Այսօր լրագրողների հետ հանդիպման ժամաանակ ռազմական փորձագետ Դավիթ Ջամալյանը կարծիք է հայտնել, որ Ադրբեջանի ռազմաքաղաքական հայտարարությունների տոնայնությունը փոխվել է. «Նրանց հայտարարության մեջ մի տեսակ այն ագրեսիվ տոնայնությունը իր տեղը զիջել է պաշտպանվելու և հայկական կողմի հնարավոր հարվածների մթնոլորտը ցրելուն: Իսկ դա նշանակում է, որ նրանք գիտակցում են, որ դիմացինը, ուրեմն, իրենից ուժ ներկայացնում է, երբ խոսք է գնում տնտեսական ենթակառուցվածքները վերացնելու մասին, որը ոչ թե մերկապարանոց հայտարարություն է, այլ ռեալ»,- ասել է ռազմական փորձագետը՝ ներկայացնելով նաև  այսօր Արցախում մեկնարկած զորավարժությունների հետ կապված մանրամասներ։

Ըստ Դավիթ Ջամալյանի, առաջիկա երեք ամիսների ընթացքում ՀՀ զինված ուժերի կողմից ակտիվ զորավարժություններ անցակցնելու հերթական փուլն է. «Մի բան է ասել բանակը մարտունակ է, մի այլ բան, երբ առարկայական ես ապացուցում քո ուժը: Սրանք կայունություն և խաղաղություն պարտադրող միջոցառումներ են և բարոյահոգեբանական տեսանկյունից՝ հիմնարար ապահովություն ստեղծելու միտում, որպեսզի ժողովուրդը տեսնի, որ կա բանակ, որն ընդունակ է իրեն պաշտպանելու»,- ասել է  ռազմական փորձագետը:
Դավիթ Ջամալյանը համոզված է, որ այս զորավարժությունները չեն խոսում հնարավոր պատերազմի մասին. «Մեծ վտանգ չի պարունակում, ուղղակի քայլեր են կանխելու վտանգները»,- ասաց նա:
Իսկ ռազմական տեսանկյունից, ըստ նրա, զորավարժությունները թույլ կտան անձնակազմին հմտություններ ձեռք բերել և պաշտպանության բանակի մարտունակությունը ամրապնդել: