Խանջյան 20 հասցեում՝ Օղակաձև զբոսայգում, կիսակառույցի փլուզման հետևանքով տուժածներից մեկի վիճակը դեռևս գնահատվում է ծանր, քանի որ նա ունի բազմակի կոտրվածքներ և գլխուղեղի փոքր ծավալի հեմատոմա. Tert.am-ին հայտնեցին Առողջապահության նախարարության մամուլի բաժնից:

Ըստ տեղեկատվության՝ մնացած 8-ի վիճակը գնահատվում է միջին ծանրության։ Տուժածներից 7-ն այսօր վերակենդանացման բաժանմունքից կտեղափոխվեն համապատասխան բաժանմունքներ:

Հիշեցնենք, որ երեկ Օղակաձև այգում կիսակառույց շինության փլուզման հետևանքով 9 մարդ էր հոսպիտալացվել։

Իսկ Սասնա Ծռեր փողոցի թիվ 2 հասցեում գտնվող նորակառույց շենքի վերելակի ընկնելու հետևանքով երկու տուժածների վիճակը «Արմենիա» բժշկական կենտրոնի մասնագետները գնահատում են ծանր։ Երկուսն էլ գիտակցություն ունեն։ Նրանցից մեկին, ում մոտ ախտորոշվել է գլխուղեղի ցնցում և սալջարդ, կողոսկրերի կոտրվածքներ` այսօր կվիրահատեն, քանի որ վնասվել է փայծաղը։

Երկրորդ տուժածի մոտ ախտորոշվել է սուր գանգուղեղային վնասվածք, գլխուղեղի սալջարդ, սուր շնչառական անբավարարություն։

Հիշեցնենք, որ վերելակի վթարի հետևանքով նաև երկու մարդ մահացել էր։