Ադրբեջանում Նախիջեւանյան կլանը սկսել է շանտաժի ենթարկել Իլհամ Ալիեւին: Տեղի մամուլը, որի արձագանքները նկատվում են նաև  ռուսական լրատվամիջոցներում, վկայակոչելով ներիշխանական հավաստի աղբյուրները, կլանի առաջին դեմքերին մեղադրում են Ադրբեջանի խորհրդարանի նախկին խոսնակ Ռասուլ Գուլիեւին քաղաքական ասպարեզ  մտցնելու փորձի համար:

Ոչ վաղ անցյալում Նախիջեւանյան կլանն, ըստ էության, վերջնագիր էր ներկայացրել Իլհամ Ալիեւին` պահանջելով, որ նա առաջադրի իր թեկնածությունն առաջիկա նախագահական ընտրություններում: Սակայն, երբ Իլհամ Ալիեւից համապատասխան արձագանք  չստացվեց, մինչ այժմ  նրա դիրքորոշումը չի հստակեցվել:

Սակայն լրատվամիջոցի աղբյուրը գտնում է, որ. «Դրա նպատակը բնավ էլ Իլհամ Ալիեւին այլըտրանք ստեղծելը չէ: Իրականում Նախիջեւանյան կլանը Իլհամ Ալիեւին փոխարինելու դեպքում առաջնությունը կտա կամ Մեհթիեւին կամ Հեյդարովին: Սակայն եթե նրանց անունները սկսեն շահարկվել նախագահի հավանական թեկնածուների ցուցակում, ապա վերջիններս լուրջ խնդիրների առջեւ կկանգնեն: Ըստ էության, հենց այդ պատճառով էլ նրանք սկսել են Ռասուլ Գուլիեւի միջոցով շանտաժի ենթարկել Իլհամ Ալիեւին»:

Նախիջեւանյան կլանը շարունակում է լրջորեն մտահոգվել եւ փորձում է լրացուցիչ քայլեր ձեռնարկել` դրդելով Իլհամ Ալիեւին վերջնական որոշում կայացնել` նախագահի թեկնածուի պաշտոնում առաջադրվելու համար:  Սակայն «Ալ-Ջազիրա» հեռուստաալիքին տված հարցազրույցի ժամանակ այն հարցին, թե պատրաստվո՞ւմ է առաջադրել իր թեկնածությունն առաջիկա նախագահական ընտրություններում, Իլհամ Ալիեւը պատասխանել է, թե հարցի կապակցությամբ դեռ որոշում չի ընդունել:

Սա նշանակում է, որ Ալիևը իրոք որոշման խնդիր ունի, քանի որ արևմուտքին հաճո է առաջի դեմքի մակարդակով Ադրբեջանում իշխանության ղեկին տեսնել Մեհրիբան Ալիեւային, իսկ իրեն վերապահված է նրան աջակցողի դերը: