇ-ն հայտարարություն էր տարածել՝ միանալով Նիկոլ Փաշինյանի հրաժարականի պահանջին։ 

Փաշինյանը տեղի ունեցածը համարել էր ռազմական հեղաշրջման փորձ։

«Հրապարակ» թերթը գրում է. «ԶՈՒ ԳՇ հայտարարությունից հետո վարչապետ Նիկոլ Փաշինյանը «տրեվոգ» է տվել, արագ կանչել մերձավոր թիմակիցներին․ Արարատ Միրզոյան, Ալեն Սիմոնյան, Ռուբեն Ռուբինյան, Վահագն Հովակիմյան, ասել է, որ եթե իրավիճակը կտրուկ սրվի, հնարավոր է երկրում պարետային ժամ մտցնենք, գնացեք պատրաստեք նախագիծը։

Պատմեցին, որ Միրզոյանը հեռացել է բավականին դժգոհ, թեեւ չի բարձրաձայնել։ Ուշագրավ է, որ երեկ նա չերեւաց հրապարակի հանրահավաքում։ Ավելի ուշ Փաշինյանը հանձնարարել է բոլորին՝ նախարարներ, մարզպետներ՝ մարդ բերել հանրահավաքի։

 
Երեկ ահազանգեր ստացանք, որ օլիգարխներն էլ են մասնակցել․ Խաչատուր Սուքիասյանը, Սամվել Ալեքսանյանը, «Սպայկայի» տնօրինությունն իրենց աշխատակիցներին պարտադրել են մասնակցել հանրահավաքին։ Մի քանի ավտոբուս մարդ է բերել, օրինակ, Արթիկի քաղաքապետարանը։ Իսկ նախորդ օրերին տագնապ է հայտարարվել այն զինծառայողների շրջանում, որոնք պատերազմից հետո Նիկոլ Փաշինյանի ամառանոցն էին պաշտպանում՝ բոլորին կանչել են արտահերթ ծառայության։ Արդյունքները գոհացրել են իշխանական խմբակին․ օրվա վերջում նրանք հաղթական տրամադրություններ ունեին՝ իրենք էլ չէին սպասում, որ այդքան մարդ կհաջողվի բերել հրապարակ»:

Հոդվածն ամբողջությամբ կարող եք կարդալ «Հրապարակ» թերթի՝ 26․02.21թ. համարում։