«Ցավոք սրտի, դեռևս կան անձինք, որոնք չարամտորեն վնասարարությամբ են զբաղված և անընդհատ խաթարում են այն ինֆորմացիոն դաշտը, որը մեր քաղաքացիներին շփոթության մեջ է գցում և անհիմն վախեր ներշնչում»,- կառավարության նիստում հայտնեց առողջապահության նախարար Անահիտ Ավանեսյանը՝ զեկուցելով կորոնավիրուսի դեմ պայքարի համար նախարարությանը 2021թ-ին պետբյուջեից 2 մլրդ 365 մլն դրամ հատկացնելու նախագիծը:

Նա հայտարարեց, որ պատվաստումների դեմ պայքարողները պատասխանատվության մեծ բաժին ունեն նախորդ օրը գրանցված 26 մահի համար:

Նիկոլ Փաշինյանն էլ բացատրեց, որ հայտնի են այդ ուժերի նպատակները:

«Նրանց պետք է, որ հնարավորինս շատ մարդ մահանա, որպեսզի ասեն՝ կառավարությունը չի կարողանում կորոնավիրուսի դեմ պայքարել»,- հայտարարեց Փաշինյանը և շարունակեց. «Ինչո՞ւ եք բողոքում, թե ինչ-որ մարդիկ, ինչ-որ բան են անում: Կա պետության հստակ պարտավորություն, վարչական լծակները գործադրեք, պետք է պատվաստումը գնա առաջ»:

Նա հայտնեց՝ չի ցանկանում Առողջապահության նախարարությունից լսել, որ խանգարում են պատվաստման գործընթացներին, քանի որ խանգարողները մարգինալ ուժեր են և ինչ ուզում՝ ասում են:

«Ես ձեր առաջ խնդիր եմ դրել, ինձ մի ասեք, ով է խանգարում և ինչու, գնացեք, լուծեք: Առողջապահության նախարարությո՛ւն, պետական մնացած մարմիննե՛ր, հո այստեղ չենք հավաքվել, որ ասենք՝ մեզ խանգարում են»,- ասաց Նիկոլ Փաշինյանը և հավելեց. «Որ գալիս միջնորդում եք, թե այս աշխատողը վախենում է պատվաստվել… Պետական կառավարման համակարգում չպատվաստված մարդ չպետք է լինի, անձամբ բոլոր առաջին դեմքերը պատասխանատվություն են կրում դրա համար»:

Մինչ այդ հարցը զեկուցելիս Անահիտ Ավանեսյանն ասաց, որ կառավարությունը քաղաքացիների հանդեպ ստանձնելով իր պարտավորությունները՝ ամբողջությամբ հոգում է կորոնավիրուսային վարակով հիվանդ քաղաքացիների բուժման ծախսերը և ուրախ կլիներ, եթե 2.3 մլրդ դրամը ուղղվեր այլ կարիքների բավարարմանը, այլ հիվանդությունների բուժմանը:

«Որովհետև, եթե մենք պատվաստման գործընթացը բավարար չափով իրականացնենք, պետք է նման գումարներ ծախսելու կարիք չունենանք»,- ասաց առողջապահության նախարարը:

Նրա խոսքով՝ արդեն 20 բժշկական կազմակերպություն ընդգրկվել է կորոնավիրուսով հիվանդ պացիենտների բուժման գործընթացում, 2226 մահճակալ է զբաղված:

«Այս պահին առկա ակտիվ 14000-ից ավելի դեպքերի մեջ ընդամենը 176 հոգի ունենք, որ հիվանդանոցային բուժման կարիք ունեն՝ պատվաստված լինելով հանդերձ: Սա ցույց է տալիս, որ պատվաստումները կանխում են հիվանդացության ծանր, ծայրահեղ ծանր ընթացքը և առողջապահական համակարգի վրա հոսպիտալացման բեռ չի գոյանում»,- հայտնեց Անահիտ Ավանեսյանը: