Պենտագոնը հաղորդում է, որ Սիրիայի արևելյան շրջաններում ամերիկյան և ռուսական օդուժերի միջև լարված իրավիճակ է ստեղծվել։

Եփրատի ափին տեղի ունեցած առճակատման մասին լուրը հաստատել է նաև Ռուսաստանի պաշտպանության նախարարությունը:

Արեւմտյան կոալիցիայի կողմից վերահսկվող տարածքում ամերիկյան Ֆ-22 կործանիչները հայտնաբերել են ՌԴ ԶՈւ երկու Սու-25-երի, գրում է Ռոյթերսը:

«Մեր ավիացիայի վերահսկած տարածքում ռուսական երկու Սու-25 են հայտնաբերել մեր Ֆ-22-ները, որոնք աջակցում էին ԻՊ դեմ գործընկերների ցամաքային գործողությանը: Ռուսական օդանավերի ուղղությամբ զգուշացնող կրակ է բացվել»,- հայտարարել է Պենտագոնի պաշտոնական ներկայացուցչ Էրիկ Պեխոնը:

Միջադեպի պահին Ռուսաստանը եւ ԱՄՆ-ն կապի մեջ են եղել այն ալիքով, որը նախատեսված է կոնֆլիկտները կանխելու համար: Պենտագոնի պաշտոնական ներկայացուցչի խոսքով, ԱՄՆ զինծառայողներն անմիջապես զանգել են այդ ալիքով` ռուս օդաչուներին ասելու, որ նրանք պետք է հեռանան այդ տարածքից:

ՌԴ ՊՆ-ն հերքում է, թե իր օդանավերը թռչել են Եփրատի արեւելյան ափի երկայնքով` պնդելով, որ դրանք թռիչք են իրականցրել գետի արեւմտյան ափին` ուղեկցելով դեպի Մայադին քաղաք շարժվող եւ հումանիտար բեռ տեղափոխող ավտոշարասյանը, գրում է newsru.com-ը:

«Գետի արեւելյան մասից մեր օդանավերին են մոտեցել ամերիկյան կործանիչները` խոչընդոտելով Սու-25-երի թռիչքը: Մեր Սու 35Ս-ն է կտրուկ մոտեցել ամերիկյան կործանիչներին, ինչից հետո ամերիկացի օդաչուները հեռացել են տարածքից»,- հայտարարել է ՌԴ ՊՆ ներկայացուցիչը: