Փետրվարի 18-ին ՀՀ-ում կայացած նախագահի ընտրությունները այսօր լրագրողների հետ հանդիպմանը «Սարդարապատ» շարժման անդամ Ժիրայր Սեֆիլյանը որակեց չընտրություններ. այնպիսիք՝ ինչպիսին, ըստ նրա, տեղի են ունեցել ՀՀ-ում մինչ օրս:

Նա նշեց, որ հավատում է Րաֆֆի Հովհաննիսյանի անկեղծությանը, և մինչ օրս նա հայ ժողովրդի այլընտրանքն է:

«Մեր նպատակը մեկն է՝ նոր որակի պետության ստեղծում, ռադիկալ փոփոխություններով հասնելու մեր երազած Հայաստանին: Համոզված եմ, որ պայքարի այս ձևով մենք կխուսափենք նոր մարտի 1-ից ու կունենանք արդյունք»,-ասաց նա:

Շուշիի առանձնակի գումարտակի հրամանատարը Հայաստանի ներքաղաքական կյանքում ստեղծված իրավիճակից դուրս գալու համար, անհրաժեշտ է համարում լուծել կարևորագույն հինգ խնդիր.«1-ին՝ հստակ ձևակերպել մեր պատկերացրած երկրի տեսլականը ու դրան հասնելու ծրագիր մշակել:

2-րդ՝ մեկտեղել, հնարավորինս համախմբել հայության մտավոր, գաղափարական մարդկանց ներուժը՝ լինի Հայաստանում, թե արտերկրում:

3-րդ՝ քաղաքական սերնդափոխություն, բայց նկատի չունեմ տարիքային մասը, այլ որակական մասը:

4-րդ՝ վերջապես, կարողանանք ձևավորել կոլեգիալ որոշումներով առաջնորդվելու սկզբունքը:

5-րդ՝ գտնել այն մեխանիզմը, որը պետք է կանխարգելի այն երկվությունը, ըստ որի հեղափոխությունը իրականացնում են ռոմանտիկները»:

Ըստ Սեֆիլյանի այս խնդիրների լուծումը «Սարդարապատ» շարժումն ու Նախախորհրդարանը տեսնում են ոչ ուշ ապագայում՝ ընդամենը ամիսներ հետո:
«Բովանդակային առումով սա դառնալու է Հայաստանի վերածննդի իմաստը»,- ասաց նա: