ԱՄՆ ֆինանսների նախարարությանհրապարակած «Կրեմլի ցուցակը» լուրջ անհանգստություն է առաջացրել Ռուսաստանի քաղաքական, բիզնես էլիտաներում` չնայած խոսքն առայժմ ոչ թե պատժամիջոցների, այլ դրանց ենթակա հնարավոր թիրախների, սուբյեկտների մասին է: Ընդ որում` Մոսկվայում նկատվող լարվածությունը բազմաշերտ է, ինչը որոշակիորեն խոսում է խուճապի, անգամ քաոտիկ արձագանքի մասին:

Վլադիմիր Պուտինը կամ Սերգեյ Լավրովը գիտակցում են, որ Վաշինգտոնը, ըստ էության, հարվածում է ռուսական կայսրության ֆինանսական, բայց նաև գաղափարական հիմքերին, սակայն չեն շտապում կոշտ հակադարձել ԱՄՆ-ին, որովհետև հասկանում են, որ Ռուսաստանը կանգնած է միջազգային մեկուսացման շեմին, և նոր Սառը պատերազմ վարելու ֆինանսական ու տեխնոլոգիական ռեսուրսներ չունի:

Ամենամեծ լարվածությունը նկատվում է «Կրեմլի ցուցակում» հայտնված տարբեր սեգմենտների ներկայացուցիչների միջև: Ռուսաստանի փոխվարչապետ Դմիտրի Ռոգոզինն ասել է, որ ռուսական պաշտպանա-արդյունաբերական համալիրի համար ամերիկյան պատժամիջոցներից վնասը կազմում է հարյուր միլիարդավոր դոլարներ, սակայն առաջարկել է համարժեք պատասխան տալ Վաշինգտոնին: Ռոգոզինի «հայրենասիրական» հռետորաբանության համար վճարում են Ռուսաստանի հարկատուները և պատահական չէ, որ նա իրեն պահում է կայսրության չինովնիկի տրամաբանությամբ: «Կրեմլի ցուցակում» հայտնված գործարարները, ընդակառակը, կայսրության վիրտուալ գաղափարի համար վճարում են իրենց քսակների ու հեղինակության հաշվին:

«Կրեմլի ցուցակը» Պուտինի համակարգի այսօրվա ստատուս-քվոն է, սակայն Վաշինգտոնում այդ ցուցակը շերտավորել են քաղաքական ենթատեքստով` թերևս, առայժմ միասնական թիմի իրարամերժ շահերը բախման վերածելու և ռուսական էլիտայի միասնության հիմքերը փոշիացնելու նպատակով: Սա ինքնին հարված է կայսրության իդեային, որը հայտնվում է ճգնաժամի մեջ, երբ էլիտան կորցնում է միասնական և օպերատիվ արձագանքման ունակությունը: Ռուսաստանի նախագահի թեկնածու Քսենյա Սոբչակը այսօր հայտարարել է, որ պատրաստվում է մեկնել ԱՄՆ` այդ երկրի ազդեցիկ մարդկանց համոզելու, որ «Ռուսաստանը Պուտինը չէ»: Սոբչակն ամենևին էլ ընդդիմադիր չէ և արտահայտում է Պուտինի համակարգի, այսպես կոչված, լիբերալ շերտերի տրամադրությունները: Եթե Սոբչակի ասածը վերծանենք հանրամատչելի խոսակցական լեզվի, ապա ռուսական էլիտայի պայմանականորեն լիբերալ թևն առևտուր է առաջարկում Վաշինգտոնին, որի գինը Պուտինի «գլուխն» է:

Ի դեպ, Վաշինգտոնում «մոռացել» են «Կրեմլի ցուցակում» ընդգրկել Պուտինի շրջապատի որոշ «լիբերալների»` Ռուսաստանի նախագահի ստվերային խորհրդական Ալեքսեյ Կուդրինին, «Ռոսնանո» ընկերության ղեկավար Անատոլի Չուբայսին: Ռուսաստանի հաստիքային խորհրդական Սերգեյ Գլազևը շտապել է վերջիններիս գործակալ անվանել:

«Կրեմլի ցուցակը» գուցե դեռ չի հասցրել հարվածել Ռուսաստանի տնտեսության հիմքերին, սակայն կայծակնային արագությամբ քանդում է Պուտինի բազմաշերտ թիմի քաղաքական, ինստիտուցիոնալ հիմքերը:

Վաշինգտոնը հարվածել է ուղիղ նշանակետին

Պուտինի կայսրությունը հոգեվարքի նշաններ է ցույց տալիս: Թերևս «Կրեմլի ցուցակում» հայտնված գործարարների գոնե մի մասը երազում է Պուտինի իշխանության շուտափույթ կործանման մասին` այն թաքուն հույսով, որ միայն այդ փաստը իրեն կփրկի անխուսափելի թվացող պատժամիջոցներից: