«Սուրբ Աստվածամայր» բժշկական կենտրոնի տնօրեն Նիկոլայ Դալլաքյանը լրագրողների հետ հանդիպմանը մանրամասներ է ներկայացրել երեկ Գյումրիում տեղի ունեցած միջադեպից տուժած անչափահաս աղջկա առողջական վիճակի մասին: Դալլաքյանը հայտնել է, որ գիշերը՝ 01:30-ին, Գյումրիից իրենց կենտրոնի վերակենդանացման բաժանմունքի աշխատակիցները տեղափոխել են պոլիտրավմայով 13 տարեկան աղջկա, ով միացված է եղել արհեստական շնչառության սարքին, ինկուբացված, անգիտակից վիճակում:

Գյումրիում կատարվել են անհրաժեշտ բժշկական միջամտություններ, վիճակի որոշակի կայունացումից հետո երեխան տեղափոխվել է «Սուրբ Աստվածամայր» կենտրոնի վերակենդանացման բաժանմունք: Դալլաքյանը հայտնեց, որ քիչ առաջ կատարվել է հերթական հետազոտությունը, որից պարզվել է՝ կան բազմակի տրավմաներ, գլխուղեղի փակ տրավմա, սալջարդ, ուղեղի այտուց, արյունազեղում, քթի ոսկորների կոտրվածք, ծնոտի, անրակի կոտրվածք, 10-րդ ողի կոտրվածք, սալջարդներ, կրծքավանդակում արյան կուտակում: Երեխան շարունակում է մնալ արհեստական շնչառության ապարատին միացված, ինկուբացված, կայուն վիճակում, շարունակվող արյունահոսություն կամ որևէ հրատապ միջամտության ցուցում չունեն, տարվում է կոմպլեքս բուժում:

«Երեխան ընդունվել է ծանր, անգիտակից վիճակում, եղել է կասկած, որ ներքին արյունահոսություն կա և ներքին օրգանների վնասում, կատարվել է դիագնոստիկ լապորատոմիա, մեծ, լուրջ փոփոխություններ կամ վնասումներ, որ պահանջեին ավելի ծանր, լուրջ քայլեր, չեն եղել, գերակշռողը գանգուղեղային տրավման է, այս պահին դեռ որևէ կրկնակի միջամտության կարիք չենք տեսնում»,- ասաց տնօրենը:

Լրագրողները հետաքրքրվեցին՝ երեխային հարազատներից որևէ մեկն այցելե՞լ է, Դալլաքյանը պատասխանեց, որ մինչ այս պահը դեռ որևէ մեկը չի դիմել տեսակցելու համար: Հարցին՝ երեխայի ստացած վնասվածքներն ինչի հետևանք են, ի՞նչ հարվածներ է ստացել, նա արձագանքեց.

«Դա մեր իրավասությունից դուրս է, արձանագրում ենք, որ ունենք բազմակի վնասվածքներ՝ դեմքի, կրծքավանդակի որովայնի, մարմնի, այսինքն՝ պրակտիկորեն ամբողջ մարմնի վրա ունենք տարբեր հետքեր: Հենց առաջին վայրկյանից երեխայի մոտ եղել են ծանր, բազմակի, լուրջ վնասվածքներ, այս գանգուղեղային տրավման նույնպես բավական լուրջ մտահոգվելու տեղիք է տալիս, երեխան անգիտակից վիճակում է, հետագայում կերևա՝ որքանով է ախտահարված գլխուղեղը և ինտենսիվ տարվող բուժման ֆոնին ինչ հետզարգացումներ կլինեն»:

Դալլաքյանը, սակայն, հայտնեց՝ ավելի շատ բութ վնասվածքներ է ստացել երեխան:

Կենտրոնի վերակենդանացման բաժանմունքի վարիչ Աննա Չոբանյանը հարցին՝ կա՞ արդյոք ինչ-որ փուլ, որից հետո արդեն կարելի է կանխատեսումներ անել երեխայի առողջական հետագա վիճակի մասին, պատասխանեց, որ առայժմ շուտ է դրա մասին խոսել, 24 ժամը չի լրացել:

«Երեխայի վիճակը ծայրահեղ ծանր է, վատացում չունենք, բայց ընդհանուր վիճակը պետք է գնահատել որպես ծայրահեղ ծանր: Ճնշումը նորմայի սահմաններում է, բայց շնչում է արհեստական շնչառության ապարատով»,- ասաց նա: