Ժողովրդի մոտ ավելի մեծ խուճապ է առաջացել։ Մարդիկ մտածում են, որ անասուններին պետք է արածացնելու էլ չտանեն։ «Փաստինֆո»-ի հետ զրույցի ժամանակ այս մասին ասաց Գեղամասարի համայնքապետ Հակոբ Ավետյանը անդրադառնալով նախօրեին Կութում տեղի ունեցած դեպքին։

Հակոբ Ավետյանը մանրամասներ ներկայացրեց, թե ինչպես է դեպքը տեղի ունեցել. «Հովիվն անասուններին արածացնելու է տարել մեր տարածքում։ Ճիշտ է սահմանին մոտ տարածություն է, որովհետև գյուղի մեջ այդքան արոտավայրեր չկան, բայց մեր տարածքում են եղել։ Այդ ժամանակ ադրբեջանցիները կրակոցներ են արձակել անասունների և հովիվի ուղղությամբ։ Հովիվը ձիու վրա է նստած եղել, երբ նրա ուղղությամբ են կրակել, կպել է ձիու դիմացի ոտքին, այն կոտրվել է։ Հովիվը ձիուց իջել ու փախել է, իսկ ադրբեջանցիները շարունակել են անասունների վրա կրակել, ինչի պատճառով անասուններ անկանոն փախել են ու նրանց մի մասը հայտնվել է թշնամու մոտ»,-ասաց Հակոբ Ավետյանը։

Վերջինս այսօր բարձրացել է դիրքեր և տեղում ամեն ինչ տեսել։ Նրա խոսքով նախիրի մեջ մոտ 180 կով է եղել, որից մոտավորապես 100-ը հետ են եկել։ Մի կովը կրակոցից սատկել է, և այն տարածքում է, որն ադրբեջանցիների վերահսկողության տակ է։

« 81 կով չկա, հետ չեն եկել։ Մեր զինվորներն էլ են տեսել, որ ադրբեջանցիները կովերին առաջ են քշել։ Այսօր երբ բարձրացա սահման, տեսա, որ մի կով հետ է գալիս։ Պարզ տեսա, որ երեք թուրք հետևից ուզում էին դիմացը կտրել, բայց կովը փախավ, իջավ գյուղ։ Ստացվում է 80 կով է նրանց մոտ ։ Դրանք 4-5 ընտանիքի անասուններն են, 34-ը մեկինը, 19-ը` մյուսինը և այդպես շարունակ»,-նշեց համայնքապետը։

Վերջինս հավելեց, որ երեկվա դեպքին միջամտել են նաև հայ զինվորները, որոնք կրակոցների տակ իրենց կյանքը վտանգելով, առաջացել են, որ կարողանան մի քանի անասուն հետ բերեն։
Կութում բնակիչների եկամտի հիմնական աղբյուրը հենց անասնապահությունն է և այս դեպքից հետո ժողովրդի մոտ ավելի մեծ խուճապ է առաջացել։ Հակոբ Ավետյանի խոսքով մարդիկ մտածում են, որ անասուններին էլ պետք է չհանեն արածացնելու. «Եթե չհանեն, չեն կարող տան պայմաններում պահեն։ Այս հարցերը շատ մեծ բարդություն են առաջացնում մեր տարածքում։ Կապ եմ հաստատել մեր ուժային կառույցների հետ, հիմա սպասում ենք։ Նրանք բանակցություններ են տանում, որ հետ բերեն, բայց չգիտեմ ինչքանով հաջողության կհասնենք»,-ասաց Հակոբ Ավետյանը։
Չնայած այսօր հակառակորդի կողմից կրակոցներ չեն եղել, սակայն Հակոբ Ավետյանը չի բացառում, որ այս երևույթը կարող է շարունակական բնույթ ունենալ։ Անվտանգային խնդրից բացի այստեղ առկա է նաև ֆինանսական կողմը.

«Մի մարդու համար, որ 34 կով է կորել, դա մոտ 30 հազար դոլար գումար է կազմում, 800-900 դոլար արժողություն ունեն կովերը։ Բոլորը վարկերի տակ, խնդիրների մեջ են։ Մարդիկ վատ վիճակում են ապրում, այնպես չէ, որ անասնապահությունը մեծ եկամուտներ է բերում։ Նույնիսկ այդ բնակիչները կարող են հիվանդանոց գնալու խնդիր ունենալ, բայց ափսոսան մի կովը ծախեն, որ գնան հիվանդանոց, իսկ այսօր հայտնվել են այս վիճակում»,-եզրափակեց Հակոբ Ավետյանը։