Այն, որ քրեական  մաֆիայի ամենահայտնի դեմքի, կամ, այլ կերպ ասած, քրեական աշխարհի կնքահայր`Դեդ Հասանի՝ Ասլան Ուսոյանի  սպանությունից հետո, հանցավոր աշխարհում  նոր քաոսային իրավիճակ էր տիրելու, դրանում համոզված էին   շատերը:  Կանխատեսելի էր նաև այն հանգամանքը, որ Դեդ Հասանի սպանությունից հետո  կրիմինալ աշխարհում փորձելու էին գլուխ բարձրացնել   հանցավոր աշխարհի հին ու նոր դեմքերը, որոնց միջև կլանային լուրջ պատերազմ է ընթանալու`թեկուզ   իրար ոտքի տակ փորելու  ու  իրար  «ուտելու»  մակարդակով:

Ի դեպ, այս առթիվ, օրերս որոշակի դիտարկումներ էր արել քրեագետ  Սերգեյ Գալոյանը, նշելով. «Կրիմինալ աշխարհում, եթե մի կողմը  պարտվում է, մյուս կողմը սկսում է դիմել զենքին, իսկ հաղթող կողմն էլ, իր ձեռքբերումները  պահում է զենքի միջոցով: Այնպես, որ արյունահեղության նոր դրսևորումներ  կլինեն»:

Քրեագետը չէր բացառել, որ քրեական հեղինակությունների սպանություններըը կդառնա  նոր վերադասավորումների  ու  նոր կլանային բախումների պատճառ, ինչից զերծ չեն մնա հատկապես  հայ ազգի ներկայացուցիչները: Թեև ըստ Գալոյանի. «Հայկական  կրիմինալ աշխարհի  ներկայացուցիչներ  համարյա   չունենք Հայաստանում: Հիմնական հզորները Ռուսաստանում են»:

Այն օրից, ինչ Դեդ Հասանը գլուխը վայր դրեց, ՌԴ-ի տարածքում  հայկական քրեական աշխարհի ներկայացուցիչների դեմ  վհուկների որս է սկսվել, որից, մեր ունեցած տեղեկությունների համաձայն,  այս օրերին զերծ չի մնում  նաև  Դեդ Հասանի կլանին մոտ կանգնած  հայազգի ներկայացուցիչ, Արտյոմ Սարատովսկին:

Վերջինիս  առաջխաղացումը քրեական աշխարհում  հատկապես խիստ անհանգստացնում է  Սարատովի հնագույն գողերից մեկին`Թենգիզ   Օզմանովին, որը գողական աշխարհում առավել հայտնի է  «Դաթո Կուադլա»  մականունով:

Բանն այն  է, որ  Հասանի   մահից հետո, Դաթոն փորձում վետո դնել  հայազգի քրեական աշխարհի ներկայացուցիչների վրա՝ այդ կերպ փորձելով  իր տիտղոսը ամուր պահել ու որևէ կերպ դիրքերը  չզիջել:

Դաթո Կուադլան, ըստ համացանցում եղած ինֆորմացիայի, սերտորեն կապված է իրավապահ համակարգի հետ. նա այն մարդն է, որ երբ  ՀՀ-ի գողերից մի քանիսը` Լենինականցի Սուրոն, ԶԱՊ-ը, Վանիկը Տեր-Պողոսյան, Կառկենը`Բիձեն, Թեմուրը Սարատովից և այլոք  որոշել են օրենքով գող կարգել, կամ այլ կերպ ասած թագադրել  հայազգի ներկայացուցիչ Արտյոմ Սարատովսկունն, դեմ է կանգնել:

Մեր ունեցած տեղեկությունների համաձայն , հայազգի գողականների «սխոդկան» օրեր առաջ տեղի է ունեցել  ՀՀ-ի սահմաններից  դուրս, որի ժամանակ էլ Արտյոմ Սարատովսկու  թագադրմանը առանց հիմնավոր պատճառների ու փաստացի կոմպրոմատների փորձել է խանգարել նույն Դաթո  Կուադլան, ասելով, որ   Արտյոմին գող կարգվելու դեպքում նշանակում է  իրեն սաղ-սաղ թաղում են, և որ ինքը չի կարող այդ բանը հանդուրժել:

Նույն լուրերի   համաձայն, երբ Կուադլայից ՀՀ-ի գողերը փորձել են ճշտել, թե ինչի հիման վրա է նա իրեն այդ կերպ դրսևորում, և որն է պատճառը, որ չի համաձայնում ախպերության որոշման հետ, վերջինս առանց հիմքերի ու ասելիքի բացակայության ընդամնեը հավելել է, որ  դա իր համար ուղղակի վերջը կլինի:  Ու  թերևս  սա է եղել այն հիմնական պատճառը, որ  Դաթոն բանեցրել է իրավապահների շրջանում ունեցած իր կապերը`թույլ չտալով  Արտյոմ Սարատովսկու ապահով մուտքը դեպի Սարատով:

Հասկանալի է, որ  քրեական աշխարհում  տեղի ունեցող վերադասավորումներն ու դերաբաշխումները,  միշտ չէ, որ ցանակալի հունով են գնում ու խաղաղ ավարտ են ունենում, իսկ  թե ինչո՞ւ  Է այս խաղի կանոններով առաջնորդվում Դաթո Կուադլան, անհասկանալի է:

Իսկ թե քրեական աշխարհի ու մաֆիոզ  կայսրության տիրույթում ինչ նոր պայթյուններ ու սրեր կճոճվեն կփորձենք խոսել առաջիկայում:

Ա. Վարդանյան