Եվրոպայի խորհրդի Նախարարների կոմիտեում ՀՀ նախագահության շրջանակում ՀՀ Ազգային ժողովում մեկնարկել է «Իրավունքի գերակայության եվրոպական չափորոշիչները և իշխանությունների հայեցողության սահմանները ԵԽ անդամ երկրներում» համաեվրոպական երկօրյա խորհրդաժողովը:

Մարդու իրավունքների եվրոպական դատարանի նախագահ Դին Շպիլմանն ընդգծել է խորհրդաժողովի կարևորությունը .«Այս խորհրդաժողովը շատ կարևոր է նաև այն առումով, որ այն անցկացվում է Հայաստանի նախագահության շրջանակներում: Նախագահության ընթացքում Հայաստանն արդեն իսկ առաջին ձեռքբերումն է ունեցել` ստորագրելով 15-րդ արձանագրությունը, ինչը հնարավորություն կտա ՄԻԵԴ-ին ավելի արդյունավետ աշխատել»,- նշել է Դին Շպիլմանը և հավելել. «Ես հույս ունեմ, որ Հայաստանի նախագահությունը շարունակական կլինի մյուս երկրների կողմից: Հայաստանի համար երկրորդ ձեռքբերում կարող է լինել Մարդու իրավունքների Եվրոպական կոնվենցիայի 16-րդ արձանագրության վերջնականացումը, որը նոր կարևորություն կտա մարդու իրավունքների դատարաններին»:

Դին Շպիլմանի խոսքով, պետք է հարգվեն Մարդու իրավունքների եվրոպական կոնվենցիայում  ամրագրված իրավունքները և ազատությունները:

ԵԽ Վենետիկի հանձնաժողովի նախագահ Ջիանի Բուքիքիոի խոսքով, ժամանակակից պետությունը պետք է ճկուն լինի, որպեսզի կարողանա արձագանքել բոլոր խնդիրներին: «Մարդու իրավունքների հարգումը պահանջում է հավասարակշռության պահպանում իշխանությունների կողմից: Սահմանները պետք է փոխկապակցված լինեն: Ընդհանուր գործընթացը պետք է առավելագույն թափանցիկ լինի»,-նկատել է ԵԽ Վենետիկի հանձնաժողովի նախագահը: