Հայաստանում ներքաղաքական իրավիճակը բավականին հետաքրքիր զարգացումներ է ենթադրում վարչապետ Տիգրան Սարգսյանի հետ կապված:

Նախ ասենք, որ իր անունից օֆշորային ընկերությունում կատարված գործարքների վերաբերյալ, նրա անտեղյակությունը առնվազն տարակուսելի է և  հավատ չներշնչող: Չափազանց տարօրինակ է, որ դրանց հետ կապված առ այսօր նա չի կարողանում որևէ կոնկրետ փաստարկ բերել (մենք այդ մասին արդեն գրել ենք):

Սակայն խնդիրն այստեղ այլ է՝ ո՞ւմ է ձեռնտու ակնհայտ փաստերը, որոնց մասին պատկան մարմինների անտեղյակությունը խիստ կասկածելի է, հենց այս պահին դնել շրջանառության մեջ:

Վարչապետի շուրջ օղակը սեղմվում է մեկ այլ հարթության վրա ևս. Վերահսկիչ պալատի հաշվետվությունից հետո, քննադատության ալիքը նոր թափ ստացավ: ԱԺ նախագահ Հովիկ Աբրահամյանը բացահայտ հայտարարեց, թե բյուջեն թալանում են ու լափում, և վարչապետն անելիք ունի: Թեպետ նույն վերահսկիչի բազում բացահայտումներ տարիներ շարունակ անհետևանք են մնացել և դա ոչ ոքի չի զարմացնում այլևս: Ինչ խոսք, չի բացառվում, որ այս անգամ էլ դրանց հետևանքները հանրության համար նկատելի չլինեն, սակայն մեսիջները ուղղակի հասցեագրված Տիգրան Սարգսյանին, այս անգամ չափազանց կոնկրետ էր:

Հետաքրքիր է, որ Տիգրան Սարգսյանը որոշեց պատասխանել որոշակի դադարից հետո, հայտարարելով, թե՝  «Ամբողջությամբ կիսում եմ ԱԺ նախագահի տեսակետը, որ երբևիցե պետական բյուջեի միջոցները մսխած պաշտոնյաները պետք է կրեն արժանի պատիժ», և անմիջապես դրանից հետո ֆինանսների նախարարությունը հրապարակեց Հովիկ Աբրահամյանի ընտանիքի սոցիալապես անապահով գյուղացիներին հասցեագրված պետական դոտացիայից օգտվելու փաստը:

Մեսիջների հարցում ևս պատասխանը չուշացավ. ԱԺ նախագահին հասկացվեց, որ մինչ խորհրդարան մտնելը՝ ինքը ՀՀ փոխվարչապետն էր:

Կուլիսներում արդեն սկսել են լուրեր պտտվել Վարչապետի հնարավոր պաշտոնանկության մասին, որը կանխատեսվում է աշնան վերջին: Նրա հետ իհարկե կրկին կփոխվի կառավարության կազմը, Տիգրան Սարգսյանի «դաշտում» աշխատող նախարարները հրաժեշտ կտան պաշտոնին, սակայն դա այլ խոսակցություն է:

ԱԺ նախագահ Հովիկ Աբրահամյանը հունիսի 26-27-ը մեկնում է Ստրասբուրգ՝ Հայաստանի՝ Եվրոպայի Խորհրդում նախագահության ստանձնման կապակցությամբ:

Համենայնդեպս, երկու հարց այսօր շատ հետաքրքիր է. մեր երկրի համար բավական հետաքրքրական ներքին իրավիճակում Հովիկ Աբրահամյանն արդյո՞ք առանցքային դերակատարում ունի և արդյո՞ք այս անգամ էլ Եվրոպան սատար կկանգնի ՀՀ վարչապետին և վարչապետացուների գլխին կրկին սառը ջուր կլցվի, թե այնուամենայնիվ կհաջողվի իրականացնել որոշ մարդկանց վաղեմի երազանքը:

Եվ, որ պակաս կարևոր չէ. այս ամենի վերաբերյալ  ի՞նչ դիրքորոշում կունենա մեր ռազմավարական դաշնակիցը, որը մեր քթի տակ անվարան իրականացնում է ոչ բարեկամական ծրագրեր: