Այսօր լրագրողների հետ հանդիպման ժամանակ  երգչուհի Շուշան Պետրոսյանը ասաց, որ  եթե իրեն առաջարկվեր Ազգային Ժողովում տեղ, նա կհամաձայնվեր` նշելով, թե  ինքը հասկացել է, որ այսքան տարիներ, անվերջ խոսելու փոխարեն պետք է նաև գործել. «Ես առաջին հիպի պատգամավորը կլինեի, որը շատ զիլ կլիներ: Ես միշտ կռիվ ունեմ և միշտ կողմ եմ մշակութային ներկայացվածությանը»,- ասաց նա:

Իսկ այն հարցին թե որ քաղաքական ուժի հետ կգնար, երգչուհին  պատասխանեց. «Պարզ չի՞»:

Պարզվեց, որ նա գաղափարապես հարում է Հանրապետական կուսակցությանը: «Կուզեի մաքրամաքուր խոսող ԱԺ, մտածող։ Ուզում եմ, որ մշակութային ներկայացվածություն լիներ»,-ասաց նա:

Ասուլիսն ներկա «Հրապարակ» թերթի գլխավոր խմբագիր Արմինե Օհանյանը սակայն, որին   ի տարբերություն երգչուհու, առաջարկներ եղել են,իրեն չի տեսնում խորհրդարանում. «Ուժերի մասին չնշեմ։ Իսկ չեմ համաձայնվում, քանի որ ես արդեն իսկ ինչ-որ կերպով քաղաքականությամբ զբաղվում եմ: Ես ինձ չեմ տեսնում այս խորհրդարանում: Խորհրդարան պիտի գնա նա, ով գիտի, որ իր գլխավոր աշխատանքը պետք է լինի օրենսդիր աշխատանքը և ոչ թե այն դիտարկի որպես հոբբի: Չպետք է այնտեղ խանութների ցանց ունեցող մարդիկ գնան»,-ասաց նա:

Ասուլիսին ներկա, մյուս բանախոս  երգչուհի, երգահան Լիլիթ Պիպոյանը ընդհանրապես իրեն ԱԺ-ում չի տեսնում, քանի որ մարդկանց ղեկավարել չի սիրում և իրեն ավելի հոգեհարազատ է մենակ ստեղծագործելը: