Մարզերի բնակիչների բողոքի հիման վրա լրատվամիջոցները տարբեր հրապարակումներով անդրադարձել էին, Երևան-Գավառ-Երևան երթուղով ուղևորափոխադրում իրականացնող «Գավառտրանս» ընկերությանը, որը լիցենզիաների տրամադրման մրցույթում նշված երթուղու ուղետոմսի համար առաջարկել է 500 դրամ արժեք, շահել է մրցույթը, սակայն, փաստացի ուղևորափոխադրումներ է իրականացրել 1000 դրամով:

Հանձնաժողովը ուսումնասիրել է երթուղու գործունեությունը: Արդյունքում պարզվել է, որ «Գավառտրանս» ընկերությունը սպասարկում է ընդհանուր առմամբ 3 երթուղի՝ Երևան-Գավառ-Երևան (համար 303), Երևան-գ.Սարուխան-Երևան (hամար 313) և Գավառ-Երևան-Գավառ (համար 326): Ընդ որում, ընկերությունը պարտավորվել է 313 և 326 համարի երթուղիները սպասարկել 1000, իսկ Երևան-Գավառ-Երևան ուղղությունը՝ 500 դրամով, որն էլ ըստ էության հանդիսանում է բոլոր 3 երթուղիներից հիմնականը:
Հանձնաժողովը պարզել է, որ «Գավառտրանսը» ունի գերիշխող դիրք, քանի որ այն հանդիսանում է Գավառը և հարակից գյուղերը սպասարկող միակ երթուղին: Իր գործունեությամբ նա խոչընդոտել է առավել բարեխիղճ ընկերությունների մուտքը շուկա, քանի որ մրցութային փաթեթում առաջարկել է անհամեմատ ցածր գին, ինչն էլ մրցույթը շահելու հիմնական պատճառներից մեկն է հանդիսացել:
Փաստորեն, «Գավառ տրանսը» չի կատարել պայմանագրով նախատեսված իր պարտավորությունները և սպառողներին առաջարկել է ծառայությունների մատուցման այլ պայմաններ՝ ոտնահարելով նրանց իրավունքները:

ՏՄՊՊՀ դիտարկմամբ, տնտեսվարողի նման վարքագիծը գերիշխող դիրքի չարաշահում է, որի համար Հանձնաժողովի որոշմամբ ընկերության հանդեպ կիրառվում է 10 միլիոն դրամ տուգանք:

Հանձնաժողովը «Գավառտրանս» ընկերությանը հանձնարարեց հնգօրյա ժամկետում վերացնել խախտումը, «Երևան-Գավառ-Երևան երթուղու ուղևորներից գանձել 500 դրամ, հակառակ դեպքում հրաժարվել լիցենզիայից՝ հնարավորություն տալով այլ տնտեսվարողների աշխատել բարեխիղճ և օրենքի դաշտում:

Հ.Գ. Հետաքրքիր է, որ տարիներ շարունակ այս ընկերությունը ունենալով օլիգարխիկ տանիք տնավարի սպասարկել է մի հսկայական վարչական տարածք, զբաղեցնելով մենաշնորհային դիրք, սակայն չգիտես ինչու միայն հիմա է հանձնաժողովն անդրադառնում այս հարցին: Հարց է ծագում` տանի՞քն է դարձել խախուտ, թե անպայման պետք է դանակը ոսկորին հասնի, որ ազգաբնակչությունը բողոքի ու նոր հանձնաժողովը հասկանա, որ ստուգում է անհրաժեշտ ու պարզի ակնհայտը, ինչը «Գավառտրանսը» չի էլ թաքցրել` օրը ցերեկով հանգիստ սահմանել է իր ուզած գինը: