Երկօրյա այցով Հայաստանում գտնվող Ֆրանսիայի Սենատի պատվիրակության անդամները այսօր այցելել են Ծիծեռնակաբերդ, և ծաղիկներ դրել 1915թ. Հայոց մեծ եղեռնի հուշակոթողին, լռությամբ ու խոնարհումով հարգելով 1.5 անմեղ զոհերի հիշատակը։

ԱԺ հասարակայնության և տեղեկատվության միջոցների հետ կապերի վարչությունից տեղեկացնում են, որ սենատորներ Ֆիլիպ Մարինին, Սոֆի Ժուասենն ու Բեռնար Ֆուրնիեն եղել են նաև Հայոց ցեղասպանության թանգարան-ինստիտուտում, ծանոթացել Հայոց Մեծ եղեռնը հավաստող վավերագրերին ու փաստաթղթերին, դիտել ցուցանմուշները, ապա գրառում կատարել «Պատվո հյուրերի» հուշամատյանում։
«Ես այստեղ տեսա ցավ, կորուստ ու կոտորածներ, որոնց մասին պատմում են փաստաթղթերն ու վավերագրերը։ Մինչդեռ այսօր կան մարդիկ, ովքեր ժխտում են Ցեղասպանությունը, որի արհավիրքներից ծնվեցին երկրորդ աշխարհամարտի արհավիրքները»,– հուշամատյանում գրառել է Ֆիլիպ Մարինին։

Դատապարտելով 1915թ. Հայոց ցեղասպանությունը կազմակերպողներին` Ֆիլիպ Մարինին իր ելույթում նշել է. «Ֆրանսիայի խորհրդարանում ներկայացված քաղաքական ուժերը՝ և նախկին նախագահ Սարկոզիի, և նորընտիր նախագահ Օլանդի կողմնակիցները, հաշվի առնելով Ֆրանսիայի Սահմանադրական խորհրդի որոշման մեջ ամրագրված նախկին օրինագծի վերաբերյալ առարկությունները, երբ ձևավորվի Ֆրանսիայի նոր խորհրդարանը, կներկայացնեն նոր օրինագիծ, որն իրավական տեսակետից պետք է անառարկելի լինի։ Հիմնական նպատակն է օրենսդրորեն պատժել այն մարդկանց, ովքեր Ֆրանսիայի տարածքում կժխտեն Հայոց ցեղասպանությունը»։