Երևանի ավագանու ընտրությունների ամենավատ առանձնահատկությունը վարչական ռեսուրսի անզուսպ օգտագործումն է:

Բոլոր ընտրություններում էլ իշխանությունը կիրառել է բյուջետային հիմնարկների աշխատողների նկատմամբ ճնշում կիրառելու արատավոր պրակտիկան: Բայց այս անգամ դա արվում է գրեթե բացահայտ՝ մարդկանց արժանապատվությունը նվաստացնելու, ուսուցչին ուզվոր, ծնողին՝ համարակալված քվե դարձնելով:

Հերթը սպորտին էլ հասավ:

Աշխարհում հակառակն է տեղի ունենում. հեղինակավոր միջազգային մրցաշարերի, հատկապես՝ օլիմպիադաների ժամանակ, պատերազմներն ընդհատվում են, մարդիկ մոռանում են վրեժի ու թշնամության մասին: Մարդկանց, թեկուզև կարճ մի ժամանակահատված, միավորում է արդար մրցակցության գաղափարը:

Հայաստանը դարձյալ օրինաչափությունից դուրս է. մեզանում, ըստ ամենայնի, ֆուտբոլը ծառայեցվելու է քաղաքականությանը:

Ֆուտբոլասերները գիտեն, որ ցանկացած ակումբ գերադասում է խաղալ սեփական հարկի տակ, որովհետև հանդիսատեսը, տվյալ պարագայում, 12-րդ խաղացողի դեր է կատարում:

Ֆուտբոլային այս աքսիոման փաստորեն չի գործում Հայաստանի առաջնության առաջին խմբում հանդես եկող «Բանանց -2» թիմի համար, որը, տանտիրոջ կարգավիճակով, «Փյունիկ-2» ակումբին հյուրընկալելու է… նրա իսկ մարզադաշտում՝ Ավանի ֆուտբոլային ակադեմիայում:

Պատկերացնո՞մ եք՝ դուք ձեր հարևանին հյուրընկալողի դերում հայտնվեք վերջինիս տանը:

Լավ, ո՞րն է այս աբսուրդի պատճառը:

Բանն այն է, որ ապրիլի 29-ն, այսինքն՝ այն օրը, երբ «Բանանցը» «Փյունիկի» հարկի տակ հյուրընկալելու է վերջինիս՝ տեղի է ունենալու Ֆուտբոլային ակադեմիայի նոր մարզադաշտի բացումը:

Դե, արդեն հասկացաք՝ Տարոնը՝ մեր ներկա ու ապագա քաղաքապետը, ներկա է լինելու բացման արարողությանը: Նրա հարազատ ընկեր ու հարևան Ռուբեն Հայրապետյանն էլ որոշել է, իհարկե՝ հանուն աղ ու հացի, մասովկան ապահովել…

Սուրեն Սուրենյանց