«Գյումրու մոր և մանկան ավստրիական հիվանդանոց» ՓԲԸ-ի տնօրենի թափուր պաշտոնի հավակնորդ թեկնածուները երեքն էին՝ 15 տարի հաստատությունը ղեկավարած Աշոտ Կուրղինյանը, «Գյումրի» բժշկական կենտրոնի ու «Գյումրու մոր և մանկան ավստրիական հիվանդանոցի» տրավմատոլոգ Ժորժիկ Սերոբյանը և «Գյումրի» բժշկական կենտրոնի վիրաբույժ Հրաչ Մարտիրոսյանը:

Հրաչ Մարտիրոսյանի փաստաթղթերը թերի էին: Նա չէր ներկայացրել բուժհաստատության զարգացման ծրագիր: Ի սկզբանե էլ ակնհայտ էր, որ Մարտիրոսյանի թեկնածությունը ձևական բնույթ էր կրում:

Թեժ պայքարը երկուսի մեջ էր ծավալվելու՝ Աշոտ Կուրղինյանի, ում աշխատանքի վերաբերյալ նախատոնական օրերին Գյումրի այցելած ՀՀ առողջապահության նախարար Արսեն Թորոսյանը դրական գնահատական էր տվել, և Շիրակի մարզպետ Տիգրան Պետրոսյանի մտերիմ շրջանակներից՝ Ժորժիկ Սերոբյանի: Նա 2018 թվականի ապրիլյան զարգացումներից հետո ՀՊՏՀ Գյումրիի մասնաճյուղի տնօրենի պաշտոնակատար դարձած Կարեն Պետրոսյանի քեռորդին է:

Մրցույթը, որին մասնակցեցին թեկնածուները, բաղկացած էր երեք փուլից: Նախ Կուրղինյանը և Սերոբյանը մասնակցեցին թեստավորման փուլին: Սերոբյանը երկու սխալ պատասխանով զիջեց Կուրղինյանին: Մյուս՝ բանավոր փուլը երկու թեկնածուներն էլ ճիշտ պատասխանեցին առաջադրված 5 հարցերին:

Երրորդ փուլում նրանք ներկայացրին բուժհաստատության զարգացման ծրագիրը:

Աշոտ Կուրղինյանն ավելի շատ խոսեց արված աշխատանքից: Ակնարկեց՝ դա այն հիմքն է, որի վրա հենվելու են ապագա ծրագրերը՝ մասնավորապես նոր մասնաշենքի կառուցում, գերժամանակակից սարքավորումների ստեղծում, աշխատավարձերի բարձրացման հնարավորությունը, որն ընձեռվել է առողջապահական պետական քաղաքականության արդյունքում:

Զարգացման ծրագրին հաջորդեց հանձնաժողովի քվեարկությունը:

Ժորժիկ Սերոբյանը խոսեց բուժհաստատության թույլ կողմերի մասին, ասաց՝ կառավարման ավտոմատացման համակարգը պետք է զարգացնել, շեշտը դնել մարկետինգի վրա: Խոսեց վճարովի և անվճար ծառայություններից օգտվող քաղաքացիներին բուժհաստատությունում տարբեր կերպ սպասարկելու վտանգների մասին: