Ռուսաստանի Դաշնության նախագահ Վլադիմիր Պուտինն այսօր Մոսկվայում հանդիպում է ունեցել իր հայ գործընկեր Սերժ Սարգսյանի հետ, հայտնում է Радио Голос России-ն՝ հաղորդելով հանդիպման մանրամասները: Նշվում է, որ Պուտինը ևս մեկ անգամ շնորհավորել է Սերժ Սարգսյանին փետրվարի 18-ին կայացած նախագահական ընտրություններում համոզիչ հաղթանակի կապակցությամբ:

«Դա համոզիչ հաղթանակ է, որը խոսում է ժողովրդի վստահության մասին և Ձեզ հնարավորություն է տալիս իրականացնել այն ծրագրերը, որոնք դրել էիք Ձեր առաջ նախընտրական քարոզարշավի ժամանակ»,- ասել է Պուտինը:

Շնորհակալություն հայտնելով՝ Սերժ Սարգսյանն ընտրություններից հետո իր առաջին արտասահմանյան այցը Ռուսաստան օրինաչափ է համարել:

«Ռուսաստանը մեր ռազմավարական գործընկերն է, և դրանով ամեն ինչ ասված է», — ընդգծել է ՀՀ նախագահը:

Ըստ աղբյուրի՝ Սերժ Սարգսյանը ռուս գործընկերոջը հրավիրել է պետական այցով լինել Հայաստանում:

Ինչպես հայտնում է РИА Новости-ն, երկու երկրների նախագահները քննարկել են հայ-ռուսական հարաբերություններին առնչվող հարցեր և արձանագրել դրանց դրական զարգացումը:

«Մեր հարաբերությունները բարեհաջող են զարգանում, չնայած համաշխարհային տնտեսությունում առկա բարդություններին: Ռուսաստանը վստահորեն շարունակում է պահպանել առաջատարությունը Հայաստանի արտաքին տնտեսական գործընկերների ցուցակում, ինչպես նաև՝ կուտակված ներդրումների ծավալով (3 մլրդ դոլար — РИА Новости)», — նշել է Պուտինը՝ ընդգծելով, որ անցած տարի ապրանքաշրջանառությունն աճել է 20 տոկոսով՝ գերազանցելով 1,2 մլրդ ԱՄՆ դոլարը:

«Ռուսաստանում շատ հայեր են ապրում, նրանք շատ պարկեշտ են, մեր երկրի աշխատող քաղաքացիներն են, և դա լրացուցիչ պոտենցիալ է, որը միավորում է մեզ», — նշել է ՌԴ նախագահը:

Սերժ Սարգսյանն ընդգծել է ռազմական համագործակցության ոլորտում առաջընթացը՝ նշելով, որ Երևանում բարձր են գնահատել այն փաստը, որ ՌԴ պաշտպանության նախարարը Հայաստան էր այցելել Հայոց բանակի օրը:

Նույն առիթով РИА Новости-ն հայտնում է, որ Սերժ Սարգսյանն ընդգծել է «բացառիկ արդյունքները՝ քաղաքականության, տնտեսության, ռազմական համագործակցության ոլորտներում, հումանիտար և ինտեգրման գործընթացներում»:

«Համաձայն եմ, որ առաջընթաց կա նաև տնտեսության մեջ: Մենք ակնկալում ենք Ռուսաստանի օգնությունն ու աջակցությունը», — նշել է ՀՀ նախագահը:

Tert.am