ԱԺ պատգամավոր Նիկոլ Փաշինյանը հանդիպել է Մոսկվայի պաշտոնական ներկայացուցիչների հետ եւ ստացել հավաստիացումներ, որ Ռուսաստանը չի միջամտում Հաայստանի ներքին գործերին։ Այդ մասին նա ասել է Հանրապետության հրապարակում ընթացող հանրահավաքում։

Նա նաեւ անդրադարձել է մի քանի գործարարների, թեեւ նրանց անունը չի տվել։ «Եւ իհարկե, կան որոշ մարդիկ, բիզնեսմեններ, որոնց իրենց համարում են Կարեն Կարապետյանի աջակիցը եւ իրենց տեսակետը փորձում են որպես Մոսկվայի տեսակետ»,- ասել է նա։

Փաշինյանը դիմել է այդ անձանց։ «Ամենայն հարգանքով, հաշվի առեք, ՀՀ-ն վարձակալության հանած առեւտրի կենտրոն չէ։ Ձեր քիթը մի խոթեք այն տեղերը, որից դուք չեք հասկանում։ Գնացեք ձեր բիզնեսը տվեք վարձակալության, արեք ձեր բիզնեսը, եւ ձեր օրինական շահերը կպաշտպանվեն։ Բայց չհամարձակվես հանկարծ ՀՀ-ին դիտել որպես վարձակալությամբ տրվող տարածքի։Դ ա չի ներվի որեւէ մեկի»,- նշել է Փաշինյանը։

Նա նաեւ հայտնել է, որ իրեն են մոտեցել ՀՀԿ խմբակցության ներկայացուցիչներ եւ ասել, որ նրանք պատրաստ են քվեարկել վարչապետի ժողովրդական թեկնածուի օգտին։ «Այնպես որ մենք չենք պատրաստվում ժամավաճառությամբ զբաղվել, մենք պատրաստ ենք բանակցությունների, եւ դրանք ինչպես նախկինում պնդել ենք, պետք է վերաբերվեն իշխանության խաղաղ եւ անցնցում փոխանցմանը։ Մենք պատրաստ ենք այս հենքի վրա քննարկել անցումային, ժամանակավոր կառավարության հետ կապված ցանկացած հարց»,- նկատել է Փաշինյանը։