Հայաստանի 4-րդ նախագահի թեկնածու Արմեն Սարգսյանն այսօր լրագրողների հետ զրույցում մի քանի ուշագրավ հայտարարություն է արել: Հարցին, թե Հայաստանում կան քաղբանտարկյալներ, Սարգսյանը՝ ի տարբերություն մյուսների, չի շտապել հայտարարել, որ Հայաստանում քաղբանտարկյալներ չկան. «Ես չգիտեմ` կան, թե ոչ։ Ես գիտեմ, որ կան անհատներ, որոնք հասարակության կողմից գնահատվում են որպես քաղբանտարկյալներ։ Ես գիտեմ միջազգային տարբեր կառույցների գնահատականը, և իմ տեսակետն այն է, որ մեր երկրում այսօր կամ վաղը քաղբանտարկյալներ չպետք է լինեն»։

Մինչ Սարգսյանը դեռ չէր հասկանում, Հայաստանում կան քաղբանտարկյալներ, թե ոչ, նույն պահին Երևանի ընդհանուր իրավասության դատարանի Շենգավիթի նստավայրում մեղադրող դատախազը Ժիրայր Սեֆիլյանի համար պահանջում էր 11 տարվա ազատազրկում:

Հիմա գանք Սարգսյանի հայտարարության հետաքրքիր, առաջին հայացքից ոչ մի նշանակություն չունեցող մեկ այլ հայտարարության, որը կապ ունի նաև քաղբանտարկյլաների կամ, թեկուզև, հասարակության մի մասի կողմից քաղբանտարկյալ համարվողների հետ:

Արմեն Սարգսյանը փաստացի հայտարարեց, որ ինքը ոչ թե 3-րդ հանրապետության 4-րդ նախագահն է լինելու, այլ հակառակը՝ 4-րդ հանրապետության 1-ին նախագահն է լինելու: 4-րդ հանրապետության մասին հայտարարում է Ժիրայր Սեֆիլյանն ու իր թիմը արդեն մի քանի տարի: ՊՊԾ գնդի գրավման ժամանակ էլ խումբը հայտարարեց, որ իրենք 4-րդ հանրապետության հիմնադիրներն են: Բայց մինչ Ժիրայր Սեֆիլյանը, նրա թիմի ամբողջ կորիզը, տարբեր հոդվածներով, ընդ որում առանձնապես ծանր հանցանքներ կատարելու համար բանտերում են, 4-րդ հանրապետությունը բերում է Արմեն Սարգսյանը:

Արմեն Սարգսյանի այս երկու հայտարարությունները՝ քաղբանտարկյալների և 4-րդ հանրապետության մասին, թույլ են տալիս առաջ քաշել այն վարկածը, որ ապագա նախագահը Սեֆիլյանին ու իր թիմին բանտերից դուրս բերելու փորձեր կանի: Կստացվի՞ արդյոք դա Սեֆիլյանի մոտ, թե ոչ, ժամանակը ցույց կտա:

Նկատենք ևս մեկ ուշագրավ փաստ: Այս օրերին «Սասնա Ծռեր» խմբի անդամները ոչ մի կարծիք չեն հայտնել Լոնդոնից ժամանած և նախկին բրիտանացի, և ապագա ՀՀ նախագահի մասին: Ծռերը, որոնք միշտ աչքի են ընկել իրենց կտրուկ և սուր հայտարարություններով, Սարգսյանի մասով դեռ ցուցաբերում են զսպվածություն և լռություն:

Մկրտիչ Հարությունյան