Տարօրինակ երկիր ունենք:

Մի կողմից` տեղի են ունենում ընտրություններ, որոնց որակը, մեղմ ասած, շատ հեռու է միջազգային չափանիշներից, մյուս կողմից` իշխանության վարքագծում արմատավորվում են ավանդույթներ, որոնք բնորոշ են քաղաքական արևմտյան մշակույթին:

Իրավապահ մարմիններում տեղի են ունենում պաշտոնանկություններ, որոնց մոտիվացիան դառնում է հանրության սեփականությունը:

Երևանի նախկին ոստիկանապետ Ներսիկ Նազարյանի դեպքում` պատճառաբանվեց, որ ծառայություն ու բիզնեսն անհամատեղելի են:

ՀՔԾ-ի նախկին պետ Անդրանիկ Միրզոյանն էլ պաշտոնանկ է արվել, որովհետև պատշաճ ձևով չի նպաստել Հատուկ քննչական ծառայության կայացմանը:

Մինչ հանրապետության նախագահը կներկայացներ ՀՔԾ-ի նոր պետին և նրա նախորդի պաշտոնանկության մոտիվացիան` նկատենք, որ մեր կայքն անդրադարձել է այս թեմային` մատնանշելով նաև այն պատճառը, որը փաստորեն դարձել է հիմնականն Անդրանիկ Միրզոյանի պաշտոնանկության հարցում:

Երեկ Սերժ Սարգսյանն այցելել է ՀՔԾ, աշխատակազմին ներկայացրել ծառայության նոր պետ Վահրամ Շահինյանին: Սակայն ավելի ուշագրավ է եղել Սարգսյանի անդրադարձը Միրզոյանի պաշտոնանկության մոտիվներին:

Խնդիրը` Միրզոյանի պաշտոնանկությունը չէ, այլ դրա պատճառը:

Սարգսյանի ելույթից երկու տպավորություն կարելի էր ստանալ:

Առաջին. Հայաստանում սկսվել է իրավապահ համակարգի բարեփոխման փուլը:

Երկրորդ. Սարգսյանը մեծացնում է իր ազդեցությունն իշխանության համակարգում` անձնական վերահսկողություն սահմանելով բոլոր առանցքային ոլորտներում:

Առաջինի մասին առայժմ դժվար է հեռուն գնացող դատողություններ անել, որովհետև գործ ունենք մի մեծ շղթայի հետ, որն իր մեջ ներառում է ոստիկանությունը, դատախազությունը, դատարանները:

Սակայն անկախ սպասվելիք բարեփոխումների բնույթից կամ բովանդակությունից` մի բան ակնհայտ է. երկրորդ պաշտոնավարման հենց սկզբից Սերժ Սարգսյանը փորձում է ձևավորել իշխանության բրգաձև մի համակարգ` նվազագույնի հասցնելով բարձրաստիճան տարբեր պաշտոնյաների ավտոնոմ հետաքրքրություններն ու շահերը:

«Միրզոյանի ազատման առիթը եղել է ապօրինությունը կոնկրետ քրեական գործով, բայց պատճառն այլ էր: Պատճառն այն էր, որ Անդրանիկ Միրզոյանը չկարողացավ լուծել իր առջև դրված խնդիրը, իսկ ես խնդիր էի դրել պարոն Միրզոյանի առջև, որպեսզի մեծ ջանքեր գործադրի Հատուկ քննչական ծառայության կայացման դժվարին գործում: Հատուկ քննչական ծառայությունը պետք է կայանար որպես ինստիտուցիոնալ անկախ և քրեական արդարադատության իրականացման գործում ինքնուրույն մասնակից: Ցավոք, մինչև հիմա այդպես չէ: Սա այն ծառայությունն է, որտեղ պետք է աշխատեն բացառապես գործին նվիրված ինքնուրույն, պրոֆեսիոնալ և հնարավորինս օբյեկտիվ մտածողություն ունեցող մարդիկ: Այս ծառայությունը չի կարող լինել կամակատար»,-երեկ ՀՔԾ-ում հայտարարել է հանրապետության նախագահը:

Պակաս կարևոր է այն հանգամանքը, թե կոնկրետ որ գործում է դրսևորվել Միրզոյանի ապօրինությունն. ի վերջո` դա մասնավոր էպիզոդ է: Բայց կարելի է ենթադրել, որ խոսքը վերաբերում է ՀՔԾ-ի վարույթում գտնվող երկու աղմկոտ գործերից մեկին, որոնցից մեկը վերաբերում է ոստիկանությունում հայտնաբերված ֆինանսական բուրգին, մյուսը` Վայոց ձորի նախկին մարզպետ Սերգեյ Բագրատյանին:

Սակայն ավելի կարևոր է Միրզոյանի պաշտոնանկության բովանդակային կողմը. եթե վերանանք դիվանագիտական ձևակերպումներից, ՀՔԾ-ի նախկին պետը մեղադրվում է ՀՀ գլխավոր դատախազ Աղվան Հովսեփյանից ունեցած կախվածության, նրան ու ոչ թե` հանրապետության նախագահին հաշվետու լինելու մեջ:

Այսինքն, երեկ Սերժ Սարգսյանը ֆորմալիզացրեց այն փաստը, որ մոտ ապագայում էապես թուլանալու է Աղվան Հովսեփյանի ազդեցությունը, իսկ մի քանի ամիս անց, գուցե, ականատես լինենք նաև դատախազի փոփոխությանը, մանավանդ որ` աշնանը ավարտվում է Հովսեփյանի լիրազորությունների ժամկետը:

Պաշտոնակ արված Միրզոյանը համարվում էր նաև նախկին նախագահ Ռոբերտ Քոչարյանի վստահելի կադրը, ըստ այդմ` Սերժ Սարգսյանը ևս մեկ հաստատուն քայլն արեց` երկրորդ նախագահին իշխանության միջանցքներից հեռացնելու ուղղությամբ:

Սուրեն Սուրենյանց