Այսօր լրագրողների հետ հանդիպմանը Հայաստանում Gallup International Association–ի հայկական գրասենյակի տնօրեն Արամ Նավասարդյանը տեղեկացրեց, որ Հայաստանում Gallup International Association-ի հայաստանյան գրասենյակը նախագահական ընտրություններից առաջ Հայաստանի ամբողջ տարածքում հոկտեմբերի 9-ից 20-ը 1067 քաղաքացիների շրջանում անցկացրել է սոցհարցում և պարզել, որ եթե առաջիկա կիրակի օրը նախագահական ընտրություններ անկացվեին, ապա կընտրվեր գործող նախագահ Սերժ Սարգսյանը:

Հարցին, եթե առաջիկա կիրակի նախագահական ընտրություններ լինեին, ում կընտրեիք՝ 28%-ն ասել է, որ գործող նախագահ Սերժ Սարգսյանին, 19%-ը «Բարգավաճ Հայաստան» կուսակցության ղեկավար Գագիկ Ծառուկյանին, 11%-ը ՀՀ երկրորդ նախագահ Ռոբերտ Քոչարյանին։

Հարցվածների 11%-ը նշել է, որ ոչ մեկին էլ չի ընտրի։ Հաջորդ հորիզոնականում «Ժառանգություն» կուսակցության առաջնորդ Րաֆֆի Հովհաննիսյանն է 4%–ով։ Նրան հաջորդում է ՀՀ առաջին նախագահ Լևոն Տեր-Պետրոսյանը՝ 3%-ով։ Հարցվածների նույնքան մասն էլ ասել է, որ կընտրեր ՀՀ նախկին արտգործնախարար Վարդան Օսկանյանին:

«Հայ Յեղափոխական Դաշնակցության» պատգամավոր Վահան Հովհաննիսյանի և «Օրինաց Երկիր» կուսակցության ղեկավար Արթուր Բաղդասարյանին վստահողների թիվը հավասար է՝ 1%:

Հարցին դժվարացել են պատասխանել հարցվածների 16%-ը:

Միաժամանակ հարցին, թե ինչպես են գնահատում նույն քաղաքացիները երկրի տնտեսական վիճակը՝ հարցվողների 22%-ը նշել է, որ «շատ վատ», 31%-ը՝ «վատ», 39%-ը՝ «միջին», 5%–ը՝ «լավ», իսկ 0,5%-ը՝ «շատ լավ»:

Իսկ թե ինչպես է ընտանիքի նյութական ապահովվածության ներկայիս վիճակը, ըստ հարցվածների՝ 63%-ը գնահատել է «միջին», 23%–ը՝ «վատ», 9%–ը՝ «շատ վատ», 5%–ը՝ «լավ», 0,2%–ը՝ «շատ լավ»։ Հարցին դժվարացել է պատասխանել հարցվածների 15%-ը:

Ըստ վարսկանիշների՝ քաղաքական գործիչներից ամենահեղինակավորը կրկին Սերժ Սարգսյանն է (32%), այնուհետև Գագիկ Ծառուկյանը ( 29%), Ռոբերտ Քոչարայանը (9%), Րաֆֆի Հովհաննիսյանը (4%), Վարդան Օսկանյանը (3%), Լևոն Տեր-Պետրոսյանը (3%), Վահան Հովհաննիսյանի ու Արթուր Բաղդասարյանի վարկանիշները նույնպես հավասար են՝ 2%: