Բաց նամակով ՀՀ գլխավոր դատախազին է դիմել քաղաքացի Անահիտ Եգանյանը, որն արդեն 5 տարի է ապարդյուն արդարություն է փնտրում:

«Ասում են՝ մարդիկ տուժում են իրենց խելքից: Ընդունում եմ, բայց ես ապրում եմ պետության մեջ, որտեղ բոլորը չէ, որ կարող են խելացի ու հաշվենկատ լինել: Ուրեմն ի՞նչ, ես պետք է մնամ փողոցում, եթե խարդախների մի խումբ չարաշահել է իմ վստահությունը և տիրացել բնակարանիս:

Հարգելի դատախազ ՝որպես արդարադատության նկատմամբ վերահսկողություն իրականացնող մարմնի ղեկավար, հուսով եմ որ դուք կվերականգնեք արդարությունը և թույլ չեք տա ոտնահարելու իմ իրավունքները՝ հանցագործներին չպատժելով, միայն այն բանի համար, որ խարդախները համակարգի աշխատողներ են կամ ընդամենը համակարգի շուրջը համախմբված ճարպիկներ:

Նախապատմությունը հետևյալն է. 2009 թվականին նախկին ընկերս՝ Արման Կոլյայի Համբարձումյանը, որն աշխատում է ոստիկանության 6-րդ վարչությունում, չարաշահելով իմ վստահությունը, իր ընկերների  հետ խմբակային խարդախությամբ ինձանից խլել են իմ բնակարանը (ք. Երևան, Դեմիրճյան 29 շ., 9բն):  Արմանն ինձ ստիպել է բնակարանս գրավ դնել և վարկ վերցնել,ասելով, որ դրա մի մասով կմարի իր պարտքը, իսկ մյուս մասը կվերանորոգենք բնակարանը և կհանձնենք վարձակալության:

Արմանը բերել է իր ընկերներին, որից Արտակ Գալստյանից վերցրել է 40.000 ԱՄՆ դոլար, իբրև իր մյուս ընկերոջ՝ Արման Վարտիկյանի հետ պետք է կանխավճար մուծի որևէ բանկում, որպեսզի դասավորի հիփոթեքային վարկ՝ իր մյուս ընկերոջ՝ Արտաշի անունով:

Երբ ես հասկացա, որ խաբված եմ, դիմեցի ոստիկանության ՔԳՎ: Այդ ժամանակ Արտակն(Նա ինձ սպառնաց, թե՝ ինքը Վանոյի Արտակն է ու իր դեմ խաղ չկա) ու Արմանն ինձ սպառնացին՝ ասելով, որ եթե բողոքս հետ չվերցնեմ, ինձ այնպես կվերացնեն, որ հետքս էլ չեն գտնի, իսկ եթե բողոքս հետ վերցնեմ, նրանք իմ բնակարանն ինչ -որ ժամանակ հետո, հետ կվերադարձնեն ինձ:

Ես վախենալով իմ կյանքից, բողոքս հետ վերցրեցի, դրա համար էլ նրանց նկատմամբ քրգործ չհարուցվեց:

Ինձ կրկին խաբեցին: Երկու ամիս անց, Արտակն իմ բնակարանը վաճառեց, իր ասելով 60.000 դոլարով վերցրեց գումարը և ասելով, որ իրենք կաշառք են տվել գործը փակելու համար, ու նաև այդ գումարը պետք է դուրս գա իմ հաշվից:

Ստացվեց, որ 40.000 դոլարը մայր գումարն էր, 6.000-ը՝ տոկոս, 6 000 դոլար էլ կաշառք քննչականին, իսկ ավելացած 8000 դոլարը տվեցին ինձ: Երկու օր անց Արման Համբարձումյանն ինձ կրկին խաբելով և սպառնալով վերցրեց 6000դոլարը:

Մինչ օրս ես բողոքում եմ, ունեմ ձայնագրություններ, վկաներ, փաստացի ապացույցներ: Դրանք կարող եմ ներկայացնել, ցանկացած պահի, Ձեր պահանջով»: