Համաշխարհային հայկական երիտասարդական ՈՍՏԱՅՆ-ի նախաձեռնությամբ Հայաստանում կազմակերպվել է «Երիտասարդական ՀԿ-ների դերը տեղեկատվական հասարակությունում» միջազգային ծրագիրը, որին մասնակցում են 9 երկրի 35 երիտասարդ առաջնորդներ` Ֆրանսիայից, Լատվիայից, Գերմանիայից, Վրաստանից, Ուկրաինայից, Ռումինիայից, Ռուսաստանից, Ղազախստանից, Չեխիայից, Բելառուսից:
Միջազգային ծրագրի նպատակն է երիտասարդների համատեղ ուժերով ստեղծել տեղեկատվական դաշտ, վեր հանել առցանց երիտասարդական աշխատանքի արդյունավետ մեթոդները և խրախուսել դրանց կիրառումը Հայրենիքի ու Սփյուռքի երիտասարդական կազմակերպությունների կողմից: Կազմակերպիչների կարծիքով ծրագիրը հնարավորություն է ստեղծում մշակել երկարատև համագործակցության ծրագրեր և ապահովել ծրագրի շարունակականությունը:
«Ծրագրի մասնակիցներն իրենց նոր գաղափարների և նախաձեռնությունների իրականացման պլանավորման ուղղությամբ ակտիվ աշխատում են, իսկ հրավիրված փորձագետներն անհրաժեշտ հմտություններ են հաղորդում»,- տեղեկացնում է ծրագրի համակարգող Սոֆյա Պիրադյանը:

Մասնակիցները հնարավորություն են ունեցել ներկայացնել իրենց երկրներում երիտասարդական քաղաքականության վիճակը, պետության դերը երիտասարդների կյանքում, ինչպես նաև իրենց մասնակցությունը փոփոխվող հասարակության զարգացման գործում:

Համաշխարհային հայկական երիտասարդական ՈՍՏԱՅՆ-ը ծրագիրն իրականացնում է Եվրոպական երիտասարդական հիմնադրամի և ՀՀ երիտասարդության և սպորտի նախարարության ֆինանսական աջակցությամբ:
World Armenian Youth Network– Wostayn 2009 թ. Եվրախորհրդում ձեռք է բերել միջազգային կազմակերպության կարգավիճակ` միավորելով հայկական երիտասարդական 12 կազմակերպություն` Հայաստանից, Վրաստանից, Ռուսաստանից, Ուկրաինայից, Էստոնիայից, Նիդեռլանդներից, Գերմանիայից և Ֆրանսիայից: «Ոստայնի» նպատակն է աջակցել և նպաստել Սփյուռքի հայ համայնքներում հայապահպան գործունեությանը, երիտասարդության ոլորտում Հայրենիք-Սփյուռք գործակցության զարգացմանն ու ամրապնդմանը, մասնակցել ազգային և միջազգային երիտասարդական ծրագրերի մշակմանն ու իրականացմանը: