Ներկայիս Ադրբեջանն իրեն համարում է Ադրբեջանի Դեմոկրատական Հանրապետության իրավահաջորդ, որը համարվում է 1918-1920թթ ընկած ժամանակահատվածը: Անկախացումից հետո Ադրբեջանը հայտարարել է, որ իրեն չի համարում ԽՍՀՄ իրավահաջորդ: «Փաստինֆո»-ի հետ զրույցում ասաց ադրբեջանագետ Գառնիկ Դավթյանը:

Փորձագետի խոսքով՝ այն քարտեզները, որոնք հիմա Ադրբեջանը վկայակոչում է, ընդհանրապես կապ չունեն իրականության հետ, մտացածին են.

«Ադրբեջանի կողմից բերված քարտեզները տրամաբանության հետ ոչ մի կապ չունեն, էլ չասեմ փաստական հանգամանքների մասին: Նրանք հիմնականում փորձում են, 44-օրյա պատերազմում ձեռք բերված հաղթանակը հիմք ընդունելով, Հայաստանի իշխանությանը հրամցնել այն հնարավոր մտացածին քարտեզները, որոնք ձեռնտու են Ադրբեջանին»,-ասաց ադրբեջանագետը և նկատեց՝ Ադրբեջանն առաջինն ուզում է այն ճանապարհները, որոնք միջպետական են և Հայաստանի համար համարվում են սնուցող ճանապարհներ:

«Եթե այսօրվա զարգացումները նայենք, Ադրբեջանը, օրինակ` Գեղարքունիքի մարզում, մեկ սովորական սար կամ բարձունք չի վերցնում, հիմնականում այն սարերն ու բարձունքներն է վերցնում, որոնք հետագայում հնարավորություն կտան նրան հնարավոր պատերազմի դեպքում ավելի բարենպաստ դիրքեր ունենալ և թիրախի տակ վերցնել Հայաստանի սնուցող ճանապարհները»,-ասաց Գառնիկ Դավթյանը:

Զրուցակիցն ընդգծեց, որ հանրությանը չի մատուցվում հստակ տեղեկատվություն՝ ո՞ր քարտեզներն են հիմք ընդունվում սահմանազատման համար, միևնույն ժամանակ նկատում է, որ այդ քարտեզները բխում են ադրբեջանական կողմի շահերից.

«Այսօրվա դրությամբ տեսնում ենք, որ այն քարտեզներ, որոնց հիման ինչ-որ գյուղեր են հանձնվել, ենթադրում եմ, ադրբեջանական կողմից բերված քարտեզներ են»,-ասաց Գառնիկ Դավթյանը:

Փորձագետը նշեց, որ ամբողջ ՀՀ-ում Սովետական միությունից հետո կա 7 անկլավ, որոնցից մեկը Արարատի մարզում է՝ Տիգրանաշենը, իսկ մյուսները հիմնականում Տավուշի մարզի հատվածում են գտնվում: Տավուշի մարզի անկլավների՝ Ադրբեջանի վերահսկողության տակ անցնելու դեպում հարվածի տակ է դրվում Հայաստան-Վրաստան տնտեսական միջպետական մայրուղին, իսկ Տիգրանաշենի դեպքում, հակառակորդին հնարավորություն է տրվում հնարավոր հարձակման դեպքում Սյունիքն ավելի հեշտությամբ կտրել Վայոց ձորի մարզից.

«Այն տարածքը, որտեղ ադրբեջանցիներն առաջ են եկել Ջերմուկում, դա ուղիղ նշանառության տակ է դնում Վայոց Ձորը և Սյունիքը կապող հատվածը, Տիգրանաշենը Վայոց Ձորը Սյունիքի հետ կապող միջպետական ճանապարհ է համարվում: Այսինքն, Տիգրանաշենը հա՛մ միջպետական ճանապարհի առումով է շատ կարևոր, հա՛մ էլ Ջերմուկում առաջացած դիրքերի և դրա միջև ուղիղ կապի առումով »,-ասաց Գառնիկ Դավթյանը: