Ադրբեջանցի հայտնի մտավորական, գրող, կինոդրամատուրգ Ռուստամ Իբրահիմբեկովը կարողացավ համախմբել ադրբեջանական ընդդիմությանը և, ըստ ամենայնի, հենց նա կլինի Իլհամ Ալիևի հիմնական մրցակիցը նախագահական առաջիկա ընտրություններում:

Իհարկե, ընդդիմության հաղթանակի շանսերը մինիմալ են, սակայն, թերևս, առաջին անգամ ադրբեջանական ընդդիմության ղեկավարն ընդունելությունների է արժանանում Մոսկվայում ու Վաշինգտոնում:

Իբրահիմբեկովը քաղաքական մարդ չէ, սակայն միշտ էլ հարել է հարևան երկրի էլիտային, ուղղակի շփումների մեջ է եղել նաև հայր և որդի Ալիևների հետ: Նրանց հետ գժտվել է 1997թ-ին և այսօր արդեն դարձել է միավորող գործոն ադրբեջանական անհաշտ ընդդիմության համար:

Սակայն մեր անդրադարձի առիթն ադրբեջանական քաղաքականությունը չէ, այլ BBC-ի ռուսական ծառայությանը Իբրահիմբեկովի տված հարցազրույցն, որում անդրադարձ կա նաև ԼՂ հիմնահարցին:

Իբրահիմբեկովի պատասխանները դուրս են այն շաբլոնից, որով տառապում է Ադրբեջանի քաղաքական վերնախավը:

Ընդդիմության առաջնորդը բնական է համարում, որ ղարաբաղցիները չեն ուզում ապրել Ադրբեջանի կազմում: «Եթե Ղարաբաղի բնակիչները տեսնում են, թե ինչպիսի դժոխային պայմաններում է Ադրբեջանը, ինչպես են կոպտորեն ոտնահարվում մարդու իրավունքները, ինչպիսի տոտալ բնույթ ունի կոռուպցիան՝ բնական է՝ նրանք չեն ուզենա, որ Ղարաբաղը մնա Ադրբեջանի կազմում»,- հիշատակված հարցազրույցում ասել է Ալիևի հիմնական միցակիցը:

Խիստ կարևոր է, որ Ադրբեջանում հնչում է նման սթափ և բանական կարծիք:

Սա խոսում է այն մասին, որ ադրբեջանական հասարակության գիտակցության մեջ որոշակի տեղաշարժեր են նկատվում:

Սակայն ավելի կարևոր է այն հանգամանքը, որ Ադրբեջանի ընդդիմության ղեկավարը կարգավորման գործընթացում կարևորում է հատկապես ժողովրդավարության գործոնը:

Ասել կուզի՝ կարգավորման նպատակը, գլխավոր սուբյեկտը մարդն է, որի ազատությունն ու անվտանգությունն էլ պետք է դառնան կարգավորման գործընթացի նպատակ:

Սուրեն Սուրենյանց