Սեպտեմբերի 29-ին կայացել է «Հումանիտար ականազերծման  և փորձագիտական կենտրոն» (ՀԱՓԿ) ՊՈԱԿ-ի խորհրդի նիստը` ՀՀ պաշտպանության նախարարի տեղակալ Ա. Նազարյանի նախագահությամբ: Նիստին մասնակցել են Ականազերծման գործողության շվեյցարական հիմնադրամի (Swiss Foundation for Mine Action) հայաստանյան ծրագրի ղեկավար Յոհաննես Օդենդալը և Միգրացիայի միջազգային կազմակերպության հայաստանյան գրասենյակի տնօրեն Իլոնա Տեր-Մինասյանը:

ՊՆ մամուլի ծառայությունից հայտնում են, որ Յոհաննես Օդենդալը մասնակիցներին հանգամանալից ներկայացրել է Հայաստանում ականազերծման գործողությունների օժանդակության նպատակով շվեյցարական կազմակերպության առաջարկությունը, որը ներկայացվել է ԱՄՆ պետքարտուղարության հավանությանը:

Քննարկման ընթացքում հատուկ ուշադրության են արժանացել ականազերծման գործողություններում հումանիտար կարողությունների զարգացման, ականապատ տարածքների քարտեզագրման, հատուկ տեխնիկայի, այդ թվում` ականազերծման աշխատանքների նպատակով թռչող անօդաչու սարքերի կիրառման, ինչպես նաեւ միջազգային այլ դոնոր-կազմակերպությունների հետ համագործակցությունը հեշտացնելու նպատակով հոգաբարձուների խորհրդի ստեղծման հարցերը:

Յոհաննես Օդենդալը առանձնահատուկ նշել է շվեյցարական կազմակերպության հանձնառությունը Հայաստանի հետ մշակված ծրագրի առաջին փուլն իրականացնելու հարցում, ինչը հնարավորություն կտա հետագայում խորացնել և ընդլայնել  համագործակցությունը հումանիտար ականազերծման ոլորտում:

«Հումանիտար ականազերծման և փորձագիտական կենտրոն» (ՀԱՓԿ) ՊՈԱԿ-ի խորհուրդը բաղկացած է ՀՀ պաշտպանության, արդարադատության, արտակարգ իրավիճակների, տարածքային կառավարման նախարարների տեղակալներից և հանդիսանում է խորհրդակցական կոլեգիալ մարմին:

Ոստիկանությունը քրգործ է հարուցել ապօրինի որսի փաստով:

Ոստիկանության լրատվության վարչությունից հայտնում են, որ սեպտեմբերի 25-ին ոստիկանության Արտաշատի բաժնում հաղորդում էր ստացվել, որ նույն օրը Խոսրովի արգելոցի «Կաքավաբերդ» կոչվող հատվածում անհայտ անձանց կողմից կատարվել է ապօրինի որս:

Փաստի առթիվ ոստիկանության Արարատի մարզի քննչական բաժնում հարուցվել է քրեական գործ՝ ՀՀ քրեական օրենսգրքի 294 հոդվածի 1-ին մասի հատկանիշներով:

Կատարվում է նախաքննություն:

Այսօր Երևանի Կենտրոն և Նորք-Մարաշ վարչական շրջանների դատարանում քննվող աղմկահարույց բանդայի գործով, դատավոր՝ Մխիթար Պապոյան, սկսվեց և շատ արագ ավարտվեց դատական նիստը:

Նիստը հետաձգվեց ամբաստանյալ Քյարամ Ամոյանի հիվանդության պատճառով: Բժշկի եզրակացությամբ, նա ի վիճակի չէր մասնակցել դատական նիստին՝ առողջության վատթարացման պատճառով:

Բանդիտիզմի, ավազակություն, ավազակային հարձակում նախապատրաստելու, տրանսպորտային միջոցների ապօրինաբար տիրանալու, առանց իրացնելու նպատակի թմրամիջոցի ապօրինի շրջանառության դեպքերի առթիվ հարուցված քրեական գործով այսօրվա նիստը տեղի չունեցավ:
Հիշեցնենք, որ գործով մեղադրվում են 6 անձինք:

Ըստ մեղադրական եզրակացության, Արտուշ Հակոբյանը, Գուրգեն Հայրապետյանի հետ միասին (վերջինս, փորձելով ազատվել ոստիկանության աշխատակիցների հետապնդումներից, դիմել էր փախուստի, որի ընթացքում, բարձրանալով Մյասնիկյան պողոտային հարակից ժայռի վրա, վայր է ընկել և մահացել) ստեղծել և ղեկավարել է կազմակերպված, զինված կայուն խումբ` բանդա, ապա բանդայի կազմում հավաքագրել Սամվել Դավթյանին, Քյարամ Ամոյանին, Արման Դալլաքյանին, Արթուր Մանուկյանին ու Դավիթ Գալստյանին և քննությամբ դեռևս չպարզված այլ անձանց:
Այլ անձանց թվում է նաև Բանդայի պարագլուխ համարվող Արտուշ Հակոբյանի կինը` վրացուհի Մարինա Գեորգիաձեն, որը նախնական տվյալներով, համարվում էր կատարված հանցագործությունների «ուղեղը»: Նիստին Մարինան ներկայացված չէր:
ՔԿՀ մամուլի պատասխանատուն տեղեկացրեց, որ 7 ամիս առաջ, դատախազի միջնորդությամբ նրան արտահանձնել են Վրաստանին: Մարինան հայրենի երկրի իրավապահների կողմից հետախուզման մեջ էր խարդախության և էլի ինչ-որ մեղադրանքներով, և վրաց իրավապահները պահանջել էին իրենց հանձնել Գեորգիաձեին:
Կբերվի արդյո՞ք հանցագործ կինը դատավարությանը, ո՞ր երկրում է նրա կատարած հանցանքն առավել վտանգավոր, պատժի ի՞նչ չափանիշներ կկիրառվեն նրա նկատմամբ, ցույց կտա ժամանակը:
Միայն ավելացնենք, որ Հակոբյանները ամեն ինչ արեցին` նրա արտահանձնումը կասեցնելու համար, վախենալով, որ մի շարք հանցանքների մեջ մեղադրվող կնոջը Վրաստանում ավելի խիստ կպատժեն:

Հայաստանի վարչապետ Տիգրան Սարգսյանը սեպտեմբերի 28-ին Յալթայում հանդիպել է Ռուսաստանի վարչապետ Դմիտրի Մեդվեդևին:  Զրուցակիցները քննարկել են երկկողմ հետաքրքրություն ներկայացնող հարցերի լայն շրջանակ:

Կառավարության մամուլի ծառայությունից հայտնում են, թե Տիգրան Սարգսյանը նշել է, որ Հայաստանը մեծ նշանակություն է տալիս Ռուսաստանի հետ հարաբերությունների ամրապնդմանն ու ընդլայնմանը:«Հարաբերությունների դինամիկան մեզ գոհացնում է, սակայն մենք տեսնում ենք, որ կա ավելի մեծ ներուժ, որը պարտավոր ենք օգտագործել»,- ասել է Տիգրան Սարգսյանը:

Իր հերթին, Դմիտրի Մեդվեդևն ընդգծել է Հայաստանի և Ռուսաստանի միջև առևտրաշրջանառության աճը և գոհունակություն հայտնել երկկողմ առևտրատնտեսական հարաբերությունների առնչությամբ: «Մենք մշտական երկխոսության մեջ ենք բոլոր մակարդակներում, այս իմաստով մեզ մոտ ամեն ինչ լավ է, և արդյունքներն էլ վատ չեն: Հիմնական ցուցանիշն ապրանքաշրջանառությունն է, չնայած մենք հասկանում ենք, որ կարևոր է նաև այդ շրջանառության որակը, սակայն այն չի ընկնում, այլ աճում է»,- հայտարարել է ՌԴ վարչապետը:Նրա գնահատմամբ` ներդրումային չօգտագործված ռեսուրս ևս առկա է:

Տիգրան Սարգսյանը և Դմիտրի Մեդվեդևը պայմանավորվածություն են ձեռք բերել, որպեսզի ռուսական կողմը քննարկի Եվրամիության և Համաշխարհային բանկի հետ դոնորների կոնֆերանսին իր մասնակցության հարցը, որտեղ անդրադարձ կկատարվի Հայաստանի Հանրապետության համար առաջնահերթություն ունեցող ծրագրերի ֆինանսավորման խնդրին: Վարչապետը կարևորել է այս հարցը և ստացել է իր ռուս գործընկերոջ աջակցությունը:

Հայաստանի և Ռուսաստանի կառավարությունների ղեկավարները քննարկել են նաև ՀՀ-ում նոր ատոմային էներգաբլոկի կառուցմանը: Զրուցակիցները հստակեցրել են այս ուղղությամբ իրականացվելիք երկկողմ քայլերը: Ակնկալվում է, որ ռուսական կողմը կմասնակցի ատոմային նոր էներգաբլոկի կառուցման ֆինանսաֆորմանը, ուստի զրուցակիցները քննարկել են, թե ինչպիսի ֆինանսական սխեմաներով է ՌԴ-ն մասնակցելու այդ գործընթացին և ինչպես է հայկական կողմը մարելու իր ֆինանսավորման պարտավորությունները՝ ատոմակայանի կառուցումից և շահագործումից հետո: Հանձնարարականներ են տրվել համապատասխան գերատեսչություններին՝ քննարկելու հայկական կողմի առաջարկությունը և հստակեցնելու ատոմակայանի կառուցման ֆինանսական մեխանիզմները:

Վարչապետ Սարգսյանը և Դմիտրի Մեդվեդևն անդրադարձել են նաև երկու երկրների միջև ադամանդագործության զարգացմանն ուղղված հարցերի: Քանի որ Հայաստանն արդեն վավերացրել է ԱՊՀ ազատ առևտրի համաձայնագիրը, կողմերը քննարկել են որոշ ռեժիմների մեղմացմանն առնչվող խնդիրներ: Հայկական կողմն առաջարկել է ադամանդի հումքի ներմուծման ժամանակ Ռուսաստանում կիրառվող 6,5 տոկոսանոց արտահանման հարկը վերանայել Հայաստանի համար, ինչին ի պատասխան՝ Դմիտրի Մեդվեդևը հանձնարարել է պատկան մարմիններին քննարկել հարցը:

Պայմանավորվածություն է ձեռք բերվել երկու երկրների էկոնոմիկայի նախարարների գլխավորությամբ ստեղծել աշխատանքային խումբ, որն էլ կքննարկի հայ-ռուսական տնտեսական համագործակցության խորացմանն ու ընդլայնման ուղղություններն ու ծրագրերը:

Սեպտեմբերի 29-ին, ժամը 08.15-ին, «ԳԱԶ-24»  մակնիշի ավտոմեքենան Նոր Կյանք-Տափերական ճանապարհի 0,5 կմ-ին բախվել է կայանված «ԳԱԶԵԼ-3221» մակնիշի ավտոմեքենայի:
Ոստիկանության լրատվության վարչությունից հայտնում են, որ պատահարի հետևանքով «ԳԱԶԵԼ-3221»-ի վարորդը` 1953 թ. ծնված  Սերյոժա  Արթենյանը, տեղում մահացել է, իսկ «ԳԱԶ-24»-ի վարորդը և  ուղևորուհին  մարմնական վնասվածքներով տեղափոխվել են հիվանդանոց:
Կատարվում է նախաքննություն:

Սրտի համաշխարհային օրը տոնվում է ամեն տարի` սեպտեմբերի 29-ին։ Սկսել են տոնել 2000թ.ից, նպատակն է` հասարակությանը հիշեցնել, որ սրտի հիվանդություններն ու ինսուլտը հիմնականում մահվան պատճառ են հանդիսանում` ամեն տարի խլելով 17,3  մլն մարդու կյանք։

2012թ.-ին տոնը տեղի կունենա «Մեկ աշխարհ, մեկ տուն, մեկ սիրտ» կարգախոսով, այն  նվիրված կլինի կանաց և երեխաների շրջանում սրտի հիվանդությունների կանխարգելմանը։

Փորձագետներն ասում են, որ 30 րոպե ֆիզիկական ակտիվությունը շաբաթվա մեջ 5 անգամ բավարար է, որպեսզի նվազեցնեն սրտի հիվանդություններն ու ինսուլտի ռիսկը։

«Ամեն ինչ սկսեք քչից, վազեք, բայց ոչ ինչպես մարաթոնին»,-ասում են մասնագետները` հավելելով, որ պետք է ուտել մանգո և մրգեր,նվազեցնել աղի քանակը`օրը 5 գրամով, ինչպես նաև մսի ու մակարոնի քանակը։

Հիլարի Քլինթոնը ՄԱԿ-ի Գլխավոր վեհաժողովի շրջանակներում հայտարարել է, որ  ԱՄՆ իշխանությունները Սիրիայի ընդդիմադիրներին 30 մլն ԱՄՆ դոլար կտրամադրեն որպես մարդասիրական օգնություն,  ևս 15 մլն ԱՄՆ դոլարի սարքեր և միջոցներ որոնք ուղղակի ռազմական նշանակության միջոցներ չեն, տեղեկացնում է «Ինտերֆաքս» գործակալությունը:

«ԱՄՆ պարտավորվում է օգնել խիզախ սիրիացիներին, ովքեր ժողովրդավարական բարեփոխումների հիմքերն են դնում»,- նշել է նա:

Քլինթոնը նշել է, որ Իրանը իր դաշնակից Սիրիայի իշխող վարչակարգը  պաշտպանելու համար ամեն հնարավոր բան կձեռնարկի:

Ժամկետը լրանալուց հետո, այսօր ազատ է արձակվել Գառնու «Սուրիկի լավաշ»-ի սեփականատիրոջ՝ Սուրիկ Հակոբյանի որդիներից մեկը` Անդրանիկ Հակոբյանը: Նա ձերբակալվել էր «բանդայի» գործի շրջանակներում, սակայն գործն առանձնացվել էր, և կրտսեր Հակոբյանը դատապարտվել էր թմրանյութեր պահելու մեղադրանքով:

Հիշեցնենք, որ Հակոբյանների ընտանիքի ևս երկու անդամ՝ ավագ որդին՝ Արտուշ Հակոբյանը և նրա կինը՝ Մարինա Գեորգիաձեն, դեռ կալանավայրում են:  Նրանք մեղադրվում են բանդայի գործով:

Համաձայն ՊԲ օպերատիվ տվյալների ամփոփագրի, անցած շաբաթվա ընթացքում ղարաբաղա-ադրբեջանական հակամարտ գոտու ողջ երկայնքով ադրբեջանական զինված ուժերի կողմից հրադադարի պահպանման ռեժիմը  խախտվել է ավելի քան 250 անգամ, որի ընթացքում, տարբեր տրամաչափի հրաձգային զինատեսակներից հայ դիրքապահների ուղղությամբ արձակվել է  շուրջ 1300 կրակոց:

ՊԲ առաջապահ զորամասերը հավատարիմ են մնացել հրադադարի պահպանման ռեժիմին և անհրաժեշտ քայլեր ձեռնարկել մարտական դիրքերը հուսալիորեն պաշտպանելու համար: