ՀՀ կառավարությունն այսօրվա նիստում մերժել է Արմավիրի քաղաքապետ Ռուբեն Խլղաթյանի հրաժարականի դիմումը:

Կառավարությունը, հիմք ընդունելով այն հանգամանքը, որ Արմավիրի քաղաքապետն ընտրվել է իր պաշտոնում 2011 թ.-ի մարտի 20-ին (դեռևս չի լրացել նրա պաշտոնավարման սահմանված ժամկետի կեսը), հետևաբար, ունի ստանձնած պարտավորություններ և ներգրավված է տարբեր համայնքային (և ոչ միայն) ծրագրերում: Նպատակ ունենալով ապահովել համայնքի աշխատանքների բնականոն շարունակականությունը՝ աշխատանքային կարգով ճշտվել են դիմում ներկայացնելու դրդապատճառները, արդյունքները համադրվել են դիմումը ներկայացնելուց հետո քաղաքապետի կողմից արված հրապարակային հայտարարությունների հետ, ինչի արդյունքում կառավարությունը եկել է այն եզրահանգման, որ հրաժարական տալու դրդապատճառները չեն թղթակցվում վերջինիս պաշտոնեական պարտականությունների և համայնքի ղեկավարի լիազորությունների հետ:

Նշենք, որ Շիրակի մարզպետ Աշոտ Գիզիրյանն արդեն ազատվել է զբաղեցրած պաշտոնից:

ՀՀ կառավարությունը այսօրվա նիստում ղեկավարվելով Սահմանադրության 88.1-ին հոդվածով և հիմք ընդունելով Հայաստանի Հանրապետության Նախագահի 1997 թ. մայիսի 6-ի ՆՀ-728 հրամանագրի 1.7-րդ կետը՝ հաստատել է Աշոտ Գիզիրյանի հրաժարականի դիմումը: