Ամերիկյան Foreign Policy հանդեսում լույս տեսած հոդվածում նշվում է, որ փետրվարի 27-ին սիրիական Իդլիբում թուրքական բանակին ուղղված Սիրիայի կառավարական ուժերի ավիահարվածը կարող է իրավիճակի լուրջ սրման հանգեցնել:

Ըստ հանդեսի տվյալների, ի պատասխան սիրիական ավիահարվածի, որի հետևանքով 33 թուրք զինծառայող է զոհվել, թուրքական բանակն այսօր սպանել է Սիրիայի 16 զինծառայողի, իսկ թուրքական անօդաչուներն ու հրետանին մշտական կրակի տակ են պահել սիրիական բանակի դիրքերն Իդլիբի նահանգի ամբողջ տարածքում: Այս լարվածությունը կարող է կտրուկ փոխել հակամարտության ընթացքը, որը վերջին շրջանում վերածվել էր Մոսկվայի, Դամասկոսի և Անկարայի միջև առճակատման:

Հոդվածում նշվում է, որ եվրոպական պետություններն ու ԱՄՆ-ն կարող են օգնել այս հումանիտար ճգնաժամի մեղմման գործում, և որ սա հենց այն գործն է, որը պահանջում է Եվրոպական միության և ՆԱՏՕ-ի համատեղ ջանքերը:

ՀՀ առողջապահության նախարար Արսեն Թորոսյանը ֆեյսբուքյան իր էջում արձագանքել է ՁԻԱՀ-ի կանխարգելման կենտրոնում տեղի ունեցող զարգացումներին: Նա մասնավորապես նշել է.

«Իմ տպավորությամբ, այն ինչ տեղի է ունենում կենտրոնի շուրջ` շատ քիչ աղերս ունի մասնագիտական սկզբունքների, սեփական իրավունքների համար պայքարի կամ կոլեկտիվի քաղաքացիական կեցվածքի հետ:

Կան բազմաթիվ երկրներ, որտեղ չկա ՁԻԱՀ-ի դեմ պայքարի առանձին կազմակերպություն, ինչպես չկա օրինակ ժանտախտի, խոլերայի կամ հեպատիտ Ց-ի դեմ պայքարի առանձին կենտրոն: Ի դեպ, ժանտախտի դեմ պայքարի կենտրոններ եղել են ժամանակին, սակայն բարեբախտաբար դրանք բոլորը փակվել են` հիվանդության գրեթե վերացմանը զուգընթաց: Եղել են նաև մասնագիտացված հեպատիտների դեմ պայքարի կենտրոններ, որոնք կրկին ինտեգրվել են ինֆեկցիոն ընդհանուր համակարգ:

Բազմիցս նշել եմ, որ որևէ գույք (շենք կամ սարք) դուրս չի գալու առողջապահական համակարգից, որևէ ծառայության ծավալ և որակ չի իջեցվելու, այլ միայն ընդլայնվելու է: Եվ այն, ինչ հիմա կառավարությունն անում է` պետք է արվեր վաղուց, բայց չի արվել տարբեր սուբյեկտիվ և օբյեկտիվ պատճառներով: Եվ հիմա էլ փաստորեն սուբյեկտիվ և միայն սուբյեկտիվ պատճառով այս ինտեգրման դեմ գործողություններ են արվում և առիթ տալիս հաստատելու մեր այն ենթադրությունները, որ միգուցե այդ «առանձին կենտրոն մնալու» մոտիվի տակ, ոչ թե մասնագիտական խիստ դիրքորոշումն է, այլ հենց նեղ անձնային շահը:

Ես միայն ուրախ կլինեմ, եթե սխալվեմ և փարատվեն իմ այդ կասկածները: Եվ կոլեկտիվը կամ դրա մի մասը (մեծ կամ փոքր էական չէ) կարող է հենց հիմա ապացուցել` առաջնորդվում է նեղ անձնային, թե մասնագիտական շահերով: Ապացուցման ճանապարհն էլ ենք ցույց տվել` կատարել մեր օրինական պահանջները և աշխատել ծառայությունների որակը և ծավալը բարելավելու ուղղությամբ: Հակառակն անելը ոչ մի կերպ չի տեղավորվում կոլեկտիվի կողմից վկայակոչվող սկզբունքների շրջանակներում: Տնօրենի ժամանակավոր պաշտոնակատարը և մենք պատրաստ ենք լսել ցանկացած աշխատակցի ցանկացած առաջարկություն և հաշվի առնել դրանք մեր հետագա քայլերում:

Հ.Գ. ի դեպ վերջերս «Տուբերկուլոզի դեմ պայքարի ազգային կենտրոնը» վերանվանվեց «Թոքաբանության ազգային կենտրոնի», որտեղ մատուցվող ծառայությունները նույնպես ընդլայնվելու են: Եվ ես ոչ մի մեղադրանք չլսեցի, թե մենք «քանդում ենք» կայացած մի համակարգ, որովհետև մենք չենք քանդում որևէ համակարգ: Մենք միայն հզորացնում և ընդլայնում ենք դրանք` պահպանելով մինչ օրս արդյունք ցույց տված բուժական պրակտիկաները և բարեփոխելով նրանք, որոնք արդեն հնացել են և արդյունավետ չեն»:

Հիշեցնենք, որ ՁԻԱՀ կանխարգելման կենտրոնի աշխատակիցներն օրեր առաջ բողոքի ակցիա իրականացրին կառավարության առջև՝ իրենց դժգոհությունը հայտնելով, որ կենտրոնը միավորվի «Նորք» ինֆեկցիոն հիվանդանոցի հետ: Այսօր նրանք աշխատանքից ազատման կոլեկտիվ դիմում էին ներկայացրել:

Երեւան քաղաքի ընդհանուր իրավասության դատարանում այսօր՝ փետրվարի 28-ին, մեկնարկեց  ՀՀ փոխվարչապետ Տիգրան Ավինյանի դեմ ներկայացված 15 հայցադիմումների հիման վրա հարուցված գործի առաջին դատական նիստը։

Հայցվոր կողմը պահանջում է պարտավորեցնել պատասխանող կողմին հերքել զրպարտություն համարվող գրառումը.

«Իրազեկեմ ձեզ, որ Ամուլսարի դեմ ծավալված արշավը միանշանակ չէ: Կան անկեղծ եւ ազնիվ մարդիկ, որոնք իրապես հավատում են, որ այս ծրագիրը աղետ է: Բայց նաեւ կան մարդիկ, որոնք ուղղակիորեն կապված են ՀՀ տարածքում հանքարդյունաբերական ոլորտի գործարարների հետ, որոնք բավական լուրջ ֆինանսական միջոցներ էին ներդնում, որպեսզի այս արշավը կազմակերպվի: Թե չէ, վստահեցնում եմ ձեզ, դուք Ամուլսարի մասին չէիք լսելու, որովհետեւ նման հնչեղություն հաղորդելու համար լուրջ ֆինանսական միջոցներ են պետք եւ լուրջ արշավ է պետք կազմակերպել, որը ինտենսիվորեն դեռեւս 2016-2017 թվականից արվում է»։

Դատական նիստին հայցվորի ներկայացուցիչը Գուրգեն Թորոսյանը միջնորդություն ներկայացրեց դատարանին՝ Տիգրան Ավինյանին հրավիրել ցուցմունք տալու, ինչը դատարանը մերժեց։ Պատասխանող կողմը նշեց, որ պատրաստվում է հաջորդ նիստին քննարկել դատարանին ինքնաբացարկի միջնորդություն ներկայացնելու հարցը։

Լրագրողների հետ զրույցում պատասխանող կողմի ներկայացուցիչն ասաց, որ ինքնաբացարկի հիմքը դատարանի կողմից պատճառաբանության ոչ համոզիչ լինելու մեջ էր, որովհետեւ օրենքը տալիս է հնարավորություն, որպեսզի պատասխանողը որոշակի փաստերի շուրջ դատարանում ցուցմունք տա դատարանում. «Դա հայցվոր կողմի ապացուցելու բեռի նպատակով է, եւ դատարանն առանց որեւէ հիմքերի մերժեց միջնորդությունն այն պատճառաբանությամբ, որ կխախտի կողմերի մրցակցության սկիզբունքը։ Հաշվի չառնելով, որ դա հենց օրենքն է նախատեսում, անկախ նրանից մրցակցության սկզբունքը եթե խախտելու լիներ օրենսդիրի կողմից նման նորմ չէր նախատեսվի։ Գտնում ենք, որ դատարանը որոշակի կաշկանդվածություն ունի։ Միջնորդությունը վերաբերում էր այն փաստի ապացուցմանը, որ դատարանը գտել էր հայցվոր կողմի վրա։ Այն անձը, որը կատարել է այդ հայտարարությունը, ինքը պիտի ասի՝ նկատի է ունեցել հայցվոր կողմին, թե ոչ։ Այդ փաստի ապացուցման նպատակով էլ միջնորդել էինք, որ պարոն Ավինյանը ներկայանա եւ ցուցմունք տա»։

Պատասխանող կողմի ներկայացուցիչ Կարեն Կարապետյանն էլ նշեց, որ պատասխանող կողմի այդ միջնորդությունը հայցի առարկայի շրջանակներից դուրս է. «Եթե անձը չի ցանկանում լրացուցիչ մեկնաբանություններ անել, կարծում եմ՝ ճիշտ չէ հրավիրել իրեն դատարան եւ պահանջել, որ ինքը ցուցումքով լրացուցիչ մեկնաբանություններ անի»։

ՀՀ ազգային անվտանգության ծառայությունը, հետևողական և անզիջում պայքար մղելով կոռուպցիոն տարաբնույթ դրսևորումների դեմ և հավատարիմ լինելով դրանք արմատախիլ անելու իր որդեգրած քաղաքականությանը, կոռուպցիայի հակազդմանն օրենքով իրեն վերապահված գործառույթների շրջանակներում ձեռնարկված օպերատիվ-հետախուզական միջոցառումների և քննչական գործողությունների արդյունքում բացահայտել է առանձնապես խոշոր չափերի դրամական միջոցների հափշտակման դեպք:

Փաստական տվյալներ են ստացվել, որ Իջևանի քաղաքապետի պաշտոնը նախկինում զբաղեցրած պաշտոնատար անձը, քաղաքապետարանի ենթակայության ներքո գործող համայնքային ոչ առևտրային կազմակերպության տնօրենի հետ նախնական համաձայնությամբ և պաշտոնեական դիրքի օգտագործմամբ, քաղաքապետարանի կարիքների համար տարբեր ապրանքանյութական արժեքներ ձեռք բերելու և քաղաքի բարեկարգման աշխատանքներ կատարելու համար հիշյալ կազմակերպությանը վստահված միջոցներից փոխանցել է գումարներ, որոնք ուղղվել են տարբեր տնտեսվարող սուբյեկտներին, որից հետո կազմվել են ապրանքների մատակարարման և աշխատանքների ընդունման-հանձնման կեղծ պաշտոնական փաստաթղթեր, իսկ փոխանցված առանձնապես խոշոր չափերի դրամական միջոցները՝ հափշտակվել։

ՊԵԿ տեղեկատվության և հասարակայնության հետ կապերի բաժինը տեղեկացնում է, որ Իրանի Իսլամական Հանրապետության հետ ցամաքային և օդային հաղորդակցությունը երկշաբաթյա ժամկետով սահմանափակելու վերաբերյալ ՀՀ կառավարության 2020 թվականի փետրվարի 24-ի թիվ 197-Ն որոշմամբ ղեկավարվելով՝ ՊԵԿ նախագահի հրամանով սահմանվել է ցամաքային հաղորդակցության ժամանակ աշխատանքների կազմակերպման կարգը:

ՊԵԿ նախագահի հրամանով` Հարավային մաքսատուն-վարչության գործունեության գոտում գրանցված տնտեսվարողների կողմից Իրանի Իսլամական Հանրապետությունում հաշվառված տրանսպորտային միջոցներով և ԻԻՀ քաղաքացի հանդիսացող վարորդների միջոցով ներկրվող ապրանքների ու տրանսպորտային միջոցների նշանակման վայր է սահմանվել «Ագարակ տերմինալ» ժամանակավոր պահպանության պահեստը: Հարավային մաքսատուն-վարչությանը հանձնարարվել է հնարավորինս արագ կազմակերպել ներկրվող ապրանքների բեռնաթափումը կամ փոխաբեռնումը «Ագարակ տերմինալ» ժամանակավոր պահպանության պահեստում և ապահովել այդ տրանսպորտային միջոցների ու վարորդների արագ ելքը ՀՀ տարածքից՝ բացառելով տրանսպորտային միջոցների հետագա խորացումը ՀՀ տարածք: Իսկ դեպի «Ագարակ տերմինալ» և հետ՝ դեպի անցումային կետի տարածք, բեռների տեղափոխումը կազմակերպել ուղեկցմամբ կամ ՀՀ ճանապարհային ոստիկանության համապատասխան պարեկային խմբերի հետ համագործակցությամբ:

Պետական սահմանի Մեղրիի անցումային կետում ԻԻՀ-ում հաշվառված տրանսպորտային միջոցներով (ԻԻՀ քաղաքացի հանդիսացող վարորդներով) Հարավային մաքսատուն-վարչության գործունեության գոտուց դուրս գրանցված տնտեսվարողների կողմից ապրանքների ներկրման դեպքերում բացառել Մեղրիի կետ-բաժնում «մաքսային տարանցում» մաքսային ընթացակարգից տարբերվող մաքսային ընթացակարգով ներկայացված հայտարարագրերի գրանցումը և ապրանքների բացթողումը: Մեղրիի անցումային կետով ներկրվող ապրանքների մաքսային հսկողության և մաքսային տարանցում ընթացակարգով հայտարարագրերի գրանցման աշխատանքները կազմակերպել՝ հնարավորինս սահմանափակելով Իրանի քաղաքացի հանդիսացող վարորդների հետ շփումները և նրանց ելքը ավտոմեքենաներից: Պաշտպանիչ հանդերձավորմամբ անձի միջոցով վարորդներից ստանալ բեռը ուղեկցող փաստաթղթերը, կազմակերպել հայտարարագրերի լրացման և ներկայացման աշխատանքներն՝ առանց վարորդին դրանցում ներգրավելու:

Իրանում հաշվառված տրանսպորտային միջոցներով (ԻԻՀ քաղաքացի հանդիսացող վարորդներով) Հարավային մաքսատուն-վարչությունից տարբերվող այլ մաքսատուն-վարչություններ ապրանքների տարանցման անհրաժեշտության դեպքում տարանցիկ փոխադրումների նշանակման մարմին կսահմանվի Արարատյան մաքսատուն-վարչությունը: Իսկ տրանսպորտային միջոցների ելքն անցումային կետի տարածքից կթույլատրվի բացառապես ՀՀ ճանապարհային ոստիկանության համապատասխան պարեկային խմբերի ուղեկցությամբ:

ՊԵԿ նախագահի հրամանով նախատեսված է առանձնացնել Արարատյան մաքսատուն-վարչության գործունեության գոտում գտնվող ժամանակավոր պահպանության պահեստ, և Մեղրիի անցումային կետով ներմուծված ապրանքների մաքսային հսկողության աշխատանքները կենտրոնացնել այդտեղ, ինչպես նաև նվազագույնի հասցնել իրանցի վարորդների շփումը մաքսային ծառայության պաշտոնատար անձանց կամ երրորդ անձանց հետ:

Հրամանով նախատեսված է պետական սահմանի անցումային այլ կետերով ներկրված բեռներն ուղղորդել մաքսային հսկողության այլ վայրեր կամ պահեստներ, բացառել դրանց հնարավոր շփումը պետական սահմանի Մեղրիի անցումային կետով ներկրված բեռների հետ:

Ապրանքները բեռնաթափելուց կամ բաց թողնելուց հետո ԻԻՀ-ում հաշվառված դատարկ տրանսպորտային միջոցների ելքը պահեստի տարածքից կթույլատրվի բացառապես ՀՀ ճանապարհային ոստիկանության պարեկային խմբերի ուղեկցությամբ՝ շարասյուներով:

Երեւանի «Սուրբ Գրիգոր Լուսավորիչ» բժշկական կենտրոնի սրտաբանական բաժանմունքի ինտենսիվ թերապիայի բլոկի աշխատողները, որոնցից բանավոր պահանջել են աշխատանքից ազատման դիմումներ գրել, չեն պատրաստվում այդ քայլին գնալ: NEWS.am-ի հետ զրույցում նրանք պատմեցին, որ դիմել են անգամ Մարդու իրավունքների պաշտպանին՝ իրենց իրավունքների խախտման ահազանգով:

«Մեզնից սպառնալիքով, ահուդողի մեջ պահելով պահանջում են, որ դիմում գրենք, ազատվենք: Ես ասում եմ՝ իմ գործն անթերի կատարում եմ, եթե իմ գործի մեջ թերություն կգտնեք, պարզվի, որ կաշառք եմ վերցրել, կաշառք եմ ուզել, հիվանդին չեմ մոտեցել, չեմ նայել, խնդրեմ, դիմում գրեմ, ազատվեմ, հակառակ դեպքում՝ ինչո՞ւ  ազատվեմ: Մեր փոխտնօրենն էլ ասում է՝ դա տնօրենի հրամանն է: Թե չէ, ասում է՝ մենք այլ քայլի կդիմենք, այնպիսի բաներ կգրենք ազատման մեջ, որ դուք ոչ մի տեղ չեք կարող ընդունվել աշխատանքւ»,- NEWS.am-ի հետ զրույցում ասաց կրտսեր բուժաշխատող Անուշ Առաքելյանը՝ նշելով, որ իրեն պատճռաբանել են, թե փետրվարի 22-ին իր հերթապահության ժամանակ  պարտականությունները չի կատարել եւ բացակայել է «պոստից»:

Անուշ Առաքելյանի պնդմամբ՝ այդպիսի բան չի եղել, ինչի մասին բազմաթիվ ապացույցներ ու վկաներ կան, այդ թվում տվյալ հերթապահության ժամանակ իրենց բաժանմունք դիմած մի հիվանդների հարազատները: Այդ փաստերին, նրա խոսքով, սակայն, տնօրինությունը ուշադրություն չի դարձնում:

Բուժքույր Նաիրա Կարապետյանը նշեց, որ ինքը նույնպես չի գրելու, քանի որ վստահ է՝ ոչ մի խախտում թույլ չի տվել:

«Բանավոր կերպով ինձ հրամայված է, որ ես ամսի 1-ով դիմում գրեմ: Պատճառաբանում են, թե ես քնել եմ, «շիրման» դրել եմ, բայց հիվանդն է դա պահանջել: «Շիրման» դնում ենք, քանի որ տարբեր սեռերի հիվանդներ են պառկած, որոնց հետ գործողություններ ենք կատարում, որպեսզի այդ ամենը բոլորի համար տեսանելի չլինի»,- ասաց նա:

Նշենք, որ բուժաշխատողները բողոքում են, որ իրենց ստիպում են աշխատանքից ազատման դիմումներ գրել՝ ներկայացնելով պատճառներ, որոնց հետ իրենք համաձայն չեն: Նրանք կարծում են՝ այդ պատճառները անհիմն են եւ իրական պատճառը նոր տնօրենի սկսած կադրային ջարդն է, որն ուղղված է բոլոր նրանց նկատմամբ, որոնք աշխատել են նախկին տնօրենի հետ: Աշխատողների խոսքով՝   3 տասնյակ բուժաշխատողների նման բանավոր պահանջ է ներկայացվել:

ՀՀ աշխատանքի և սոցիալական հարցերի նախարարության համակարգում գործող տարեցների և երեխաների խնամքի շուրջօրյա հաստատություններում այսօր՝ փետրվարի 27–ին, կարանտին է հայտարարվել: Այս ամսին  տեղեկանում ենք  Աշխատանքի եւ սոցիալական հարցերի նախարարության լրատվական ծառայությունից։

Նպատակը այս եղանակին տարածված սուր շնչառական վարկաներից խուսափելն է: Կարանտին հայտարարվել է վերոնշյալ հաստատություններում, քանի որ վիճակագրության համաձայն՝ տարեցները և երեխաները՝ հատկապես հաշմանդամություն ունեցողները, առավել հակված են տարածված վարակներով հիվանդանալուն:Կարանտինը կշարունակվի երկու շաբաթ։

Մեծավանի ջրամբարում ձկնաբուծություն չի նախատեսվել և ջրամբարում ձկների հայտնվելու վերաբերյալ որևէ տեղեկության Ջրային կոմիտեն չի տիրապետում: Այս մասին գրառում է տեղադրվել Ջրային կոմիտեի էջում։

Հրապարակման համաձայն՝ Մեծավանի ջրամբարը կառուցվել է 1989թ․ Լոռու մարզի Մեծավան գյուղից 2 կմ հեռավորության վրա: Ջրամբարը ոռոգման նշանակության է, մեռյալ ծավալ չունի։ Ըստ այդմ, շահագործման ռեժիմներով պայմանավորված և անվտանգության նկատառումներից ելնելով՝ ցանկացած պահի ջրամբարը կարող է դատարկվել:

Ջրամբարը դատարկվել է վերջերս՝ անվտանգության նկատառումներով։ Դեռևս 2017թ․, կոնստրուկցիաների քայքայման պատճառով վթարային իրավիճակ է արձանագրվել․ պատվարի ձախ կողեզրին կառուցված աղետային ջրհեռի խրամուղային ջրընդունիչի աջ կողմի բետոնե պատի վերին եզրի՝ մոտ 40 սմ բարձրությամբ և 17 մ երկարությամբ հատվածը փլվել, պոկվել է հիմնական պատից: Խրամուղու կոնստրուկցիան քայքայված է, ինչի հետևանքով հորիզոնական շինարարական կարերի միջով ջուրը ներթափանցում է պատերի բետոնի շերտերը, իսկ հավաքովի երեսպատման սալիկները հեռանում են հիմնական բետոնից:

Ստեղծված իրավիճակի շուրջ մտահոգություն էին հայտնել Լոռու մարզպետը, արտակարգ իրավիճակների նախարարությունը, որոնք գրություններով դիմել են տարածքային կառավարման և ենթակառուցվածքների նախարարություն: Մեծավանի ջրամբարի պատվարի վերականգնման աշխատանքների ուսումնասիրության և դրանց հրատապության գնահատման հարցը քննարկվել է Ջրային կոմիտեում տեղի ունեցած՝ Ջրային համակարգերի օգտագործման և պահպանության տեխնիկական հանձնաժողովի նիստում:

ՏԿԵՆ հանձնարարականների համաձայն, ջրամբարի հիդրոտեխնիկական կառուցվածքների/ՀՏԿ/ տեխնիկական վիճակի զննման, նախնական ուսումնասիրությունների, ստեղծված իրավիճակի գնահատման ընթացքի և արդյունքների վերաբերյալ Ջրային կոմիտեն պարբերաբար տեղեկատվություն է ներկայացրել:

Մեծավանի ջրամբարի հիմնանորոգման նպատակահարմարության հարցը 2019թ․ հունիսի 19-ին քննարկվել է ՀՀ Անվտանգության խորհրդի գրասենյակում՝ ՀՀ արտակարգ իրավիճակների, էկոնոմիկայի, ֆինանսների նախարարությունների, ՀՀ ոստիկանության և Ջրային կոմիտեի ներկայացուցիչների մասնակցությամբ: Քննարկումների և կատարված ուսումնասիրությունների արդյունքում ակնհայտ է դարձել, որ անհրաժեշտ է կատարել ջրամբարի ՀՏԿ-ների վերանորոգման աշխատանքներ, քանի որ այդ վիճակում ջրամբարի շահագործումը կարող է անկանխատեսելի հետևանքներ ունենալ:

ՁԻԱՀ-ի կանխարգելման կենտրոնի տնօրեն Սամվել Գրիգորյանը հրաժարվել է կատարել կառավարության որոշումը: Սա էլ դարձել է նրա հեռացման պատճառը: Այս մասին լրագրողների հետ զրույցում ասաց Հայաստանի առողջապահության նախարար Արսեն Թորոսյանը:

Նախարարի խոսքով՝ ՁԻԱՀ-ի կանխարգելման կենտրոնի նախկին տնօրենը հրաժարվել է փաստաթղթեր ներկայացնել, որոնք անհրաժեշտ էին երկու ծառայությունների՝ ՁԻԱՀ-ի կանխարգելման կենտրոնի եւ «Նորք» ինֆեկցիոն հիվանդանոցի միավորման վերաբերյալ կառավարության որոշման կատարման համար: Ավելին՝ Սամվել Գրիգորյանը հրաժարվել է վերադարձնել բժշկական կենտրոնի կնիքը: Նախարարի խոսքով՝ սա պետք է ունենա նաեւ իրավական հետեւանքներ, որովհետեւ չի կարելի, որ «որեւէ մեկի քմահաճույքով պետական հաստատությունը զավթվի եւ չհանձնվի պաշտոնատար անձանց»:

Արսեն Թորոսյանը նշեց, որ այս միջադեպն իր մոտ դեժավյուի զգացողություն է առաջացրել. նման ինչ-որ բան տեղի ունեցավ 2018 թվականի ամռանը, երբ «Սուրբ Գրիգոր Լուսավորիչ» ԲԿ տնօրենը, նախարարի խոսքով, «հրաժարվեց իր դիրքերից նահանջել՝ ասես, դա նրա սեփականությունն էր»:

Նախարարի խոսքով՝ ինքը հրաշալի ծանոթ է ՄԻԱՎ/ՁԻԱՀ-ի դեմ պայքարի ոլորտին, քանի որ իր առաջին վարձատրվող աշխատանքը եղել է հենց այս ոլորտում: Նրա խոսքով՝ ինքը նաեւ հրաշալի ծանոթ է մարդկանց, որոնք այս ոլորտում աշխատում են, եւ նրանց «անդրկուլիսային շահերին»:

Նախարարը հիշեցրեց, որ ՁԻԱՀ-ի կանխարգելման կենտրոնի եւ «Նորք» ինֆեկցիոն հիվանդանոցի միավորումն ամենեւին չի նշանակում այս կենտրոններից որեւիցե մեկի փակում. հակառակը՝ երկու ծառայությունները կշարունակեն զարգանալ: