ՊՆ նախկին աշխատակհց, «Նոր Եդեսիա» ջոկատի հրամանատար Գևորգ Հայրապետյանի փաստաբան Սեդա Սաֆարյանը երեկ հիմնավոր կասկած է հայտնել, որ իր պաշտպանյալին «փակելու» և կալանավայրում ճնշումներ կազմակերպելու հարցում շահագրգռված են ընդդիմության հայտնի գործիչներ, որոնց կապն իշխանության հետ Հայրապետյանը կարող է բացահայտել:
Դարաբաղյան պատերազմի հերոս Գևորգ Հայրապետյանը, որն անցյալ տարի հայրենիքի դավաճանության հոդվածով դատապարտվեց 12 տարվա ազատազրկման, հոգեբանական ճնշումների է ենթարկվում: Կան ուժեր, որոնք փորձում են ազատամարտիկին ինքնասպանության դրդել: Սա Հայրապետյանի շահերի պաշտպան Սեդա Սաֆարյանի կարծիքն է: Հայրապետյանն իրեն առաջադրված մեղադրանքը չի ընդունել և մտադիր է դիմել Եվրադատարան:
Չի բացառվում, որ պատերազմի հերոսի նկատմամբ նման վերաբերմունքը քաղաքական շարժառիթներ ունի և պայմանավորված է նրա ընդդիմադիր հայացքներով, Մարտի մեկին նախորդած հանրահավաքներին մասնակցությամբ: Բայց ինչո՞ւ այն, ինչ ներվեց հարյուրավոր, շատ ավելի ակտիվ ընդդիմադիրների, չի ներվում ազատամարտիկին: «Ես չեմ կարող հիմնավոր կապ տեսնել իմ կալանավորման և այդ երևույթների միջև»,- խոստովանել է Հայրապետյանն իր փաստաբանին: Սակայն նա կարծում է, որ իր կալանավորման և մեղադրանք առաջադրելու մեջ կա նաև ընդդիմադիր ուժերի դերը: Ըստ Սեդա Սաֆարյանի, Գևորգ Հայրապետյանը նամակներ է ուղղել որոշ մարդկանց: Այդ նամակագրության մեջ ընդդիմադիր գործիչների և իշխանության կապը փաստող որոշ տեղեկություններ կան: Խոսքը Կոնգրեսում բավականին տեսանելի անձանց մասին է, որոնք էլ նպաստել են Գևորգ Հայրապետյանին բանտ գցելուն: Սեդա Սաֆարյանը հրաժարվում է անուններ հրապարակել, սակայն վստահեցնում է` բացառված չէ, որ Գևորգ Հայրապետյանն առաջիկայում հրապարակի իր նամակներից մեկը: