ԱԺ 8-րդ գումարման առաջին նիստը սկսվեց բավական լարված մթնոլորտում. հարցն այն է, որ նսիտի «Հայաստան» դաշինքի պատգամավորներից երկուսը` Մեղրիի նախկին քաղաքապետ Մխիթար Զաքարյանը և Սիսիանի քաղաքապետ Արթուր Սարգսյանը, ներկա չեն նիստին, քանի որ կալանավորված են։

«Հայաստան» դաշինքի պատգամավոր Արմեն Ռուստամյանը նշեց, որ չի եղել նման իրավիճակ, որ 2 պատգամավորներ լինեն կալանքի տակ։ Նրանք, ըստ Ռուստամյանի, իրենց կամքին հակառակ է, որ չեն կարողանում մասնակցել ԱԺ նիստերին։

«Մեր աչքի առաջ ամենաթողություն է տեղի ունեցել` ԱԺ պատգամավորներին կալանավորել են` շրջանցելով պատգամավորական անձեռնմխելիությունը։ Եթե համարում ենք, որ ոչինչ չկա դրա մեջ ու այսպես էլ պիտի առաջ գնանք, ապա այս սկզբով մենք լավ տեղ չենք հասնի»,–ասաց Ռուստամյանը։

«Իմ քայլի» պատգամավոր Վլադիմիր Վարդանյանն էլ հակաճառեց Ռուստամյանին` ասելով, որ «Հայաստան» դաշինքի 2 պատգամավորների անձեռնմխելիության հարցը որոշել է ԿԸՀ-ն։ Նա հորդորեց հետևել Ամենայն Հայոց կաթողիկոսի, ՀՀ նախագահի կոչերին` ձևավորել ԱԺ մարմիններն ու անցնել բնականոն գործունեությանը։

«Ազգային ժողովը որևիցե եղանակով չի կարող ազդել արդարադատության համակարգի վրա։ Սա է իրավիճակը, խնդրում եմ՝ ավելի կոնստրուկտիվ գտնվենք»,– ասաց Վարդանյանը։

Ի պատասխան «Հայաստան» դաշինքի պատգամավոր Արամ Վարդևանյանն էլ նշեց` մեծ ցավ է ապրում, որ Վլադիմիր Վարդանյանը քաջ գիտակցելով, որ որևէ բացառություն չկա պատգամավորին իր անձեռնմխելիությունից զրկելու, քան ԱԺ նիստի ժամանակ, խոսում է այն մասին, որ մի դատախազ և դատավոր կարող է շրջանցել Սահմանադրությունը։

Վարդևանյանը նշեց` պետք է ֆիքսել, որ Մխիթար Զաքարյանն ու  Արթուր Սարգսյանը, ոչ թե բացակայում են, այլ պատանդի կարգավիճակում են։

«Հայաստան» դաշինքը պահանջում է 20 րոպե ընդմիջում, որի ընթացքում պահանջում է իրենց 2 գործընկերներին կա՛մ ազատ արձակել, կա՛մ էլ քննարկել, թե ինչ պետք է անեն այդ առնչությամբ։