ԱՄՆ-ում Armenian Power՝ «Հայկական ուժ» հայկական ավազակախմբի պարագլուխներից Մհեր «Մայք» Դարբինյանը նոյեմբերի 4-ին դատապարտվել է 18 տարվա ազատազրկման՝ բազմաթիվ հանցագործությունների համար: Այս մասին տեղեկացնում է dailynews.com կայքը:

Հանցագործությունները կապված են եղել հիմնականում դրամաշորթության հետ, ինչի շնորհիվ նա կուտակել է ավելի քան 1 միլիոն դոլար:

44-ամյա Մհեր Դարբինյանը, որը նախկինում ապրում էր Վալենսիայում, ԱՄՆ-ում դատավոր Գարի Կլաուսների որոշմամբ պետք է նաև 170 000 դոլար որպես տուգանք և վնասի փոխհատուցում վճարի իր գործունեությունից տուժած անձանց: Դատական փաստաթղթերի համաձայն՝ բանտից ազատվելուց հետո Դարբինյանին սպասվում է արտաքսում Հայաստան:

Դեռևս 5 տարի առաջ Դարբինյանը Լոս Անջելեսի դատարանի որոշմամբ մեղավոր էր ճանաչվել ավելի քան 40 քրեական գործով և դատապարտվել էր 32 տարվա ազատազրկման, սակայն վերաքննիչ դատարանը չեղյալ էր հայտարարել մեղադրանքները:

Այս հունիսին Դարբինյանն իրեն մեղավոր է ճանաչել միանգամից 30 կետով: Նրա փաստաբան Մայքլ Սեվերոն նշել է, որ իր պաշտպանյալը նպատակ չի ունեցել ինչ-որ մեկին վնասելու:

«Հայկական ուժ» («Armenian Power») խմբավորումը ձևավորվել է 1980-ականներին Լոս Անջելեսում: Ինչպես նմանատիպ այլ կազմավորումներ, խումբը սկզբնական շրջանում ձևավորվել է օտարներից և մրցակիցներից պաշտպանվելու համար, սակայն հետագայում վերափոխվել է հանցախմբի, որը զբաղվել է ամեն ինչով՝ սկսած սպանություններից և խարդախություններից, վերջացրած շորթմամբ և բանկերի թալանով: Հանցախումբը տարբեր անձանց բանկային հաշիվների թալանով է զբաղվել՝ հիմնականում թիրախ ընտրելով տարեց մարդկանց: