Այսօր ՀՀ Վերաքննիչ քրեական դատարանում Սերգեյ Չիչոյանի նախագահությամբ պետք է լսվեր ամբաստանյալ Դավիթ Օսիպյանի գործը, որը մեղադրվում է 2010 թվականի նոյեմբերի 23 – 25ը ընկած ժամանակահատվածում Մերի Բարսեղյանին սեռական բռնության ենթարկելու մեջ: Սակայն նիստը հետաձգվեց` պաշտպանի` Վարդան Նիկողոսյանի  չներկայանալու պատճառով:

Ներկայացնենք գործի նախապատմությունը, նախորդ դատական նիստին մեզ պարզ դարձավ, որ Նորք Մարաշ առաջին ատյանի դատարանը մեղավոր էր ճանաչել Դավիթ Օսիպյանին և ըստ 131 հոդվածի 2-րդ մասի 4 –րդ կետով և 138 հոդվածի 2-րդ մասի 3 –րդ կետով նրան դատապարտել 7 տարի ազատազրկման:  Ինչ էր տեղի ունեցել. 2010 թ.  նոյեմբերի 23-ին  Մերի Բարսեղյանը և Օսիպյանը ծանոթացել են  <օդնոկլասնիկի> կայքի միջոցով,  գնացել են սրճարան: Մերի Բարսեղյանը, որը դեպքի ժամանակ դեռևս անչափահաս էր (17 տարեկան), զանգահարել է մորն ու խաբել` ասելով, թե հեռախոսն անջատված է, քանի որ մարտկոցը լիցքավորված չէ,որ  հանկարծ չանհանգստանա: Առանձնասենյակում, ըստ տուժած Բարսեղյանի, իր կամքին հակառակ Օսիպյանը սեռական բռնության է ենթարկել նրան:

Այնուհետև աղջիկը խնդրել է, իրեն տուն հասցնել . նստել են տաքսի և Օսիպյանը խաբեությամբ նրան տարել է «Էրզրում» հյուրանոցային համալիր` իբր աղջկան շոկային վիճակից հանելու, որ այդ վիճակով տուն չգնա, միասին սրճել են, ճաշել, հետո վերցրել են սենյակ և  ամբաստանյալը կրկին բռնաբարել է նրան:

2010 թվականի նոյեմբերի 24ին Օսիպյանը Նուբարաշենի հյուրանոցային համալիրում 3-րդ անգամ է բռնաբարել աղջկան:

Պարզելով որ ամբաստանյալը ամուսնացած է եղել, Բարսեղյաննները դիմել են իրավապահներին:

Մինչ կտեղեկացնեին նիստի հետաձգվելու մասին, միջանցքում զրուցեցինք  ամբաստանյալի մոր` Ասյա Օսիպյանի հետ, որի  կարծիքով Մերի Բարսեղյանն անհիմն մեղադրում է իր որդուն: «Ես անձամբ ճանաչել եմ աղջկան, նույնիսկ դեպքի օրը խնդրել եմ նրան իջնել մեքենայից և հանգիստ թողնել որդուս, քանի որ Դավիթս ամուսնացած էր, իսկ Մերին էլ անչափահաս էր: Դեպքից հետո ես և որդիս գնացինք Մերիենց տուն, և երբ աղջկա մայրը հարցրեց աղջկան, թե սիրում է արդյո՞ք Դավիթին, ուզում է կյանքը կապել նրա հետ, Մերին համաձայնեց և ասաց, որ շատ է սիրում Դավիթին: Մայրը բարկացավ, տարավ աղջկան սենյակ և սկսեց ծեծել, ես մտա սենյակ այն պահին, երբ Մերիի մայրն ու քույրը ջուր էին լցնում աղջկա վրա, իսկ Մերին ցավից լաց էր լինում: Հետո աղջիկը եկավ և ասաց, որ չի սիրում որդուս:  Աղջկա մայրն էլ սկսեց սպառնալ մեզ` ասելով, թե Դավիթին  կտա դատարան, և դատական պաշտոն ունեցող իր բարեկամի միջնորդությամբ  Դավիթը տարիներով «կփտի» բանտում: Մերին մասնագիտությամբ վարսահարդար է,  և նրան այլևս ոչ ոք աշխատանքի չի ընդունում: Բոլորն արդեն լավ գիտեն Մերիին, իսկ ինձ ու իմ տղաներին ( ես 5 տղա ունեմ)  լավ են ճանաչում ու գիտեն, որ այդ աղջիկն աչք է ունեցել իմ տղայի վրա»- պատմեց ամբաստանյալի մայրը:

Ա. Օսիպյանը նշեց, որ ինքը չի լռելու և պայքարելու է արդարության համար. եթե Վերաքննիչ դատարանը չբավարարեց իրենց բողոքը, հացադուլ հայտարարելով` նստացույց կանի նախագահի նստավայրի մոտ, այնուհետև կդիմի եվրոպական դատարան:

Հետաքրքիր է, որ Օսիպյանի գործին <Հայկական Վարկածի> մասնակցությունից հետո հավանաբար հրապարակայնությունից խուսափելու նկատառումով Դավիթ Օսիպյանի դատավարությունը այլևս ընթանալու է դռնփակ: