Այսօր ՎԱՐԿԱԾ ակումբի հյուրեր «Վաչագան-Գևորգ» ՍՊԸ-ի տնօրեն Վաչագան Մկրտչյանը և նրա իրավապաշտպան Մարիաննա Եղիազարյանը ներկայացրեցին «Արցախ» բանկի հերթական ապօրինությունը:

Բանախոսները նշեցին, որ արդեն 2 տարի է բանկը հաճախորդին չի տրամադրում տեղեկատվություն այն մասին, թե  որքան տուգանք է գումարվել հաճախորդի՝ գրավադրված բնակարանի գումարին: 

Վաչագան Մկրտչյանը պատմեց, որ  ունեցել  է «Վաչագան -Գևորգ» անվամբ շինարարական կազմակերպություն, որի ապրանքաշրջանառության համար 2006 թվականից սկսած վարկեր է վերցրել և մարել ժամանակին: Բայց 2010 թվականին  ֆինանսական ճգնաժամի  հետևանքով չի կարողացել ժամանակին մարել տոկոսները, որի համար  2011 թվականին դիմել է բանկին՝ խնդրել, որ իջեցնեն իր վարկի տոկոսներն ու երկարացնեն վարկի մարման ժամկետը: Բանկը պատասխանել է, որ Կենտրոնական բանկն այդպիսի գործարք թույլ չի տալիս իրականացնել:

«2011թ. գարնանը որոշվեց բանկի կողմից բազան վաճառվի, տարածքը վաճառվի և բանկի վարկը մարվի: Բանկի վարկը կազմում էր 700.000 դոլար: Փաստացի օբյեկտը շուկայական գնով արժեր մեկ միլիոն 500 հազար դոլար, նրանք որոշել էին վաճառել մեկ միլիոնով, սակայն բանկը տեղեկացրեց, որ հաճախորդ կա, որն ուզում է գնել 450.000 դոլարով: Ես դեմ էի, բայց քանի որ սթրեսային իրավիճակ էր, և ես համաձայնվեցի»,-պատմում է Վ. Մկրտչյանը:

Նրան այժմ անհանգստացնում է փոքր կենտրոնում գտնվող իր բնակարանի հարցը. այդ բնակարանը ևս գրավադրված է, սակայն 2 տարի է՝ տեղեկություն չունի, թե ներկայումս այդ գրավադրված գույքին որքա՞ն տույժ-տուգանք է գումարվել:  Վաչագանի խոսքով, ինքը  4 անգամ գրավոր դիմում է ուղարկել «Արցախ» բանկին, սակայն բանկը հստակ ինֆորմացիա չի տրամադրել:

Վաչագան Մկրտչյանի իրավապաշտպան Մարիաննա Եղիազարյանն էլ նշեց, որ դիմել են իմանալու համար թե ինչքան են կազմում տուգանքներն ու տույժերը, սակայն՝ ապարդյուն: Բանկից տեղեկացրել են, թե այդ գործը վաղուց իրենց մոտից դուրս է եկել և գտնվում է գլխամասում. «Բազմիցս զանգահարել ենք, հետո ինքներս այցելել ենք Ղարաբաղ և հանդիպել ենք կառավարչին, և խնդրել ներկայացնել որոշումը, ինչին ի պատասխան հնչել է հետևյալը, պատասխանը եղել է բանավոր, այն դեպքում, երբ դիմումը եղել է գրավոր և այսպես «ինչ ուզում ենք, այն էլ թող անենք»»-ասաց Մարիաննա Եղիազարյանը:

Վաչագան Մկրտչյանը պատմեց նաև, որ Երևանի Սայաթ -Նովա փողոցում գտնվող  «Արցախ» բանկի մասնաճյուղի կառավարիչ Զորիկ Ավետիքյանն իր կնոջն ասել է, թե Վաչագանը խաղատներում գումար է վատնում և բազում սիրուհիներ  է ունի: Ինչը զայրացրել է Վաչագանին, և երբ վերջինս գնացել է նրանից հաշիվ պահանջելու, բանկի կառավարիչ Զորիկ Ավետիքյանը իր վրա զենք է բարձրացրել: