Անցեալ Կիրակի օր Լոս Անճելըսի հայ համայնքի մէկ կարեւոր մասը ներկայացնող շրջանակ մը պատեհութիւնը ունեցաւ անմիջականօրէն տեսնելու Հայաստանի կառավարութեան գլուխը կանգնած անձի մը՝ վարչապետ Տիգրան Սարգսեանի «դիւանագիտական» ճարտարութիւնը, որուն շնորհիւ՝ ան փորձեց խուսանաւել ամէնէն ցաւոտ հարցադրումներէն:

Նախ՝ հանդիպման մասին: Հայաստանի վարչապետը պիտի այցելէր շրջանս եւ բնական է, որ հայրենիքի առօրեայով տագնապող մեր համայնքի անդամները պիտի ուզէին հանդիպիլ անոր, պիտի ուզէին անոր տալ զիրենք յուզող հարցեր՝ ակնկալելով ստանալ անկեղծ ու ճշմարիտ պատասխաններ:

Հանդիպումը կայացաւ, քաղաքավարական ողջոյնները փոխանակուեցան. առաջին իսկ վայրկեանէն, հրաւիրողները՝ յանձինս ՀՅԴ Արեւմտեան Ամերիկայի Կեդրոնական կոմիտէի ներկայացուցիչին, յստակացուցին, թէ այս հանդիպումը արարողակարգային պէտք չէ նկատուի, այլ առիթ՝ արտայայտելու մեր մտահոգութիւնները Հայաստանի ներքին խնդիրներուն մասին: Այդպէս ալ եղաւ: Ողջոյններուն յաջորդեցին հարցումներ, որոնք շօշափեցին Հայաստանի քաղաքական, տնտեսական եւ ընկերային խնդիրներ՝ սկսեալ իրաւական համակարգին մէջ տիրող անարդարութիւններէն մինչեւ պետական համակարգին մէջ առկայ այլ թերութիւնները, մինչեւ Հայ-թրքական արձանագրութիւններու յամեցող սպառնալիքը, մինչեւ արտագաղթի տագնապալի ծաւալները, մինչեւ սուրիահայութեան ցոյց տրուող աջակցութեան անբաւարարութիւնը:

Վարչապետը բոլոր հարցումներուն պատասխանեց առանց աճապարանքի, սակայն, դժուար թէ այդ հանդիպումէն ոեւէ մէկը դուրս եկած ըլլայ բաւարարուած կամ գոհացած: Վարչապետին ամէնէն ճարպիկ պատասխանները անոնք էին, ուր ան կ՛ընդունէր առկայ թերութիւնները, եւ պետական միջոցներու սահմանափակութեան վերագրելով զանոնք՝ կոչ կ՛ուղղէր միասին աշխատելու եւ միասին վերացնելու զանոնք:

Կաշառակերութեան ու արդարադատութեան մէջ տիրող անօրինականութեանց անդրադառնալով՝ վարչապետը ներկայացուց կառավարութեան ձեռք առած միջոցները, որոնց շարքին՝ պետական բարձրագոյն պաշտօնեաներու եկամուտներու յայտարարագիրներու պարտաւորութիւնը, պետական համակարգի երեք ոլորտներուն մէջ ձեռնարկուած միջոցները, եւ այլն: Մենք մեր կարելին կ՛ընենք, սակայն այդ կարելին անբաւարար է վերջնականապէս բարելաւելու վիճակը. այս էր պատասխաններուն փոխանցած պատգամը:

Հանդիպման ձեւաչափը այնպիսի չէր, որ բանավէճի հնարաւորութիւն ըլլար: Այսուհանդերձ, վստահ ենք, որ վարչապետը հանդիպման վայրէն հեռացաւ՝ գիտակցելով, որ հաւաքուածներուն համար կառավարութեան ջանքերը՝ մեր հայրենիքին մէջ արդար հասարակարգ ստեղծելու համար, ո՛չ միայն անբաւարար էին, այլեւ՝ միայն ձեւական:

«ԱՍՊԱՐԷԶ»