«Տաղանդավոր Սերունդ» մանկապատանեկան, երիտասարդական հասարակական կազմակերպության  նախագահ Միքայել Մարգարյանը, այսօր լրագրողների հետ հանդիպման ժամանակ հայտարարել է, որ  «Տաղանդավոր Սերունդ» ՀԿ-ն Հայաստանի Հանրային հեռուստաընկերությունից պահանջում է հրատապ կերպով չեղյալ հայտարարել «Մանկական եվրատեսիլ 2012» հայաստանյան մրցույթի արդյունքները և կազմակերպել նոր ընտրություն` ժյուրիի բաց քվեարկությամբ:

Հիշենցնեք, որ  սեպտեմբերի 30-ին կայացավ «Մանկական Եվրատեսիլ 2012» մրցույթի հայաստանյան եզրափակիչ փուլը և ժյուրիի ու կարճ հաղորդագրությունների միջոցով քվեարկությունների արդյունքում հաղթող ճանաչվեց Compass Band-ը` իր Sweetie Baby երգով:  Քվեարկությունից օրեր անց հայտնի դարձավ, որ խմբի մասնակիցներից մեկը 9 տարեկան է, սակայն մրցույթին կարող են մասնակցել միայն 10-ից 15 տարեկան երեխաները:

Իսկ երեկ Հանրային հեռուստաընկերության «Եվրատեսիլ» նախագծի պատասխանատու Գոհար Գասպարյանը հայտարարեց, որ խմբի հիմնական մասը կազմված է 4 հոգուց և բոլորն էլ 13 տարեկան են:

ՀԿ-ի նախագահի խոսքով, Հանրային հեռուստաընկերությունը նախապես հայտարարել էր, որ մրցույթի հեռարձակումը կլինի ժամը 19:30-ին, այնինչ սկսվեց 19:00-ին:

«Մարդիկ հնարավորություն չեն ունեցել դիտելու մոտ 7-8 երեխայի, բնականաբար նրանք կորցրել են իրենց հնարավոր ձայները: Պահանջում ենք նաև քաղաքացիներին փոխհատուցել կարճ հաղորդագրությունների վրա ապարդյուն ծախսված գումարները»,– ասել է Միքայել Մարգարյանը և ավելացրել, որ իրենք պահանջում ենք պատժել Հայաստանի Հանրային հեռուստաընկերության  ղեկավար կազմին` զբաղեցրած պաշտոններում պարտականությունները լավ չկատարելու, օրինազանցություններ թույլ տալու, երեխաներին հոգեբարոյական վնաս հասցնելու, մանուկների բարոյական նորմերի  խեղաթյուրման մեղադրանքի հիման վրա:

«Մենք չենք ուզում դիմել եվրոպական ատյաններին և ցանկանում ենք հարցը լուծել Հայաստանում: Բայց եթե այսպես շարունակվի, Հայաստանը կգնա որակազրկվելու ուղղությամբ»,- նշել է նա:

Կազմակերպությունը խախտումների մասին նամակ է ուղարկել ՀՀ նախագահին, վարչապետին, ԱԺ նախագահին, ՀՀ մշակույթի նախարարությանն ու այլուր։