Սիրիայի ազատ բանակի ամենաուժեղ թևը համարվող Լիվա ալ Թևհիթ խմբավորումը կարողացել է Հալեպ 300 հոգանոց  ջոկատ մտցնել: Այս մասին հայտարարել է հենց խմբավորումը:

Խումբն օգնելու է արդեն շուրջ մեկ շաբաթ կառավարական զորքերի դեմ պայքարող ընդդիմադիր զինյալներին:

Թուրքական Haber 7 կայքի փոխանցմամբ, խումբը նախ նամազ է արել, ապա երդվել ու մտել Հալեպ:

Յուսուֆ Սաբահ էբու Սելմոն, որը  խմբի ղեկավարներից է, տեղեկացրել է, որ իրենց նպատակը շարունակում է մնալ Ասադի տապալումը:

«Մենք այդ ուժն ունենք, սակայն վախենում ենք վնասել Հալեպի խաղաղ բնակչությանը, դրա համար մեր ողջ ուժը չենք ցուցադրում: Սակայն ամեն դեպքում մենք գրավելու ենք Հալեպը: Ասադի զինվորներին մաքրելու ենք այնտեղից: Նրա անկումից հետո քաղաքացիական և իսլամական պետություն ենք ձևավորելու»,-նշել է նա:

Երեկ գիշեր Հալեպում շարունակվել են ռազմական լայնածավալ գործողությունները: Ըստ ականատեսների` տանկերը և ռազմական ուղղաթիռները շարունակում են ռմբակոծել քաղաքի որոշ թաղամասեր:

Սիրիայի պետական լրատվամիջոցների խոսքով, կառավարական ուժերին հաջողվել է վերականգնել հսկողությունը Սալահեդդին թաղամասում, սակայն ընդդիմությունը շարունակում է պնդել, որ թաղամասի վերահսկողությունն իրենց ձեռքում է:

Սախուր թաղամասում նույնպես ընթանում են  կատաղի մարտերը: Տեղեկություններ են տարածվել այն մասին, որ կառավարական զորքերը հերթական մեծ գործողությունն են նախապատրաստում` այս շրջանից զինյալ ընդդիմադիրներին «մաքրելու» համար: