Շիրակի մարզպետ Աշոտ Գիզիրյանը պաշտոնից ազատվելու դիմում է ներկայացրել: Ինքը՝ մարզպետը, «Առաջին լրատվական»-ի հետ հեռախոսազրույցում չի հերքել այդ լուրը և ասել է. «Պայմանավորվենք՝ երբ դիմումը հրապարակվի, կիմանաք: Առյաժմ ոչ մի բան չկա»:

Հիշեցնենք, որ փետրվարի 18-ի նախագահական ընտրություններին Սերժ Սարգսյանը խայտառակ պարտություն է կրել Գյումրիում՝ ստանալով ընդամենը 3033 ձայն: Իսկ երեկ ԱԺ նախագահ Հովիկ Աբրահամյանը, պատասխանելով մեր թղթակցի հարցին, թե հնարավո՞ր է՝ նման բնակավայրերի համայնքապետերը կամ մարզպետերը պատասխանատվության ենթարկվեն, ասել էր. «Հնարավոր է ամեն ինչ: Մենք ըստ աշխատանքի պետք է գնահատենք»: Եվ չի բացառվում, որ առաջիկայում Ա. Գիզիրյանին հետևեն այլ պաշտոնյաների հրաժարականի դիմումներ:

Ավելացնենք, նաև, որ Ս. Սարգսյանը ընտրություններին պարտություն է կրել գրեթե բոլոր խոշոր համայնքներում՝ Վանաձորում, Հրազդանում, Դիլիջանում, Նոյեմբերյանում, Եղեգնաձորում, Արթիկում և այլուր: Իսկ երեկ Վանաձորի քաղաքապետը, անդրադառնալով իր քաղաքում Ս. Սարգսյանի պարտությանը, ասել էր, թե՝ «Դա մեր առաջնորդի պարտությունը չէր, դա մեր ժողովրդի անգիտակից լինելն էր, որ ժողովուրդը ինքը չի հասկանում’ ինչ է անում»: Եվ այդ արտահայտության համար վանաձորցիները քաղաքապետից պահանջում են ներողություն խնդրել:

Հիշեցնենք, որ Վանաձորում էլ Ս. Սարգսյանը ստացել է ընդամենը 5400 ձայն: