Այսօր՝ հուլիսի 26-ին ժամը 16.00-ի սահմաններում Նուբարաշենի թիվ 11 օժանդակ գիշերօթիկ դպրոցում արտակարգ պատահար է տեղի ունեցել: Ոստիկանության ահազանգ է ստացվել, որ նշված դպրոցում մահացած աղջիկ երեխա կա: Ըստ նախնական տեղեկությունների, տեղի է ունեցել ինքնասպանություն:

Ոստիկանությունը պարզել է, որ մահացածը նույն դպրոցի սան 15-ամյա Զինա Սիմոնյանն է:
Տեղեկությունների համաձայն, Զ. Սարգսյանը ծնունդով Արտաշատից է և օժանդակ դպրոց նրան տեղափոխել էր մայրը:

Արձակուրդների հետ կապված մայրը մի քանի օրով երեխային տարել էր տուն և միայն մի քանի օր առաջ նրան նորից բերել էր դպրոց:

Շատ հնարավոր է, որ երեխան իրեն ցած նետած լինի՝ (իհարկե եթե դա այդպես է) հենց այդ պատճառով: Հատուկ դպրոցի երեխաները տուն գնալուց հետո մեծ դժվարությամբ են հետ գալիս դպրոց: Քանի որ այստեղ հիմնականում մտավոր խնդիրներով երեխաներ են, նրանց դժվար է համոզել մնալ դպրոցում՝ նրանք անասելի կարոտում են տունն ու իրենց ծնողներին:
Պարզվել է, որ ցերեկային հանգստի և քնի ժամին երեխան դիմել է դաստիարակչուհի Հասմիկ Մխիթարյանին, որպեսզի գնա զուգարան: Տեսնելով, որ երեխան ուշանում է, դաստիարակչուհին մտել է զուգարան, որտեղ էլ տեսել է, որ պատուհանը բաց է, ինչից հետո էլ պարզվել է, որ երեխան իրեն ցած է նետել:

Քննությամբ պետք է պարզվի, տեղի ունեցածը ինքասպանություն է, թե մեկ այլ՝ դժբախտ պատահար: