«Մենք այսօր նաև հանցագործ ենք արտադրում: Գիտեմ, որ նախարարը չպետք է նման բաներ ասի, բայց ասում եմ… ես կարծում եմ, որ պետք է փոխել քրեակատարողական հիմնարկների փիլիսոփայությունը»,-այսօր «Սիվիլիթաս» հիմնադարամի կազմակերպած քննարկման ժամանակ ասաց Արդարադատության նախարար Հրայր Թովմասյան` անդրադառնալով քրեակատարողական հիմնարկներում տիրող իրավիճակին:

Նախարարը  նշեց, որ երեք-հինգ տարի ՔԿՀ-ում գտնվող անձը այնտեղից դուրս գալով՝ աշխատանք չի գտնում, քանի որ կրում է «նստած-հելածի» պիտակը, չի կարողանում ինտեգրվել հասարակությանը, ընտանիքի հետ խնդիրներ է ունենում և ի վերջո կրկին հայտնվում է քրեակատարողական հիմնարկում:

Իր խոսքում նախարարը նշեց , որ ինքը ցանկանում է ՔԿՀ-ների խնդրի համակարգային լուծում գտնել՝ չքննադատելով նախորդ նախարարներին. «Ասում են՝ հին ավելը շատ փոշի ա հանում… Ուզում եմ հասկանալ խնդիրները, ու գտնել դրանց լուծումները, ստեղծել այնպիսի համակարգ, որը` որ նախարարն էլ գա, չի կարողանալու փոխել»,- ասաց նա: Թովմասյանի խոսքով՝ ինքն այս հարցում ևս որոնումների մեջ է և դեռևս պատրաստի լուծումներ չունի գրպանում, բայց ձգտում է համակարգային լուծման:

Այն հարցին թե  որքանո՞վ է իրավական տեսանկյունից հնարավոր իրականացնել արտահերթ ընտրություններ, ինչպես պահանջում է Հայ ազգային կոնգրեսը նախարարը պատասխանեց. «Արտահերթ խորհրդարանական ընտրություններին նա ասաց,  որ այն  անցկացնելու իրավական ճանապարհ այսօր գոյություն չունի»,-ասաց Հրայր Թովմասյանը:

Նախարարի խոսքով՝ այսօր Հայաստանի խորհրդարանի լուծարման բացարձակ իրավունք այլևս գոյություն չունի: Ըստ նրա՝ եթե նախկինում նախագահը կարող էր անգամ քաղաքական նկատառումներով լուծարել խորհրդարանը, ապա հիմա՝ 2005թ. ընդունված Սահմանադրությամբ, հստակ սահմանված են այն հիմքերը, երբ կարող է լուծարվել խորհրդարանը:

Թովմասյանն ընդգծեց, որ այսօր Սահմանադրությամբ արտահերթ ընտրությունների անցկացման համար սահմանված հիմքերից որևէ մեկը գոյություն չունի. «Ուստի խորհուրդ կտայի մինչև պահանջ դնելը նայել, թե որքանով են դրանք Սահմանադրությունից բխում»,- ասաց նախարարը:

Շուշան Գալստյան